Ajme Majo spašavaj ! Jemaš li pinku sode bikarbone ?
Sode bikarbone ?
E..e..a da ćega !
Žena prvo pogleda u mene sliježući ramenima, pa onda opet šjoru Filu...koja je sva nervožasta skakutala s noge na nogu...na našin kućnim vratima....
Ajde ujdite..A ča stojite tu ka inkantana...rečen joj ja i maknen zaćuđenu Maju s vrata o stana...
Ona projde kraj nas ka vitar i omar side na katrigu.
Ma jemate le vi u kuću sode bikarbone - joli nimate ? Ča me ovod mantate !
A ča je. Ča se desilo....? Pojavi se u oti momenat moja punica drito iz sobe, onako još rašćepušane kose i u kućnome mantilu.
A ča bi se desilo, moja šjora Vjera, dan poslin Nove Godine...? Eno se oni Lucin nevojnik naliza ka majka sinoć pa jutros gre po kući vas išenpjan..Veza je šudar okolo glave..i stalno zavija ka vuk !
A jesu li šudar prvo dobro smoćili u domaću kvasinu ?
Da jesu li ? A nego ćedu čoviku metnit suvi šudar na glavu ? Naravski da jesu ! Ma ne pomaže...raširi ona ruke. Njanka ovoliko,,,i frcne nokton priko svojega zuba.
Tako nan je, ka...tila stavit na znanje da je situacija zbilja ozbiljna...jerbo je u nas kvasina lik za sve postojeće nevoje. Ako ne pomogne kvasina - ajme ti ga se, najeba si. Moraš u dotura...a od tega i ne more bit veće tragedije...A najskoli prvi dan poslin Nove Godine - jerbo to onda nosi nesriću cilu godinu dan, sve dok jušto rojena mlada godina ne ostari i ne pasa pa ne dojde opet novo lito. A ko će dotlen priživit ?
Znači ni dobro....stropošta se na katrigu i moja punica !
Ma ne da ni dobro...vengo gore ne more ni bit...e ! Evo san se i ja sva smantala koliko mi je žaj šjore Luce...Bidna žena ne zna ča napravit...pa mi je palo na pamet da more bit vi jemate sode bikarbone..jer ni loše zamutit dva kućerina ote prašine u vodu...kad se čoviku desi ovakva nevoja.
A ko će nan dat sode bikarbone ?
Ma ja san mislila...Ako igdi jema sode bikarbone..bit će je u našega Marinka, jerbo naše političare zasigurrno glava ćesto boli o svih ovih nevoja i velikih problema i konfužjuni koje oni tribadu rišavat...skoro svaki dan.
Ma ke ! Naivno će moja punica. Njanka jedan put je ni popija. Mi to opće ne duperamo - pa je i nimamo doma !
A je san i ja luda..udre se šjora File rukon o svoje čelo - pa di se jedan saborski zastupnik i more napit ? Ne piju zastupnici ona falša vina o kojih boli glava...ka ča to radi obišni mali svit koji nima šoldi za šampanju oli za liznit bićerin dobrega prošeka.
Ajme..kad ste već spomenili...a jeste li za čašicu lipega hvarskoga prošeka..ubacin se ja u razgovor ?
Aj daj malo ..da dojden sebi...!
Evo..evo...omar ću ja....I brzo iz veltrine izvadin kristalni bocun s prošekon i dva bićerina.
A bogati...lipa li bocuna..stane šjora File prstima prilazit priko kristala. A je li ovo češki ?
Ma molajte me se šjora File..Ča ja znan ?
A jesi li ti ovo dobija ka na dar za Novu Godinu..pogleda me ona malo iskosa i onako - stisnutih očiju ?
To mu je još od dote....jema u njemu ko zna koliko godišć...jerbo smo ga mi još naslidili od mojih starih...ljubazno joj objasni moja punica.
A dobro...kad je od dote ! Mislila san da nije slučajno od korupcije i mita !
Ma ča van je ?
Je..je...Nikomu van ja višje ne virujen...Sve se iskvarilo. Nemoš ni komad friške janjetine za blagdane kupit ako nisi u dobre s mesaron. A ča ću onda poć i pričat kako je s političarima...zaključi ona i otpije gutljaj prošeka..
A je dobar..nima ča !
Je..je..Nabavjamo ga uvik kod istega čovika !
Ajde dobro.....Vengo ča će mo mi sad kad vi nimate sode bikarbone? Kako ću na oči šjori Luci? Ja san joj bila zadnja uzdanica da ću je dikod pronač.
A da je poć u apoteku !
Ma ko danas radi, Marinko ? Samo dežurna apoteka - a tražidu i ricetu. U redu stojidu pijančine joli njiove žene i dičica...Smrznit ću se na ovu kišu....
Pa nećete vi poć čekat u filu !
