A ča su to anarkišti ?
Pa oni su Van , ka, protiv svake vlasti, države, stege, crikve.....i, kako bi van to reka, nikakvi jin autoriteti puno ne značidu osim ća volidu radit kako ji je voja i sve po svojemu guštu, Ne volidu da jin se zapovida a govoridu da bidu tili živit po prirodnin zakonima a ne po izmišjenim, umitnim ljudskim zakonima - oli po diktatu nikoje vlasti oli onih koji kontroliradu vlast. Zato su oni uvik kontra i vojnikov i policjoti...Nijedna jin uniforma ni baš po guštu. Ma i njih jema puno vrsta i podvrsta. Ove i one vele......
A ja san mislila da su oni niki terorišti !
Bile je i tega...moja šjora File, nije da i tega ni bilo . Ma nije u temu bit anarkije. Jerbo se našlo i onih ča su mislili kako triba po vladariman bacivat bombe, pucat pištoljima joli jin probit trbuj rašpon.
Bože me oslobodi....!
Tako Van je to, šjora File....Uvik jema i ovakega i onakega svita,. Pa najboje to sami znadete.
Je, je......Nima tega ča mater ni rodila !
Ali ovod u Dalamaciju, kod nas - tu se višje radi o nikoj boemštini.....O našen svitu koji ne voli da mu iko soli pamet oli popuje ! Znadete Vi one naše jude ča jin je stalo jedino do svojega mira. klape. marendina i bocuna crnega.....i koji su štufi svih kerefeka i velike pompe ča gre uz politiku i uz vlast.
Ma znan, kako ne bi znala....Nego je li istina da se nogometni klub Split iz prve zva "Anark" ?
Je, to Van je živa istina !
A kako to ?
Lipo ! To su Van bili sve momci koji su bili dil nezadovojnika postojećin stanjen ...tamo još u Krajevinu Jugoslaviju. To su Van bila radniška dica oli sami škverski radnici...A kako jin je zakon, u ono vrime, branija da imadu svoju politišku organizaciju..oni su lipo osnovali športski radniški nogometni klub i nadili mu ime "Anark" - tako da je svak pametan omar zna da su to livičari. Bidni...kasnije jin je u ratu skoro cila prva momčad striljana...jerbo su prvi otišli u partizane. Oni su van činili oni Prvi splitski partizanski odred.
Aha...sad san se sitila...Jemaš prav !
To je bila mladost !
Je..je...Ma mi ništo ni kjaro. Jutros u butigu čujen di niki govoridu kako su i esdepejci anarkišti jerbo da su u Sabor prikjučer napravili barufu. Da su ka ajduci navalili na stol o pridsidnika Sabora. Da se oni Friščić vas smeja i smanta, da ni zna di mu je glava a di gujica...Pa je mora pobič..Pričadu da ste išli ka u niki manifestacjun....pobunu usrid Sabora,
Ma ke barufa ? Samo smo izašli vanka isprid pridsidničkog stola i nismo tili da se nastavi rad Sabora u kasnu uru, kad nikoga nima....Nismo tili da u tu uru stavidu u raspravu naš pridlog zakona o smanjivanju poreza...jerbo je svaku većer Sabor radija samo do sedam uri navećer - a sad su tili nastavit i poza osan uri...samo da se ne čuje i ne vidi ča mi to nudima u našin pridlozima.
Ma je li istina da se Friščić i poslin po ure njanka ni denja vratit natrag u dvoranu ?
Istina je...jerbo se, sve mi se pari, bija dobro pripa...pa su poslali Jarnjaka koji nas je napa da smo vagabundi...ma je isto prikinija zasjedanje.
Ola...ča ste mi se ništo okuražili !
Ma nismo tili da ćinidu mone od nas...Eto to je....!
A ovi doli u butigu odma govoridu kako ste anarkišti ! Pa ča da i jeste...meni su baš simpatišni oti anarkišti. Ne dadu na se ! Tako i triba ! A ča mislidu ovi na vlasti...da jin je Sabor čaćin....pa da oni mogu radit ča ji je voja - a vi bi ste tribali stat kuco i samo jin begenavat ! Ma Bogati....Evo, ja bi vas se omar odrekla da in niste pokazali zube.....
Ma ni to ništa bilo !
Znan ja da je to kapja u moru, Marinko moj...Jer omar se sitin kako su oni vas mazili i tetošili kad su bili u opoziciju. Evo mi je sad skoćija tlak! Skupjali su marune po ulicama....vezivali su se lancima oko Sabora....napunili su splitsku Rivu sviton koji je pod dirigentskon palicon maestra Sanadera....govorija, pritija i vika svašta. Nazivali su vas izdajnicima i kleli se kako su za nji generali iz domovinkega rata svetinja i da ji nikome ne dadu. Poslin su ji bez po muke ekspresno isporučili vanka....ma su nastavili pjuvat po vama. A sad jin, ka naivnin curican, smeta ća ste stali u Saboru isprid govornice i ča niste dali da se vridja zdrava pamet vas i vaših glasača.
Baš tako, moja šjora File !
Još kad čujen kako sviridu o temu kako ste vi komunjare...pa kad to još kaže ona rusulica Kosorica...dojde mi da razbijen televiziju. A do jučer su nosali okolo partijske knjižice i gurali se u prve redove po Komitetima i pitaj Gospu di sve nisu....Trčali su štafete i kleli se u socijalizam i komunizam ! Pa jema li di tega na ovemu svitu ?
