Taman sam tija skoknit do "Mora" kupit malo blitve jer će Maja danas za obiid učinit polpete....kad zazvoni telefon.
Alo, Marin je ! Ko zove ?
Ma ča se tu dereš....aj dojdi do mene, tribaš mi nešto....cukunu jedan !
A ko bi drugi i bija nego šjora File. Moga san odma i mislit....
Kad je Li-Lu vidila da se spreman izać počme lajat ka luda i skakat po meni, grebat po vratiman o kuće i potizat me za japanke
Aj kvragu...Ostavi me na miru zviri jedna ! Omar se vraćan !
Ma zaludu san joj ja tumačija da ču se brzo vratit doma. Ona laje li laje....Na kraju san je mora vezat i povest su sobon. Boje i to nego da mi privrne cilu kuću i ne da mira nikome da otpočine. Poslin bi se mora skužavat svakome stanaru koji bi mi doša lupat na vrata.....a ko bi to izdrža.
Ali Li-Lu je nastavila lajat ka da je poludila tako da se cili portun tresa ka zvono o crikve. Prva je izletila šjora File a za njon svi susidi. Jedan poza drugin.
Otrovat ću ti je, ovega mi križa - stane se pritit šjora File križajući se.
Okinit ću joj jezik i šamaštrat ga ne stane li omar lajat ! Je si li me razumija ?
Kuco, beštijo nesriknja ! Obisit ću te za repicu na tiramolu !
Kad je Li-Lu začula kreštavi šjora Filin glas brže bolje se sakrije iza moje noge i začepi ka zalivena, ka da nikad u životiu nije zalajala. Samo je čirila iza mene puna rišpeta i straja.
A ča ste ono tili šjora File moja dobra ?
Aj ne kokolaji mi vengo mi rici koji je indiric o kardinala Bozanića...Tila san mu se javit...onako ka starija žena ika prava virnica .
A pišite mu na Kaptol !
Ma ne bi tila da pošćer gori u Zagreb falije i da kardinal ne dobije moje pismo.
Ne bojte se, neće. Svi znaju di je Kaptol a bome svi znaju i Bozanića.
Dunkve, jeman ja njemu puno tega za reč i to šćeto - neto, drito u facu !
A onda lipo na avijon pa u Zagreb !
Evo ti ga na, zakrešti ona i peta mi roge...
Neš mene utirat u reoplan. A neš, mišu moj...Neš gledat oti film. Znan ja da bi ti najvolija da padnen sa sto ijad metri i da se razbijen u sto komadi !
Oli ste poludili ? Pa cili svit leti avijonima.....A kako bi nan došli turisti iz cilega svita ?
Pusti ti te priče. Nisan ja furešta vengo domača žena - i svašta san vidila u mome životu...a još više znan. A takvi danas nisu na cini. Takve bi neko moga bekit....zagleda se ona u mene i sva pocrveni potižuči svojin tankim košćatim prston ispod izduženog vrata.
Je, jako ste Vi važni ! Eno ne more ni Kosoruša spavat o straja da joj šjora File čagod ne saspe drito u facu !
Nju mi ne spominjiako se očeš u jednemu komadu vratit doma - jer češ ti ovancat na kraju za sve njih.
Dobro, dobro...ajde molajte, smirite se !
Ne zajebaji me Marinko. Nisan ti ja ota kujica ča se razlajala pa se onda sakrila iza tebe čin san joj pripritila ! Nikor mene nije još pripa ! A, ne...Nisan ja od takve race, ne, ne.....
Ma znan ja...
Ništa ti ne znaš. Njanka di ti je gujica a diti je glava...I bilo bi ti boje da slušaš one koji ništo peškaju...ka šta sam, recimo, ja - završi ona značajno dižući se na vrj prstiju, onako nekako sva ukoso....raširivši ruka ka nika opasna tičurina prin nego ča će uvatit svojin kanđama nemoćan pljen.
