Marin Jurjević o svemu

30.10.2007., utorak

ŠJORA FILE TUGUJE ZA FRANOM MATOŠIĆEM

E, Marinko moj...otiša je naš dobri Frane....pognute glave, jedva čujno, gotovo šapčući...ponovi po ne znam koji put šjora File!
Pokoj vični njegovoj duši...je bija dobar čovik! Da dobar...najboji! Kažem ti Marinko moj, ne rađaju se takovi višje! Prošlo je vrime o takvega svita! Ajde, nalij mi još malo prošeka...
Ulijem šjori Fili još bićerin hvarskog prošeka i nazdravimo opet našem dobrom barba Frani Matošiću.
Tako ti je to...Partidu najboji...opet će ona, kucne svojin bićerinom o moj i gucne slatke mirisne tekućine.
A je, je...šjora File, bija je on, šta se kaže čovik i po...ma i godine su tu. Evo ga je uvatila osamdesetideveta.
Pa šta onda..da je živija i dvista godin, bilo bi malo - koliko je vridija...zaoštri ona odma po svoju.
A šta će te meni poć govorit. Ja to najboje znan. Bija je najstariji član SDP-a u Splitu. Taj se nije libija svakome reč u čunku šta ga gre...ali nikad nije prominija bandiru, nije bija prilivoda - uvik je osta velik čovik, splitska legenda i pravi livičar. Bija je električar. Svašta je proša u svom životu. Bija je u partizane. Igra balun na Visu. Možda niste ni znali ali on je bija i hrabar čovik. Odlikovan je bija Ordenom za hrabrost, pa Ordenom zasluge za narod II reda i Ordenom zasluge za narod sa srebrenon zvizdon!
Paš ti meni poć govorit o njemu, mulac jedan!? Naravno da ja to znan - čineći fintu kako je jidna, odgovori mi šjora File.
A znadete li da se on nije libija usprotivit ni Titu kad ga je bija činija da se Ajduk pritvori u niku vojnu momčad?
Da je li znan ?! Ajde mući tukac jedan...A ja se još dobro sićan koja je to barufa bila kad se bija potuka sa Zvezdinin igračen Stankovićen..i to ovod usrid Splita ..dok se još balun igra na stari plac isprid Plinare. Ma ča ti znaš...! Bilo ti je to ijadudevestopedeset idruge kada je Ajduk sašija sve klubove u ligu i nije izgubija njanka jednu utakmicu.A ne ka ovi danas...zaključi ona značajno.
Ma ne sićan se ja toga. Nisan se bija ni rodija...ali san čuja za to.
A čuja si čuja. Pa naravno da si čuja. A moj dobri Frane je bija dobija ka niku partijsku kaznu kad je bombiza šakon u čivericu tega Stankovića. Ma ni mu bilo puno žaj..jer je reka, kad su ga počeli zajebavat: "Ma žaj mi je ča ga nisan još jače udrija!" E, takvi ti je on bija. A za pravo reč - bija je boji o kruva. A moš mislit koji je to majstor bija. Zabija je najviše goli u cilu povist Ajduka. Znaš li koliko? Ne znaš..Bome da ne znaš! Zabija je sam samcijat sedamstodvadesetidevet goli. Pa sad ti vidi koji je to fuzbaler bija! Najveći i najboji o sviju! A još nešto, On ti je u Ajduk iz Zagreba doveja Bajdu Vukasa....igračinu o kalibra i čovika koji je kupija prvu vespu u Split. Čin ga je Frane vidija u Zagreb kako igra..reka je: "E, ovega malega moran dovest u Ajduka!" I doveja ga je...jer nije bija o prazni riči ka šta ste vi političari.
Ma nemojte opet o politici, molin Vas Bogon šjora File!
Ma je li ?! Ne da se gospodinu slušat o šporkarijama rvacke pulitike! Ma da ne bi mučala radi tebe! Dosta je meni takvih ča mi ne dadu govorit - jer kad ja progovorin tek ćeš onda i ti čut šta te gre. Ovo nije ništa! Puna mi vas je kapa...Stalno nike zabrane! Bilo bi van boje da uvedete red u ovu bidnu zemju. Evo, kad se spominjen našega Frane omar mi na pamet padnu ove tuče između dinamovaca i ajdukovaca....njiovi navijači. Pa di to vodi Majko Božja ! Sad su dinamovci napali tamo u Liku ajdukovce...pa udri po njima baturicama. A ka, policija je pratila ajdukove navijače na temu putu! Pa ko je tu lud? Osim ludi mladih glava ča se razbijedu između sebe - a ča radi ta policija? Ča radi ota pratnja ? Nakon tuče vata barufante! A ča nešto ne napravidu prije....Jer, evo sad su u Zagreb opet isprobijali dva dinamovca...i temu neće bit kraja! A ja se sičan, Marinko moj...kad je Torcida osnovana o splitski študenti iz Zagreba. Navijalo se u svih šesnajst - ali nikad ni bilo ovako grubo, divjački i huliganski. Bože nas oslobodi takega navijanja ..koje mora završit u krvi!
Je, i ja tako mislin moja šjora File....Ovo je za svaku osudu ča se događa oko našega nogometa danas!
Ajde, ne zvizdi! A ča se radi? Ništa! Eto ti ga na..! Ništa..lipi moj političaru!Misliš ti da san ja luda pa da ne vidin di mi gremo?! Pun mi je kufer političara ča su umislili da ji mi moramo volit neka nas oni stalno pljačkadu i živciradu. Oni.... ma ne mogu doć sebi o smija i jada..oni ministar Kirin kaže da će otić u holivudske zvizde. Ma neka gre šta daje. Ja ću mu platit kartu da gre za Australiju meju one aboriđine ako triba, samo neka gre ča prije...Gospodin bi glumija! Ma vidi ti cvića našega...ka da i sad cila Vlada ne glumata okolo da ništo radidu, gradidu, mućidu se - a samo nas piturajedu.
E, a nije ni to za bacit!
Ma ajde zajebaji ti nikoga drugega a ne mene - prostrili me pogledon ona . Gledan sinoć na televiziju onega Radića priko kojega idu sve gradnje mostova u Rvackoj. Ma nemoš ni potočić, ni baru prigazit a da ne naletiš na niki Radićev most. Lipo, lipo...čovik projektira, gradi s kumovima...i onda inkasaje. Ka u butigu! Platit molim! A kome isporučijude te račune? Narodu! Narodu - a da kome će! Dobro su oni tvoji mulci iz sedepeja nikidan rekli da bi tribalo gradit most prima Mrduji...pa nek se onda lipo tamo jedan krak pruži prima Braču a drugi prima Šolti...a od otamo jednon petljon drito u Dugobabe! A svaki krak s osan traka! Most bi se zva po doturu Sanaderu....koji be se vas rastopija od dragosti ! Ma kako se zove oni tvoj šef o tih esdepeovskih njunjora u Splitu, a ?
Gojko Čepo !
Evala mu. Moraš mi ga dovest jedan put ovod kod mene na Pujanke. Skuvat ću mu obotnicu po šoltansku. Lizat će prste!
