Ala ča te izgadilo, Marinko moj !
Ma di to?
Aj ne čini monu od mene..Znaš ti dobro di !
Očete reč da me izgadija oni Lalić ?
A da ko drugi !
Ma baš me briga !
A obisi ti to maški o rep, sunce moje...Ma si mu brzo iša odgovorit !
Baš je meni puno stalo do takvih čunki ! To san ja dava Globusu intervju o Meksiku a novinar me onda pita i za ono pismo ča ga je Lalić ka potaka - a onda, bokun, i o njemu.
A lipa ti je ona špančera ča si se litreta š njon. Oni sombrero. Pari se ka da si niki divji bandolero oli vagabund a ne pitomi spličanin.
Ma to je bilo onako radi atmosfere !
Je... lipa ti je atmosfera...Nima ča! Lalić te napa da si prapotopna komunjara i boljševik...Da si vođa nike splitske komunistiške bande koja je s Bandićen ušla u šape - pa skrojila cili onu vašu stranašku Konvenciju.
A vidite, šjora File... čovik je, more bit - pinku rebambija !
Ma da pinku !
Dobro, dobro - to se tako reče....
Po njemu ti si pravi ajduk i arambaša...Ma koji si ti uncut...Niko na tebi ne bi reka..jer onako na prvu. Pariš ka umiljato janje !
A ča je sad su Vama...pa znadete baranko Vi da su mi to isto govorili devedesetih godin oni najgori desničari i crnokošujaši !
Ma znan ja to...Marinko moj. Nego se mislin: A Bogati, more bit da su ti judi bili i u pravu kad ti to isto danas govori Dražen Lalić koji se prodaje za livičara...
A šta je, je....Malo se okuražija ovih dana.....
Ma jemaš ti prav. I vrime mu je. Nisan ga jemala priliku čut ranije...ono kad je bilo gadno...Kad je tribalo imat muda za branit livicu...antifašizam.
Kako ste ga i mogli ćut..kad je onda muča ka zaliven.
Ka začepjena demižana!
Onda su ga sad otčepili ! A ko mu je to diga čep s justa...pa se sad uvatija gadit esdepe a najskoli tebe ?
Baš me briga. Taman ću poč vodit računa i o njemu i od njegovin stvarima !
A nemoj tako. Čovik van je napisa pismo a na svako pismo triba odgovorit.
Samo ni ja ne znan kome bi ga impoštala...Njemu oli nikoj grupi ?
Nikomu !
Je si nepristojan. A lipo ti je reka da si boljševik...Nego ča ti je to boljševik...a pametno moje ? Biće nešto puno lipo !
Ajme meni..svega će te me umest. Ko bi Van sad i to poša objašnjavat ?
Ma dobro...fermaj malo ! To je ka ništo skroz na skroz obrnuto od Lalića....Je li tako ?
A je...On baš tako misli !
Ma vidi ti..Sad mi je sve kjaro.
Ajde drago mi je čut !
Ne zajebaji me..vengo me slušaj. Ako si ti onih gadnih devedestih ima muda branit svoj SDP i livicu a on se uvuka u mišju bužu ka nika vrsta pantagane ča stalno čiri kad će proć nevera pa da omar iskoči iz rupe na svitlo - e onda je prava stvar bit oti tvoj boljševik.
Jo meni..sve Van se izmišalo...
Ma muči, cukunu jedan.
A evo mućin !
Ako je on doša nazad u SDP tošno prin vengo ste uzeli vlast - pa je tražija po Zagrebu da ga metnu na visoke pozicjune u stranku doli u Splitu..onda je boje bit boljševik nego liziguz ! Jel tako !
A more se i tako reč.
Naravski da se more !
Ako se najidija na tebe jerbo mu ka niste dali stan...a on bidan misli kako se toliko namučija oko organizacije maškari i krnjevala u Splitu da mu je, u najmanju ruku, tribalo dignit spomenik na misto o Bajamontuše - onda je boje bit oti tvoj boljševik nego umišjeni samojubivi puvander...ka ča je on.
A ča ja znan ?
Znaš ti, dobro znaš...tičice moja !
Eno ti ga sad piše da sve lažeš jerbo da je bija junak nad junacima, samo ča nikor to nije vidija..onako na prvu....i da si izventa kako su ga u onu vašu esdepejsku Akademiju oni mulci anonimno ocjenili ka najgorega jerbo da je bija najboji....Pa se sve mislin je li boje uporno pričat laži o samome sebi oli bit uskok, ajduk oli recimo boljševik...I moran ti reč da bi ja ovako stara prin obukla monturu o tih tvojih boljševika nego od sebe činila Krnju ka ča to radi veliki socijolog o Torcide...Jel tako ?
Ma di ste sad Torcidu našli ?
Pa je li on doktorira na Torcidi ?
Je ! Pa šta !
Ništa ! Pusti me na miru. Znan ja ča govorin !
A stalno ti prigovara da si ti ka Bandića, sa tin tvojin boljševičkin udarnin esdepejskin spliskin grupan, nikako namistija u Pridsidnisštvo od stranke..
Pa šjora File moja, oli ne vidite da je popizdija ?
Bome vidin..jerbo ča ti i samoga sebe ne bi uvalija onda u to Pridsidništvo...kad već moreš i druge ?
Pa to i ja govorin !
Je, ma ti ne razumiš da je on čovik koji ne viruje u tajne izbore nego u to da se funkconeri meću dekretima i šporkin igrama. Zato je i kuka i kumija one po Zagreba da ga metnu za nikoga šefa u esdepe. Pa kad nisu tili...štica se čovik. Jer ko to ne bi takvoga genija vazeja za šefa ?! Makar u Županiju !
