Ta-taaaaaaaaa !!!!!
Ma...... Ta-taaaaaaaaaaaa !!!!
Šta se dereš, uši si mi probila !
Ma vidiiii je !
Koga to ?
Ma Li-Lu...Ne da mi izač iz kuće !
Stišan muziku i zbilja začujen iz kužine režanje i ono visokofrekventno lajanje našeg četveronožnog kućnog ljubimca.
Ostavi me,,,Ostavi me na miru....kad san ti rekla !
Više zapomaže nego zapovida Vjera.
Teškon mukom se dignem, ostavim knjigu i odem vidit koji se to vrag dešava idprid vrata od stana.
I imam šta vidit: Pas skaća po Vjeri, čini škerce...potiže je ćas za rukav, ćas za cipelu ....a ova se brani smotuljkom od novina kojeg Li-Lu svako malo zgrabi zubima i rastiže režeći.
Je li dosta više ovega cirkusa ?! Viknem na pasa.
Li-Lu se zaustavi, nakrivi glavu kroz onu bilu koprenu od dlaka koje joj padaju priko očiju - i zaćuđeno me pogleda...ka da me pita: A šta je tebi sad ?
Vjerći iskoristi taj nenadani intermezzo i šmugne kroz vrata na hodnik od portuna.
Li-Lu se opet upali...ka da radi na baterije i počne lajat, grebat pandžama po vratima i cvilit.
Šmugnem i ja u sobu. Zatvorim vrata i nabijen muziku. Lipo namistin kušin ispod glave i zavalin se uzimajući knjigu u ruke. Nisan se dobro ni namistija kad začujen:
Mariiiineeee...Mariiiineeee...Dolazi vamo...Evo te ništo triba šjora File !
Enti čire Irudove....nemoš imat ni minuta mira u ovu ludu kuću..pomislin stenjući i oblačeći šlape .
Evoooooooo !!!! Evooooooooo dolazin !
A šta se dereš tikvane...probudit ćeš cilu kuću....oglasi se Majin jidan glas.
Zdravi bili šjora File...Ćestitan van Dan žena !...rečen čin ugledan moju susidu...i lipo je zagrlin i pojubin u oba obraza, ka ča je i red.
Ajde komodajte se...Sidnite !
Fala ti Marinko moj ! A ča si kupija ženi za osmi marta ?
Pasa !
Pa jema godinu dan da je ovod...To je već tele a ne pas !
Ajme nemojte tako šjora File...oglasi se moja punica. Baš je naša Li-Lu cila šesna i pametna ka Salamun.
Je, mogli bi ste je dat i na fakultet...oli da se privati kandidature za gradonaćelnicu, kad je već toko pametna !
A Li-Lu....čin ugleda šjoru Filu...biž u kantun iza kauča na svoj kušin pa je odotamo čiri....ka cila u nikom straju.
Eno ste nan pasu utirali straj u kosti. Ćin Vas je vidila pobigla je u kantun !..dodan ja.
Nego ča ! Tako i triba....Nego, nisi mi reka ča si vazeja ženi za njen praznik ?
Pa reka san Van da san joj kupija pasa.
Bogami lipo,,,Kupija si joj pasa lani...pa sad misliš da si je namirija za deset godin.
E..tako je to...jerbo se pas minja svake godine..reste, postaje stariji, svašta nauči...tako da je on svake godine isti ali isto tako i drukčiji, novi pas !
Škrtune jedan škrti...Ča još vi zastupnici nečete izumislit samo da prođete ča jeftinije ? Sram te bilo ! Pa si poša šparat na vlastitoj ženi ?
A ne...ne ! Tega san pasa ja kupija i za punicu i za moju čer i za ženu. Neka sve tri guštaju. Ko je to vidija darivat samo jednu a drugima ništa....
U to se Maja umiša u naš razgovor i napadne me da šta zezan bidnu šjoru Filu...i da je pustin na miru.
Ajde Majo pusti ga...neka samo blebeće. Navika je u Saboru na to. Ka da ga ja ne znan ? Biće ti ni pasa nije kupija ?
Kupija san joj kitu ljubićica !
Dobro si još i prošla mala....nakrivi šjora File svoju mudru glavu prema mojoj ženi.
A punica ? Je li Vama čakod kupija ? Je li odrišija kesu pa kupija baranko onu čikolatu sa rižon ?
Pustite Vi...Dobar je moj zet meni...Počme me branit punica.
Je...puno je dobar ! Jema takvih na kvintale....
Ko kaže da jema vakih ?.... Uletim brzo u rič šjori Fili. Nima, nima šjora File moja...jerbo nima svako prošeka kojega ja dobijan sa Hvara. Evo san jučer dobija dvi botilje...i sad ćemo jednu načet. Majo daj bićerine...!
Nalijemo tri bićerina i onda lipo nazdravimo: Za sve žene ovega svita ! Živija osmi marta !
Je dobar !...raznježeno će šjora File. Moj Marinko - cila tvoja pamet je u temu ča znaš prave jude koji znadu pravit vaku likariju od prošeka ! A to ni malo !
Ajmo ča popit u to ime po još jedan bićerin !
Ajmo !
Strusimo po još jedan bićerin i šjori Fili se malko zacakle oči.
Joj kad se sitin svoje mladosti kad san na Dan žena dobijala bukete cvića i kad su me vodili po plesovima i većerama....Kantalo se i balalo po Frontama u Mjesne zajednice, pa u Domove o kulture, svukud di se moglo.... Nisan pristajala balat po cilu noć. A momci...momci su se lipili za me ka leptirice na sviću. Namušćala bi se i sredila ka krajica...Ni mi bilo ravne ! Tot san i upoznala mojega pokojnega...E...!!!! Vozija bi me po cili dan na bičikletu !
