Prošlu je subotu bilo vražje vrime. Čak je i u Zagrebu puvala nika ka bura. Pravi pakal. Ledeno i vitrovito a još i sa bokun sniga. Povratak zadnjim večernjim avionom u Split bija je priča za sebe. Kasnilo se uru i po radi vitra a kad je avion sleta parilo se da će se rapast na ijadu komada: tresa se, dršća. stenja i mava krilima ka nika betežna tica...Bože oslobodi ! Kad san doša doma na Pujanke odma san trgnija jedno žestoko piće da dojden sebi...Uostalon u nediju sam obeća šjori Fili doć na obid pa mi nikad ne bi oprostila da je avion pa i da smo svi otišli u bekala...Bogu za kurira! Ma ko bi njoj objasnija da to nisan učinija baš njoj za dišpet !?
I tako smo se u nediju, oko po bota, ka ća smo se i dogovorili, isprid njezini vrata nacrtali ja, Maja, Čepo i pas. Ja san joj u ruke nosija bocu "Porta" jerbo znan da voli slako... i jist i pit....žena je učinila nešto fritul, a Čepo je donija buketić lipega cvića.
Zazvonimo...Pas počne ništo gunđat i meškoljit se, onako po pasju...Ja upren u botun o zvona po drugi put... kad se vrata naglo otvoridu.
A ča je..Ča si navalija ka one male gubitniške stranke u vlast...Oli ti gori pod nogama..Di ti se priši? - pogodi me omar bujica riči s one druge strane praga. Nasmijana šjora File raširi ruke i izjubi Maju, meni otme onu bocu Porta iz ruku...a Čepi buketić lipega cvića.
Ola ča smo se bacili u trošak ! A je li to oti pas ? Pari pantagana u bundici ! Kolika je - mogla bi ga stavit na bor ka ukras ma bi se izgubija meju pustim balunima....navali ona odma - a pas počne piskutavo lajat i šlajfat zanjin nogan na mistu ka da oće uteč...
Ma ča si se pripa mišu moj..Neću te ja pojist! Baranko dok se ne udebjaš - nasmije se moja susida..a pas biž iza Maje !
Ola plašjivega kubanca..Neš ti belece ?! Ne biš ti moga, mali moj, s onin bradonjon Katron u klapu...Bićedu te ovi esdepejci već dricali i natirali da se profiniš ! Je to je jedna puno lipa družina ! Štaš poć govorit !
Vidin ja da se Čepo nekako ukipija na vratima....pa ni naprid ni nazad..
A ti si siguro oti kapo od mladih spliskih esdepejci !? Ma ča tu stojiš ka inkantan ? Ajde ulizi...zapovidničkim tonom naredi šjora File Čepi.
Ola lipega cvića - zagleda se ona u oni buket ća mu ga je već otela iz ruke! Ma baš ti fala, sinko moj...vidin ja da si ti od fine race a ne ka niki ovod...reče ona nikako ka zagonetno i značajno.
I tako smo prošli tu prvu prepreku od šjora Filinog kućnega praga.
Ajde, sidnite, komodajte se....ka da ste doma.
Vidin ja da se pas ne da otirat od Majinih nogu iza kojih samo viri i onin svojin crnin očima zvirka prima šjori Fili ka ustrašeno dite.E... prvo ćemo izist malo kroštul - a morete vazest i koju fritulu..reče ona gledajući sumnjičava u onu terinu fritul ča ji je Maja ponila sa sebon.
A ko je radija ote fritule?...upita ona i malo iskrivi onu svoju sidu glavu gledajući iskosa prima Maji.
A eto, ja...reče ona, ne znajući ča će sad bit.
U tišini je šjora File izila jednu fritulu...Malko je drobila u ustima i činila onu facu od veliki i važnih misli, ka da je u najmanju ruku niki profešur o fritul..i na kraju prozbori: Nisu loše. nisu...ma, ka da jin fali kap prošeka i malo višje suvic...Ali mlada si..Jemaš ti još vrimena za naučit kuvat, glavno je jemat voje...
Ola ga ča smo strogi danas šjora File...dobacin joj ja!
Ma Majo moja pusti ti ovoga piciškandala o političara..Ma odlišne su ti ispale, ne mogu bit boje..reče ona falšo. Ma mašite se vi malo mojih kroštul.
I tako je počelo.
Kroštule. Bićerin prošeka. Riblja juva. Salata o hobotnice. Slani crneji. Lešo riba. Frigane lignje i na kraju rožata - a pili smo šoltansko crno. Dobričić.
A Čepo moj lipi...kako ti je ono ime ?
Gojko !
