Uskrs je.
Lipi dan. Sunce. Mir.
Ali Li-Lu se pomamila - a kako već od najranijih ura po kući spremaju i ovo i ono.... jerbo se pravi svećani obid i ćekadu se gosti - pa se kužinaje, doliva, priliva..siće, riže i kuva. Nastala je prava gungula...u kojoj pas trči od punice pa do žene, od dice pa do mene, od špakera do ormara, od stola pa do frižidera...laje i skaće..tura njušku di triba i ne triba...mene je tokalo izvest ga isprid kuće da ne smeta u otemu konfužjunu.
A tako su se liberali i nene.
Sija san na šentadu i pustija Li-Lu da trči okolo oko stabala po travi. Tišina...reklo bi se; "Nema ni pasa!" - ali ne moš tako reč kad je tu rastrkana Li.Lu....kojoj stalno bacan šiške a ona ih neumorno vraća, dahće i gleda me drito u oči čekajući novi itac. Jezik joj se obisija i pari mi se da će se i ona izvrnit po tleju od umora - ali za sad ne odustaje od igre.
Sinoć su se Joppa i Vjera kasno vratili. Našli su se u "Staroga Mornara" Svi spliski Jurjevići u drugon kolinu...da se, bome, upoznadu - jerbo ih nije malo. Sve je to organizira sin od mojega prvega rođaka Darka priko "Facebooka" ! Ma ih je dil po svitu od Ingleške do Koreje ...pa se nisu baš svi mogli trevit - ali dobro je za početak. Većina je došla.
To su ti moderna vrimnena. A ča bi mi prez kompjuteri ? Ne bi, izgleda, višje mogli ni živit. A ja i Maja smo bacili sinoć na karte sa Sanjon i Čokon...a punica se stalno križala isprid televizije na kojoj su one, ka nike zvizde, pivale...jerbo ni ispala nika voditejica sa TV-a , za koju moja punica kaže da joj je "slon sija na uvo"...ča oće reć da nima njanka bokun bokunić sluha - a ispa je njoj omiljeni Drele.
Tako smo uz karte, križanje, spizu i bibite dočekali kasnu uru pa i sam Uskrs....a dica su se bila vratila pa opet izašla vanka s prijatejima...tako da san poša leć prin nego su arivali natrag. Sad spavaju a ja čuvan isprid kuće Li-Lu koja se napokon umorila pa se izvalila poda moje noge u lad od šentade i ne more maknit ni uvon...Drži šišku u justa, ne pušta je
i samo dahće.
I taman kad san upa ka u niku Nirvanu ...otvoridu se vrata od portuna i eto ti šjore File niza skale.
A ča je ? Oli su te potrali iz kuće ? A ?
Dobro Van jutro i sritan van Uskrs šjora File.
I tebi, sinko moj !
A di ćemo vako rano?
Gren do crikve....Čekadu me prijatejice !
A oće li bit i koji korteđant ?
Ajde ne zezaj me na ovi dan - Davno su finila ta vrimena kad san ja bila bacila oko na mojega pokojnega...Bog mu da pokoj...I kad smo se korteđavali....
Ma niste Vi još za bacit ! Biće kojemu finemu gospodinu još uvik zapne pogled za tako šesnu ženu !
Aj pušti me s miron, Marinko ! Ostala san ja virna mom pokojnom...i ne bi ga bila privarila ni da je partija i puno prije nego ča je !
A znan ja da ste Vi jedna žena , ča bi se reklo, od starega kova...ma se isto nikad ne zna ?
Je..nisan ja prilivoda ka i vi političari ! Pa minjate uvirenja i bandire ka i dica mudante !? Ajde pusti me stat ! Nima tega čega se vi ne bi odrekli zaraj vlastite koristi !
A lipo ste nas ištracali !
Ne,,nego ću vas poć mazit ! Eno kredu i na televiziju u ona takmićenja od pivanja...a nećete vi krest u politici ?
Asti ga miša ! Znači i Vama su digli tlak sinoć na televiziju. Oli Van je drag Drele ka i mojoj punici !
Draga mi je pravica a ne krađa ! Eto ti ga na !
Annn....
Ma ča je ovo došlo..Kredu na televiziju, kredu političari, kredu u fuzbalu, namištadu se natječaji, krede država a , bome, kredu i nju ... Sve sami lopov do lopova ! Ma dojde Bogu za plakat ! I on će dignit ruke od nas !
Ajde neće bit baš tako !
Nego još gore ! Aj, makni se malo...ča si se tu raširija po šentadi ka niki tamo šeik,,,Daj malo mista...reće ona i sidne do mene. Otvori veliki crni boršin i izvadi šudar iz njega. Otare čelo i malo mane sa njime ka da tira muve...
A ča Van je vruće ?
Boje ti je mući. Kad se sitin di živin...omar me uvatidu fumade !
Gren ja doma skoknit po ventulu..ako triba ?
Fala ti - ne triba mi ventula. Triba mi malo spokoja i to je sve.
A očete li da vas ja bacin auton do crikve.
