morska iz dubina
četvrtak, 15.05.2025.
Murva
Govorili su da je murvu posadila šukun, šukun, šukun baba. I da je zato tako naresla. Uspinjali bi se na nju dokle dospu vele drvene skale, ma niko ni hodi više od tega. Ni dica ni stariji. Zrile su već u kraj šestega miseca i deboto cili sedmi. Kad bi završila skula i kad bi došla na škoj, čekale su me lipe, duge, škure, kako med slatke murve. Bilo ih je krcato. Put in je bi poznat. Rukon ubrat i ravno u justa. Koje pranje, pretpranje, natapanje, namakanje. Onako stasita, usrid maslinika, ni vidila nikoga od živega stvora na kilometre uokolo. Gledala je u lozu, smokve i cukarinke, a ja san se pitala je li cabla imaju svoj jezik. I je li se razumidu kad in se grane zapetljaju ili se jide jedna na drugu. Jer teta se jadno jidila. Vazela bi kosor i kidala sve zapetjano, uz pokoju beštimju, al najčešće, vraga izila.
Mi smo cilo lito hodili u mudantice. Justa, lice, a i velik dil tila nan je bi modar od murvi. I ni to bilo baš lako oprat. Teta bi nas o noć utirala u velo, drveno maštilo i fregala saplunon. Svako malo bi ponavjala, za Gospu blaženu, jadno ste halavi.
Za zobanje murvi ni bilo posebne ure. Jili smo kad god smo hotili, kad god nan je pitalo ili onako usput jer nan se grana našla na putu. Dida nan je, za debelu granu, konopon veza staru gumu i tu smo se jujali po cile dane. U debelome hladu. Stariji ka da nisu ni postojali. Mi, mali Liliputanci, smo činili svit sam za sebe. Bi nan je bogat lipoton bezbrižnosti i odsustvon ikakve spoznaje kako odrastanje i bit velik nije tako lipo ka bit mali, od voća i zemje šporak i bezbrižan u svin smjerovima.
Zato nema dana da mi ne iskrsne jedna od milijun malih sličica iz doba dičinjeg kraljevstva. Vrime di se ni klanjalo kruni nego nebu, zvizdama, misecu ka na dlanu položenon i svemu šta je reslo oko pojate, a nama dici činilo život slatkin, ispunjenin i dostatnin.
Nismo ni u snu pojmili da smo cilo lito samo minjali mudantice od žutca. U našen svitu ništa drugo ni ni postojalo. Ta neponovljivost, duboko mi utisnutog u svaku poru, ispunjava mi život puninom i iskonskim osjetom šta znači bit slobodan i ne uvjetovan materijalnin blagostanjem. To je nezaborav koji je zasinjao moj dalji put života.