Ma je to bilo drugo vrime šjora File ! Ni bilo boje zabave pa Van se i to činilo ka krajevski bal na kojen ste Vi bili pričipesa. A bičikleta Van je bila ka najlipja kočija oli merđo !
Pa za me to i je bija krajevski bal...makar smo bili prez puno tega. Ma smo jemali judskosti i jubavi. Bome, tega nan nikad ni falilo...I zato san se ćutila i tišćala ka prava prinčipesa...I zato mi je bilo lipo ! A ča ti misliš da šoldi činidu jude bojima ? Da oni koji jemadu merđu više pizadu od drugih !?
Nisan to reka !
Ma si mislija !
Nisan...očiju mi...!
Aj, ča mi se sad tu kledeš i mucaš....ka nika plačipizda....Znan ja da je tribalo uvik jemat i štogod šoldi za priživit ka čovik...Ma to mi nikad ni bila prva stvar u životu. Nikad !
E, to ste lipo rekli. Sičan se pokojnega šjor Marina Tvrdića, ča je sta kat ispod nas, kad je ono su svojin karon i konjon bija u poje di je svojoj ženi ubra kitu pojskoga cvića - tamo u Merjan. Kako je u ta vrimena bilo nikako neprilišno da pravi muškić pokazuje velu jubav prima svojoj ženi a najskoli da joj nosi doma cviće, jerbo se to u staremu Splitu držalo ka za niku slabost oli meškinjavost...on je vaze oti buketić cvića i metnija ga je ispod svoje špančere koju su naši stari zvali strijač, da to nikor slučajno ne vidi...Poza tin je lipo sija na kar i polako, milujući konja škurijon po leđima, krenija prima Poljudu. Ali na njegovu nesriću trevija ga je jedan poznati i lipo ga je, ka ča je i red, pozdravija: "Zdravi bili šjor Marine! " A šjor Marin je po navici diga španćeru sa glave i otpozdravija: "Zdravi bili !" I tako je otkrija onaj buketić cvića ča ga je bi ubra za svoju ženu. U po ure je cili Split zna da je šjor Marin pokaza strašnu slabost i niku bolešćinu pa je ženi poša brat cviće u Merjan....Jo, do kraja života su ga zajebavali...! Eto, to Van je bija oti nakrivo nasađeni Split...Nisi smi pokazat ni da voliš svoju ženu !
To je zato ča ste vi muškarci obišni tudumi ! Zaključi jednostavno šjora File.
Aj Majo daj nariži malo sira i gavrilovićke.
Nisan ti ja od te spize ! Jebeš....čibi fredi !...bez pardona će moja susida. Nego gren ja vazest doma brujeta ča san ga napravila...Za lizat prste je.Pa ćemo se skupa mašit.
Aj zovnite i Vi svoje, šjora File...Mi jemamo pećenoga, pa ćemo podilit !
Samo da nije kokoš...doda šjora File.
Od kada san vidila kako se jedan gospodin izvrnija isprid blagajne u samoposlugu i pa u nesvist...jerbo je ispod španćere bidan sakrija zaleđenog pilića..koji mu je smrznija mozak....pa se strovalija taman di ni tribalo...Odonda ne jin ni kokoše ni piliče.
Jo ča mi ga je bilo milo...Bidan ni jema za platit pilića pa ga je tija ukrest. Od nevoje i mižerje a ne zato ča je bija lopov. More bit da mu je ženi bija rođendan oli imendan....
Ajde, puštite sad to...ajde zovnite svoje da dojdu....reče moja punica.
Jemate li vina ?
A naravski, ubacin se ja - Nikad ova kuća ni bez vina !
Tako i triba !
I taman kad je šjora File pošla da će zvat svoje da dojdu na obid...viknen za njom: Šjora File ! Šjora File ! Evo i Vama jedna crljena ruža ka ča san je danas da ženi i punici ! Jedino sam mojoj materi, ka dite - kupova ljubićice. Ma sad meni dragin ženama na ovi dan poklanjan crvenu ružu !
Ajme fala ti moj sinko, raznježi se šjora File i ka da joj je utekla jedna gotovo nevidljiva suza iz oka.
Puno ti fala!
Onda se zaputi prima vratima i naglo se zaustavi....
Ma daj Majo Makni se malo ! Je li ono ona ona televiziju ?
Ma ko ?
Ona sa bilon koson!
Koja...?
Ma Kosorica ! Je..je, to je ona !
Ajme Marinko moj...molin te dragin Bogon uduni televiziju.
Ne moran je još gledat i na ovi dan....Dosta je meni ote falše brige za bidne i nemoćne...dosta, za sva vrimena.
A dobro....Kako Vi kažete !
Nego Marinko moj, možda ti nju i treviš dikod gori u Zagreb..pa joj lipo reci kako joj je šjora File porućila da mi je pun kufer svega ča oni iz vlade palamude i mažedu narod dok sve gre u provaliju. I reci joj da pristane pituravat kosu. Vako pari da stalno jema kacigu i da je ovi ćas sašla sa motora. I još kosu tanga u bilo.
Ma kad je već tanga - da je baranko tanga u crljeno...
Šjora File !
Molin.
A ča ste me ono tribali ? Zašto ste došli ?
Ne sičan se višje a i koga briga, Marinko moj....Glavno je da smo se našli. Da smo skupa !
Tako je šjora File...Aj požurite se, jedva Vas čekan vidit natrag !
|