Držim vas za rič...On ionako stoji ovod blizu, na Mejaše.
Odlišno, jedva čekan da ga upoznan..Već mi je pun kufer tebe i tvog pametovanja!
A dobro.
Eto, još ćeš mi i nos obisit! Nemoj bit đeloz na mladi svit. Njiovo vrime tek dolazi...a tako ti je to, mišu moj - podrugljivo će ona...i odma doda: A ona Ministrica Lovrin će mi se litretat...Sliku ću joj zalipit na vrata o portuna! Ma zamisli ča je rekla...da je preprodaja droge opasnija o otmice državnih dužnosnika - pa i nje same! Ma ča otmica glavešina! Ma mi jemamo takve glavešine da to more bit samo korist, dobro dilo... ako ji niko čapa i sakrije na par godin dikod. Ma more ih metnit jušto u Hiltona u Nevi Jork. Pa da jin svi mi plačamo i spavanje i spizu - samo da višje ne upravljadu s nama. Uništilo nas je to njihovo žrtvovanje za narod. Ajmo se mi sad malo žrtvovat sami za sebe - bez nji. E,a...onda bidu spali na prosijački šćap... eto ča ja mislin. Možedu me slobodno bacit u pržun za ove riči - ma me nećedu natirat da mući!. A Bože dragi koje je u nas pravosuđe. Nima bojega na svitu. Ka ni ministrice! Eto...niki je momak radi 150 kuni, ka veliki kriminalac i narkodiler uvatija dvi i po godine pržuna! A Novalić zbog gospodarskog kriminala teškog 53 miljuna kuni - uvatija je isto dvi i po godine pržuna. Niki Pešek, eno piše u današnje foje, uvatija za ubistvo isto dvi i po godine pržuna, pa oni Gucić radi podmićivanja sudskega vištaka s 25 iljada eura - uvatija je dvi godine zatvora a oni Mateković za otmicu uvatija godinu dana zatvora a, opet, oni niki Primorac ća je u Makarsku na zebru ubija dvi curice od šesnajst godin - uvatija je 6 miseci zatvora! Pa ti sad budi pametan!
Je, nije lako...nije!
Ma ča nije lako! Ne mogu te višje slušat! Sve bi ja to sredila u po ure. Ne bidu meni suci tako sudili, ja in kažen!
Ali, to bi bilo mišanje u nezavisno sudstvo...!
Dat ću ja tebi mišanje po tintari..kukumaru jedan! A ča je ovo? Ovo je mišanje govana....eto ti ga na sad! Koji su to suci, da mi ji je vidit...počme ona mavat rukama...Samo bi ih ja upitala za junačko zdravje da mi je dat pet minuti vlasti!
Ma prošla su Van ta vrimena!
Ma ča prošla! E, zajebaji ti mene, zajebaji....ma u prave zemje nema takvega lopovluka, viruj ti meni. Ma, eno oni brat o ministra Primorca! Pa zapeja, zapeja - oče bit pridsidnik Županijskog suda u Splitu. I nima druge! Ne more taj fermat! Jedan brat na listu hadezeja za Sabor a drugi u Izborno povirenstvo! Ma ča je to?
Ali, nisu oni za istu izbornu jedinicu!
Dat ću ti ja po čiverici. Samo mi nemoj o jedinicama! Eno je indeks od mlajega Primorca pun i ništic i jedinic...Jedva je dolazija do duja. Pa je lipo sad dotur o nauka...oli će to postat za koji dan. Pa će bit i šef o Suda....pa u Izborno povjerenstvo...pa,pa...pa di tu jema kraja Marinko?
A ča ja znan?
E, bilo bi ti boje da znaš pa ne bi trpija one šporkarije ča pišedu na hadezejske plakate da ste vi za legalizaciju droge. Ma i ja već znan da ste protiv legalizacije nego da ste za dekiriminalizaciju droge. Ali zaludu je! Hadezejci uvik pivadu isto! Lažu pa lažu! A do jučer su imali isti takvi zakon kojeg sad pjucadu! A vazeli su da jin piva o drogan baš oni mali ča je četri puta bija kažnjavan radi droge. Ma ča je ovo? Kad će kraj ovin maškaran!
Ma prestanite se jidit šjora File..Kad s vama pričan nikad ne znan oču li Vas na kraju morat odnit u bolnicu..Oče li Vas kolpat, oče li van puknit koja žilica u glavu ili će van molat srce?! Prestanite me strašit!
Je, je...vidin ja da si se vas usra o straja slušajući me! Magarac jedan..rugaš se sa staron ženon ka šta san ja! A baš me i briga...eno su otvorili svečano Rebro koje je počela proširivat i uređivat Račanova vlad..., Bog mu da pokoj. Ma su vas onda pjucali i itali se blaton na vaše doture koji su najzaslužniji za cili taj priojekat! E, ma sad se napuvajedu ka paunovi..i sve vićedu: "Vidite nas, vidite nas ...ča smo pametni i lipi!" Ma ne bi oni meni tako! Rekla bi jin ja ča ji gre - pa makar isti čas pukla! Nego ča! A di su bili kad je grmilo! Kad je tribalo podmetnit leđa! E..a sad se kite vašin perjen. A ko van je kriv kad ne znate svitu kazat ni ča ste napravili!
Ma nije to baš tako...Zna narod!
Ma ča nije...Ma ča...Ma ča zna narod. Narod ti je ka tisto. Svi ga misidu - a narod ka gušta jer misli kako ga to masiradu zaraj njegova dobra. Ma ne zna bidan da ćedu ga na kraju ispeć u pečicu ka štrucu kruva. I pojist...moj dobri Marine, pojist za marendu, i to isti ovi ča jin se sad ulizujedu i trčedu okolo begenavajući judima i lažući jin. More bit da će dotur Sanader opet izumislit niku svoju garantnu, jamstvenu...ili kako se već zvala - karticu ! Ma ovi put tribat će je napisat još manjin slovima da je poslin izbora teže pročitat ča je sve obećava. A vi narodu lipo dilite samo tablete protiv skleroze...da ne zaboravidu tako brzo, ka šta su zaboravili posli prošlih izbora, ča jin je hadezejovski kapo sve bija obeča! I neka jin dragi Bog prosvitli pamet kad dojdedu do onih glasačkih škatula!
Ma pustite više na miru politiku šjora File! Umra je barba Frane Matošić!
Ma ko ovod spominje politiku cukunu jedan da bi li cukunu. Ja se samo spominjen jednega velikog splićanina i čovika i ništa višje! A sve ovo drugo san ti rekla ne bi li u tu tvoju šupju glavu ušlo baranko malo pameti...jer, dite moje, virujen ja da će te pobidit na ovin izborima, da će pobidit stranka mog dobrega Frane - ali tribat će van puno truda da popravite sve ono ča je razbijeno, i puno puno pameti i kurađa a i odlučnosti, borbenosti i srčanosti koje je uvik jema naš Matošić. Aj, nalij još jedan bićerin prošeka - pa da još jedan put nazdravimo našen barba Frani i svin dobrin judima na ovemu svitu...jer jedino u judsku ćestitost i dobrotu ja virujen, Marinko mali.
Aj, nazdravje !

