Jutros opet kiša.
Prvo vozim malu u Špinut.....pa natrag na Pujanke, pa onda punicu na pazar...Vraćam se priko nove športske dvorane di se igra svitsko rukometno prvenstvo, pa na Bačvice...pa opet na Pujanke....Zovedu me iz Sabora. Sutra je Odbor za zaštita okoliša ovod u Solinu. Tema je azbest...Pa svraćam u stranku na po ure pa opet na Pujanke. Zoven Antu da gre li u Zagreb ? Dogovaram par sastanaka...pa idem do na Klerikat...Tamo je studij Sociologije Filozofskega fakulteta Sveučilišta u Splitu. Afitali su dil zgrade. Raštrkani su po cilemu gradu. Puno dobrega su već napravili za razvoj cilega fakulteta i sociologije. Dekan Jozo Milat mi na brzinu govori o problemima...A triban još do maloga...Mobitel stalno zvrlji..zvrlji...zvrlji. Mali je naručija par knjiga iz vanka pa triba vidit je li i sa tin sve u redu. Jopet se vraćam na Pujanke...Trčin uza skale...Doma me čekaju niki ljudi iz susidstva...kad taman na vrata o stana zvoni šjora File.
Zdravi bili !
E Marinko moj...evo niko ne otvara a zvonin već deseti put.
Kako to ? Pa tribali su mi već stić niki judi...
A ča ja znan....
Otključajen vrata...a iz sobe trešti muzika. Mala je nabila tuta - forca !
Vjera ! Vjera ! Vjeraaaa !
E..tata !
Ma šta si tu muzika nabila tako...Bit ćedu mi judi dolazili a ti jin nisi otvorila vrata..Evo šjora File ti zvoni već po ure..!
Mala samo slegne ramenima i stiša muziku.
Nisan ćula !
A diš ćut, božja ćerce...uz tu buku ?!
Vas jidan oden sa šjoron Filon u kužinu i sve se mislin: Ma ča oće reć da ona nije prozborila njanka jednu besidu .
Ma jeste li vidili šjora File...Dojde mi da je sakramentan !
Polako..polako lipi moj. A oli si se ti doša refat na bidnu dicu zaraj sviju problemi koje jemaš su ton tvojon politikon ? An ?
A je li red da ona...?
Ma tiš se pozivat na red...Udre mi ona kontru....Ti skupa sa tin tvojin ministriman i cilon van vladon !
Ma koji moji ministri ? Koja moja vlada ?
Ja san u opoziciju !
Neš ti opozicije...Ja mislin da Sanader vas dršće kad vas čuje....podrugljivo se ona nakrivi prima meni.
A ča bi ste vi tili ?
Ništa ! Ka da se mene oli ovi moj mali svit išta i pita. A da me se pita - jemali bi ste onda ča i ćut ! E !
Pa recite meni....
Tebi ću poć govorit ? A maloprin si mi reka da ionako ti nisi vlast pa da ne moreš ništa uradit !
Dobro - mogu bar balit !
E..to moreš....Čula san te ja, ćula ! To je ćudo jedno ! Ne bi te đava nagovorija....Ali ja oču da se ovo promini...Razumiš li ti mene ? Dovde mi je svega...i potegne onin svojin oštrin dlanon nevidljivu crtu negdi oko svog ćela iznad tankih obrvi...i to takvon brzinom da se ćulo kako riže zrak.
Pa i ja to oču !