Ha,ha,ha....
Ma ča se smiješ nevojo jedna nevojna..Ištraca te ka niko do sad.
Boli me nika stvar za to..
Ajme meni šporkačuna jednega. Ma ča to govoriš? Nemoj da ti opalin jednu trisku priko te tvoje čunke..jesi li me razumija...Budi pristojan kad pričaš su namon !
Škužajte šjora File ! Skužajte !
Ajde, ajde....dobro., neka ti bude - ali samo ovi put !
Fala in !
Nego, ča to priča da spliski esdepe ne vaja ništa, da ste nikakvi, da jemate kilave rezultate..Da ste gori nego ča je Ajduk kad mu gre najgore ? A za sve si, naravski, kriv ti.
Ma pustite ote priče. Kažen Van ja da je otiša malo, ka šta bi to bračani rekli - "put Milne" !
A oš reč da je pinku ka rebambija, otiša na kvasinu !?
Bože oslobodi ! Nikad to ne bi reka...nego..pari mi se da je malo prikoviše nervožast i da je posta ka niki ridikul...Niki Krnje !
A zašto?
Pa u Splitu smo na ovin izborima dobili skoro tridesetipet posto glasov...ča je najboji rezultat kojega smo ikad učinili. To Van je boje nego ča je SDP u prosjeku uvatija u ciloj Rvackoj.
A koliko ste uvatili u cilu Repupliku ?
Oko tridesetidva posto !
Pa onda dobro radi ta vaša boljševička banda !
Ma kraguc i boljševici ! Ostavite se tega !
E baš neću..jerbo me zanima ča to on prklja !
Ma ko to ?
Pa oti Lalić , šempjo šempjasta !
Aaaan !
Inače je naša izborna jedinica jemala u sebi dvi županije. Splisku i dubrovašku. Grad Split uvatija je pedeset posto svih glasova esdepeja u toj izornoj jedinici.
Znači sam Split pola a svi ostali, u obe županije, drugu polovicu ?
Je, šjora File, baš tako !
A i ja san van dala glas !
Ma znan ja to, znan...A, inače, Split je uvatija priko sedamdeset posto svih esdepeovskih glasova u našoj županiji.
I to je, temu Laliću, malo ?
A tako ispada !
Malo je nikima u glavi, dobri moj Marinko ! Ma ča ga uopće obadaješ ?
A kad stalno pizdi !
Taki su mi najdraži ! Sami sebi bi spomenike dizali...ali neka drugi radidu za njih ! Ne boj se, nećedu se takvi umorit...Oni se oznojidu samo ispod jezika ! Da jin je balit po cili dan bili bi du najsritniji...I naravski, da to prinosi televizija. Ja mislin da oti Lalić u takujin ne nosi pineze vengo mac svoji slika u bojama pa stalno vadi dikoju i misli u sebi : Jo ča san šesan ! Ajme ča san lip ! Ajme koja pametna čunka ! A biće mu se doma i zrcalo istrošilo od pustega gledanja...
E, sad ste ga baš pritirali...
To ti misliš !
A je se volite svađat !
Je...baš mi je gušt karat se s takvima ! Jo ča bi se ja karala š njin !
Šjora File moja, ne znadete Vi ča govorite ! Same šporkarije !
Ma koje šporkarije ?
Ne znate Vi ča u Beograd znači glagol "karat se" !
Jebe me se !
E baš to...Pogodili ste iz prve !
Ma dat ću ti jednu, skoči se ona, i zamane rukon - onako par la finta...Ali vidin ja da joj se "brk smije" i da se nije uvridila.
Slušaj ti, mangupe - nego reci ti meni a kako se more ulist nikako u te tvoje boljševike ! Meni se to pari puno dobro ! Znan da si bija uvik s pravin judima,,,da si branija svoj stranački dres kad ji je malo bilo u vašoj momčad i kad je valjalo igrat teške utakmice s puno jačin protivnikon...znan ti cilu racu...znan da ne daš na se i na one ča su uvik bili za pravicu i poštenje...eto vidin da van gre dobro....a Bogami nisi samojubiva plačipizda niti ti je udrilo u šufit da si najpametniji na svitu...A to ti je meni glavno !
Ma koji boljševici ! Evo ćete me i Vi uvalit u govna...To Van oče reč da smo ka niki politiški dinosaurusi i staromodni propuvali judi....
Ohoooo...Jesi me pripa ! A oš reč da je ka ti Lalić nika novotarija na ovemu svitu. E moj mišu, vidila ja san ja takvih puno u životu..Njih je uvik bilo i uvik će ji bit...Oni su ti ka buve oli ka krpelji na pasu...Žividu od njega i na njemu, vozidu se na njemu..grijedu se na njemu i sišedu mu krv. Najviše ča mogu uradit je da ga tu i tamo učipnu za tilo...tek toliko da prižividu i da se zna da postojidu...Ma koliko god bili dosadni i ma koliko god bolešćina mogu izazvat - na kraju uvik ostanu samo obišne buve oli krpelji i ništa više !
Jesi li me razumija ?
Jesan !
E, onda dobro ! A sad gren ča...jer moran u spizu...I evo me ovih dana doli do u vas na Bačvice. Moš se odma spremit. ...Neš me se tako lako rišit, Ja ti kažen. Oču i ja, ovako pod stare dane - u te tvoje boljševike
Aj, zbogon ti bilo !
I ode moja dobra šjora File u spizu na pazar.
|