- 19:31 - Komentari (247) - Isprintaj - #

26.10.2007., petak

ŠJORA FILE NA SMOJINU GROBU

Ajme koje vrime jutros. Niko plačljivo jugo s par suza kiše.....i miris zime. Triba sam već u devet uri bit na Lovrincu. Dan je Oslobođenja Splita pa nosimo cviće na Spomen kosturnicu palim antifašistima i na Spomen križ palima u Domovinskom ratu. Prije toga moram malu bacit do škole. Jedva san užga auto. Uvatila ga vlaga pa škrokaje, prdi i dimi se ka ferata...trokirajući puze uzbrdo. Okolo mene trubidu i mašedu mi bisni vozači a ja činin fintu da ji ne vidin i ne čujen.
A šta ču...auto je priša priko trista ijada kilometri. Nije on bidan kriv. Dobro još i gre!
Poslin Lovrinca trčin doma po nike papire koje san zaboravija jer kako se ono reče: "Ko nima u glavi jema u nogama!"
Nisan ima pacijence čekat lift pa san se popeja uza skale. Cili san se uspuva i oznojija. Za krepat!
I taman kad san tija otključat vrata od stana začujen ono poznato:
Marinko! Marinko mali! A ča si se tod uzdrča...pariš kada ćeš se jušto sad izvrnit po tleju. Oli te uvatila debuleca? A da nisi bolestan?
Okrenen se - a iza mene stoji šjora File. Onako drita i sva u crno...ka nika meštrovica.
Ma nije, nije...moja šjora File, nego san mora skoknit po nike papira a nije mi se čeka lift.
E, a štaš...Tako ti je to. Kad ga tribaš nikad ga nima! Nego, baš san te dobro uvatila...Danas je godišnjica o Smojine smrti. Greš li mu na greb odnit gariful? On je ono zakopan u Žrnovnicu. je li...?
Je, je...ma ne gren Van ja doli...jerbo dobro znan kako njemu nikad ni bilo stalo do velikih riči, gungule i pompe. On Van je bija jedan skromni čovik! Nije Van njega briga za nikakvo cviće!
Paš ti meni poć govorit ko je bija Smoje?..odma se ona uzjoguni. Ma ne znaš ti ni po mise. Lipo te pitan, greš li u Žrnovnicu?
Ma ne mogu, več san Van reka...! I meni je malo od nervoze uzdrča glas.
Ma Bogati! A da mi se ti nešto ne jidiš, nevojo jedna...Ne smiš gospodina zastupnika višje ništa ni pitat. Ne smiš mu ni jednu besidu reč a da se odma ne afana. Lipo, lipo..! Dotle smo došli!
Ma nije tako, šjora File...nego mi je priša! Čekadu me doli u stranku!
Je, je...falit ćeš jin za popizdit ako te ne vididu po ure! Ne mogu oni bez tebe ni popišat se poć. E tico moja, i ti si mi ka svi ovi drugi. Samo na svoju gujicu misliš. Da ti neko ne bi slučajno ukreja katrigu o jebenoga šefa esdepeja...i to ovod, u Splitu! Neš ti face !
Vidin ja da je đava odnija šalu i da se moja susida dobro najidila. A šta ću, pokušavan je nikako smirit, spustit balun na zemju ...a već znan šta me čeka.I tako, s onin ključen od stana u vratima najumiljatije šta san moga rečen joj:
Ma dobro, dobro šjora File...sigurno bi Vi tili skokinit odnit buket cvića našemu Smoji na greb. Evo sad ću ja...Samo da uzmen nike papire!
Šjora File se u ćas cila promini. Ka da joj sunce priđe priko lica..Uvati me za rame i malo me ka udre, ali onako o dragosti.
Ajde. ajde lipi moj...Ma znan ja da si ti uvik bija čovik. Samo da je takvi ka šta si ti višje. E, di bi nan onda bija kraj!
Uglavnom, vidin ja da me ponovo dobro navukla na svoju...i da će bit baš onako kako je ona zamislila čin me ugledala. Dok san se ja vratija iz stana ona je već bila obućena u kapot. Oko glave je vezala šudar na bile bule a u ruci joj je bija buketić lipega cvića. Vidin ja da san upa u već pripremljenu trapulu, da san se ka muva da uvatit u mrižu moje Šjore File.
Do Žrnovnice više nije uvukla jezik u usta.
Prvo, udri drvjen i kamenjen na Luku Podruga ča je uvridija Smoju na Gradsko Vijeće kad se govorilo o njegovon spomeniku.
Ma on će mi poć govorit. On! Drača jedna od čovika! Samo smeta ka drača u grlu! Ma ne mogu ga štampanega vidit! A koliko tek more lajat? Ja mislin da je onako mršav jer ga izujida vlastita zloča! Sam će sebe o zloće pojist...ka niki samožder!
Ma šta to pričate šjora File?
A je, je! Ne more taj dobro svršit! On će poć govorit o Smoji! Pa da je žderonja, pa da je pijančina...pa da je neprijatelj Rvacke. Ma ča on zna! Samo laprdat i rigat gadarije. Laprdalo jedno! Višje vridi nokat na mali prst o Smoje..i to oni o nogu, vengo on cili! Ča on zna ča je dobra spiza i žmul dobrega vina? Njemu i ne triba spiza. More bit da on jide slike o judi koje ne voli..I to onako, lipo ih izriže iz foji...pa udri, kusaj, žvači, gutaj...raspištoljila se moja suvozačica a sve mašući rukama i čineći šeste ka da ništo guta.
Ma znaš ča, Marinko moj lipi...ja bi njega natirala da proštije sve ča je Smoje napisa.....pa da vidi koji je to čovik bija! A ne. ne...počme opet ona mavat rukama. Gospodinu Luki se ne čita. E to mu nikako ne gre. Ali zato more više šporkarija izgovorit u minut nego ča ji jema na cili Karepovac!
Ajde, nemojte šjora File! Dajte se urazumite! To Van je sve samo politika!
