ISKONSKI PAG

petak, 06.03.2015.

GOVORI SA PIJACE

Ako se je ki od "paških političara" i najuti kada je vidi ili cu ca se to u Pag u maškaranom bruncu muti, ni moga ucint niš, osim ca su se pritili da karnevala neće bit, zato ca ni formirano gradsko poglavarstvo, jer za vrime maškar, vridiju maškarane regule.
Koliko je njih bilo u maškare, nisan baš previše primjeti. Budućen gradonačelniku odmah preporucan da parića nošnju jer će berzo doć litnji karneval, a montura Paških gradonačelnika je paška nošnja, jer moraju povest pervo kolo.
Sada, ako nisi u to pervo kolo, si protiv gradonačelnika, jer ispada da je to pervo kolo isključivo gradonačelnikovo, pa ma ki on bi. Pokojna nana Kate mi je uvik govorila:-"sinu moj u ko si kolo, tako kolaj". Koliko mi je vrimena tribalo da to svatin.

Sve u životu ima svoju cjenu i ki rece da ga šoldi ne zanimaju – ako ga boje pogedate u oci vidit ćete da je Pinokio malo dite za njega.

Korizma je zaminila vrime od karnevalskih caratanija i šulaca. Zato je u Pag sada došlo vrime da se pozabavimo sa onin ca su judi od maškar porucili Paškim političarima.
Da su Paški političari šegavi, bili bi se dobro mašakarali i iza kakvoga kantuna iz pozadinskih linija, sa socija kima se neznaju adrese, ili su tajne i pokušali cut ca to narod govori, ca to narod misli, ca narod oće, verujen da bi in bilo lakše.
Neznan di su možjani onin Paškim političarima ki su doveli Grad u ovu poziciju, dali su svjesni koliko su mišlju, riječju, djelom i propustom, ucinli štete svome Gradu, a Grad su judi ki živeju u njemu i od njega.

Za vodit jedan Grad triba prije svega volit judi, a ovi naši političaru su pokazali da oni u sebi takve jubavi nimaju, pa ne triba ni razbijat glavu za njih.
Mislin da u ovo vrime u kome živemo moramo više nego ikad gedat oko sebe, a ne gedat samo sebe. Moramo nastojat bit judi, ma koliko god to bilo teško u vrimenu u ken van Paški političari nudiju med i mliko, kako biste njih zaokružili na listu.
Zato dragi moji Pažani, želin Van puno razboritosti i zdravja onoga trena kada uzmete olovku uruke i zaokružite ono ca mislite da će bit najboje za svih Vas, pa onda i nas ki ne živemo u svom rodnom Gradu.
Retki su oni ki misliju o tome kako je život dar i kako ga triba živit punin plućima jer je to jedini način da preživimo kako i judi.
A, Grad Pag biser još uvik zatvoren u svojoj Lošturi, zamagljen godišćima uništavanjem, neradom, zanemarivanjen i zaboravon. Koliko god to bilo žalosno, on je ipak osta sacuvan, ali i na izdisaju. Sve se nekako nadan, da ako se skupimo svi zajedno i izbrišemo sve gluposti iz nedavne prošlosti, da će taj naš biser zasjat punin sjajem na ponos nadolazećoj Paškoj dici i svim njegovin građanima.

06.03.2015. u 09:10 • 0 Komentara • Print • #

Ovaj blog je ustupljen pod Creative Commons licencom Imenovanje-Nekomercijalno-Bez prerada.