Maloprije san skoknija do trafike kupit "Slobodnu" jer mi se po ovon vrimenu nikako nije dalo iz kuće. Taman san se vratija i uša u portun - kad ono, isprid lifta stoji šjora File sva zamotana u šudar na cvitove i obućena u debeli crni kapot.
A odakle Vi '
A evo se vraćan sa mise !
Pa di u ovu uru ?
Je...bila san u grad u Gospe o Zdravja...Višje ne gren ovod na Pujanke u Crikvu...zarad onega župnika ča je usrid Crikve namisto o Božjin stvarima drža propovid o politici i mata virnike da glasaju za HDZ a ne SDP. E, tamo moja noga višje neće ugazit....Neće mene on zvat antikristom zato ča ne glasan po njegovu guštu! Čekan da se čuje i nadbiskupova...pa ću onda vidit ča ću daje...
E...načekat ćete se...moja šjora File !
Neka ! Jeman ja vrimena višje nego ča oni mislidu. A, bome, jema u Splitu i drugi Crikvi....Baranko nan tega i politiških stranak...ne fali ! Eto...drugu nediju gren u Sv Roka...pa ću vidit di je najvišje po mome guštu ! Demokracija je - jeman ja prav birat u koju ću Crikvu Boga molit i za koju ću stranku glasat...zaključi ona oštro i pogleda me drito u oči ka da samo čeka da rečen koju protiv...pa da saspe na me paljubu iz svih svojih kaluni...A Bogami ji njoj ne fali !
Ma dobro...samo san pita....
Pa si me lipo i čuja - prisiće šjora File svaku daljnju diskusiju o toj temi.
Uto dojde lift.
Nego, bija si ti u Pariđi...nekako će ona podrugljivo, odvezujući šudar sa glave...Otilo se malome Marinku u svit...tila je gujica vidit puta, a ?!
Ma nije, nego...Ja san..
Ajde mući....ća si se odma naša uvriđen! Znan ja da je tebi najdraže doma.....nasmije se ona dodavši: Ako ćemo se poć zajebavat...
Ma šjora File...
Muko moja. ća si mi jutros osjetljiv..Pa ča da si bija u Pariđi...Neš ti. Svaka mona je tamo bila! A da nisi bija povirit onu Mona Lizu ? Ma moš ti mislit velike pameti dat ženi ime Mona ?! O ovdi kod nas..kad nekome rečeš da je mona...odma te da na sud. Pa da si ga uvridija, pa da je to brezobrazna rič..ka nika beštimja..Da je to "ona stvar"...A u Pariđi svi dolazidu iz cilega svita i gredu gledat Monu...Pa i moj mali Marinko ! Ka da nama ovod fali moni..!? Toga jemamo za izvoz !
Ma ja san bija na Skupštinu..
Ajde pusti me na miru s oton tvojon Francuskon...nego kaš mi dovest onega tvoge Čepu na obid? Otkad si mi obeća, pa ništa...!
Ma čin Vi rečete.
Pa rekla san ti, za ime Isusovo..oli si ti ebete...?! Ajde, amo se nać u drugu nediju...ako oš !?
Dobro, javit ću Van čin se dogovorin s Čepom!
A nemoj opet zajebat, je si li me razumija !
Ma neću..!
A čin se on bavi ?
Studira !
A študent je! Mogla san i mislit...Ko bi i jema onakve indeje ako ne niki študent !? A di živi ?
Na Mejaše !
Asti ga miša! Pa onda smo deboto susidi.
Je, je...Prije je bija tu na Pujanke...a sad se odselija odma tu iza onega mosta.
Aj neka...Onda te držin za rič....Višje o temu neću mislit. Dogovor je dogovor....reče ona pa malo zastane. A je san i ja naivna su ovoliko godišć....Ma ko još viruje dogovoru s političaron ? Taj te privari čin te vidi a laže ćin zine! Vidin ja da meju takvima nikakva rič ne važi, nikakvi dogovor ne traje duje o po ure i nikad se ništa ne zna kako će finit !
Ma nisan Van ja od takvi !
Ka da jema drugovačijih !
Bez uvride...Sve dok te ne vidin na vrata o mojega stana s tin tvojin študentom..neću ti virovat, e..! Ka da san ja slipa...Svaki dan na televizuju jeman ča ćut o doslidnosti vas političara....Pa to je za krepat o smija i muke. Sve bi ja Vas jednin icom...
Ma ča ja to ćujen ?
Eto oto ča čuješ !
Nima vire u Vas. A ne, ne...
Ma šjora File...!
Ma čaš mi poć govorit! Tu se ne zna ni ko pije ni ko plaća. Najdraži mi je oni Friščić ća bi jude vratija na selo! Eno mu na Luka Bebić...On se dva dana prije izbori upisa ka da živi u Komarnu, par metri od onega gradilišta za most za na Pelješac...Pa di je sad? Da nije možda u Komarni? Je moj klinac! Biće gori po Zagrebu širi seosku idilu u teplemu stanu s centralnin grijanjen...A ti rajo glasaj....Svi se kunedu u nike ka programe, indeje o velike filozofije i teških i nerazumjivih besid...Ma bi samo ćapali koju ministarsku stolicu višje....i basta! A na jedine programe o kojima vodidu računa i o kojima mislidu su televizijski programi kad se navećer vratidu štufi u svoje stanove i zavalidu u meke foteje pa bacu dikod oko i na zabavu za nas male jude...na televiziju! E onda se i oni sitidu programi!
A da ne bi i oti tvoj Čepo tija bit ministar?
