Evo nan već po dana kiša ne da mira. Zovu malo boje vrime - da će zateplit, da će kiša stat....a ona uporno pada, pada, pada....A kad u Splitu pada kiša to je već uvod u veliki konfužjun po gradskim cestama...jerbo su splitski šoferi nika ćudna raca - postanu nervožasti i jidni čin sidu u tonobil....Veliki su beštimaduri i ka da podivjaju čin se uvatidu timuna. Jema sudari, klizanja, okrićanja i tumbavanja na sve bande...tako da normalni svit jedva čeka da kiša ferma i da sunce izajde iza oblaka. Ne daj nan Bože sniga. Vas se naježurin i od same pomisli na njega - jer onda počinje pravi rat. Dica trčidu oko auti i skupjadu ono bokun sniga za grudat se - a pošto ga nikad nima bog zna koliko..onda snigon samo obložidu koju okruglu stinu ..pa udri! Tako da jema razbijeni čiveric, nogu, ruku i svi vrsti judskih kostiju...jedni trčidu za drugima ka maniti a gradski promet ferma i po fabrik i firmi stane radit jerbo da su izvanredne okolnosti. Deboto isto ka..kad Sanadeer ne uspije sastavit Vladu i dobit većinu u Sabor ! Eto zato mi i kiša gre na živce jer je ona ka nika uvertira u opći konfužjun kojeg nan, baranko u ovemu gradu, bome nikad ne fali !
I sasvin normalno da po toj kiši moran trefit moju dobru šjoru Filu !
Ma di ćete po oven vrimenu ?
A, evo gren do grobja...
Pa di baš sad...
E, a moran....Zasluži je oni moj da mu stavin koji gariful. Nikad ja to ne zaudobin...jer dobri judi se vaja sićat i onda kad ji višje nima. Posebno onda! A ovi moj ti je bija dobar ka kruv...Nima višje takvih...doda ona sjetno.
Ajde ulizite, bacit ću vas do na grobje !
Ma ne tribaš...Znan ja da ti jemaš posla. Evo sad će autobus..
Ajde, nemojte me jidit..Ulizite kad van govorin !
I uđe moja šjora File. Side na prvi sic...do mene, lipo se veže kajišon oko pasa ..onako sva atento... i stavi buket garifuli na prsi.
A baš Van je lipo cviće!
Naravski da je..ona će ka malo uvriđeno. Ne nosin ja mome Antiši svašta ! Volija je on gariful višje nego ikoji drugi cvit. Aj priznaj da ji se ne moš nagledat o lipote...zaključi ona i turne mi cili oni buket isprid nosa tako da san jedva i cestu vidija.
Je..je...šjora File...Samo ji maknite isprid moji očiju jerbo ćemo se rumbat !
E..sve ti smeta...pa nisi baš ti toliko ćorav da ne vidiš bokun ceste ?!....reče ona i nekako se sumnjičavo nagne prema meni i ka de me odmiri sve od glave, priko ruku...do nogu...
A dobro ti i govoriš. Kakvi si smotan još ćemo svršit dikod u konal oli fošu. Aj, ćoro moj...samo ti vozi. Ma di se ja bidna uvik namirin na ovake...zaključi ona više za sebe, onako u bradu.
Nego, Marinko moj...tide ona započet pričat pa naglo ferma i zapita: A mogu li ja s tebon razminit koju besidu a da te to ne razbuca...i da moš na miru vozit. Još u meni jema špirita...a da mi se baš sad gre put nebesa ?
Ma morete, morete...
Ajde, kad ti kažeš...odgovori ona, ali nekako sumnjičavo nakrivi glavu i pogleda me priko oka.
Nego...a ča ti kažeš na sve ovo?
Ma na kojo ?
Ma ča na kojo? Aj ne glumi monu ! Ma na ove izbore..ove šedute kod Mesića...Na Sanadera i njegove pritnje...Na tvoga Milanovića..na sejake i liberale....Ma na cili ovi konfužjun..Jema li temu kraja i ko će dat Vladu ?
Ola ća ste me napali s pitanjima - pobunim se ja. Pa nisan ja Salamun da na sve to jeman odgovor!
Ma ne boj se, znan ja da ti nisi Salamun! Daleko od tega...doda ona šerjasto. Nego svašta narod po pazaru priča. Jedni govoridu da će novi izbori..Drugi da je Sanader u gabuli i da zato izvodi ove monade s izventavanjen nikog ka izvanrednog stanja. Pa jopet...da će Zoran bit pridsidnik Vlade. Ko bi ga višje zna ča je ča ! Samo da nas višje ne mantate i da se sve ovo skupa nikako skupusi!
Ma šjora File....To je jedan ozbijan posa i triba vrimena...
