Neka se lipljiva vrućina uvatila za Split i ne da nikome mira. Ne moš radit, ne moš odat, teško je i sidit, loše se spava...svi su štufi i čangrizavi....a posebno je teško mislit.
I tako...vraćam se ja oko tri ure poslinpodne doma. Jedva san se popeja uza skaline do isprid portuna o moje kuće na Pujankama...i, onako, cili zapuvan i crven u facu - sta san ne bi li malo otpočinija ...jerbo mi se parilo da bi moga past po tleju u afan o puste debulece ča me čapala.
Nisan dobro ni uvatija arije...kad začujen:
A lipo san ti govorila da će te spiza dotuć. Samo ti nastavi tako pa neš još dugo ! Ola ča bi razveselija sve koji te ne volidu !
Dignen glavu...kad ono - ko će drugi nego šjora File. Sidi sa još dvi svoje prijateljice u ladu na šentadu ča su je dica dovukla do ispriid portuna...a svaka od nji maše ventulon...ladeći se i ogovarajući sve i svakoga ko in naleti na itac.
E, zdravi bili šjora File !
I Vama gospoje moje....lipo se javin njezinin kumama.
Zdrav mi bija moj Marinko...Bogami i tribat će ti zdravja ako se ne baciš na dijetu, ja ti kažen.
Ma dobro, dobro..Ovo san se malo zapuva jerbo puno sidin na poslu pa nisan u kondiciji !
A troke oni bidni fuzbaleri ča trčidu za napuvanon mišinon po dvi ure bez stat...doda šerjasto moja dobra susida.
A vidin ja da i Vi pratite ovo prvenstvo o baluna !
Je...ne mogu bez baluna...Po cili ga dan sanjan....podrugljivo će šjora File.
A naš mali Denis baš voli balun...Eno smo mu kupili dres o naše reprezentacije...doda gospoja ča je sidila s live bande o šjore File !
A je...vidila san ja odma da je to jedno puno bistro dite. Ne znaš je li pametniji on oli ona napuvana mišina ča je probiva nogon po cili dan isprid kuće derući se ka nika beštija ....obrecne se šjora File na nju.
Molin te ne vriđaj mi unuka...
Ne spominji mi fuzbal....Oli ne vidiš da van očedu samo zamličit oči...da se ispuvate i izbeštimate gledajući po cili dan fuzbal na televiziju - namisto da beštimate na ovu našu šesnu Vladu i na one ča je vodidu ?!
Ma ča ti tu laprdaš ! Ča se uvik činiš najpametnija ! Najidi se njena prijateljica...Moj je Denis jedan pravi talenat za balun. I ako baš oćeš znat dat ćemo ga u Ajduka čin malo ojača. Malo nan je meškinjast !
Bilo bi van boje da ga date u skulu.....i da stane trčat ka manit oko kuće. Pari trotul !
Ako bude dobar u balunu bit će dobar i za skulu...a još će nač i koju manekenku za ženu...Vidin ja da si ti đeloza ča i tvoj nije takvi talenat...ne da se ova njezina.
A jemaš se čime i pofalit...zaključi šjora File.
I kad san već pomislija kako su se napokon smirile..ubaci se i ona treća gospoja, koja se očito osjetila zapostavljena, u raspravu:
Tvoj Denis i ta njegova štraca o žene ćedu bit stalno na televiziju u onu emisiju o poznatin čunkama ča se rastavjadu, šaketaju i minjadu žene i muževe ka obićni svit mudante....Ma ko to ne bi poželija svon unuku ?!
Ma koje mudante..?
A bome mudante ! Kako koje ?
Ma jel ti to mene ka vriđaš...?
Bože oslobodi...Ala ča se ti pališ na mali gas ?!
Doooosta! Izdere se moja šjora File na njih...Ne moš ni dvi beside reč a da se vi dvi ne pokarate...Prave ste peškaruše. Pun mi vas je kufer !
A ti onda pojdi ča ako te ne komoda naše društvo....ofendi se Denisova baba.
A kakve ste...bilo bi mi boje i sa Sanaderon sidit vengo su vas dvi !
Baš je to jedan šestan čovik...doda ona druga. Ma si ti uvik za posolit na kraju..... pa tvoja uvik mora bit zadnja !
Šestan ?! Je, je...ma baš je šestan. Eno ti ga na pa ga vodi doma..Ionako je oni tvoj uteka od tebe jema petnajst godin. A dobro je i izdura i po ure s tebon...kakva si !
Moooooliiin ! Skoći se na dvi štrjkave noge uvridjena gospoja.
Čaaa si rekla ?
A bome to ča si čula..reče šjora File i prikriži značajno ruke...
