morska iz dubina
srijeda, 02.02.2022.
Bonboni
Foto: Otočka
Od kore lemuna teta je činila bonbone u cukru. Koliko god da je stila isprid nas sve bi mi izili. Ma je ona znala koliko će nan stit. Brojala je i gledala da nan budu iste veličine. Pa je jednon meni stila jednoga više jer da su u mene manji bokuni. I onda je nasta rat među nama dicon.
Najstarija Mero je rekla da to ni pošteno. Najmlaji Tonči se počeja kriviti. Za to vrime ja san stila sve bonbone u justa. Bili su na sigurno.
Teta je vikala na svoju dicu. Da kako ih ni sram. Da mi je mat u bolnici. Da otac fatiga u Splitu. Da san sama.
Mero je rekla da je ni za to briga. Tonči se i daje krivija. Samo me Vinka pogledala i stila svoja dva bonbona od lemuna isprid mene. Ja san izbečila oči jerbo je Vinka govorila malo i uglavnon je činila kuco. Rekla san, ni potriba. Digla se od trpeze i izišla u dvor.
Sela san na skalinu i počela se krivit.
Kad će mi doć više mama.
