Ola...Marinko...finila je cila šetimana i evo je došla subota je a u fojima nima ništa o tebi. Oli je i oni Kuljiš u štrajku ? Oli mu daju malo pinez za posal ča ga obavja za svoje šefove, pa se štica ?
Ma di Van je, po ovoj vručini, baš on pa na pamet...šjora File moja ? Oli Van on toliko fali ?
Je, ka luda čer materi ... odbrusi, sva upoćena. šjora File...mašući ventulon okolo glave.
Pa ča ga onda spominjete ?
A eto, uzavrili su mi možđani na ovi pakal o vrimena pa je i logišno da se sitin i kojega Vraga !
Ma ni Van on Vrag...On samo lavura u foje da bi, bidan. priranija čejad o svoje familje !
Ma koja fameja, koji lavur...Ka ča se reče: Bravura je živit prez lavura ! To je ka da makaku iz afriške đungle daš lapiš u šapu pa ča nažvrlja - nažvrlja. Eto san se sitila kako te ono zanju subotu bi u Večernji list po miljunti put ištraca. Uvik trumbeta istu pismu. Ma kako mu samo . da izviniš jednoj staroj ženi, višje ne dopizdi ?
A bogati...za to i inkasava pineze !
Ma da mi je vidit otu monu koja ga plača za one šporkarije i škovace su kojima natrpa foje - kad se istrese posrid njih...u tin svojin ...ka nikin dubokoumnim analitikaman. Moš mislit ! Onda san ja, za njega, baranko Tolstoj - ako ćemo poć pravo govorit ! Ja bi tribala dobit onu Nobelovu nagradu za književnost kad mome malome na komad škartoca napišen ča triba kupit u butigu. To je vrhunska literatura ako ćemo to poć komparat su Kuljiševin rigotinaman. Ma ne mirita on ni lipe za ono ča radi. Mene omar protre kad pročitan lažetine koje izventa u tin svojin palamuđenjima. Ka da piše za idijote a ne normalnu čejad ! Omar trčin u kondut da se istresen ! Eto tako mi on dojde ka niko ricinisovo uje oli bakalarevo uje ča smo ga morali pit ka dica. Ma bi, baranko, poza tin dobila lipi bonboncin...obišno limuncin da ga čučan..da mi ubije oni gadan vonj o uja. A sad ništa ! Dobijen samo, da skužaš. litavicu...proliv i to je sve. Finito ! Nima bonboncini !
Eto vidite, moja šjora File, kako Van on, za pravo reč, čini dobro ! On Van je zamina za niki skupi laksativ..Recimo Portolak....I to besplatna zamina. Ča bi sve bračani dali da to znadu...?!
Vidiš, vidiš...jesi mulac...Dobro ti špjegaš ! Zanamisto lokat dekote i trpat se klistirima...lipo pročitaš tri rečenice o Kuljiša i omar te protre, otvori na sve buže. Omar trčićiš u kondut ! Ma more bit problem ako više judi istovremeno čita Kuljiša. Ko bi naziđa toliko konduti...Ola koja bi to kolektivna sraćka bila !
Ajme meni, zgadit ćete mi obid ! Ostavite se višje tega ociđenog kacamarina...Puna mi ga je kapa. Neka čovik piše....Ma ko ga obadaje, komu je stalo do njega i njegovih domačih zadatkov ča ji piše za svoje meštre ?!
Ma bogati...ča smo se profinili. A ja ti govorin da bi mi mogli napravit dobar posal s otin njegovin kupusarijama. Ja bi zanamisto skupih...kako si ono reka...an, laksativa - lipo vazela njegovu pisaniju i prodavala je ka dekot. I to na ricetu. I još bi pročitala foje, ma bi priskočila ono ča on piše - i još bi zaradila !
Ma je li Vas ja to dobro čujen ?
Čuješ...čuješ...naravno da čuješ I triba da čuješ. Eto ... lipo, kod težih zatvora i tvrde stolice, kad ono čejade ništo začepi pa mu se criva zacimentaju...ja bi izdavala ricetu u kojoj bi se Kuljiševe pizdarije, prodavale, s onon miron koju bi propisali...ka jedan dekot za očepjivanje bidnega svita koji bi ne znam ča da a da more normalno otić u kondut. Ma bi pazila da ne pritiran jerbo bi čitanje velikih količina Kuljošovih gadarija moglo dovest do teških poslidica. Stalnog i nezaustavljivog proliva - a di smo onda ? Ubili bi smo bidnega čovika ! Zato triba oprezno s tin dekoton. Ma ke antibiotici, ma ke laksativi, ma ke ricinusova uja.....Ovo je ka nitroglicerin...Opasno je i za onega koji barata su tin ! E ! Nije ti medicina laka stvar, Marinčelo moj !
A more bit da tu jema ništo..Ko če ga znat lipa moja šjora File !
Nego ča da jema...Jedino se mislin kako bi onda na svin trafikan trbalo pisat Farmacija...pa nisan sigurna bili bi du tamo onda mogle lavurat samo magistre farmacije a ne obišan svit, ka sad. Jer likovi su vrag, sinko moj...i mogu te ubit ako ne znaš kako jih i koliko triba vazest za bolest koju jemaš ! A ovi dekot o Kuljiša more bit gori o Černobila...Jerbo eto i govna,a ne samo radijacija, moredu te doć glave....vengo ča.
Viruj ti jednoj pametnoj i iskusnoj ženi ka ča san ja, dite moje - jerbo, viruj mi, nima tega ča ja već nisan vidila na ovemu svitu !
|
