Jučer je maloj Esmeraldi, sa trećega kata, bija rođendan.
Kasno popodne žena me natantala da odem po Vjeru jerbo je tribala učit - a morala je poć i na rođendan od male Esmeralde....
Sve je počelo je ovako:
Vjerči se cilo jutro bunila:
Ma šta ču ja tamo sa dičicom ?
Ajde molin te...jerbo je mala Esmeralda infišala u Li-Lu...i triba joj odvest pasa na rođendan...i šta se tu more, dite se oče igrat s beštijom !
A oču li većeras moć izać sa prijama ?
Ma diš baš većeras...Sutra ti je informatika...Ostat ćeš po ure i gotovo..... samo da se dite izigra su pason - a onda se moraš uvatit knjige !
Zašto baš ja moran poć ? Nek ide Josip....počela je ronjat Vjera.
Taman posla...javi se student iz sobe. A šta ću ja sa dićicon ?
A šta ću ja....?
Ajde dosta je bilo više. Uzimaj pasa i aj po ure do diteta !
Av..av...av..!!!! Uzlajala se Li-Lu koja je odma skužila da ide negdi vanka...Počela je skakat ka blesava i vrtit se, ka obićno, ka trotul - sama oko sebe.
Maja joj je pokušavala navuć one kajiše o pasa - ali se Li-Lu, naravski, cila zamotala u njih i počela je cvilit.
Ola koji konfužjun !
Uvik nike monade...i za najmanju sitnicu..U kući ućas nastane cirkus i svi se deredu i vićedu u isti momenat.
Dostaaaaaa !!!! Jesan li reka da je dosta ! Razderen se...
Aj gori kod male jer ću itnit i pasa i oti kajiš kroz ponistru !
Ma Bogati ! Vidi teroriste ! Još bi se tuka ! Aj mući ješ dobit jednu priko zubiju...zapriti mi se Maja.
Odma se umirin.
Napokon Vjerči ode sa Li-Lu koja je lajala i šlajfala na mistu po parketu ...pokušavajući šta prije uteć iz stana.
Blaženi mir !
Jo da je po ure ostat sam doma i malo otpočinit !
I taman san se bija opustija...Lipo sija za stol, izija fregulu sira, popija dva deca crnega, otvorija novine i počeja guštat u tišini i spokoju kad zazvrnda zvono na vratima.
Ko je sad u ovu uru... u ime Isusovo ?
Jehovini svjedoci !
Ajte ljudi s miron...Nedilja je..pustite me na miru - Ma neću ništa uzest. Ne triba mi razgovor o nikakvim problemima. Bar mi tega ne fali!
I tako minut po minut...ućas proleti po ure - a Vjere i pasa nikako natrag.
Ajde po malu...linčino...viće Maja! Znaš da triba učit !
Evo..sad će ona doć.....
Ajde gori po malu kad san ti rekla !
U to se uključi i punica.
A dobro ti govori Maja....evo će proć cili dan a još knjigu nije takla.
I šta ću. Nema mi druge nego aj na treći pod po Vjerči i po Li-Lu.
Zvonin ja zvonin na vrata od male Esmeralde...ma od buke. mužike, lajanja i dičinje dreke ne čuje me niko.
Na kraju otvorin sam vrata i lipo pozdravin: Dobra većer - a evo san doša po ćer i pasa...Vrime je da gre doma !
Ajme Marine, škužajte...nismo Vas čuli. Ma sidite bona....Ajte samo minut. Popijte čašu vina ! Očete li ća izist ?
Ma fala Van lipa. Priša mi je. Velika mi je priša !
Ala...ala ! Morete sist bokun i sa nama obišnin judima. Neče Van past kruna s glave !
Jo....nemojte, ja sam zbilja samo tija.....
Ma vrag odnija i prišu. Nikome još nije uteka posal. Sidite..molin Vas Bogon...Sad će Ane donit pršuta i sira ! A očete li jednu paštu ?
