< | prosinac, 2009 | > | ||||
P | U | S | Č | P | S | N |
1 | 2 | 3 | 4 | 5 | 6 | |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 |
Dnevnik.hr
Gol.hr
Zadovoljna.hr
Novaplus.hr
NovaTV.hr
DomaTV.hr
Mojamini.tv
Ma koji Sibir, ma koje ledeno doba......?! Ovo je susvita, ovo je gore nego u vrime praljudi. Ovo nas dragi Bog kaštigaje za sve grije ča smo ji učinili ovu godinu,ča jušto pasaje ! Zato je na nas i posla ovi mraz i nevoju ! Maajte.molin Vas, šjora File - pa Vi njanka mrava niste zgazili---Ća bi Vas sad Bog kaštigava ? Je, je - kaštigaje nas sve skupa jerbo trpimo ove krvopije i kokošare ča su namon vladaju....a mi jin još begenajemo i kokolajemo ka da su o zlata - pa ji još stalno nanovo biramo na vlast da nan i zadnju košćicu iščućadu i ispjunu nas ka niku stvar ! Ola grubi riči u ova pridblagdanska vrimena ! Pa ja to i govorin zaraj Božića, nesriknji sinko......i radi sviju onih koji su zaraj pravice dali sve...pa i sebe same. To govorin zaraj mojih starih ča su svojin trudima i svojin posštenjen zalili i moje ditinjstvo, mladost i cili moj život. Govorin ti zaraj onih kojima je iznad svega bilo do ćasti a ne do slasti. Govorin ti zaraj tega jer ne smimo to nikad zaboravit...Eto zato ti govorin ! Vidin ja da se moja susida cila uzdrčala i da je nikako ka potresena tin svojin ričima. U kantunima od očiju zablištila joj je, ka biser, po kapja suze - ma se nikako suspregla da se ne rasplaće. Nikad je nisan vidija u takvemu stanju...Brže bolje nalijen njoj i sebi po čašicu farskoga prošeka su feton domaćeg limuna i šerjasto joj rečen: "Ajmo mi nazdravit dobra moja šjora File! Ni svaki dan Božić !"...."Ajde more!" I klepnemo se našin bićerinima tako da kužinom odzvoni onaj cakleni zvuk...ka najlipša arija ovega svita. Vidin ja da je šjora File već malo bolje volje pa je ponudin i feton domaće pacente i crnim vrgorskim vinom ča mi ga je sinoć donija Vjeko. "Ajde. mašite se...Ćisto radi gušta. I da Vas višje nikad nisam vidija tako loše volje!"...Ona samo mahne svojon suvon rukon i reče: "A štaš ! Svak jema svoju žutu minutu ! Svakomu se čaša prilije kad se najmanje nada !" Dobro a di ćete za Badnjak i Božić ? A di bi ja išla ? Bome - bit ću ka i uvik...doma sa svojima.Ne znan ni kako ću na polnoćku po ovemu mrazu ! Taman bi mi tribalo slomit kuk oli ruku ! Pa crikva Van je tu priko puta, .Nima straja. A šta ću, morat ću polako, nogu prida nogu - iako san štufa svega. A, bogati...ča je tebi bilo su rukon ? Vidila san da ti je cila bila inpašana . Strombula san se po cesti kad san izlazija iz auta pa mi je izletilo rame ! Sve ti je to od tega trbuja.Bit će te pritega ka piz o sto kili...Ča ne smršaviš, mono jedna ? A kad mi je gušt jist ! A ti onda papaj i padaj. Jemaš noge ka dvi takjice za potakjat pome a trbuj ti je ka da si uteka iz crtanega filma ! Svo zlo u tome ! A šta kažete na ovu da se Sanader vraća u politiku ? Ajme, ne čačkaj mi po rani ! Omar bi se, ka oni japaneži, samoubila ! Ola ća ste nagli....Pa di bi ruku na se digli ?! Muko moja...prikršila bi sve zavite i otišla na oni svit za mojin dobrin mužon...jerbo bi došla u napast da napravin još čakod gore nego da se obisin o maslinovu granu. To bi Vi ka otišli u razbojnike i ubice ?! A ka da je to kod nas ništo lošega ? Prin bi rekla da je to u nas postalo zanimanje koje se najviše cini i poštiva ! Ma neće bit tako ?! Neće muda Marjanova...A oli san ja tramakavala poslove su austrijskin bankama..? Oli san ja nisila žveljarine o zlata...ka da san sultan oli njegova bula ? Oli san se ja rugala su tebon kad si ono pita u Sabor ča je sa škverskin šoldima...? Ajde ne pizdi mali kad ti ni potriba i ne glumi mi tot veću šempju nego ča već jesi ! Očemo li se onda vidit za Badnjak ? Pa naravski ! Jebeš Badnjak di nima familje i prijateljov ! Lipo zborite....Onda će te svratit na fritule i bakalar ? Oču ! Al doš ti i tvoji do mene ! A nego ća ! Sve ću Van pozobat po kući ! I napokon se šjora File nasmije. Samo dojdi - s veseljen ću Vas dočekat a i neće ti bit žaj...ne boj se, bit će najlipji delicija i bokuni. Znači jema se, jema šjora File - a ovod mi kukate mižerju ! Je jema se ! Eno san ukrela par miljuni u autocese, pa malo u Podravku, pa malo po škveru, pa pinku u onu austrijsku banku....Skupilo se skupilo,Marinko moje...Šparala san cilu godinu ! A nešmi virovat - evo prvi put da nisan otišla ni u Veronu slušat one operne arije...sve da bi tebi mogla spremit terinu kroštula, malo fritula, kupit kil bakalara i dvi boce vina. Eto ste me sad još i u đir uvatili. Pa znan ja da Van ni laka ! A laka je meni laka - jerbo mi je savist čista. Ma ni laka onin lažnin rišćanima i kradjivcima ča lažu ćin zinu. Njima ni laka. Viruj mi, Marinko moj...A bit će jin svaki dan sve teže..jerbo ćedu ji njiovi ajduci prvi izdat i napustit i bacit jin se stinjon u glavu - Slušaj ti mene ča ti govorin. A mi ćemo se još jemat prilike vidit i ćut..Jesi li me razumija ?! A jesan, šjora File. I krene šjora File prima vratima jerbo je čekala pošćera s nikin paketima ča ji je oko Božiča uvik dobijala iz Jamerika. I kad se uvati za kvaku okrene se i reče mi: "A, je li, ne pitaš me ništa za koga ću glasat - A merlo moje !" A ne pitan jerbo je to nepristojno ! Ma ča nepristojno, ma ča neš pitat...jopet se sva zajapuri moja dobra šjora File ! Glasat ću za Josipovića, eto ti ga na, i to svima govorin - jasno i glasno. Deboto vičen ! Jer narod koji ne zna mislit svojon glavon kad mu je najveća potriba - uvik dobije neku tuju glavu da misli umisto njegove - a onda, ka i obišno, najebe...jerbo je to, onda, i zaslužija ! |