morska iz dubina
ponedjeljak, 19.12.2022.
Bilo je to...
Foto: morska
Te zime teta je rekla, homo usić borić. Jednega malega za stit ga u kantun o kamare. Božić gre. I svaka familja tuka stit jednega. I okitit ga. Skupit ćemo šiške o bora, opiturat ih u bilo i obisit ih s bokun konca. Mi dica smo vikali da hoćemo šarene baloniće. Ma teta je rekla, ni pinezi za to.
Šterike su zavonjale. Ona o petrolje najviše. U peć je svako malo stivala drva. Da nan bude toplo. Na trpezi je bila vela pogača. U terini freško lešana riba s kompiron. Nas četvero dice smo se stisli na banak. Izili smo sve šta je bilo u pjatu. A posli smo navalili na kroštule. Posute cukron. Koji je škripa pod zubin. Znali smo da sutra ujutro gre nešto jadno velo. Nešto će bit pod borić.
Legli smo na posteju o slame i pokrili se debelin krturon. Dica na velu. Teta i muž na malu posteju. Rekla je, ala zaspite. I činite kuco. Pokrili smo se po glavi, a ispod krtura smo činili svake monade.
Ujutro smo se digli. Obukli čistu robu i stali pred borić. Teta je rekla, Božić je. Neka nan bude blagoslovjen. Bili ste dobri pa ste i poklon dobili.
Ispod bora suhe smokve, mindeli i keksi na slova. Lipo to razdilite na četri dila, rekla je. Svakome isto. A ja gren zaklat kokota pa ćemo ga ispeč.
Mi smo s blagon ispod bora ostali sami do obida.
Bilo je to 1960. i neke godine Gospodnje.
