Maja, punica, Vjera i Li - Lu partili su još u subotu za Čiovo. Ja san se oko podne naša na brujetadi kod Štrbe s Emilom, Donellijem, Pinom i Račom. Ćoka nije moga doć...Ne zna ni sam šta je propustija !
U teči je bilo žbiraca, cipli, pauka, batovine, ugora, škarpine i pitaj Boga ćega sve ne. Pila su se mišana vina, crna i bila....tako da je tu bilo malo nereda...a slušala se Mercedes Sosa "Escondido en mi pais".
Pridvećer je doma uletija Joppa pa je vajalo frigat krumpire i peć jaja..onako na brzaka. Naravno - poslin tropske vlažne i lipljive vrućine...tresnija je niki monsunski pljusak tako da mišanca nije bila samo u štumiku i glavi nego i na nebu.
A takvo je vrime u Rvackoj ovih dana !
Lipa nan se popara kuva !
Jutros san trknija kupit jednu catu i šljiva za odnit sa sebon u Zagreb a, naravski, i splitsko izdanje "Slobodne".
I taman san se vraća doma kad, ono, na šentadi isprid portuna sidi šjora File sa svojin prijatejicama i maše okolo glave s nikon ofucanom ventulom...ka da tira muve.
Mariiiiinkoooo !!! Vamo dojdi ! Ajde, ča lizeš ka puž ?
A vruće je !
Ma ke vruće....Pari mi se ka da san upala u oni lonac o lušije pa se kuvan u vrilu vodu a nikor da digne poklopac ! Evo je i vrime išenpjalo.....Sve nas to Bog kaštigaje zaraj monadi ča ji radimo ovod po Rvackoj i po cilemu svitu. Da znaš !
Ma to mi je prvo i palo na pamet..odgovorin joj onako znojan i mrzovoljan.
A je li to oni iz Sabora....piskutavim glason reče njezina prija. Prava curica, pari mi se roba od najmanje osandeset godišć.
Je,je...oli mu ne vidiš po čunki. Svi mi paridu isti, ka da su bliznaci !
Ma ja ga ne vidin dobro, znaš malo mi je vid oslabija jemat će, evo, skoro već petnajst lit.
Pa ča ne greš u dotura ?
Evo ti ga na..pojdi tamo sama...ko te drži..uzjoguni se njena prija i peta joj roge. Ti bi mene u greb otirala. Đeloza si na me još od onda kad san ti Ivanka priotela.
Bože mi prosti, oli si otišla na kvasinu. Pa to je bilo...jema sto godin !
Aha ! Sto godin ! Oš reć da san ja stara ! Gren ja doma jerbo me ovod nike vriđaju...poćme se trest šjora Filina prija. Ali ne more se maknit sa šentade jerbo nima force u noge.
Ajde mali daj mi ruku...Pomozi mi se ustat. Neću da sidin kraj ove stare čangrizave čimavice...reće ona, pružajući prima meni drhtave ruke.
Ajde sidi tot di jesi. Ča si se omar ofendila ka da si Gospe o cukra ! Nisan te tila vriđat....Smanta me ovi Marinko čin san ga vidila..poćme se pravdat šjora File.
Oćete li bagulin....upitan ja ljubazno.
Dat ću ti ja bagulin po kostima, jesi li me razumija..okomi se na mene moja susida.
Neš me ti svadit s mojon najbojon prijateljicon, da znaš
Oli je obid ?...odjednon se trgne ona treća koja je bila bokun zakunjala pa se sad naglo prenula iz sna.
Ajde samo ti drimaj. Jema do obida još po dana..umiri je šjora File.
Šćeta....Baš šćeta...promrlja ona i opet usne.
A ča me tribate šjora File ? Priša mi je....Gren u Zagreb.
Ma Bogati, ti greš u Zagreb. Velika stvar. A prijatelj ti je pobiga iz Zagreba i to sa svih funkcija...a ti drito gori !
Je...sutra ćemo raspravjat o Jadranki Kosor i novoj Vladi !
Ola smija ! Ma koja nova Vlada...To je živa smijurija a ne Vlada. Baš mi je žaj Jadranke jerbo ćedu je one zviri izist za marendu. Ne zna ona s kin jema posla !
Nemojte se Vi privarit...lipo joj uzvratin.
