Ma fini su meni svi kolači, a i gredu mi od ruke, oduvik, ča je je. Da me bilo pitat', uvik bi se rađe mašila činit' kolače, nego kuvat'. Ma me se ritko pitalo, pa me uglavnon tokalo oboje. Al' dobro sad, ni to poanta. Otišla san daleko, a e. Vratimo se mi lipo na kolače. Ma fine kolače, nego kakve. Svih ovih godin' ih je prošlo priko ruk' toliko vrsti, podvrsti, formi, mimo formi... od suhih do mokrih, pardon, kremastih... pa voćnih, čokoladnih, glaziranih, prelivenih... pečenih, zapečenih, sušenih, nepečenih, friganih... od sitnih do višekatnih... tankih i debelih, ma tila san reć', dizanih i spuštenih, pardon, prhkih, do, do... do palačinki iz boce, eto. Eee, o revolucija-palačinkama ću jednon drugon prilikon, obećajen... fala Anni za ricetu. A dobro sad, nije poanta ni u tin revolucionarnin palačinkama. Otišla san opet daleko, a e.

I di san sad. Aha, ma fini kolači su poanta. Vrste i podvrste, forme i kalupi... manji, veći, glatki, rebrasti, okrugli s rupon ili bez rupe... za biskvite, torte, kuglufe, kekse, šape, rafijole, zimske i ljetne sladolede... ma, čudo je bilo tih slatkarija i pomagala za njihovu izradu, jer... čovik uvik izventaje ništo novo, od kad je svita i vika. I neka je, tako i triba.

Ma fin je i ti mafin danas, neka ga ja ne poznajen od pri. More bit' da vi znate mafina, a... ma fin je vas, ka pravi pravcati muffin.



Eto, koliko god da san znala, za njega nisan, a da smo se prin upoznali, ko će znat' kako bi smo se onda gledali. Možda bi smo se zajubili već na prvi kalupić, ili barenko na prvi griz. Ma, ne znan ja... mislin... bajan i gatan napamet. Pa kud ću, di ću, najbo'je na Google. Taj svakoga vraga zna, pa je valjda čuja i za toga mufastoga slatkiša.



Ko je, šta je, i oklen je ti mafin? I di se krija svih ovih godin'? Di je bija kad se grmilo i sivalo po kužini? A kažu, da mu je pravo ime muffin. Ma lipi moj i slatki mufff... ajde se ti lipo vanka zovi kako o'š, ma fin ti meni bija i po Vuku. Pa nek bude i vuk sit, i mafini na broju.
Ahaaa, lipo si ti to zamislila, ma... na kojemu broju? Ako je vuk sit, a znamo da je sit, onda mafini više nisu na broju. A e, skroz logično.



Pa, ako san ja u pravu, a more bit' da i nisan, mafini su, da tako rečen, moderni kolač, koji u nas tek zadnjih godina dobiva na popularnosti. Ča nikako ne znači da je mlad i zelen. Dapače, star je da stariji ne more bit'... ma, starkelja od kolača, kad van kažen.


Tea Mamut - Muffini s malinama

A ja san lipo, zahvaljujući Tei, priko noći dobila savršeni mafin, jer da san ga tribala čekat' osan godin', ka' i ona, garant bi smo se bili posvadili, odavno. Razlika između mog i Teinog mafina je jedino u voću, jer san, u nedostatku malina, upotrijebila brusnice, i svejedno je odličan. E sad, savršen ili ne, ko san ja da sudin. Možda ima i koji bolji, ma se još nismo upoznali.

I to bi bilo to... ne znan šta bi mecabg rekla, može li se ovi moj mafin švercat u one njene priče... sinki priče, ako se ne varan, al' svejedno, čista asocijacija.

Eto, ako uplovite u ovu mafinastu priču, sritno i prijatno van bilo!

Oznake: mafin, kolači, muffin