Ma koja pulitika...tudume jedan...skoči ona na mene! To je neodgojeno čejade i basta! A jesi li zaboravija kako je Sanader vriđa tvoju familju?! A,a...unese mi se ona u lice..da san deboto skliznija sa ceste. E vidiš, taki ti je i ovi. Sve ti je to ista pašta...reče ona nikako ka poučno. Još si ti zelen! Još smrdiš na mliko! Ma ja san puno tega u životu priko kostiju pribacila, neće oni mene privarit, neće...A Bogami neću jin ja ostat ni dužna...Ma jo da mi je samo jedan dan bit u Sabor. A jemala bi ća cila Rvacka ćut! Ja ti kažen...završi ona upirući prston ka priteči... u mene.
Šjora File, evo smo skoro stigli..pustite me da vozin s miron ionako slabo vidin a i kiša je.
Znan ja da ti ne vidiš. Ti si ka slipi miš. Šišmiš! Šišmišu jedan naivni..jer da vidiš ne bi muća kad oni Sanader gre okolo s lopaton i vadi kamene temeljce ča ji je zatrpa prije par godin - i ponovo ji sad zatrpaje...E, a sve uz kamere i uz one svoje liziguze ministarske. Ka da ja to nisan vidila već miljun puti?
Ljudi moji kad ću više stić, mislin se ja u sebi...i sitin se kad san je ono vozija na Čiovo..kako me isto ovako izludila. A vidin ja da me moja šjora File gleda nikako strogo priko oka.
A ča je, ča si se uzmuva ka da ti je crv uša u gujicu? Jedva čekaš da me se liberaš, a...merlo moje?
Ma nije...
Ma ča nije...E, Marinko moj...neš ti da me slušaš, a da očeš bija bi puno pametniji! Vi ne znate kako triba s tin Sanaderon. Oli ti nije jasno da ćemo svi otić u prdec ako mu šćeto-neto ne sasujete u facu ono ča ga gre!? Pa oli ste mutavi? Oni strušnjaci iz Međunarodnega monetarnog fonda lipo van govoridu da je HDZ doveja cilu zemju na sam rub priovalije, da smo gotovi ako ovi nastavidu dalje ovako...A oni medvid Šuker kaže kako ih oni to falidu. Da jin to pivadu hvalospjeve. Pa zar ne vidiš da ćinidu mone i od vas i od cilega ovega jadnega naroda. Zaduženi smo višje nego cili cilcati svit. Jedino je oni Libanon gori od nas. A tamo je stalno niki rat, ubijadu se među sebon i itadu bombe jedni drugima u glavu. E, jedino se š njima mi moremo mirit! Od cile su Rvacke napravili svoj ekšperiment a mi smo ka niki kunići na kojima probajedu svoje izume kako da nas muzu na gladno a da ne krepamo....Ma ja to neču trpit. Prin bi pukla nego pristala o temu vikat na cili glas - da me cili Svit čuje! Ako oćete dobit izbore i vi tribate to govorit, jesi li me razumija cukune jedan?
Jesan, jesan...izvlačin se ja iz razgovora i već parkiran blizu žrnovačkog groblja. Ali ona nikako da izađe iz auta. Drži ono cviće u svojoj suvoj tvrdoj ruci i nisan siguran oče li ga odnit Smoji na grob ili će me opalit sa njin po glavi!
Pogleda me oštro i reče: A Milanoviću reci da ga je pozdravila šjora File i da je sinoć kod Bage bija odlišan. Fala Gospi da je neko napokon reka ono ča svi mislidu o tome ko triba birat vlast u Rvackoj! Oni ča i žividu u Rvacku, a da ko drugi ?! Svaka mu je bila na mistu! A ona ministrica ča sliči na koludricu, ona Kolinda - navila se ka pokvareni žveljarin pa mlije li mlije...! Ma kako ji samo onako dresiradu pa svi govoridu isto. Ka niki blizanci. Da je jemala španćeru na glavu pomilila bi da je Kosorica. Zato Jadranka stalno i nosa onu špančeru okolo - da je ne mišadu s drugin hadezejkama iz vlade, jerbo svi isto pričadu. Bilo muško, bilo žensko! A i oni će mi Polančec dat svoju sliku. On ka da neće.... Ka, fin je...A vas pocrveni ka skuvani rak kad laže. A ja ga još nisan vidila a da nije bija crven! Lice mui je ka niki detektor laži..stalno ga izdaje!
Dorbo, dobro ..amo mi polako.
Izađem, otvorin joj vrata i korak po korak dođemo do Smojina groba..One valovite ploče ča sliči na more.
E lipo moj i šesni prijateju..Ma dala bi dvajest godin života da te vidin bar na po minute...reče šjora File stavljajući buket cvića na bili grobni kamen. Pa me pogleda onako furbasto ispod oka:
A ča je ti...ča me gledaš. oli si mislija da ću i ja partit brzo. E neću, neću...ne boj se.Neš tako lako gledat taj film! Prvo ćemo sminit HDZ s vlasti. Pa još moran vidit kakvi će te vi bit. Pa vas moran dobro isfregat ako budete radili pizdarije. Pa mi se unućad mora poženit...a bome jeman ja puno tega reć i svojin praunucima. Ma se tribadu prvo rodit ! Pa od svih tih godina ča stojidu prida mnon - od gušta bi dala dvajesetak Smoji! A ti...bili mu ti da koju svoju godinu, Marinko mali?
A bi, šjora File...da bi mu...pa da napiše još puno tega o ovemu velikon kažinu u koji nas je uvalija HDZ...Da se ne zaudobi, da se pamti na vike vikova..Kako nikad niko višje ne bi pravija takve monade..a sve na grbači naroda i za vlastitu korist. E, bi..moja šjora File, od gušta bi mu da koju svoju godinu života zarad tega. Ma on je bija pridobar čovik i ne bi vazeja ni Vaš ni moj ni ičiji minut života..jer on je svoj život proživija judski i pošteno...i reka je ča je jema...a sad je na nama da umisto njega kažemo koju i da zauvik ostanemo judi..jerbo judi znaju bit gori od beštija kad se pomame!
Eto vidiš Marinko moj, znaš i ti dikod reč koju pametnu kad očeš ...ma to je ritko!
Ajde vozi me doma... Koliko samo moš pričat? Za trojicu...! Ma vaja meni još puno tega danas napravit...Nisan ja političar pa da mogu dangubit po cili Božji dan! Aj vozi mali...ma oli si gluv ?!