Ma kakvi...Ne jin Van ja pašte !
Je..je..Ni to zdravo..Ali evo rođendan je maloj Esmeraldici pa smo vazeli malo pašti - jerbo dica volidu slako !
Aha...Evo je stiga pršut !
Ali...nemojte Davore....Reka san Van....
Ma ča si ti reka...začujen ja iza sebe poznati glas moje suside...
Okrenen se..Kad zbilja...iza mene sidi šjora File i pita svoga unuka paštama.
Šjora File ! A tu ste..Nisan Vas ni vidija. Zdravi bili !
Eto me sad višje ni ne vidiš, a...! Ne denjaš se ni sist i malo proćakulat s nama...je li ? A tija bi da glasamo za tebe !
Ajme, samo nemojte omar o politici !
Ne, vengo ću o brokvama i lanjskemu snigu ! A nego o ćemu ću vengo o politici ? Ionako ste nas sve izludili...a sad bi tili da mućimo ! Ma vidite li vi koji je to mulac ?!
Pustite... maloj je Esmeraldi danas rođendan !
Je...Nima ča ! Baš ste lipo ime nadili maloj, reče ona nikako podrugljivo...po svoju..i okrene se prima bidnemu Davoru i Ani.
A to smo mi po jednoj seriji sa televizije !
Naravski ! Ko bi se sitija, ajmo reč...onih starinskih imena ka ča je Luce, Dujka, Bepa.....
Pa to van je Josipa....Mislin ta Bepa..zafrknen se ja i pođen tumačit šjori Fili te stvari oko imena.
Tiš mi reć !? Došlo jaje učit kokoš ča je ča ! Ajde Marinko moli Boga da su ti se oba dida zvali Marin...jer kakvi si, bili bi ti nadili kakvo meksikansko ime. Sto posto bi ti bija niki Pančo...jerbo to podsića na pancetu !
Ha..ha...ha...Zaceni se Davor.
A ča se ti cerekaš nesriknji sinko. Nadija si maloj ime Esmeralda.
A znadeš li ti da se tako zvala ona šesna ciganka ča se u nju bija zajubija oni gobo od zvonara crikve u Pariđiju ? Ne znaš..je li, a !
Nisam baš siguran....
Ignjorante jedan obišni...A ti si mislija kako ti je to niko meksikansko ime.
Nisam ja ništa....
Ma svi ste vi otišli na kvasinu. Išenpjala vas je ova luda televizija. Ne morete prez nje ni vlastitoj dici imena dat.
Od vas je učinila obišne tukce !
Svi se umiridu jerbo je šjora File podigla ton svoga glasa...a kad ona to uradi..omar i muve stanedu zunzit i brže boje se negdi sakriju. A da o Li-Lu, koja se pritajila i zavukla mi se ispod nogu - i ne pričam.
A nisi maloj mogla dat, ajmo reč, ime Ane...ka ča je tvoja mater tebi dala ? A ne, ne...Vi bi ste otili bit moderni. Dobro joj nisi nadila ime Simonica !
Još je mala lišo i prošla !
Šjora File...pokvarit će te judima rođendan od diteta !
Bože oslobodi ! Ja samo kažen ča mislin....
Eto, judi moji, fala Van..ma ja moran ić....pokušan se ja škapulat.
Ma stojte još malo. Mrate probat Aninu pašticadu !
Nema mi di stat. Puknit ću !
Šjora File se omar javi:
Onda bi ti bija prvi političar koji je puka ka cvrčak - ali od spize ! Sve se meni pari da su vaši trbuji nekako rastezljiviji nego oni u ostalega svita. Evo...cilemu se narodu trbuj usuka, uša u se..slipija se sa kostima...A jedino u vas političara se rastega...jerbo puno morate mumat i lokat...Sve u interesu sviju nas. Jo koja je to teška žrtva !
Opet ste me se uvatili !
