Jučer ka da bila subota a ne petak.
Ljudi spojili prvomajske praznike sve tamo od sride pozapodne pa do u prvidan.
A na Prvi Maja, ka šta je i obićaj u Splitu, vajalo je poć na Merjan, pa smo onda otišli na izvor rike Jadro u Majdan di nas je čeka Darko, pa do Matka u Kaštel Štailića u Biblijske vrtle - di su esdepeovci činili feštu...pa smo na kraju svratili do Rilje i njegovih u Trogir. Jedva smo se škapulali da ne moramo još do Okruga iako je Miše stalno navaljiva da skoknemo do njega na bob i manistru - a dobro znan koliko je Venko goluz na otu spizu. Jedino mu je soparnik draži. Ma je vajalo popodne nikima još na Brač...i u Tučepe...tako da smo se jedva izvukli.
Šjori Fili san obeča da ćemo u petak na kafu na Bače..jerbo je Prvi Maja činila sa svojima tamo blizu Kotlenica na jednu livadu kraj špilje Vranjače. Pekli su janjca ka šta je u našin krajevima stari obićaj - kad se skupi familja a posebno na feštu o Prvega Maja..
Pa di lipo tamo ?
E, a dica volidu trčat po livadi...a bome nije ni daleko - A i čovik se pinku makne od ove gradske gungule i šušura...taman za odmorit možđane od sviju nevoja i briga ča se nakupidu u prsi poštenoga svita.
Ajde, dobro...onda u petak na kafu !
I tako san je jučer ujutro lipo odveja do Žbirca na Bačvice...ka šta je ona bila i zamislila.
Sili smo na taracu od kafića i uživali u lipon sunčanon danu i pogledu na Splitska vrata između Brača i Šolte i na dicu ča su se igrala isprid nas na pjesku. Bilo ji je i u kupačin gačican i u bikinijima...i u svin mogućin krpicama, ka na pravu modnu reviju...a igralo se i na picigin i šetalo uokolo s pasima
Šjora File gucne malo kafe iz čikare i zatvori oči.
Ajme, baš je lipo ovod.
Je, ma kako ne bi bilo lipo. A tek ovi profjumi od mora i ovo malo bave ča nan lagodi lice. Čini mi se ka niki maeštralić. Ma ke Brazil, ma ke Italija...? Nima do Bača i našega Splita !
Molila san Boga samo da ne bude kiše za Prvi Maja. To mi je najmrže !
I meni....
A sičaš li se ti, Marinko moj, kako je bilo tužno lani u ovo vrime...kad je partija naš dobri Ivica ?
A ko se ne bi siča !
Znaš, ja san ti na nj gledala uvik ka i na svoje dite, viruj mi...Prvi san ga put bila trevila na Rivu još devedesete godine na oni vaš veliki skup. Ma bija je vas šesan...Svega san ga izjubila kad je doša meju nas. Smija se ka malo dite...Vidilo se da je to jedno dobro čejade...da je o dobre race, da jema šesta o pravega domačeg čovika i da jema srca i jubavi u njega koliko oš. A to ti je meni najvažnije.
Znan.
Ja ti odma namirišen kad je niko dobar. Ali i kad je guba ! A, ne more mene tu nikor privarit. Ni da je najveći mangup....
Je, mogli bi ste slobodno radit u policjote za namirisat lupeže i lažjivce !
Zajebaji ti, zajebaji jednu staru ženu - Samo ti zajebaji, ma je tako...zaključi ona.
A ča su mi išli na živce oni ča su od njega tražili da bude ka niki lajavac. Oni ča su mislili da bi stalno triba bombizavat...a ne onako pametno - ka ča je on zna, lipo po valju vatat punte.
Ma jedna stvar Van je igrat na balote a druga poć vodit politiku, šjora File! Ča to pričate ?
Evo ga na, da ča ja pričan ?
A evo ti dajen mukte repeticije...da i ti čakod naučiš, beno jedna. Eto ča !
Malo je bilo takvi, Marinko moj, viruj ti meni.