- 20:00 - Komentari (274) - Isprintaj - #

15.10.2007., ponedjeljak

ŠJORA FILE OTIŠLA NA "MARENDU NA MATEJUŠKU"

U subotu smo na Matejušku napravili jedan marendin za svakoga ko je tija doć. Pekle su se srdele, bilo je kroštul i vina...dobre pisme i puno prijatejskih razgovora. Je puvala bura ali nije smetalo. Jedino nan je vitar odnija ništo crvenih baluni ,na kiojima je pisaklo SDP, u arju....pa su judi govorili: Asti ga miša, ma je ih je lipo vidit...Ovo je dobar znak prije izbora!
Naravska stvar da mi je šjora File još u petak došla u vižite da mi reče kako je nikako ne smin zaboravit odvest na Matejušku...jer da tamo ionako odavna nije bila jer o gada i zaraj dišpeta neče nogon da stupi priko ove berlave Rive ča ju je unakazila družina iz Veloga Mista zajedno s HDZ-om. Čin joj ih spomenen ona samo peta roge i viče: Evo jin na! Platićedu oni za oti zločin kad - tad ! A ča mislidu, da će in to ovi naš grad zaboravit ?!
Već me je u autu počela ka prava čimavica gnjavit oko Sabora.
A ča je, Marinko Mali....Završija je kurbin pir! Nima više gori - doli.....Bar ćedu te se dica nagledat!
Ma šjora File moja...evo su nan izbori prid vratima. Nima odmora! Sad je tek najžešće. Vaja nan u kampanju. Triba obać cilu izbornu jedinicu od Splita pa sve do Dubrovnika! Sad se najviše radi....
A je, je...Znan ja vas političare. Nikad se vi niste oznojili. Bože oslobodi. Eto je, ka i pulitika sad postala težak posa ?! Ma nemoj ti meni prodavat ovod maglu....Je, sve mi pucate od truda i puste pameti. Slušala san nikidan onu hadezejku, kako se ono zove...a Sučec-Trakošćanec...ča je izvalila onu pizdariju da žena vridi onoliko koliko jema dice. Ma zamisli ti koja je to tuka da bi li tuka!? Poč pjuvat po onin ženan ča nimadu kvatriljun dice...a radidu i mučidu se cili život za svoje familje. Oredu po dana u poduzeću, pa još doma kuvadu, peredu, redidu i čistidu..tetoše one muške trutove i odgajaju dicu...Ali, ne...One njoj ne vajadu ako povr svega toga nimadu baranko deset dice! Ma iz kojega je kara ta ispala? Pa kako more takva žena bit u Sabor? Bože me sačuvaj! rekla bi joj ja u čunku sve ča je gre...samo da mi je dikod trefit.
Ajde puistite šjora File. Znadete i sami da nas jema svakakvih.
Je...ma ona je ka gospoja-zastupnica..ka nika naša elita...A pametniji je moj unuk o nje! A di jin je ona doturica Čikeš ča je u Sabor držala propovid o temu kako misec nije peder i kako jema muški i ženski planeta i kako bidu nan sve one pale šoto po glavama da kojin slučajen nije baš tako...
Ma ča višje ne uvedu test inteligencije za bit na te liste o Sabora.
A bome, to bi bilo pošteno...jer onoliko ludonja skupit na jednu jarpu i nije baš lako! Triba za to jemat lipog matrijala !
Ajde, neće bit baš tako ! Možda se ženi omaklo ?!
Ma je...sve je eno ponovila u foje....A šupjača jedna..da ona samo zna koliko poštenik i šesnih žena jema koje ne mogu jemat dice. E, one su po njoj škart. Za bacit! Ka da su nevajale krpe! Ma sve bi joj zube prosula koliko san jidna!
Ajme meni, šjora File..pa još će te mi u boksere završit !
Pa i to, ako triba !
Na svu sriću smo arivali na Matejušku i moja šjora File odma se razgalila kad je vidila Lepu Smoje.
E, bidni naš Smoje...da mu je sad bit ovod, ajme ča bi bija sritan. Ovo je oni svit koji je je on volija. A nije mu bija mrzak dobar bokun ka ni liznit žmul vina. Ali najviše je drža do prijateljstva. Do juskosti! Jedino bi mu morali vezat šudar priko očiju da ne gleda prima Rivi da ne vidi ča su uradili oni koji su mu za svoje šporke potribe ukreli ime Velega Mista.
Odma se moja susida ubacila među one ča su pivali....a koje je pridvodija jedan drugi Smoje, naš lipi Dasen sa svojin mužikantima i pivačima.
Kad se dobro ispivala i izjubila sa svin poznatima sila je moja šjora File na banak da malo otpočine.
Ajde, ne bilo ti teško, donesi mi pijat sredl i žmil crnega...da malo dojden sebi. I svakako mi dovedi malu Željku, jeman je ništo pitat!
Evo, odma ću...samo se vi komodajte...
Donija san joj srdele i žmul vina...a ona već na mote priča s nikin Japancima.
Asti ga Mande, šjora File, ma nisan zna da govorite po japaneški?
Ajde bogati, neš ti muke. Čin čovik jema ruke more govorit sa cilin sviton. Jezik ti i ne triba!
Bome vaš nikad ne pristaje radit. Ja mislin da je to najveći udarnik od svih jezika na svitu!
Aj ti doma svoje zajebavat, a ne mene, bidnu staru ženu....nasmije se šjora File.
A zbilja...ma di je prije našla ove Japance. Jidu oni srdele i smiju se i očima i ustima i cilin tilon. Lip, smišan i vesel narod. Ka bebe se. Ovod su došli u turizam pa su naletiili na našu "Marendu na Matejuški" ča je splitski SDP učiniju u ovo subotnje jutro za sve jude koji volidu ovaj grad....ali i za svakoga kome je lipo družit se sa nama.
U to dođe Željka.
Ajme, evo meni moje Antunoviške...skoči se na noge šjora File. Ostavi i srdele i vino, zagrli Željku i svu je izjubi.
Jo ča si mi draga. Ma sva si ka pupa! Pa će se oni muzuvir Sanader poč mirit s tobon! Ajde, neka gre vatat rake....da ne kažen koje. Stuće mo ga moja Željka mi da sebe neće moć pripoznat. E, ovakve nama tribaju. Pametne i šesne. A njemu eno one Trakošćanec i ona ća stalno gre za njin s onin kapelinon na glavi. Pa neka otvaradu škole, dilidu kjuće o stanovi i dijonice uokolo ne bi li kupili svit! Ma nije narod lud. Nije. ja ti kažen. Ma vidi mi je ča je vesela! E tako triba. Pobidit ćemo mi njih veseljen! Na vr glave su došli poštenome svitu....e !