A ča ću kad san obećala ženi donit sodu bikarbonu....
Smislid ćemo čagod..zamislin se ja.
Uto se iz postelje digne moj student, onako još crvenih očiju i vas podbuja, češući se iza uva.
A jeste li kušali s onon vodon u koju stojidu kiseli kukumari ?
Ajme, dite mouj...bog te blagoslovija..dobro ti je palo na pamet. Nikad se ne bi sitila. Sto posto će to pomoć onoj pijančini..! A jemate li teglu kiseli kukumari ?
Jemamo...jemamao...brzo će moja punica, otvarajući frižider.
Ja mislin da bi u ove naše konobe tribalo omar prodavat i kisele kukumare...mudro će šjora File. Lipo se čovik obleja s onin nevajalin vinima ča ji loćedu refužo...pa omar poza tin popije litru ove smrdljive vodurine - i dojde na svoje. Na litru vina - litra kisele vode. To bi bila ka nika riceta. I nema te onda glava ča ni bolit...jerbo je omar ličiš !
Ola...pa to bi onda bija niki kombinacjun o konobe i apoteke. Mogle bi se zvat, recimo "vinske apoteke"...pametno će moja punica.
Jemate prav šjora Vjera.....Aj Marinko moj, ne bilo ti na zapovid - ulij mi još jedan bićerin ovega prošeka...Ma sladak je ka cukar..Evo mi se sve lipi za justa !
Oću, oću...! Brzo skoćin i nalijen bićerin šjori Fili, koja je - nakon ča je pronašla vodu o kiseli kukumari - ka malo došla sebi.
A nisu loše ni sarme u kiselon kupusu poza dobre lokačine...počme već mudrovat moja susida.
Ma samo ako su domaće su malo suva mesa oli kaštradine.... a more se bacit u teču i koja kobaja, ako je prava.
Je...je...Baš je tako !
A ča se oni Lucin mora toliko izneredit ?
Pusti moj Marinko, ni ni njemu laka..a ni cilon fameji !
Oli je kakva nesrića ?
Ma da nesriće...I to koja...značajno klimne glavom šjora File.
Osta je prez posla...Eto ti ga na ! Jušto na Božić ! I raširi svoje duge košćate ruke ka sam Isukrst na križu.
Svi pristanemo govorit i nastade muk u kući .... tako da se Li-Lu uznemiri i poćme žestoko lajat..
A ti stoj kuco....Jesi me ćula ? Nakostreši se šjora File na pasa..
A Li - Lu brže bolje biž ispod kauća pa joj sad samo viridu i svitlidu dva oka odispod, ali mući ka zalivena.
Ma nemojte mi reć..sva se uznemiri moja punica !
Je..je !
A di je fatiga ?
U bitugu o šjor Mirka...ma je i on iša na inkanat..A sad ga je ovo su neradnon nedijon ubilo skroz na skroz !
Ma ča mi govorite ?
Taka mu je sudbina...Teška i jadna ! Cili život se mučija on i šjora Luce..Uvik ji je tukla mižerja..A radišan su svit, nima ča. Eto šjora Luce frega skale u portunu za nikakve šolde. Gre po kućama..pomaže ženama o boje stojeći fameja...za ništo crkavice. A sad ovo ! A sin jin ne radi. Završija je za onoga od očali...kako se ono reće..an, za optičara. Ma posla nima...I sve tako...nevoja na nevoju. I ča ćedu sad bidni ? Tako jin je počela ova Nova Godina...su otkazon. A ovako jin izgleda dan poslin...Žena krši ruke a muž joj oda po kući i zavija...ča od glave ća od muke..I evo, ako ga ne spasidu ovi kiseli kukumari i ova vodurina - ne znan ča ćedu ?
Ma isto se ni triba poč nalokat....reče moja punica nalivajući po još jedan bićerin šjori Fili i sebi.
Nije on ni tako loš čovik...počme objašnjavat šjora File. Vengo su ga se oni farabuti iz vinarije uvatili zajebavat pa je čovik ubija togu u par bocuni nevajala vina.
A ča su mu to govorili ?
Ma on je njima ispriča da kako su se ovo lito on i šjora Luce, poslin toliko godin, pošli kupat na Bene u Merjan i da se ona ubola na ježinca. Ni bidna mogla od bolova ni na nogu stat. Znate kako ježinac zna bit vražji kad mu se ona njegova bodja, ona štenca zadije u petu...?
Ajme ne spominjite mi....! Naravski da znan !
E..pa tako je ona jaukala i skakala na onu jednu nogu okolo...bože oslobodi - ka nika roda, samo malo pobasja i podeblja...I di će - kud će....nima druge vengo dikod posudit iglu,,,stvatit je na vatru od fajercaga i onda izvadit štence o ježinca iz noge.