Ma oli ste , Bože prosti, išempjali ? On je ka bambin bija ministrant..a Vi odma o ministrima..
E, boje je odma to rišit...Jerbo vidiš koliko je fila za ote ministre. Ima ji više u nju nego da se mukte dilidu pršuti ! Ma to je jedan mirakul !
Doće i temu kraj, šjora File !
A je, je..oče. Ma kad? Jemate li vi u esdepeju šansi za sastavit otu Vladu!
A naravski da jemamo!
Znači...jema judi ?!
Jema !
Aj..drago mi je ćut! Jerbo se evo i danas ponavjadu niki izbori pa se mislin a di je bija uprišija oni Sanader potpisat sporazum s onim Romom. Nije jema pacijence da vidi je li uopće izabran! A ča mu je bilo ? Uvatila ga trta...pa daj šta daš ?! A je se izneredija u gaće...Vas mu se svit smije po pazaru! Ma je naša sebi pravega para !
Šjora File, nemojte vriđat !
Ma ne vriđan ja nikoga...nego mi je malo ka smišno bilo gledat ono slavje na televiziju..kad su sklopili oti sporazum. Pa ono čašćavanje! One čaše...Piće, kreveljenje, da izvineš...Eto, to mi je ka bilo puno smišno a i nikako nakaradno. Moš ti mene ubit..ali svi tako govoridu...! A ča sad, ako niko drugi bude izabran a ne baš oti Sanaderov Rom ? Oče se opet feštat u hadezeju ?
A ča Van ga ja znan ?!
Ma dobro, dobro Marinko moj lipi...Evo san sva ozebla dok ovod u portunu s tobon govorin. Koliklo samo moreš balit ? Da upo toliko radiš bija bi miljuner! I ti bi jema one zlatne reloje a ne oti mižerjasti o po šolda..Ma di si ga samo kupija? Bićeš ga dobija u škatulu o 3 kila deterđenta..!
Ma ća Vi to ? Znadete li Vi da je ovo...
Ma zajebajen se..Ajde ne jidi se, nasmije se ona šerjasto!
I čekan te drugu nediju, jesi li razumija ?!
Dobro !
Nego, vazest ću ja i bocu šampanja za u nediju. Oću, tako mi Boga moga. Pa ćemo nazdravit ka judi....Ako tvoji uspijedu sastavit Vladu, od gušta ću popit jedan bićerin šampanja! Naravski neće bit to oni tvoj francuski ča si ga se sigurno naloka gori, ali..
Ma...ja ću
Pusti, pusti Marinko..To je moja voja i gotovo. Ne tribaš ti ništa nosit sa sebon. Dovedi ti meni otega malega šefa od spliskih esdepejskih njunjori da koju besidu i sa njin razminim. Ja častin! Ako i ne sastavimo otu vladu...a očemo.... drago je meni ča ću bit sa svojin judima, sa našin dobrin sviton - a to ti je, sinko moj, najviše ča u životu moš jemat. Dobre prijateje i čestite jude uza se! Sve ostalo može pričekat! Nigdi nan se ne žuri. Sve će kad - tad doć na svoje! Niko još nije uteka pravdi...ni svojoj sudbini...viruj ti ovin mojin godinama i ovin mojin sidin dlakama..jesi li me razumija. Triba izdurat, e baš onda kad je najteže...Neka patidu šporkaćuni i lopuže ma di bili i ma kako se zvali...Mi ćemo lipo blagovat i popit koju u naše ime i u ime naših starih i mladih. A kad šjora File kuva..onda je to za lizat prste, jesi čuja. I dovedi Maju...Ne dolazi mi prez nje!
Ma ne znan oče li moć..Mora ćuvat pasa!
Ma kojega pasa, muko moja?
Ma dobavili smo ništo malega pasa..Eno san ga doveja priksinoć iz Zagreba.
Zagreba? A laje li po kajkavski ?!
Ha-ha, samo se šalin Marinko! A koje je race ?
Ja mislin da se to kaže "bichon havanese", ma nisan Van baš sigur !
A sad mi je kjaro! Kubanac ! Nabavija si kubanskega pasa!
A more bit da jesan.
A jema li bradu ?
Jema!
Ala gušta..Onda ćeš ga sto posto zvat Castro ! An, očeš li ?
Ma kuja je! I dica očedu da se zove Lilu !
Ma moš ti drugome prodavat maglu. Onda je to Li-Lu !
Opet niko kinesko ime! Ma vidi ti ča si smislija. Kubanski pas kineskog imena! A nemoš ti, merlo moje, uteć od svojih...a ne, ne! I slušaj, ako mi ne dovedeš pasa na obid uvridit ćeš me za na vike vikova, jesi li razumija ? Paš mi onda lipo na miru sve ispričat i kako si ga nabavija i kako si ga doveja...Ma ča san ja to doživila pod stare dane ?! U mome portunu živi kubanski pas s kineskin imenon! A zato je Maja upisala španjolski...da ga boje razumi kad laje, je li ?
Šjora File...!
A ča je! Ne smi se čovik višje malo ni pošalit!
Dobro, dobro...
A koliko pas jema...?
Ništo manje o dva miseca..
Ola gule...Onda mu moš vezat i crveni rubac oko vrata jerbo se tek primija u pasje pionire...izgovori ona i brzo šmugne iza vrata da joj štogod ne uspijen odgovorit.
Ostanen onako inkantan i zazvonim na svoja vrata a iza njih se začuje štucavo piskutavo lajanje...Pitaj Gospu na kojen jeziku. Višje ni sam nisam pametan !
|