Pa ča onda čekaš !? Navali onda....ne daj jin mira....Reci jin sve ča ji gre ! Jer ovod ništa ne vaja. Ne samo da se ćejad smrzava..da nima tega vražjeg plina. Ne samo da jema dvista ijad duš ča skapavaju o glada. Ne samo da država ne puni ni kvarat toga svoga...kako se ono zove - an, budžeta. Ne samo da su evo iz pržuna pustili i one divjake ča su ubili malega Luku Ritza...vengo u foje piše da je Lovrinka svoju ćer utirala na sud. Da je oni bivši zastupnik hadezeja lambrija niku lovu...pa oni njiov načelnik oli gradonačelnik popapa miljune kun....a da i ne pričan o onemu indijanskemu vraću ća je i Sanaderu peka kolaće za kampanju...pa se poslin naloka čaja o bunike...a jedan mu se prijatelj užga i izgorija ka šuferin ! Pa vidiš li ti da je to sud Svita ! Da smo mi arivali još za vrime života drito u pakal..i to u oni najzanji, najdubji njegov krug. Ni Dante ne bi pakal tako opisam ka ča su nan ga ovi meštri uredili !
Oli ste se danas digli na livu nogu...šjora File !
Ma štufa san ti, sinko moj, svega. Zato ne vići na svoju dicu jerbo su i oni žrtve ovega rasula i kupusa o države. Jesi li čita kako oni diplomirani ekonomišiti ništa nisu znali na onu proviru znanja ča su je napravili zaraj zapošljavanja.
Jesan..
Pa onda znaš da su i Stradun i Kantridu smistili u Split. Da je njih devedeset i pet posto pokazalo katastrofalno znanje oli, ako ti je lipje ćut, perfektno neznanje. Francuski pridsidnik je za njih žena a ovi naš Radman, ča ga jubomorne mudonje nisu tile primit u Akademiju, je po njima niki slikar. Ne znadu ni raćunovodstvo ni matematiku...Ne znadu ništa..a najmanje ekonomiju. I ča sad ?
Pitaj Boga !
A ne. ne...Triba pitat onega punjenog fazana Primorca....je li nan to dala ota njegova reforma obrazovanja? Izajdu dicja iz skule gluplja vengo kad su ulizla u nju ! Pa to je Bogu za plakat ! A lipo je zaposlija trijest savitnika i ašištenata o medijske propagande samoga sebe. Ma su ga u Splitu navijači dobro izviždali kad je otvara svitsko prvenstvo o rukometa !
Jemate prav...
Nego ča da jeman...Jeman sto posto prav ! I rekla san svojoj nevisti; Vadi malega iz skule dok je na vrime.... jer će nan dite skroz pobenavit ostane li u njoj još koju godinu !
A oli ste se najili luidih gljiva pa ćete dite vadit iz skule....?
Daću ti ja lude gljive, cukunu jedan ! Nego ča nego da ga triba na vrime izvadit iz skule. Još uvik dite nešto zna..Zdravo je i pametno. Ako ga ovi uzmedu pod svoje - šteta more bit nepopravljiva ! Eno žene već kukaju po butigi jutros...Jo meni, mala će mi diplomirat ovih dana ! Jadna ti san ! Ča su joj uradili...? Ispast će mi blesa, tuka....a lipo su me svitovali da je dan na zanat a ne na fakultet ! Ko će je sad uzet ovaku...?
Ajde, opet sve uveličavate, šjora File !
Ma je li ? A koje su skule završili ovi naši tajkuni ! Za profešure sigurno nisu ! Pa ča jin fali ? Sad bi moj unuk triba poć u njiovo roblje kad završi skule !
Ma koje roblje ?
Da ma koje roblje ? Ono pravo ! Radiš ka pas...za šaku šoldi....a nikad ne znaš kad će te gazda itnit na ulicu. Eto takvo roblje !
Nego šjora File..mi smo se ovako zapričali...A zašto ste došli ? Jeste li me Vi štogod tribali ?
A evo jesan....jesan...muka mi je i pitat.
Pitajte. slobodno pitajte. Nismo od jučer !
Za ne lagat, mali mi je navalija da gren vidit jemaš li možda koju kartu za većerašnju utakmicu o rukometa...Ma ovu sa Švedskon...Nemoš je nigdi kupit i kad bi jema šoldi....Sve se razgrabilo !
Šjora File...virujte mi da niman...Da bi Van je od gušta ! A da kome bi ako ne bi vama ? Ako ča izleti do većeras javit ću se svakako...
