Taman san se vratija iz Dolca Donjeg di sam, ka izaslanik pridsidnika Sabora Borisa Šprema , bija na komemoraciji žrtvama fašističeka terora kad su u tomen malemu mosorskom selu 1944. godine ubijeni i zapaljeni u crikvu blizu tri stotine mištana a meju njima i 103 diteta !
Užas koji si nikad ne smi zaudobit !
Doli kraj cvićarnice naletin na šjoru Filu koja je pošla kupit buket cvića za odnit na grobje.
Marinko moj, a diš ti ?
A bome, gren doma. A di bi drugdi !?
Lipo , lipo - a evo je tek po bota ! Lipo ti je radno vrime ! Nima šta !
Ajme meni...ma molajte me se šjora File. Gren samo po ure izut cipele i odmorit noge pa gren dalje. Jeman danas posla priko glave. Evo će mi u Split doć popodne tri ministra !
Neš ti ! Pa ča onda....Valjda jemaš i po minuta za me , a ?
A kad ja to nisan jema vrimena za Vas ?
Ajde dojdite za namon kod mene. Bit će drago Maji....pa ćete čakod bacit u kjun. Koju sitnicu...onako čibi - fredi...i poza ten popit bićerin prošeka.
Ma oli si ti pozvizdija ? Pa korizma je....Ne jin ti ja ovih dana po vas dan ništa ! Njanka mrvu kruva...reče ona nekako značjno.
A biće da ipak čakod čalabrcnete makar navećer !
Je,,,ma pinku.... samo pinku, ka crno ispod nokta...reče šjora File i zapucketa su svoja dva suvonjava košćata prsta...I još nokton projde priko zuba - da ča boje shvatin težinu njezine pokore.
Dobro onda...ma ja žurin. Ajde stojte mi dobro.....
I taman da ču zakoračit kad me ona uvati ispod lakta o live ruke ka su nikim klišćima oli čambrama o raka - a ne onon svojin isposničkon žilavon dugon rukom.
Di si navra, vraže ? Fermaj se i slušaj me !
Ajde oču !
Kaže mi oni moj mali unuk ča po vas dan čorka u kompjuter, da me niki Profaca proglasija mrtvon...Da ja uopće ka i ne postojin, da ovo nisan ja. Ma zamisli ti ! Vengo ko je ovo vengo ja - Ni valjda nika fantažma - sva se zajapuri i pocrveni u licu moja susida ?
Je, je ... čita san ote monade, ma ga ja odavno ne obadajen,,,Ne morete ništa pametnije od njega ni očekivat ! To je takvo čejade....
Ma je li....Ni tebe proglasija nikon avetinjon joli deboto nikon utvaron sa starega šufita, vengo mene ! Ma jesi li vidija jednega cukuna brezobraznega ?!
Lipo Van govorin da ga ne obadajete. Oti je mudrac napa bija i mene da kako me ni sram sidit u prvi red na proslavi o antifašisti !
Šjora File se prikriži razrogačenih očiju.
A eto vidite !
Pa di je naša baš tebe zajebavat ! A di je oti makako bija dok si ti sa svojima odija po srušenin spomenicima i branija partizane i antifašiste ? Di je bija kad su ti su rivolveriman zaraj tega upadali u kuću, pritili dici i fameji ? Nikako ga se ne mogu siti iz oti vrimena kad je tribalo jemat muda a ne kartu o reoplana za niku daleku zemju...A, ne...ne još ja nisan išla u bekala. Još mi možđani rade i pamćenje me , fala dobremu Bogu, dobro služi...reće ona nagnuvši se naprid raširenih nog i kucne se šakon posrid svog visokog izboranog čela...
Biće proučava Budizam !
Ča !?
Ma ništa, samo se zajebajem....
A ni to za zajebanciju...Nikako ! Ma di ji samo najdu ! Jema ih ka ušenaka na pasjen repu joli krpeja po livadan i grmju...Nemoš ji istribit sve i kad bi tija !
Sad bi Vi zvali upomoć Ciana pa bi sve to posuli diditijen !
A nego ča bi ! Ne bi trepnila ni obrvon ! Pa zna li oti injorant da si ti lani dobija ka pridsidnik splitskega esdepeja priznanje i povelju zahvale o splitskih antifašista ? Bićedu i oni po njemu sumnjivi, an ?
Ajme. ma ko više more trošit riči i vrime na tako beznačajnega čovika koji je infiša da je važan. Ka ča bi reka Maksim Gorki. On je nika vrsta "suvišnega čovika" ! Neka ga ! Neka gušta pljujući po meni - ako ga to čini sritnim. Biće da mu ni laka...NIkako ! Eto mi ga je baš nekako milo....
Blago nama dok je takovih !
Ma tako triba, šjora File !
A ča je onemu drugemu muzuviru koji na niki portal da si ti isfalija Kerumovu sestru na prošlo gradsko viće. A Bože...luda svita ! A ti si gadija onu iz hadezeja...Onu, kako se zove...an onu Bilačku, zaraj primitivizma ča vriđa ljude jerbo nimadu fakultete vengo, ma zamisli ti samo - jedino sridnju skulu...
Drago mi je da ste to slušali na vlastite uši !
Da slušala !? I gledala !
Bome san joj reka da onda ni Krleža, ni Brandt, ni Polić - Kamov, ni Tolstoj, ni Steve Jobs ne bi mogli vodit gradsko viće jerbo nimadu recimo višu učiteljsku i da je to pravi pravcati primjer antiintelektualizma i najgorega primitivizma !
Dobro si joj i reka.....Jebeš ti jude koji se falidu diplomaman umislivši da su zaraj par godin skule višje oni boji od ostalega svita - ka da su oni uvatili Boga za bradu. Malo sutra !
Iden ja sad šjora File ali ću Vas prvo uštipnit da vidin jeste li zbilja o krvi i mesa oli ja to samo sanjan.
Aj kvraguc, mangupe jedan da bi li mangupe spliski. Ako ti razvalin jednu trisku priko čunke omar ćeš znat jesan li živa joli san samo fantažma !
Ma znan ja da ste Vi živi vengo mi pada na pamet kako je slavni američki režiser John Ford snimija film " Ko je ubija Lbierty Walanca" a u stvari je triba snimit film "Ko je ubija šjoru Filu" ?!
Pa eto me kuša ubit oti Profaca ! Ma se zajeba ! Još ču ja durat i dizat mu tlak sve do nebesa !
A i John Ford je partija, dodan ja - pa ne bi, sve kad bi i tija - moga snimit oti film. Jedino ako se genije Profaca ne uvati i režiserskega posla !?
Oče, oče - kad ja prominim svoje ime Fila u Merylin !
Ola koju karijeru bi mogla napravit u Jamerike i oni Holywood...završi moja susida vragolasto me gledajući i zaceni se od smija vatajući se s obe ruke za svoj ravni trbuj.
|