Ma vidi ti - da Gojko ! A ovi tvoj Marin nikad mi to ni reka. E..puno lipo ime...Samo ga mi ovod malo dajemo dici ! Ma nima to nikakve veze...Kad se navikneš sve ti je isto. Glavno je da se znaš ozvat kad te se traži ..Jel tako !?
Gleda je Gojko nikako ćudno i ja samo molin dragega Boga da joj ne odgovori onako po svoju kako on zna. A velik je zajebant i klikeraš! Moglo bi bit ovod još barufe !
A to van je oni, šjora File ča je ono bija napravija cilu flotu o brodi pa je pušta doli na Rivu.
A vidi blente...Pa fala Bogu da ja znan ča je on sve radija...Zato san ga i zvala. To je bilo kad je oni stari prdonja pokaza golu gujicu isprid cile Rvacke..jerbo ga je uvatila televizija di kalaje gaće šoto! Ala - ča mi je to bilo smišno! Samo u Splitu jema takvi redikuli i matuni. Ja mislin da više nije smija na ulicu o srama. Biće i on nabavija škartoc sa dvi buže - za na glavu , ka ona dva penšjunata iz haesua, da ga nikor ne pripozna kad gre priko Rive!
Ma ne gre van Rivon više niko, uleti Čepo!
A je, je...Ma vidi ti mulca ča je bistar?! Jemaš prav. Otkad su je izneredili oni velomistaši tamo višje judska noga neće da ugazi. More bit jedino da se Jerkov po njoj šeta i to obnoć da ga kokod ne vidi. On je bija izvalija onu pizdariju da kako ne bi tribalo puštat višje nikad na Rivu one koji su bili protiv ove majmunarije ča su je oni napravili ! Ma je si li ti ikad čuja veće monade i goreg brezobrazluka. Prvo mi je doša iz Pule ovod u Split igrat u Jugoplastike, pa smo o njega napravili košarkašku zvizdu. Pa nan je vratija tako ča je unakaziija Rivu - pa bi, još na kraju. baš on spličanima naređiva ko more a ko ne more na Rivu. Ma di se samo rodidu tako pripotentni judi ?
A u rodilištu...reče više sebi u bradu Čepo !
Ma jel ti to mene zajebaješ mali, an !...obrecne se šjora File. Moli ti Boga da si mi simpatišan jer si izumislija onu obotnicu ča ste š njon išli po gradu da pokažete koliko je lupeštine kod nas i koliko je oti mafijaši meju političarima i u vlasti..inače bi sad dobija svoju. A dobar ti je bija i oni most ća si pridlaga da se napravi do Brača i Šolte..priko Mrduje..pa još s onin krakon do Sanaderovi Dugobaba. A je san se bila iscipala o smija ! Znaš ja san ti sa Šolte..pa bi mi to baš lipo palo. Mogla bi skoknit do u Maslinicu kad god me je voja.....a ovako uvik moraš pazit oče li oli neće punit bura !
A ko bi ti ono bija projektira most?
Bure Radić !
Ha-ha-ha...jesi baš smišan! Sve mi diraj ali nemoj našega Juru...Ja mislin da kad je on bija bambin da se i onda igra s mostićima. Pa diš mu sad poć vazimjat to zadovosjtvo iz ruku. Nek se igra! Kupit će njemu ovi narod i platit te njegove igraške. Pa vrime je o Božića, darivanja i činjenja dobrih dila...Ko bi mu sad uskratija to zadovojstvo? Pa da nan se na kraju još štica i rasplaće. A ne bi to Sanader nikako dopustija. Na prvu se vidi kako je on jedan srčan i puno osjećajan čovik. Jel tako? Jeman li ja prav?
Av-av-av...odgovori moj kubanski pasić kineskog imena nigdi ispod stola.
A ča se ti javjaš a lave, je li? ...podrugljivo će šjora File.
Ma ni to nikakav lav!
E. Marinko moj lipi..još si ti zelen. Znaš li ti onu staru kako u maloj boci špirit stoji! More bit da bi te ovi pas žešće branija i od tvoje žene i od tvoji prijateja esdepejci..?!
Ali....zausti Maja da će nešto reč.
Ma molaj Majo, to ja onako višje ka da skrenen pažnju tvome mužu na ove ča ga stalno ujidaju..A Bogami vidin da ji ne fali!
Ma koji to ?
Da ma koji to !? A je li te odma u onu noć o izbori ištraca, kako se zove, an...oni Dražen Lalić... na radijo Split, pa poslin i u foje. A je li te još prije ispjuva...I to da jedan put !...oni debeli ča je uvik na televiziju..e, oni..oni, a oni Kuljiš. Pa oli te nije oni dugonja sa španćeron, oni Tomić proglasija za tikvana....Pa jopet ona novinarka Slavica Lukić..Da si ka mrtvo puvalo. krepani fazan ča leti ! A je. lipo su te nafalili...nima ča...Moš bit sritan ča tako lipo o tebi pišedu ! Ma divota !