Vidin ja da je đava odnija šala pa se umišan.
Ajde molajte, molin Vas lipo...Ča Van je sad ? Tri stare prijateljice pa se tu karate ka nike balavice..A ča će svit reć ? Jedva čekaju da se počepušate ! Oli ne vidite da Vas svi gledaju sa ponistra...?
Sve tri u isti ćas dignu poglede prima ponistrama...I zbilja, svugdi baranko po jedna glava na svakoj ponistri prati zbivanja na šentadi isprid ulaza u portun o kuće.
A čaaa je ? Ča jedagube, manjamuktaši i neradnici ? Nimate pametnijeg posla nego tu čulit po ponistran i po cili Božji dan i slušat ča pošten svit govori ! Ajde, boje van je da bižite ča...jer koga ja zapantin neće dobro proć.....zapriti moja šjora File.
Ma je si ih ti vidija, Marinko moj...Sve to triba potaracat, ja ti kažen...
Dobro, dobro....Ajde, sad ste se ispuvale...sve će bit dobro.
Ma ča će bit dobro !?
Ajte doma onda gledat fuzbal !
E baš neeeću, jidno će šjora File....Dosta mi je bilo vidit poslin one utakmice s Austrijon kako je Sanader posta i športski komentator....pa da mi odma krv udre u temple. Dobro me nije kolpalo !
A zašto ?
Ma da zašto ? Pa ča ne vidiš da očedu od nas činit pizde ! E...ako o tebe mogu pravit monu...od mene Bogami neće !
A grubih riči...šjora File moja ! Ne virujen svojin ušima da to čujen od Vas ?!
Nisan ni ja virovala svojim očima da je Sanader posta športski komentator - pa eno je ! A ča ti ja mogu. sinko moj. Ako neš virovat svojin očima i ušima a komu ćeš onda ?
Jemate Vi prav !
Nego ča da jeman ! Nego ča ! Ma je po naroda pošandrcalo pa niti čuju niti vide ono ča jin je prid noson. A oti nos jin ovi iz Vlade stalno rastižu pa rastižu! I to kako ! Pa dokle ćedu to trpit ?
Znači, more čovik postat mona ?
Da more ? Nego ča da more ! I to kooolika...raširi ona patetično svoje tanke ruke.
Vidin ja da je uvatila ona njezina parlativa...i da će teško fermat.
I slušaj ti mene, zastupniče...pripriti mi ona svojin prston ..ka niki malašni, ženski Grgur Ninski.
Svako jutro kad se probudin čujen da je krešija benzin..da će krešit struja...da će krešit spiza i da ćemo svi skupa otić u prdec.
A Sanader mi još kaže da kako se moramo pomirit s otin da se neće moć živit ka šta se nekad živilo !
Ma Bogati...A kako je on živija prije ?
Je li on živija boje onda ili sad živi boje ?
Oču i ja živit boje...sad - ka i on ! I ča on jema meni tod pritit da mi neće bit dobro. Ma jo da mi ga je trevit...čuja bi me i on i ona Kosorica !
A ča Van je ona sad kriva ?
Zna ona, ne boj se ! Čula bi me, čula !
I još nešto...Evo gren u subotu u vižite jednoj mojoj ća joj se unuka udala. I ča ću joj ponit za dar ? Ali kako je krenilo sad ćemo...kad gremo u babine, oli na vinčanje...oli na kštenje diteta.... na dar nosit botilju-dvi benzine oli nafte. A ako si bolje stojeći onda kanistar o deset litri ...Jer to su kod nas postale najdragocinije stvari. Brzo ćedu i momci vatat cure faleći se: "Mala, pojdi za mene...jeman pet rezervari plavoga dizela !" A cure se više nećedu mušćat parfemima vengo sa Eurosuperon 98...pa ćedu se momci falit: "Ala, uvatija san jednu...je miriše lipo po kerozinu...Biće da joj otac radi u koju stranu firmu. Upala mi sikira u med !"
E baš ste vražji šjora File !
Nisan Marinko moj ja vražja..vengo je izgleda Vrag doša po svoje....a cila država, ka i Titanik, udrila u valcer dok tonemo, tionemo....
Njih je briga jedino za fuzbal !
Ala...ala, malo više kurađa...optimizma, susido ! A sad mi stojte dobro...moran doma...i krenem da ću uvatit kvaku vrata portuna o kuće.
I još nešto Marinko moj,...začujen za sobon šjora Filin glas...Već sad se zna ko će se utopit a ko će se spasit sa ovega našega Titanika....viruj ti meni. A kad ovi ča tonedu dojdu pameti - već će bit kasno !
A brodovi za spašavanje bit će puni guzonja !
Opet će najebat oni iz treće klase !
|