Pun je meni kufer onih ča stalno palamude, mašu rukan i vičedu. Fali nama pameti...Fali nama smirenosti i rišpeta prima drugima. Eto ča nama fali...!
Ma ko mi je to doša govorit ? Ma di baš Vi šjora File ? Pa Vi stalno vičete i pritite se okolo svima...Vi ste ka niki anarkišta, terorista o riči, rivolveraš...Niki ženski Če Gevara....
Pusti ti mene lipo na miru. Vidin ja da ti malo peškaš ! Ne razumiš ti moju taktiku i štrategiju. Moran ja dikod i podignit glas - ali samo onda kad drugi mučidu ...jer ne vaja, brate, niti bit muto mutavi. Uvik vaja nač miru, e !
A zato ste Vi volili Račana.
Ne samo zato...Ali ako baš oš znat..i zato. Zna je oti svoj posa. Učinija je on ono ča stotine drugih bukača ne bi moglo. Oni bidu samo lajali i lajali. Ka pasi na misec. Nije on bija niki šotokucin...ali je zna napravit puno a da se na prvu ne vidi. Zato je on na svoj način i brda pomaka. Oli si već zaboravija na koje su vas gradele tili ispeč ?! A vatru su već bili zapalili. Eto ti ga na...zaključi ona i ljutito naglas srkne još kafe iz svoje čikare.
Ma jemate Vi prav šjora File. Znadete Vi dobro da san ja iz njegova garde !
Ma Bogati...A nisan znala da si ti neki gardist !
A to ka oni niki crveni-gardist !
Ajde nemojte me činit ludin kad nisan. To se samo tako kaže ! Tija san reč da smo puno političkeg puta za njegova života skupa učinili.
Je, je...pa Vas sad zovedu da ste esdepejski barakaši...Da vas se triba liberat !
Asti ga miša malega...pa vidin ja da su i vas izludili foji i novinari.
Je, našali su Crikvu u koju ćedu Boga molit ! Ne virujen jin ni koliko je crno ispod nokta. Ma ne more nikor prominit ono ča ja mislin i ono ča ja znan - a troke oni !
A ča to ?
Pa da je Račan učinija pet od šest i da se mogu pritumbavat i činit kerefeke koliko ji je god volja ali da to nikad neće moć prominit.
naravski.
Je, samo da vi esdepejci to ne zaboravite..i da ne inšepjate kako Svit počinje tek od nikidan...Da sve uvik počinje isponova. Da znaš samo koliko je takvi Salamuni najebalo, Mariko moj...Nima gorega od onega ča umisli da je popija svu pamet od ovega Svita i da su svi drugi tukci osim njega. Čuvajte se otakvi ! Ti van ne mislidu dobro !
Čuja san to ijadu puti...
Pa šta da si čuja i sto ijada puti ! Nike stvari ne smiš nikad zaudobit...Uvik jih moraš držat na pameti.
To Vi ka da ste meštrovica u skulu, a ja ka da san prvašić !
I jesan za tebe meštrovica ! Cili je život jedna velika skula ! Puno pametnija i urednija nego ča je ona od onega Primorca...ča pari nika čapja oli roda...i ča je učinija ove makakade da dica moradu poć na ulice učit svoje ministre kako se radi posa !
Svaka jin čast...
Pusti ti sad to...Nego zacimentaj ti nike stvari u tu tvoju čivericu. Ne daj da blatidu Račana. Nikomu. Ni njegove ljude ! Jesi li razumija....Ne pjucajte sami na sebe i na ono ča ste najboje napravili. Za istin ste stolon jili...kad ste bili mižerni i kad ste dilili samo nevoju i ideale. Čuvaj se onih koji mislidu da muku ne triba dilit...nego bi tili dilit privilegije...a jebe ji se za cili Svit. Drž uvik na oku takve, jesi li me čuja ! Tek je pasala godina dan odkad Ivice nima.
Oli Vi mislite da san ja niki žbir ?
Ma koji žbir ? Ne daj samo da van stranku raskupusaju mangupi....
Ka da ste čitali Lenjina koji je govorija o mangupima u našin redovima....misleći na svoju stranku !
