morska iz dubina
nedjelja, 04.06.2023.
Žbaćeno jaje
Zašto se kriviš, srce moje, pitala je teta.
Zato jer je Merica vazela jaje ispod kokota. I žbatila ga s cukron. Eno je, ji ga. I neće mi dat malo. Mila moja, ni jaje od kokota nego o kokoši. Bit će ih danas još. Pa ti vazmi i žbati. Hodi svako malo u štalu. Vidi jesu snile.
Evo gaaa, teta. Još je toplo. Ma ne znan kako se to žbati?
Vazmi, srce, pot. I oni lateni pjat na škanciji. Jan ću ti pomoć.
Viš di je žumance u potici? Tu sti dva kućarina cukra. I mišaj. A ja ću ti penjrun žbatit bilance u pjatu.
Kad je teta učinila snig pribacila ga je u poticu. I sve izmišala.
Evo ti, oko moje, rekla je. Izi to u miru.
Vazela san pot. Sila ispod murve. I jila san. Bilo je jadno lipo. Najlipje.
Mera mi je, sa ograde o gustrine, petavala roge. I belila se. Da je jaje o kokota, rugala se. I kesila.
Onda me ugrizla osa. Tamo di mi je kaplo dok san jila.
Samo san tila da mama ozdravi.
Da se vratin u svoje pravo doma.
Bija je to dan kad mi je tetina jubav bila malo.
Jer mama je mama.