Ma ča ti znaš ? Sanader se proglasija Dioklecijanon ! A znaš li ti da se Dioklecijan bija proglasija Imperatoron i Božanstvon ?
Znan !
Pa kad znaš..onda ča se ćudiš ako sutra osiće Kosorovoj glavu ka ča je osika i našemu bidnemu Svetemu Duji glavu...a ?
Ma nićemu se više ja ne ćudin !
I boje ti je da se ne ćudiš..tuntle jedan tuntlavi.
Eto neću !
A znaš li ti da je Dioklecijan jema ženu Prisku i čer i da su obe dvi bile rišćanke - pa su ih isto bekili...a ?
Znan !
Pa kad znaš ča me ćiniš ludon...kad nisan luda ?
Ma ko Vas čini ludon ?
A eto ti !
Ja ?
E baš ti...Jerbo da si pametan onda bi zna da se na otin dvorima uvik ubijalo kako je ko stiga koga...i sve to zaraj bokun vlasti oli zlata i cekini. Nise tu štedilo nikoga. Brat je ubija brata, mater sina, sin oca, čer sestru, sestra mater i samo se gledalo kako zajebat onega koji ti je najbliži.
Oli je vrime od obida ?..odjednom se trgne ona njena usnula prijateljica.
Ma nije, nije..nego se ovi Marinko dere toko jako da te probudija. Aj spavaj za Gospu milu,,,spavaj i miruj !
Aj dobro ! Uzdahne ova i opet usne.....
I ča san ti ono tila reč ? A.....Znan ja da to ne mora bit tako vengo da i dotur Ivo more partit za navik..dok nisi reka "keks"...makar on sad možda misli da je još uvik glavna faca u hadezeju. Sve ti je to jedan veliki kažin !
Znan !
Šta samo ponavjaš za namon kako znaš - a ne znaš ništa...Jerbo ne znaš da se i Dioklecijan, kad se ono bija povuka sa carskega mista, proglasija za doživotnega Augusta.
Ma ko bi reka ? A ne za poćasnega pridsidnika ?
To ti mene zajebaješ je li ! Aj ti u Zagreb pa zajebaji političare a ne pošten svit sa Pujanki...da znaš. Pizdi tamo u Sabor a ne ovod u naš dvor...završi ona jutito svoju malu propovid iz povisti cara Dioklecijana.
Ajde, ča se jidite ? Stojte mi dobro i guštajte tod u ladu !
Je guštat ću na ovu tropsku klimu ča je ćapala Rvacku a od nas napravila domoroce....Još samo fali da narestu cabla o banana ovod usrid Splita.
Pa to su van cabla ka i palme.
Oho...onda smo mi već na po puta da moremo okolo odat goli ka Adam i Eva su listom o smokve koji ćemo metnit na onu stvar. Znala san ja da ćemo se mi kad tad vratit na početak svih početaka pa jopet počet sve isponova. Eto di nas je doveja naš splitski moderni Imperator Dioklecijan.
Nemojte tako, Dioklecijan je bija velik čovik !
Nije ni ovi za bacit...ča se kili tiće, da znaš !
Nisan mislija na to !
A nego na ča si mislija ? More bit na pamet ? Pa diš pametnijeg od njega !? Lipo se fudra ! Ni mu loše ! Jesi li čuja ča pišedu u Jamerike kako je maca papila po miljarde dolori ?
Ma ja isto mislin kako ga ne triba uspoređivat s Dioklecijanon...jerbo je Dioklecijan bija veliki Car...Učinija je reformu vojske, financija i Države. A ovi...?
Pusti ti...znan ja ča govorin !
Kako Vas je voja..A ja sad gren...Moran uzet valižu pa via Zagreb !
Još jedan put..Stojte mi dobro i do vidova !
I krenen ja prima portunu kad začujen šjoru Filu di viče za menon: Marinko...Marinko mali...i da znaš da su ovod svi ustravljeni...pa mućidu. Jedino ja govorin ča mislin ali moj ti je glas isto ka da čuješ glas od cilega naroda. A svit ti ovega našega novega Dioklecijana zove "Alibaba iz Dugobaba", samo ji je to straj reč prid tebon... i sve tri gracije sa šentade udru skupa u kikotavi smij.
A ja - put pod noge.
Još san samo čuja iza sebe di ona treća pita "A oli je ura od obida?"
|