I je li tako uradila ?
Je, sve..ka po libru o najboje medicine. Ma ništa pomoglo !
Ma zamislite !
E..tako je bilo !
Onda je njezin Stipan...tako van se zove njezin muž - njoj reka da on jema iskustva su otin stvarima i da se najboje na ono ubodeno misto malo popišat i da sve omar projde ka da si rukon pomaza !
Ma nije moguće !
E, a je !
On je njoj reka da gredu malo gori meju bore pa da će joj se on popišat na ote rane i da ćedu tako sredit stvar.
I jesu li ?
U početku ona nije nikako tila ! Ma noga žiga li žiga !
I najposlin je ipak pristala. Otišli su gori meju cabla, di ji nikor ne more vidit, i on je izvadija onu svoju stvar i lipo joj se popiša tošno tamo di se bila ubola na ježinca.
Ujme ime Isusovo !
A ča je drugo mogla bidna ?
A valja reč..istinu za voju...da on uvik jema tega tekućeg, ajmo reć likovitog matrijala - za pišanje..jer mu nije mrsko liznit bocu...a kako vidite za nevoju i to dobro dojde.
I ?
I šta i ? Zajeba se i sve je to ispriča u vinariju oli u tu konobu, čati ti ga ja znan. A onda je najeba !
Kako ?
Da kako ? Pa svi su ga uvatili u đir....tako da je vas poludija. Rekli su mu: A bogati Stipane..pa ti bi moga otvorit privatni obrt i zaradit velike šolde.
A kako ?
A lipo ! Liti greš po spliskim plažama...po Merjanu recimo...A sam i znaš koliko tu jema u moru sika i ježinaca da se svako malo nikor nabode na njega.
Pa ča će s tin ?
Kako..ča će ? Svitovali su ga da nabavi jednu škatulo od kartona - od one ambalaže. Recimo od frižidera, joli od televizije. To ionako bacijedu tamo u škovace u Getroa, Peveca i di se već te stvari prodajedu. Triba na nogama jemat samo japanke oli šlape, natikaće. Mora bit gol. Stavi škatulu priko sebe. Na ono misto di mu je ona stvar probije rupu i izvadi kroz nju, da izvinete, svoga bimbu !
Bimbu ?
A da kako ću van drugovaćije reč ? Ja san jedna fina gospoja !
Daklen..Izvadi svoga bimbu i napiše na škatulu velikin crvenin slovima:
PIŠAMO NA UBODE O MORSKIH JEŽINACA ZA 5 KUNA.
I lipo šeta okolo.
Jedan čovik - jedna butiga ! I to pokretna !
Ajme !
Ma ča ajme ! Svi su mu rekli da je to jedna puno pametna indeja...a on je vas poludija i počeja je još višje lokat i na kraju je bija pijan ka majka.
A kad je šjora Luce došla po njega još su i nju zajebavali: Eno van se napila butiga. šjora Luce !
A ona se bidna rasplakala !
Svi smo ušutili kad nam je šjora File ispričala ovu tužnu štoriju.
A znate ča ? Nadoveže se ona.
Da je meni bilo uvatit te cukune čuli bi oni ono ča ji gre.
A ča to ?
Lipo bi jin rekla: Nije se ovo šjor Stipan naloka...vengo uzima repromatrijal za svoju butigu. A vi...neradi i pijančine jedne...samo ločete i pišate uludo.
U šjor Stpana baranko pišoka vridi..a u vas ni to !
I digne se šjora File jerbo je tribala poć doma...pa s nogu doda: E dobri moj svitu, ča se nan ovo dešava ? Judi propadaju, postaju pijančine o muke i nevoje...a biće još i gore. Prava nevoja će tek arivat ! Samo ča to još svi ne znadu...I sve bi to još nikako podnila - ali ne mogu podnit kako ova naša vlast sve to gleda uz cerek i prez da se baranko malo zacrveni prid svojin narodon za sve ono zlo ča su mu napravili.
A ča će bit sa šjor Stipanon ?
E ča će bit ? Njemu će naš veliki vladar i dotur o svih nevoja ča su snašle mali svit kazat:
Eto vidite, donija san van kapitalizam, slobodu i peršpektivu - jer kad bi vi, šjor Stipane, jemali svoju butigu da van ni bilo mene i moje vlasti ?
Nikad ! doda ona.....Nikad !
Samo jebeš ti tu sriću i taj dan kad je zaraj tebe dobija tu butigu !
A dabogda se i tebi tako posrićilo doture naš šesni - pa i ti bar malo gušta u temu tvome kapitalizmu i oda okolo gologuz po sikama, u škatuli od kartona i piša ljudima na rane.
Samo ča bi za to tribala škatula o bagera a ne televizije oli frižidera !
Jo koja bi to likarija bila !
|