Jema, jema....budite sigurni. Jer di je svita tu jeuvik pametnih i krasnih ljudi...ma i govana, smrdjivih govana...šjora File moja !
Pa ka da ja to ne znan! Tiš me poć učit....naroguši se ona ! Nego to kažen onako..jerbo san jidna na ovi narod ča trpi da ga se voda žedna priko vode....A ljudima je teško, puno teško Marinko moj. Zato će ti sve višje bit i oti anarkišti...ča ćedu ne samo grintat i brontulat protiv vlasti - vengo će joj i šakon počet pritit...ili otić u demonštracjune...a onda je svašta moguće ! Neće to moć višje prikrit organiziranje nikakvog svitskog prvenstva - pa sad da je i od samega fuzbala !
Je...triba jist, triba priživit šjora File !
Naravski ! A još kad poćmedu stizat računi za ove puste dvorane - vidit ćeš onda ća se more desit. A to je izgrađeno opet po onemu lipome modelu javno-privatnog-partnestva....di uvik dobro projdedu ovi privatni a najebu javni interesi.
To smo, ionako, kopirali iz vanka !
Oho....jemaš prav, ma san ja čula da je u Inglešku krenula i izgradnja pržuni po otemu principu od javno-privatnega-partnerstva. E, priznajen, to mi se omar svidilo...jerbo san slušala onega ministra o pravosudja..onega štrkjavoga i finega Šimonovića...da kako u Rvacku fali toko i toko pržuni.
I ja san to čuja !
Ma zamisli ! Naši bidni krimnalci moradu se gužvat u pržunima i spavadu ka srdele u sardinu...deboto jedan po drugome. Pa ji , eno, moradu skoro puštat vanka i molit Boga da ji sud ne osudi na pržun ...jerbo je tamo sve krcato. Još ću povirovat da ji vlasti nagovaradu da bižidu iz pržuni - jerbo triba oslobodit mista za nove ture kriminalci. Nemoš ti njih toliko smistit koliko oni moredu krest, ubijat i kršit zakone.
A ča ste Vi zločesti !
Ma moli ti Boga ča ovi naši sudovi ne radidu kako triba...pa jin po škafetinima stojidu spisi od prije sto godin. Pola tega gre u zastaru. Mora bit da ćedu poćet smanjivat i kazne zaraj te gužve u zatvorima.
Ma ča je vama?
Pusti ti mene da govorin ! Jer po meni ajmo mi učinit najpametniju stvar na svitu i sve te naše dvorane koje smo sad izgradili a koje su ka buža bez dna.....lipo pritvorit u velike pržune. I to su pet zvizdic !
Ali...
I onda ne bismo više jemali problema sa zatvorenicima. ne bidu tribali bižat iz pržuni a proradili bi i naši nevajali sudovi...jerbo bidu sada imali di slavat kažnjenike. Ovako ji moradu držat doma oli puštat da se šetadu na slobodi...jer pošteni kriminalac ne more stić na red za ulist u pržun i izdurat svoju kaznu. A od svega tega i privatni i javni interes bili bidu namireni. Svi zadovoijni...svi prijatelji. Svi partneri !
Ma kako....?
I još bi smo slobodne kapacitete naših pržuna mogli iznajmljivat fureštima za velike šolde. Uvozili bi lipo kažnjenike-turiste. Moš mislit koja bi to bila velika propaganda za Rvacku: "Mala zamja sa velikin pržunima...Za kriminalce iz cilega svita!" Još bi ja dodala: "Popust na grupe!" Pa bi za veće količine uvezenih robijaša-furešta bija i boravak ciniji....Ča veća ponuda - to cina niža. A kapitalizam je,. bome i kod nas stiga. Baranko bi tu tržište funkcioniralo kako vaja. Moš mislit lipe parole na CNN: "Ukredite u Ingleškoj - Robijajte u Rvackoj!" Pa bi te dvorane kategorizirat tribalo. Pa onda posebne menije i dodatnu ponudu napravit - za bogatiju robijašku klijentelu. I sve bi uvik bilo puno. I liti i zimi ! A oni Bajs bi puka od jida i đelozije ! Jebeš ovi dosadašnji turizam s poštenin sviton ! Nas moredu spasit jedino robijaši ! A neki koji su sad kod nas na slobodi sigurno bi uložili svoje pare u povećanje komfora tih pržuni. Za svaki slučaj ! Zlu ne tribalo ! Eto, sad si čuja...!
Šjora File...ja znan da je jugo i da svitu po vakemu vrimenu svašta pada na pamet - ali ovako nešto još nisan nikad čuja !
I neš ! Odgovori ona unoseći mi se u lice ...I neš !
Pa Vi ste jedna prava pravcijata anarkištička duša !
A da ča san ! I baš mi je drago ča mi je to danas došlo u pamet ! Ma san ja još oni blagi anarkišta...Oni pitomi anarkišta. Jer, ka ča jema jutih i blagi peveruni...Tako ti jema blagi i jutih ljudi. Samo ča je stvar u temu da se oni blagi u ćas moredu pritvorit u one jute...A onda neće višje bit dosta samo strpat lupeže u pržune...vengo će vridit ona: "Rašpe, bombe, rivolveri!" - a onda ko ča peška - peška , Marinko moj !
|