Željka nije uspila ni rič prozborit jerbo je u to došla Smojina družina s gitarama i mandolinama i pala je pisma...a moja šjora File najviše voli pivat. A bome, ni Željki nije mrsko.
Dica trčidu uokolo i igradu na balun uz more pa se moja šjora File uznemirila da ko ne upade u more.
Ma znan ja da se nećedu utopit. Znaju naša dica plivat. Ma smrznit će se na ovu buru!
Vidin ja da ona cilo vrime stoji atento i da se neče smirit dok dica ne stanu trčat uz more.
Ala, ala..dico..Ajmo daje od mora.
Tek kad su se dica makla u parkić iza naših leđa smirila se.
E, još u njoj živi i mater i baba..i briga za dicu...za svu dicu, ma čija ona bila!
Takva je naša šjora File.
A rec imi Marinko, pita me ona kad je opet malo sila, ma ča to radi oni Tadić koji je uteka iz HSP-a ? Ča se sliza s ovin nevajalcima iz Velega Mista ? A je me razočara! Ma sve je to ista pašta, sinko moj. Prodaju se ka kumpliri. Bože oslobodi...ma jema li više poštenja u tega svita? A zamisli, ja san mu bila povirovala kad je ono vika protiv trgovine u politici. A vidi ča radi? Znaš ča ću ti reč. Marinko moj.... nagne ona glavu i ka da mi šapje na uvo...Sve ti je to HDZ zakuva. Oni ti sve to rade. Ma znan ja Sanadera...značajno će ona, podižući glas. Oti ti je bija i gradonačelnika Grabića kupija a di neće ovega ča je do jučer s Đapićen bija u kolo. Ma ništa ti ja jnima ne virujen. Tako ti je i Đapić stalno ka nešto prigovara Sanaderu a uvik mu je u Sabor dava ruku kad je bilo gusto. Ma iz istega su ti oni lonca, slušaj ti mene. I to onega crnega! Pa evo, ni ovi Tadić nije daleko uteka od tega! Ništa ja njima ne virujen! Jer ko more s Velin Mistom...taj more i sa HDZ-om...Vidi samo ča su nan o Splita učinili. Sad bi tili to i od Rvacke napravit. E neće, ja ti kažen da neće, počme se ona žestit....Nego, Marinko, očete li vratit funtanu na Rivu kad dojdete na vlast?
Očemo šjiora File, nemojte brigat! I ne samo to. Odrizat ćemo one željezne stupe i napravit sve da nan Riva ponovo bude šesna!
Ma bravo, držin te za rič! Privariš li me jemat ćeš posla s menon...a onda te neće spasit ni ijkadu saborski imuniteti! Jesi li me razumija !
Ma jesan, šjora File...Ma ča bi Van poša lagat ?
Dobro, dobro..virujen ti. Ma jesi li vidija ove luđake. Proglasili su Rivu najčišćon ulicon u Dalmaciji. Da ulicon ?! Ne znadu oni ča govoridu! A jesu je bome očistili...ali o judi, jer čestita judska noga neće o gada da višje ni ugazi na nju. Eno vidi, nema ni pasa na nju!
I tako smo mi čakulu po čakulu, rič po rič, pismu po pismu ...ubili cilo jutro na Matejuški. Šjora File mi se već malo i umorila i valjalo je poć nazad doma.
Lipo san sija šjoru Filu u auto. Sila je ka krajica i vidija san da joj se oči punidu pomalo suzama.
Ma ča je šjora File...Ma oli to Vi plačete?
Ma nisan, nism sinko moj..opdgovori mi ona brišući šudaron oči i okrečući glavu da je ne vidin...Ovo mi je sunce udrilo u oči i natiralo suze na njih!
A ja sna zna da ipak plače...Od sriče ča je bila sa dobrin ljudima...ča se vratila u nike svoje stare dane!
Isprid kuće su je dočekali njezini a ja san mora dalje.
Željka je popodne išla za Vrgorac na "biklijadu" a ja i Maja smo navečer tribali na jedan izuzetan događaj. Većeras u splitskom teatru gostuje Marijanski teatar iz Sankt Petersburga...Opera Kirov. Davat će se Evgenij Onjegin od Čajkovskog...a to se ne propušta, jer oni su najbolji na svitu
I zaista je bilo spektakularno! Split to još nije doživija.
Sinoć, u nedilju, točno prije glavnog Dnevnika...zvoni keo na vratima. Šjora File nosi štrudel.
Ajde mašite se malo, od domačih je jabuka!
Zoven je da uđe ali neće jer da su joj gosti doma pa se triba odma vratit. Samo mi onako sa hodnika dobaci.
A jesi li vidija popodne u Stankovića ča kaže Đikić? Ministar Primorac ga je ucinija da mora napast nikega svog kolegu. Dava mu je teške mijune kuna da to uradi...a ako neće da će ga uništit. Ma je li to moguće? Kad bi to bila istina..onda Marinko moj, mi jemamo posla sa mafijon. ne triba nama Čikago...jer doša je doša Čikago u nas. samo ča oni Al Kapone nikad nije posta političar niti ministar! Jadna zemjo ko te sve gazi ! Ma je li to moguće?
A neznan Vam ja šjora File moja, valjda će se jedan put otkrit ča je tu prava istina!
Oče, oče..ne boj se. Samo da dotle ne napravidu još toliko monadi dato više niko to neče moć dricat. A je si vidija da je oni bivši hadezejski pomočnik ministra...oni general Zagorac, jednoj ženi, ča je sad u pritvor ,platija navodno niku uslugu pravin pravcatin konjon. Ajme majko, Marinko moj, ovi ćedu ukinit i kunu ka novac i uvest plačanje u konjima¨! A ča ja znan..koliki je lopovluk i mižerja...čovik će do na kraj miseca možda moć zaradit samo kopitu-dvi od konja
Ajde, šjora File ...ostavite se politike, lipo uživajte većeras s gostima i svojon famijon.
Je, je ...jemaš ti prav....Ali isto me ništo brine da nan niki konji ne bi zavladali a narod nastavija blejat ka ostrižene ovce. Jo koji bi to lipi zoološki vrtal bija od ove naše države !
I ode moja šjora File...a ja sam ka i obično...još dugo mislija ča je ona s ovin ričima u stvari tila reč..