Ajde s vragon...molaj se ti sad velikih riči pa i otega Lenjina. Friga se meni za njega i čiji je bija. Ja njega nisan znala ma Račana jesan. Bog mu da pokoj !
Dobro šjora File.
Ni ti ovo Rusija vengo Rvacka ! Triba učit od svojih....i na svojoj škini.
Ma je, reka san Vam već...
Samo da ti još ništo rečen...pogleda me ona nekako ka tajanstveno.
Ti znaš da ja puno držin do Svetoga Ante...
Znan.
I da nigdi ne gren prez njegove slike..,.jerbo on pazi na me i na moju familju.
Ma reka san Vam da znam.
Ali ne znaš da uvik sa sobom nosin i još jednu sliku..nastavi ona polutiho i zavuće ruku u svoj veliki boršin i nešto izvadi.
Vidiš li ovi portafoj ?
A vidin, nisan slip...Oli u njemu nosite dolore ?
Aj ne zajebaji...reče ona i izvadi jednu sliku u boji. A na njoj ona i Račan na splitskoj Rivi na onemu našemu skupu iz devedesete. Zagrljeni.
Asti ga...a ko Vas je ovo litrata ?
A ča te briga ! Je li sad vidiš da ja jeman prav govorit o Ivici...jerbo san se skupa sa njin tukla za livicu kad je bilo najteže, a ?!
Šta je...je ! A baš ste šesni. Bokun mlaji ali skoro isti !
A vidi mi njega ! Je li ka pupa ! Kako se samo smije! Znala san ja da u maloj boci špirit stoji...Ali, zna je on svoju. Ni on bija brzoplet niti je išta radija štrci-brci. Ne ka ona juta trava na jutu ranu. Nego ka prava likarija..Višje su vajala dvi njegove kapi nego cila demižana od onih ča su se činili važni i tukli šakan u prsa. Od njega vaja učit....završi ona i stavi sliku kraj Svetoga Ante u svoj takujin...pa s njin u boršu.
A to je Vama on ka niki svetac !
Pa skoro da i je, ako baš očeš znat !
A, ne bi Van Crikva na to lipo gledala !
Pusti ti mene. Jeman ja sveci ovod na Zemji i na Nebu. Svaki koji čini dobro drugima i koji manje misli na se vengo na druge - za mene je svetac.
Je, ma ga više nije !
Ma ča pričaš pizdarije ! Ma kako ga nije ! A ča ja ovod govorin ? Oli ne vidiš da je u meni. Pa valjda je baranko bokunić i u tebi. Da tako ne mislin ne bi ovod s tebon ni sidila niti bi njanka riči s tebon progovorila. Inače bi mu sve bilo za ludu !
Jemate prav šjora File...rečen nikako posramljeno.
Ovod je, ovod..i to ovega ćasa - tu su namon dvojicon.
A očemo li onda za njegovu dušu po bićerin prošeka?
Ma oču za njega i dvi ako treba...živne moja dobra šjora File.
Kamarijer ! Kamarijer !
Jemate li prošeka ?
Da jema li prošeka ! Pa niste u biblioteku nego u kafić..Naravski da jema !
Aj...daj onda dva !
I ode momak....a šjora File se odjedanput skoći na noge.
Ej...ej ! Ali ako jemaš onega sa Hvara. a ?
Nać će se za Vas gospojo, nać će se !
E sad mi je lakše....Ne bi mi Ivica nikad oprostija da san vazela koji nevajali prošek za pokoj njegovoj duši. Svašta bi mi reka kad se buden gori srela su njin...a jema bi i prav.
Uto je konobar donija dva hvarska prošeka !
Ajde Mariko moj, za pokoj Račanove duše !
I ispijemo prošek...
Momak, moš li odmah naplatit ovo, molim te...žuri nan se.
A ne nikako...Ako je za Račanovu dušu...časti kuća !
Fala in !
Ne zahvaljujte...bilo je od srca, a to je najmanje ča za takvega čovika, ka ča je bija Ivica, mogu učinit !
|