Koje te auto sad spopalo...Pa nima ni pet minuti do Sv.Petra i Pavla...Nisan ja baš toliko stara da ne mogu učinit tih par koraka...reće ona i nagne se prima mene drito me gledajući u oči.
Samo sam mislija...
Je, puno si ti mislija..Moš mislit ! Još bi me ti i onin vojnim kamijonom bacija do crikve.
Kojim kamionom ?
Onim..onim. Znaš ti kojim ?
Ma kojim, šjora File !
A onim kaijonom ča su ga vazeli za petnajst miljuni skupje vengo ča je bila druga ponuda !
Pa ča ja jeman s tim ? I ka prvo nije jedan vengo višje kamioni !
Baš me briga koliko ji je...samo znan da su ji uvatili s rukon u vrići...a sad oćedu kaznit one ča su to otkrili a ne one ča su to uradili ! Pa judi moji - di toga jema..zavapi ona - digne glavu prima nebu i prikriži se !? Di toga, za Boga miloga, jema ?
U Rvacku !
Je , baš ovod ! Ma ča smo mi Bogu zgrišili pa da jemamo takvu vlast ? Reci ti meni...Ča ?
Ne govorite meni...Pa mi smo to i razotkrili. Pridložili saborsko povirenstvo. Eno Stazić radi svoj posal kako triba !
Svaka mu ćast. E, da je baranko višje takvi !
Pa onda nemojte meni nabijat na nos ote kamione ! Stazić je iz moje stranke !
A moran nekome ! Ti si mi ovod jedini pri ruci od političara ! Nisan ja za to kriva...e, bome !
Ma nismo svi isti u politici !
Znan ja to, znan Marinko moj - vengo me jididu toliko da ću puknit ka cvrčak ako se na koga ne iskalin...A ti mi dojdeš isto ka nika vrsta ispovidnika...! Sve ti rečen ča mi ne da mira i ča me tišti...ma te, za razliku od pravega ispovidnika, još mogu malo i bombizat i refat se na tebi. Ti me baranko saslušaš....a znan ja da ćeš me digod i poslušat. A poslin gren u crikvu u pravega popa...ispovidit se i ispričat svoje grije i tražit oprost za njih. Ma jedan veliki dil političara misli da je bezgrišan...i onda kad nas upropastidu - ne pada jin na pamet da zamolidu narod za oprost za sve svoje grije i za sve nevoje u koje su nas uvalili.... Nego bi još tili da jopet glasamo za njih !
A vi nemojte !
Ma naravski da ja neću ! Ma jema i meju narodon nepopravjivih cukuna, lipi moj Marinko. Moš mu bajame tuć na glavu ..Moš mu krest i ono malo mižerje ća jema....Moš mu otkidat od justa i zavlaćit ruku u đep...ma on neće pristat birat lopuže i pokvarenjake kojima za vrime izbori iz justa cure samo med i mliko. Uvik ti je taki jedan dil naroda....od kad je svita i vika !
Triba to minjat !
Triba, Marinko..naravski da triba....Ma je to mukotrpan posal.
Eto sad ste priznali da ni lako ni svima nama političarima.
Ma znan ja da nije, sunce šesno moje...znan ja. Nego tribate bit uporni i nedat se. Jerbo isto je najveći dil judi nezadovojan i puno je očiju uprto u vas s nadon. Triba se žrtvovat....Triba se patit da se stvari prominedu. To ti govori šjora File...na Uskrs ! Jerbo je baš ovi dan pravi dan da se oto kaže...i da se napokon falši judi i farizeji u politici razotkriju do kraja.
Je, je...tako je !
A sad me molaj...Moran poć. čekat će me moje dobre prijatejice. Mislit će da mi se nije čakod, ne daj Bože, dogodilo !
I digne se ona polako...Uzme svoj veliki crni boršin. Baci pogled na Li-Lu koja se sva uvukla u se i sakrila u kantun ispod šentade..ne dajući ni glasa od sebe..jerbo joj je šjora File još orprije utirala niki ćudan straj u kosti...i krene polako nogu prid nogu...Učini par koraka, okrene se i škiljeći onako po njezinu, podrugljivo, reče mi:
A onemu Rončeviću moš kazat da slobodno more poć pivat u televizijsku emisiju "Zvizde pivaju". Sičaš li se one pisme od Zdenke Vučković, i ćini mi se, Ive Robića..ča se zvala "Tata, kupi mi auto" ! E..on bi triba pivat tu istu pismu samo ća bi se sad zvala "Ministarstvo, kupi mi kamijone"! A ženski glas mogla bi mu bit Kosorica oli koja druga ženskica iz Vlade. A po potribi moga bi i Hebrang uletit s trećin glason ! Jo...koja bi to pisma bila. Sigura san da bidu osvojili sve nagrade ovoga svita su njon - a ne da se naš dotur Ivo stalno smije ka ona stvar na nove mudante - čin mu spomeneš lupeštinu, korupciju i kriminal.
Jer...moga bi mu, na kraju krajeva, taj smij ipak... prisist ! Zapanti dobro ća ti je šjora File danas rekla, baš na Uskrs !
|