- 11:30 - Komentari (447) - Isprintaj - #

07.10.2007., nedjelja

ŠJORA FILE DOŠLA POSUDIT LUMBRELU

Baš san jutros mislija malo otpočinit.....kad zazvrlji telefon.
Ajme, ko je sad? Ne moš ni nediljon bit miran!
Ali štaš, moran dignit slušalicu jer ko zna šta je i ko je..Kampanja je već evo započela, sve se više zahuktava. Bićedu zovu iz stranke...
Alooo!
S druge strane žice muk.
Alo! Vičen iznerviran.
Ma je si li to ti Marinko mali?
Jesan, jesan...odgovaran jerbo san omar pozna šjoru Filu.
A ča oče reč da zovete ovako priko telefona? Oli niste doma?
Ma doma san...lipi moj...Vengo nisan znala da si ariva iz Zagreba...Evo gren u spizu s neviston a vamka je nika kišica, pa san tila pitat Maju jema li koju žensku lumbrelu viška jerbo nan tribadu dvi a ja jeman samo jednu.
A moja šjora File, ja van niman pojma. Sam san doma. Svi moji su na Čiovo. Dojdite do mene pa ćemo je kušat nać.
Eto mene!
Nisan se ni diga sa katrige kad na vratima zazvoni zvono. A kako i neće kad nas dili samo par metri hodnika..
Otvorin vrata a moja šjora File razrogači oč, zaklecaju joj kolina...parilo se da će se izvrnit i past drito na kosti.
A judi moji...ma je sili to ti ?
Blažena Divice Marijo...napokon si se ušesnija. Ma parija si s onon kosurinon ka neka šimija iz prašume....Ništa ti nisan tila govorit, ali da si ti moj ne bi ti meni onakvi oda okolo!
Ma kakvi to, šjora File?
Ma ča kakvi ?
A nikakvi, eto ti ga na...Najidi se ona..ulize u stan i omar side.
A dite moje..s onon kosuruinon parija si mi ka niki redikul, ka da si malo rebambija, išempja, otiša na kvasinu....a...e...Oli je takvi malo u Splitu, sinko moj !?
Ala.ala...šjora File, Vi ste malo staromodni...ka niki oldtajmer...pa se teško privikavate na novitade!
Ma koji "tajmer", ma koje novitade...! Slušaj ti mene. Otkad je svita i vika najlakše ti je bilo glumit ludonju, bit čudak i drugovačiji od cilega svita...a onda pizdit da kako su svi mone koje ništa ne razumidu. Ma su za takvima uvik na kraju dica zviždilai kreveljila se po ulici, tukli ji stinama a judi su ji voltavali...i nikad to ne bi lipo završilo za njih.. Tako da znaš. Još si moga završit ka Karuzo !
Ma šta to govorite šjora File ?!
Još ću pomislit kako ste se upisali u hadezejce kad me tako napadate !
Ajde Marinko zajebaji ti nekoga drugoga a ne mene...sva se nakostrušila!
Nego..reci ti meni a ko te je to ostriga!
Štrba!
A ?
Ma Štrba...To je moj stari prijatelj koji me lipo jučer ošiša kad san se vratija iz Šibenika sa skupa SDP-a..i još me je najija s tri vrste sira, panceton i tlačenicon, kiselin kukumarima i popili smo bočicu "Postupa"!
Ala. lipega brice! A di oti radi...pa da i mene šišne!
Ajme ne govorite grube riči šjora File. Pa znadete li Vi ća se u Splitu oče reč kada se kaže da si nekoga "šišnija"! Vidin ja da u Vašoj peči još jema žerave!
Ajde s vragon...skoči moja susida, a "brk" joj se lagano rastegne u osmjeh. Mogu zamislit kako je ona nekad bila vesela , duhovita , pametna i atraktivna cura.
Ma nije on nikakvi brijač, moja šjora Fille. To on onako usput...prijateljski...za nas par iz klape. Jednostavno, zna čovik svašta radit.
A blago ti se njegovoj ženi. Oni moj ima dvi live ruke...Oče radit ali sve krivo napravi! Pravo smetalo.
A je, je...žena mu je braška iz Mirac. Upala joj sikira u med....Moj Štrba je još ka pravi mladić. Vozi kus motora a moj je vršnjak. Jidri. Vata ribu. Šije. Svira violinu. Mandolinu je sam napravija pa . zna i harmoniku svirat. Pravi renesansni čovik. Ali od svega, najboje kuva....Pa san posli onega sira...posli "čibi fredi" ..od gušta izija marinirane lokarde...Jušto ji je jučer učinija...Ma bilo je za lizat prste!
Evo i meni pjuvaka dolazi na justa..Ajde muuči višje o spizi.
Nego kako je bilo u Šibeniku ?
Vidin da je Milanović lipo reka Sanaderu da ćete ga, kad uvatite vlast, oporezovat..i to svaki kvadrat, svaki pod o njegovi kuć i svaki njegov sat..i cilu imovinu. Ma baš mu je dobro reka da neka ponese sve svoje račune kad se budu sučeljavali. Ma jedva to čekan vidit. A Bogami će naš Ive morat najmit dva fakina da mu nosidu vriće sa računima. E...nakupilo se tega, nakupilo za vrime ovega mandatića....A možda donese i one otelske račune iz Verone ča je bija obeća ma ih nikad nije pokaza!
Je, je...i ja mislin da mu je Zoran dobro ono reka...!
A nije Van loš ni oni Jurčić...Svaka mu piva! Ča je Sanader mislija..da smo mi tuke i tukci pa da ne vidimo kako je dilija šolde iz proračuna i šakon i kapon ne bi li kupija kojega birača za se. Istina je da je oštetija tako 90% judi koji nemadu ništa od tih njegovig dionic. A ko to plača? A ne plača on? Jebe se njega. Uzeja šolde iz proračuna klojega ja i mali svit puni - a on samo zagrabi u kesu pa dili šolde okolo. Ma ko mu je to dozvolija? Je li koga pita ? Neka dili svoje a ne tuje novce....Nije mu to čaćino, nego od naroda.! Ma odma poludin čin se tega sitin. Marinko moj...Ne spominji mi ga višje, molin te dragin Bogom!
Ma ne spominjen ga ja nego Vi !
Ma ča ja..Ma ča ja...Ma znaš ča ?! Već san ti jedan put rekla...Ma da mi ga je dovatit svega bi ga učinila u papar...Ma samlila bi ga...Ma šamaštrala bi ga da ga ni rojena mater ne bi poznala !
Ajde , ajde..smirite se šjira File jer će Van tribat vode i cukra...Ma znadete li Vi ča govorite. Pa to je kažnjivo dilo? Svršit će te Vi još u pržun zarad Samadera! Ne smi se vriđat pridsidnik Vlade!
Ma ča ne smi...Evo sad ti gren na ponistru i vikat ću da me cile Pujanke ćuju svašta protiv Sandera! Pa nek me tuži Ujedinjenin Narodima ako ga Mesić pušti govorit!
Ajte Vi lipo na svoju a ne na moju ponistru...uvatin je blago za rame ja jer se počela dizat sa katrige.
A šta je, lipi moj, uvatila te trčvaica o straja....a ja san mislila da si ti ka niki esdepejov tigar, lav...ča li već!