Stalo je meni, moja šjora File, do njih ka do lanjskega sniga!
Ma koji lansjki snig..ko je vidija lani sniga u Splitu ? An Majo...! A da ti muž nije bokun maka !
Ma ja to samo...
Ma ča ti samo...Ja te zajebajen sinko moj..jerbo bi jin na tvome mistu baš lipo odgovorila..Branče bi jin izvadila...Nokautirala bi ji baranko ričima... ka ča je oni Beneš nokautira...one svoje
Ma koji Beneš ?
Ma da koji Beneš ! Oni iz Banja Luke !
Ma ka je to bilo ?
E, bilo je kad je bilo ma ti nimaš pojma o nićemu! Dobro su ti i napisali...najidi se šjora File.
Ajde kad me već potižete za jezik dobro. Ma ča bi ste Vi da ste na mom mistu uradili? Oti je Lalić. moja šjora File, dva puta ulazija i izlazija iz esdepea. Prvo je izaša kad je ono bilo gusto..kad nas je u Split ostalo samo desetak da nosimo našu bandiru. E, onda je šmugnija vanka iz stranke - da jerbo je istraživač i da mu to ka čini nike probleme. Ali da nas podržaje u sebi i to tuta forca!
A svak jema pravo na svoj straj! ...doda šjora File poućno!
Je! Tako san i ja mislija. Pa se vratija u stranku. Intavula se i posta jopet član kad smo osvojili vlast u Split. Pa je bija zaposlen u općinu i najviše se bavija Krnjon i organizacijon krnjevala. Bija je u sobu sa onin profešrom Lozom, ča je sad diretur od Pomorskega muzeja!
An...
E, onda smo ga stavili i za potpridsidnika od županijeskega esdepea!
A je li, ma ja nikad nisan njnka jedan put čula da se dikod oglasija!
Pa i nije ! Nije se nikad oglasija..ali se strašno na nas najidija da nije dobija od općine stan i reka mi je kako smo mu tribali dignit spomenik za njegove zasluge - a umisto toga eto njanka stan nije dobija!
Ma je li moguće..?
A je...Pa smo mi opet otišli s vlasti a on opet iz esdepeja, kima - vanka,... zaradi istraživaške i profešuurske slobode - ma se prin toga u Zagreb namistija za profešura. A posli je laja di je stiga kontra mene a i pokojnega Ivice..Da će najveći spas za esdepe bit kad nas se libera...! A znadete i sami da meni nikad ni bilo mrsko bit u društvu s Ivicon pa i kad su nas pjuvali - a najskoli takvi ka ča je priženca o Dražena !
A u temu grmu leži zec! Ma kakvega sve svita jema ? A Kuljiš, Tomić..ota Lukićka ? Ča je š njima ?
A ča ja znan...a da Van pravo kažen, ni me ni briga!
Dobro i govoriš!
Ma jedino mi smeta ča stalno sviridu kako smo u Split prošli loše a u stvari - otkad postojimo nikad boji rezultat nismo učinili. Uvatili smo skoro 35 posto glasova. I to sami. To van je, moja šjora File, 50 posto od sviju glasova ča smo uvatili u ovu desetu izbornu jedinicu i 63 posto sviju glasova ča smo ji uvatili u našu županiju. Sve se to dobilo u Splitu. A ča ću Van reč. To je iznad prosika esdepeja u državu...I, eto, nikad nismo bili boji...A oni navalili. Ma neka su! Ali baranko da znadedu prave brojeve. Ona Lukićka čak ne zna da je HDZ u našu izbornu jedinicu uvatija 8 a ne 9 mandati. Kaže da smo prvi put na državne izbore u gradu slabiji od hadezea. Sve krivo i izmišljeno - pa se ti sad pođi karat š njima! Ma neću i neću !
I nemoj, Mariko moj...Ma ko ji jebe! Tako i ona šjora Fani laje o meni svašta. A Majo moja, viruj mi... same izmišljotine, laži i šporkarije. Samo ča će je vrag odnit kad je uvatin u ruke, ja joj kažen...!
Nego je li Van spiza bila dobra'
A je. je...usudi se javit Čepo...baš san gušta u ovoj lešanoj ribi! Najboje je jist lagano !
A vidin ja da podjebaje.
A vidi i šjora File.
