Ma je li moguće da u Rvacku jema sedan stotin ijada judi ča se moredu smatrat sirotinjon ?
A je, šjora File...je,je...Tako kažedu službeni podaci !
Pa onda je deboto svako šesto čeljade u Našoj Lipoj gladno suvega kruva ?!
Pari se da je tako.
A je li HDZ još na vlasti ?
A da šta je ! Nije se valjda priko lita, dok ste Vi bili na Šoltu, prominila vlast. Tek su zasili u fotelje. Ča jema da su izbori finili ?
Niti jedno cilo godišće.....
Ajme nama kad su nas ovako lipo sredilo za manje od godinu dan ! A ča nas onda tek čeka ?
A da je povirit u Nostradamusa ?
Samo se ti zajebaji. Lipu su nan papu skužinali...Nima šta !
Ma, šjora File moja...Nisu nama oni ništa skužinali ča narod ni tija pojist.
Ne pizdi tode. Evo...ja nisan tila ...pa me opet tokalo da se patin ka pas...pod moje stare dane.
Škužajte...jemate Vi prav. Nisu svi krivi...vengo oni ča su glasovali za hadezejce i one njiove slake priče o Misiru u koji nas vodidu...A dotralo nas ka marvu na rub od provalije. Sad narod čeka da jin s neba padne mana Božja ! Ma nima toga višje. I on je diga ruke od nas !
Je, ma kad pitan u butigu oli na pazar a ko je to glasa za dotura Ivu...nemoš nać njanka jednega koji bi to prizna. Ka da su mrci i dusi (Bože mi prosti!) glasali za njih.
A biće da je i tega bilo.
Onda smo mi fantažma a ne zaozbijna država.
To ste Vi rekli a ne ja. Još će te u pržun !
Ma ča ! Ma koji pržun ? Mene bidu strpali u pržun umisto onih lopuža i bogatuni ča nas činidu šempjama i smijedu nan se sa svoji jahti.....
Nisu to njiove jahte vengo jahte o njiovi prijeteljov.
Aj ne čini me ludon....nije govno vengo se pas posra !
Ajme lipi riči ! Pa jer to more poč govorit jedna starija žena...?
Ma ko je star? Mlaja san ja o sviju vas ! Sad bi mogla poć u demonštracjune i opalit matunon kojega.... kako se ono sad kaže po modernu...annnn....celebritija - posrid ćiverice.
A ča su van sad oni bidni krivi ?
Sve je to ista raca. Manjamuktaška ! Sami neradi i nabigujice !
Nemoš otvorit televiziju o gada. Moš birat oš gledat koji film iz vrimena kad je i tvoj dida bija još bambin ...oli moš gledat kojega celebritija ča je kosu zaliza cukron i vodon kako se žvali sa nikon cicaton šupjaćon ča se fali da joj je mužjak kupija nike taljanske postole za lito - jerbo da je to jedna velika jubav od toliko i toliko ijad kun oli eura!
Nisu to nike postole, šjora File...vengo Pačoti postole. Taljaneške !
Jebeš ti našu elitu koja se fali cipelan i time ko je završija manje skule !
Ma ostavite se njih. Oni su nebitni !
Je li ? A neka narod krepaje ! Neka mi oni Šuker dojde opet solit pamet kako nan ni loše ! Eno mu je inflacija ka u Njemašku prin nego je Hitler čapa vlast ! A Sanader još traži račune o Verone...Ispale su mu oči o buljenja u one male brojke o satovi na rukan. Eno su mu se i kolobari ispod očiju zaraj toga obisili pa pari ka teški noćar oli da je jušto uteka sa kirurgije prin operacije. Bilo bi mu boje da na bokun špaga oko vrata obisi žveljarin...pa da ga nosi okolo. Da ne falije kad će ubacit u šestu brzinu. Lipo nas je i daleko dotra vozećo ovon peton brzinon koju stalno spominje.
A ča Van sad on pada na pamet !
Ma pa mi je on na glavu a ne na pamet ! Ka bovan sa sto metri visine ! Svu me spešta. I mene i cili ovi šempjasti narod koji mu još viruje. Ma ća nas ne pušti na miru ? Ča nas višje voza ? On je zamislija da je Rvacka tonobil a da je on Fanđo oli u najmanju ruku Šumaher ... a da smo mu mi ka niku bili miši, pokusni kunići....koji Bog ?!
Koji su vas sad miši spopali ?
Je Marinko moj lipi. U Rvackoj pantagane jemadu skupe tonobile i vozadu miše - ma ti to ne vidiš...jerbo si taki kaki si !
Ne vriđajte !
Ko te vriđa ! samo ti govorin da doturu Ivi triba uzet timun iz ruku dok se nije skroz na skroz rumba sa cilon Rvackon i svima skupa nama u njoj...je li ti mene razumiš...mali ? A onda nas višje neće moć škapulat ni naboja Prva Pomoć na ovemu Svitu !
A eto Vi će te me poć učit !
E ja...baš ja ! Lipo se dogovorite svi Vi iz opozicjuna i skupite čoviku šolde da more kupit...recimo jednege Ferarija...Ako triba zamolit talijannce da ga vazmu u trkače o Formule 1. Pa nek se lipo gre iživljavat po trkama i trkačin stazama a ne na nama.
Lipa indeja !
Slušaj ti mene pa neš nikad falit ! Evo ja ću od ove svoje mižerje platit dvi mise u Svetoga Ante a i najljuća sirotinja odvojit će od svoji justa da mu se nabavi taj najskupji tonobil na svitu - sa , vazmimo reć, najmanje pedeset brzina. Pa nika ih onda minja po svon guštu, kako god ga je voja, koliko god oče i koliko god more. Neka se su njin rumba oli ne rumba ! Samo neka nas ostavi na miru. Neka sam umire o straje di će završit, a ne da se ovako tuto kompleto patimo...Ustravija je cili narod koji kuka, gleda u nebo i moli se: Ajme Majko Božja samo da dotur Ivo ne ubaci u još veću brzinu !
A nisan Van ja siguran da bi se on denja ulist u taki trkaći tonobil !
Ajde Bogati...Pa potegnite i vi svoje veze u Ferarija. Neka samo za njega napravidu Formula su dva sica. Nije on bilo koja šuša. On je naš dotur Ivo !
A ča ćedu mu dva sica u Formulu...dobra moja šjora File ?
Pa da i Jadranka Kosor more sist do njega....cukunu jedan !
|