Ma Marinko moj. spusti ona glas...Za pravo ti reć i boje da nimaš. Da znaš da mi je pa kamen sa srca. Eto morala san te pitat a sve san molila Boga da karat ne bude..
A zašto ?
Jerbo me straj za malega u onu gomilu...meju onoliko svita - da se ditetu čakod ne dogodi. Nikad sebi ne bi oprostila...!
Ma ča će se poć dogodit ?
Ohoho...da ča...? Pa cila ulica jutros priča kako se jedan dil tribina sinoć na utakmici protiv Španjolac zamalo sorija šoto skupa sa navijačiman iz Zadra. Moš mislit ča se je moglo desit. To su bila dica iz onega "Tornada"..To je ka njiova "Torcida". Sad na radijo kažu da ni bilo straja - da su morali stavit još nike potpornje - ma je mene omar oblija ladni znoj. Da mi se malome ća desi srce bi mi molalo....
Evo, onda morete bit kuntenti - niman karat !
Jo fala ti Marinko moj....fala ti !
Ćudin se ja kako je ovo sve nekako naopako...ali mućin, a ča ću. Sinoć sam dvi ure prije utakmice vozija punicu u škversku ambulantu i tamo san je isprid čeka jedno uru i po vrimena...A išla je samo vazest uputnicu za pregled. Padala je gusta kiša. Judi su u potocima hrlili ka dvorani. Auta su se zaplela u grop - jerbo je svak tija doć ča bliže dvorani. Parkirali su se deboto jedni po drugima..Naravski uz beštimje i teške riči i pritnje - ka ča je i obićaj. Ali u nas, ako je rič o domaćin judima, to ništa ne znači. Jerbo nikad nikor u staremu Splitu ni potega nož na drugega...iako su padale teške beside i pritnje. Ali i to se prominilo. Jema po autiman oružja ćudo jedno. Za cili jedan rat. Od pištolji, pendreci,noži, baturica o bejzbola do francuskih ključi i željeznih dizalica. Pa ako se namiri ludonja na ludonju - zna past i krv.
Ali svi su ipak išli navijat za naše pa ni bilo nikih neredi meju navijačima. Svi su poslin utakmice bili prisritni..Obućeni u kockaste majice i kapeline, su crveno bilin šalpama, zastavama i oninn štapima na napuvavanje...Ali kad su izašli vanka na kišu za poć doma - jemali su ča i vidit. Dok su oni navijali za Rvacku pauk je skupija sve ča je moga skupit i odnija jin tonobile. E sad je tek nastalo bogavanje,. beštimadura i privrćanje očima. Em ča su po kiši išli na utakmicu, em ča su dali sve od sebe navijajući za Rvacku, sad jin je pauk popajia tonobile i morali su se po pljusku snalazit kako su znali i umili. I nije višje ta teško nabavljena karta za utakmicu koštala samo koliko i jedno sidalo u dvorani vengo su još morali nadožuntat i globu za odnešena auta. U policiju kažu da su auta smetala prtometu - a ja van garantiran da za vrime utakmice u cilemu Splitu na ulici nije bilo njanka jednoga tonobila - jer ne gledat tu utakmicu bila bi ka i nika vrsta nacionalne izdaje.
Eto tako je to završilo ! A more bit da se državni budžet baranko za jednu uncu višje napunija na račun splitskih navijaći ! Jer država kod nas nikad ne spava kad triba vazest koji šold od obićna svita, pa makar i noću !
I zato razumin zašto mi je šjora File, odlazeći sritna ča niman kartu za njezinog mezimca - na vratima rekla:
I da znaš da ću činit sina i nevistu da prominedu mome unuku ime u Spartak.
A zašto Spartak !
Pa zato.... ako ga i toka robijat za nikoga tajkuna da znan kako će kad - tad dignit bunu protiv njega i protiv onih koji ga držidu !
|