Ajde molajte, šjora File...pa nećemo pravit ovod cirkus da nas judi gledaju ka makake! Ma smirite se...otpočinite,. Jeste li za bičerin hvarskog prošek? Odličan je !
Aj, more...reče ona pomirljivo i podigne onako ka niki vražić, svoju gustu obrvu prima gori.
Dobra moja šjora File, boja je od zlata a pametnija od Salamuna.
Nalijen joj bičerin. Gucne.
A je, Bogami pravi je..A ko ti je ovo da. Da nije mito i korupcija?
Ma nije...To mi je prijatej donija...pijte s miron...Sve je po zakonu, šalim se ja.
Ajde neka, u zdravje...i zabaci glavu dodavajući jedan gutljajčić.
Bogami, pravi...ponovi. A, je li Marinko..i oni Mamić ča izvodi one makakade , i on se nakupova tih dionica. I on je...Ma kako se ono kaže: a je, je...torbar!?
A šta ja znan!? Izgleda da je !
E Bože mili luda svita! Ma di to jema !? Ma nigdi...kažen ti ja - nigdi! Em kredu, em pravidu kerefeke di stignu....i sve to bez pardona...jebe se nji za nas i za cili svit. A mi ka niki cukuni..sve to gledamo i mučimo. A ja neču mučat! Ja oču u demoštracijune. Pa neka mi rečedu da san i anarkišta! Pa ča! Evo jesan i uvik ću bit...Samo jin neču dat gušta i neću, bome, mućat! Ne - ću i ne-ću mu-čat...počme šjora File vikat i rastavjat svaku rič na slogove. I ko mi ča mo-re? Ionako su svi popizdili. Evo, jutros mi mali čita kako je u Strožancu jedan peka rakiju a drugemu je to zasmetalo pa ga je naprobiva letvon i još mu je odgriza komad prsta. Ka ono ča je oni Tajson onemu drugemu bokseru odgriza komad uva. Omar san rekla: A nisan znala da je u Jamerike takva glad da jedni drugima jidu uši! A vidi ovi naši...Žderu prste jedni drugima.....E, moj šesni Marinko a kad si ti prije vidija da judi jedni druge jidu... i to žive?! Evo smo i to dočekali! s ovon vlasti Jerbo ovo ti je kod nas posta kanibalizam a ne kapitalizma! Slušaj ti ča ti ja govorin...pa neš falit!
A ča će te moja draga šjora File, puno tega je pasalo i neće se više nikad vratit. Taki Van je život!
Je, je..sičan se ja kad je još ono Maruška Šinković pivala na "Melodije Jadrana" onu "Ča je bilo tega više ni" i odma san pustila suzu jerbo san znala da je to najveća od svih istina, dite moje.
Ali lopovima se mora stat na kraj. Tu ne smimo popustit. Nemojte opet šta zajebat kad dođete na vlast! A vidiš li ti kako to rade i u onu tvoju Južnu Jameriku. Čita meni moj unuk vsaki dan foje. Eno su u Čileu uvatili i udovicu od onega lopuže i nevoje Pinočeja i svih mu petero dice i još njih dvadeset i četiri komada. Ča rodbine ča lopuža iz njegove Vlade...jer su pokreli državu i jer su slavali dolore, i to mijune dolori u banke u Nevi Jork i ča ti zga ja znan di sve. Baš ka niki naši ! Ali njima su finili bali, došla maca na vratanca - i aj lipo svi, tuto kompleto, u pržun! Eto tako triba. A ča je s ovin našima? A u Čile je sve to napravila jedna obišna ženska. Ma svaka joj čast. Ona njiova pridsidnica...ne mogu se sitit kako se ono zove...?
Michelle Bachelet !
A je....Ma vidi ča si mi pametan kad je ovako za reč niko ime...Ma triba bit pametan i za lopuže povatat i lipo jih rebnit po zakonu! A, e !
Ma nije Van ovo revolucija, šjora File! Ovo su parlamentarni izbori !
Je, je...ali kad Vas narod dovede na vlast imate lipo da ispunite ono ča narod traži!
A ča to?
Pravdu! Pravdu! Cukune jedan da bi li cukune. A ča drugo!
Nije meni ni do pinez ni do slave...nego do pravde. Eto to Van očedu mali judi koji ćedu glasat za Vas. Za Gospu milu, nemojte ji izdat! Budite njiov glas, budite njiova produžena ruka....Uradite da svi judi mogu živit ka dostojanstvena čejad. Nikad nemojte postat puvanderi ni bahati ka ča su to ovi! Uradite ono ča mora uradit svaki pošteni čovik ma di bija - i judi ćedu vas blagosljivat Marinko moj. Ne triba svitu puno, ali Bogami ne more svit višje ni trpit da mu zlaton i zlatnin satovima nakičene pijavice sišu krv. Ne more svit gledat kako su neki od nikadašnje mižerje - priko noći postali bogatuni koji su namirili svoje još nerođene unuke i prauinuke. Ma dosta je nama tih unuka i praunika. Dosta nam je tega da se trud naroda arči i da se banči na račun naroda. Eto zato tribate poslušat narod...a ja san ti narod, Marinko moj, i zato me dobro slušaj i zapanti ča ti je tvoja šjora File rekla.
Oču, oču....
Nego, ča ti mene ovdi stalno zagovaraš, farabute jedan ...a jemaš li ti ili nimaš jednu žensku lumbrelu za posudit?
Jeman, jeman...Evo baš jedne lipe na cvitove i na slike Splita.
Gleda je šjora File i cila se ozarila.
A je, baš je lipa! A ko je učinija ovako šesnu lumbrelu.
Ma Vesna Podlipec iz "Parkova i nasada"!
Ne znan je, ali je puno pozdravi....E ovakva mi lumbrela triba!
Ma eto Van je ja od srca poklanjan šjora File, nabavit ću ja drugu!
Šjora File se zbilja iznenadi. Zablista sva ispod onako otvorene lumbrele s palmama i motivima stare splitske Riive.
A Marinko moj, ma baš ti fala...ma nemoj mislit da si me kupija s jednon lumbrelom. Nije se rodija taj koji more kupit šjoru Filu! Nema tih šoldi....
Ma znan, znan...znan ja to...
Uvati se za kvavku da će izač, okrene se..Odmiri me od glave do pete i reče
A pozdravi i tega tvoga, kako se ono reče, štilistu Štrbu koji te ostriga, napokon je učinija čovika o tebe...Još samo da smršaviš i bija bi mi ka pupa...A reču ja to Maji...Morat će te bacit na dijetu...Morat ćeš manje mumat ! Znala san ja da će kad tad o tebe postat čovik. Aj, ne jidi se i živ ti meni bija!
Otvori vrata, iziđe na hodnik i odma počme dozivjat nevistu da di je više, da šta čeka, da ćedu okasnit...!
I, evo, sija samn za stol da dođen malo sebi jer svaki nalet šjore File je ka nalet blagog tajfuna koji iza sebe ne ostavlja ruševine - nego sasvim obratno, uvik nešto novo izgradi u meni.

- 13:46 - Komentari (173) - Isprintaj - #

<< Prethodni mjesec | Sljedeći mjesec >>