Ma pušti ti vrime na miru. Ja bi jedino otila da dojde do promina. Znaš ti mene! Triba jemat srca...a bome i muda! Nemoj da te čujen kako ste se ispuvali, kako nimate force i da će te odustat! Pa znadete li vi da su svi judi koji nisu glasali za hadezejca Ivu - dali svoj glas za promine! Samo da nan sijdu s glave ovi muizuviri !
Ma znan ja..
E ne znaš...Jerbo da znaš ...svi bi ste sve svi stavili na jednu jarpu i rekli: Dosta je bilo !
Ma ne gre van to tako...
Ma ča ne gre ?!
Oli oni Friščić misli da su za njega glasali da gre sa doturon Ivon ? Oli je išempja ? Znan ja tolike iz njegove stranke..Eno se zlamenuju i ne mogu doć sebi kad jin se kaže da možda gredu s hadezejciman u kompu ! Isto ti je i s liberalima, viruj ti meni ! Tako obišni svit misli..i nikako drugovačije! Oli su oti vođe o stranki rebambili i oli žividu u bumbaku pa ne vididu da ćedu ostat sami samcijati...prez svoji članov - ako ji izdaju ! Pa ne postoju oni zaraj sebe nego zaraj svita koji je glasa za njih! Jel dobro ja govorin...?
Ma je. je....ali politika je..
Ma tiš mene poć učit ča je politika..I samo da znaš.... ako vako niki nastavidu neće višje svit govorit da je politika kurba...jerbo će i u kurbe bit višje poštenja vengo u politiku! Eto ti ga na...zapinjeno će moja šjora File !
Dobro, dobro..
Ma ni dobro, ni dobro Marinko moj...kakvi dobro! Ne bi van dala jist dok se ne dogovorite...
Ma ko to ?
Pa svi vi za koje je glasa svit koji nije za hadezejsku vlast! Ča se tu jema izumišljavat tepla voda! To je abak! Ka dva puta dva ! Ča jemate glumit velike čunke! Neš ti velike pameti uradit ono ća od tebe tražidu oni ča su te i doveli u Sabor! Evo...jesi vidija kako je izgorija oni Đapić ? A di i neće! Stalno se kokolava s hadezejon. Njegovi su dizali rukice u Sabor za njiove zakone...a tili sačuvat ka niku andu od opozicije! A ne gre to tako! Ni narod veslo čuća! Bogami nije ! A oni su umirovljenici najebali radi ovi njiovi spliskih privaranata ! Sve se, dite moje, u životu plaća...Kad - tad ! E....Završi ona značajno.
Pacijence šjora File, sve će doć na svoje.
I došlo bi, ne boj se, da ja vazmen stvar u svoje ruke...Ma mene niko ništa i ne pita - pa jin ti lipo prinesi ča ja mislin, jesi li razumija ?!
Jesan,jesan...požurin ja. Ma evo smo već deset minuti na grobju a Vi još niste svon Antiši odnili garifule.
Ne brigaj ti za njega. On je moja briga ! Bija je cili život strpjiv i dobar čovik - pa će znat i sad pričekat koju minut! Razumit će on mene. Sve ću mu ja tamo na grebu lipo objasnit. On je zanji koji me sluša prez brontulanja. I još ništo...Ma daj učini mi jednu jubav. Ja san sigurna i to sto posto da će Zoran uspit i da će se formirat ota vlada od livoga centra. Daj mu reci da bi tribalo izumislit ka niko Ministarstvo za narod...Onako da niko iz naroda bude ministar za prinit ono ča u narodu govoridu i mislidu o tin velikin politićkin problemima. Evo...ajmo reč da on mene stavi za Ministricu o naroda...Ma vridila bi mu zlata. On je pametan i mlad...a ja evo već u godinan i jeman vrimena koliko te voja za skitat se po pazaru, rivi, pjaci, grobju, , cvićarnicama, peškarijama, pekarama i svin mogućin butigama, bufetima i birtijama. Ako triba i na Ajduka ću poć ! Ja bi mu bila od najveće pomoći a da znaš...i potukla bi se za njega. Bi, ovega mi Boga...reče ona i digne oni buket garifuli u zrak! Ne bi mu tribali oni sa crnin očalima i ča jin viridu žice iz ušiju! Sve bi to šjora File sredila !
A....
Aj, boje ti je mući..i da si mu prinija sve ča san ti rekla. A sad gren mom Antiši sve ispripovidat. I nemoj me ćekat...jer kad počmen sa njin pričat tomu nima kraja...
I još mi na odlasku dobaci : Aj Bog...ćoro gi !
A ja ka da san vidija da se podrugljivo nasmijala iako se nije okrenila nego se sitnim korakom izgubila među čempresima i kapima kiše...
|
