morska iz dubina
subota, 19.06.2021.
Bilo jednon(3)
Foto: Otočka
Otac je užega furmile i zapali oganj. U mrižama je to jutro bilo obilato ribe pa je mat rekla, danas gradele. Ja san volila čistit lustre s ribe, ma ono iznutra nikako. Na škarpinu su se već ranije bili uboli otac i mat. Zavijali su kako čaglji. Jadno ih je bolilo. I ruka in je otekla. Oboje su tukali primit injekcije.
Lipo je riba zavonjala. Ka i uvik. Dobri bokuni su činili voju. I taman kad smo seli za trpezu čuli smo glasno dozivanje, eeeej, zenso, jesi li doma. Susidi, koji su tek počeli gradit ka i mi, došli su na svoju parcelu. I doveli svoje dvoje dice. Darku i maloga Primeta.
Mat se odma digla, obrisala ruke o travešu i sva ozarena rekla, sedite, hote obidovat s nama. Oni su se malo mislili, ma pogled in je cilo vrime bi na pijadeli o ribe. A lipo si peška, zenso, svaka čast. Di si vrga mriže. Put Lastova, reka je otac i učinija mista da se na banak može sest. Ma samo ćemo popit bevandu, oglasija se susid i svi su zaseli. Mat je već posložila pjate i penjure, dodala čaše i u trenu smo svi bučno jeli.
Mi dica smo se spustili na more. I preplivali na škoj preko puta. Nismo ni pitali jel možemo. Mogli smo. A oni su do kasna bacali na briškulu i trešetu. Za večeru je mat isikla pancetu i pome pa se posli zapivalo. Mali ferali na petrolju su treperili. Komarci su grizli. I sol na koži je grizla.