Ma nisan. nisan..nego mi svaki put prikipi kad otvorin foje pa mi unuk čita ča tamo piše. Uvik o lopužama i kradjivcima....ali nikako da neko najebe.Da se neko od njih najde u pržunu. A to ne ! To kod nas ni moguće !
Bit će i tega !
Bogami teško ! A jesi li vidija ...eno te spominje oni ingleški parlamentarac okolo afere u spliskome škveru koju si načeja naza pet godin.
Pa ča se desilo ? Ajde reci !
Još ništa.
Eto vidiš..izija vuk tovara !
A mi, mali judi, ne moremo pravdu istirat nigdi. Lipa nan je ota pravna država...moš mislit ! Ona važi samo za bogatune i političke mazgune. Sve lipi svit. Kaptalac do kapitalca !
Šjora File, ajmo nazdravit maloj Esmeraldi.... pokuša ponovo prikinit tu tiradu bidni Davor.
Davore...šesni moj Davore..Aj ti prvo na gradski prominit maloj ime...I ne jidi se zaraj mojih besid. Još će ti se mali, ako Bog da da se rodi, zvat Dezmond.....Ostavi ingležima i meksikancima da oni dajedu svoja imena svojoj dici...a ti svojoj nadij naša imena ! Jerbo ćedu nan i dušu vazest. A tvornice, zemju i sve drugo evo već i jesu.
Pustite jude na misru, šjora File....Nije ni Vaše ime baš domaće. Sto posto Van je pravo ime Filomena ?!
Ona me pogleda ka zadnju štracu.
A jesi prosuja glupost....Marinčelo ! A da šta nego je Filomena domaće ime ! A da mi je znat iz kojega si kara ti ispa, za Gospu blaženu?
Jemate Vi prav...Uvik Vi jemate prav !
A dašta ! Bilo bi ti bolje da nešto uradiš u Saboru...Da malo prodrmaš gujicu ! I reci Staziću da će teško izać na kraj s onima jubitejima kamijona. Ma nek se drži. Ja san uza njega. Danas je i Mesić reka kako je bivši ministar o vojske lažjivac ! A Hebrang stalno ponavja kako on ne laže vengo samo ponekad ne govori istinu.
I mene to ćudi !
Samo se ti i dalje ćudi i bulji ka tele u šarena vrata dok van lopuže isprid nosa kredu i pravidu se nevini a vi ka da ste mutavi. Eto je i ovi inglež...kako se ono zove mali...okrene se ona prima svome unuku...?
Helmer baba, Helmer..On ti je u evropski parlamenat !
A pametna li diteta ! Da mi je znat na koga se uvrga...? Ponosno ga pogleda i pogladi po kosi šjora File.
E oti Helmer ti je reka da je Rvacka, ča se tiće vladavine prava, gora od Afrike ! Jesi li me sad čuja ?
A evo jesan !
I ne samo da ćedu afrikaneži bit jači od nas ča se pravde tiče...vengo ćedu i boje živit od nas.
E to ćete malo pričekat !
Samo ti sviraj ! Već je Sanader reka da smo u banani......A uskoro bi mogli bit i na grani. Pa kad već od nas činidu makake neka nan baranko osiguraju i prirodni ambijent.
Ma ča Vi to...?
A cilu Rvacku vaja ogradit žicon badavicon i naplačivat karte fureštima da nas dojdedu gledat...I to cile ekskurzije i organizirane grupe... su avijonima, kruzerima, feratama, kamperima, tonobilima, bičikletama i na noge. Tribadu se organiziradu simpoziji o nama i ovon ćudu ča nan se dešava....
Postat ćemo glavna evropejska i svistka atrakcija... a oni tuntle Bajs napokon će spasit turizam u Lipoj Našoj !
Lovuša će teč potocima pa će meštar Ive napokon moć napunit svoju... državnu kesu !
A na žici vaja napisat velikin slovima : "ZABRANJENO RANIT STANOVNIKE !"
|