Slušaj ti študent jedan zajebantski. Nima do ribe, jesi li razumija. Ka prvo si popija juvu koja ti je prava likarija. Pa san ti učinila obotnicu po šoltanski s kumplirima. A obotnicu je uvatija moj Glavurtić iz Maslinice. Ne boj se - nije iz Indije oli Koreje ! Lignje su uvaćene sinoć ovod u konalu, u splitskin vratima a crneji su došli drito it Vele Luke. Tamo ji zovedu još črnci - i ne postoji slaje usoljene ribe...Ma tebi još mliko teče iz justa pa ne znaš ni po mise..da si danas krajevski jija i pija ono ča ne moredu dobit niti svin svojin parama platit ni najveći rvacki tajkuni . Jerbo loza o Dobričića reste jedino na Šoltu, i to ne u svakoga. To ti je grozje ča jema malo crno zrno ka balina. A rvrdo je ka cica u mlade cure! Slušaš li ti mene ? To je vino ka patina i triba se na njega naviknit. Ali nema bojega. Pravo dalmatinsko, trpko i teško vino...ka ča je na škoju i život uvik bija težak. Prošek je sa Hvara....Sinko moj, višje si ti danas sunca, mora, arje i sokova Dalmacije unija u sebe nego u cili svoj život...Ma ćemo isto sad sve to prisić kapjon Porta, an Marine...?!
Je, je..mogli bi smo.
Otvorimo bocu Porta i nalijemo svakome po bićerin. Šjora File zatvori oči, nagne kristalnu čašicu i ispije na dušak slatko crno portugalsko vino. Otvori oči i reče:
A Bogami, nisu ni ovi loši...Svi gušti ovega svita su u ovemu vinu, ma višje onako ka za na kraj... kad se ji slako, nego za pit uza spizu. Ajde, vazmite sad po fetu rožate da van osladi malo justa....A onda se okrene i pogleda doli po podu tražeći pasa.
Nego Majo ča ti ova beštija ji ?
A nike pasje brikete!
A Li-Lu ka da je znala da se govori o njoj - izviri glavon iza Majine cipele i pogleda šjoru Filu.
A je li ovi pas radi na bateriji oli ga navijate ka žveljarin?...nasmije se ona. Da mu ispod trbuja ne piše Made in Hong Kong ?!
Svi se ka nasmijemo, ali pomalo kiselo.....a naša kujica biž iza Maje.
Ajde, svitu moj...bilo mi je drago da ste bili. Čepo moj...ništo si mi puno miran bija...OIli ti ni vajala spiza.... oli san te ja ispripadala - a ne pariš mi baš strašjiv ? A vidiš baš nisan namjerno tila puno govorit o politici ni o mandataru Ivi...Jemat ćemo još prilike za o temu pričat...A sad van ja, ka ča je i red, lipo gren ubit oko. Malo san umorna jer isto san ja jedna starija žena ma koliko još force jemala.
I tako se mi izjubimo sa šjoron Filon, zahvalimo joj se na obidu i obećamo da ćemo se opet vidit.
Kad šjora File otvori vrata...prvo na hodnik o portuna šmugne pas a onda i mi svi za njin.
Kad smo izašli kaže meni Čepo:
Iden ja sad na čevape i pivušu ! Ovi đir o ribe mi baš i nije bija po volji - a hobe san se ionako nagleda u kampanji pa mi se činilo ka da jiden političkog neprijatelja !
Muči Gojko da te ne čuje šjora File jer ćemo svi ogrist ! Nisan je nikad vidija ovoliko finu ! Valjda je tila ostavit lipi utisak na tebe !
Asti ga...a kakva je tek onda kad je štufa, doda Čepo i ode niza skaline.
A kad smo mi ušli u stan Li-Lu se odma stane junačit, lajat ka blentava i grebat nožicama po vratima ka da se sad okuražila i ka da po pasju govori šjori Fili: A di si sad da ti ja pokažen ko je ovod gazda !
Ala ga - i ovi bi pas moga u političare!
Gren leć dok mi je navrime, kažen Maji i oden u sobu...ali još dugo nisam moga zaspat od onog piskutavog av-av-avanja ...naglo okuražene kujice koja se činila važna sada kada je bila sigurna i kada šjore File nije bilo na vidiku.
Jušto ka i niku ljudi!
Kad je gusto, useru se u gaće ka grlice i nigdi ih nima - A kad prođe gadno vrime i opasnost evo njih odma....onda se okuraže, busaju se u prsa, pametuju i laju, laju, laju....uvjeravajući sebe kako su lavovi a ne obićne kukavice i pantagane koje će opet ako postane gusto ućas šmugnit u mrak prve buže koja im se ukaže na obzorju - i čirit iz nje da vide je li opasnost prošla, a kad prođe - onda će opet ispuzat iz nje i lajat, lajat, lajat !
Takve u Splitu zovemo jednostavno - pizduni !
|