Dunkve...Oču reć kardinalu da ne daje taljancima ništa natrag...jerbo jin je sve plaćeno ča se jemalo za platit i da podrži onega istarskega biskupa i istarsku Crikvu koja se ionako, ka i istarski narod, napatila da u Istru sačuva rvacku rič, viru i zemju. Nemore sad on stavjat svoj potpis na papir kojin se to poništava. ON mora stat uz svoj narod, svoju Crikvu, uz svoje virnike i biskupe svoje koji branidu od tujinaca ono ča je naše. Ja jesan stara ma nisan šempjasta. Ako ste nikome ništo platili - tu je,onda, kraj priče i basta ! Ne more se pet puti ista stvar naplatit ili bivšin gospodariman vratit. Pa onda će nan cila Rvacka svršit na banak....počme ona vikat a susidi, koje je svojin lajanjem u portun privukla Li-Lu, odma joj počmu davat podršku i kako se parilo jemala se dignit ka nika rivolucija o našeg portuna. Ka da bidu svi sad krenuli prima Vatikanu oli prima Kaptolu....oli, pače, trčečin korakon prima Istri. I to onako stari, nabubreni nogu, izmoreni visokin i niskin tlakon, gihtom i vrućinom - ali krcati žaron i vojon da brane svoje.
Naravski, na čelu kolone bila bi šjora File.
Doli kurbe bankarske...začuje se negdi iz dubine portuna.
Doooliiii !!!!
Doli švicarski franak !
Doooliiii !!!!
Doli bogatuni, kurbe i bortuni !
Doooliii !!!!!
Stanari su se počeli skalavat s gornjih katova tako da je u hodniku već bila prava gužva i gungula.
Doli lupeži naših radnih mista !
Doooliiii !
Živija Remetinaaac !
Živijaaaa !!!! Sto puti živija !!!!
Svršit će i ovi kurbin pir....zakrešti šjora File !
Oćeeee!!!! Odgovori zgužvana okupljena portunska čejad !
Li-Lu uhvati malo kuraže i zalaje iza moji nogu !
Ola junaka ča viri iz bumbaka.....nasmije se šjora File ! Ajde laji kad ti je Bog da glasa ! Laji Li-Lu tuta forca !!! Odobrovolji se moja susida koja je ka postala niki vođa ove male provale bisa inače mirnih stanara, uglavnom baba i dida iz moga portuna . A Li-Li je sve dobro razumila i razlajala se ponova ka da je niki lav a ne miš u biloj bundi. Još samo da zapivadu "Padaj silo i nepravdo" !
Ajmo ljudi moji, ajmo doma....ja ću šjori Fili dat sve indirice koji joj tribadu pa nek šaje pisma po ciloj Rvacko koliko je god vojaj. Jesmo li se dogovorili ?
Nismoooo ! Očemo veće penšjune ! Dosta je krešivanja benzina ! Očemo posla za naše unuke ! Ne damo spliski škver ! Vratite nan "Jugoplastiku" ! Di je nestala "Dalma" ? Ko je ukreja "Jugovinil" ? Kako su se meksikanci dočepali "Dalmacijacimenta" ? Očemo radnišku a ne lopovsku vlast !
Ma šta je vama ljudi, pa vi bi ste tili radniško samoupravljanje ! Tili bi ste natrag socijalizam !
Nima više toga ! Ne more se više natrag - na se ! S tin ste raskrstili ! Sad su nova vrimena !
Doli nova vrimenaaa !!!!
Doliiii !!!!
Ajme ludega svita ! Prvo rušidu pa onda kukadu za srušenin !
Ma ča ti pizdiš ? Kukamo mi za bojin životon !
An ke bon ! Ma ću ja ovancat ako ne kupin blitvu.Ko bi živija o ženinog brontulavanja ? Gren ja u butigu.
I zaputin se niza skale...
A di bižiš...počme vikat šjora File za menon ?!
Ma gren u spizu. Lipo san van reka, Ja ću Van dat sve indirice pa pišite kome Vasgod voja....Ma sad moran poć, e !
Aj kad već greš kupi i meni dva kila poma - ali domaćih. Reci Vojku da su za mene !
Ma ni Van šjor Vojko kriv ča više nima domaći pom. Biće dobro ako bude i španjolskih !
Samo ji ti vazmi - ionako mi ne tribadu za poć činit šalšu vengo za jednu drugu potribu !
A za ča to ?
Za gađat one političare u glavu ča su nas u sve ovo uvalili !
Onda je boje da su šta tvrđe !
Boje je !
A da Vam vazmen i koji kukumar. On je još tvrđi ?
Samo ti vazmi. Dobro si se sitija. Pa kad ji zdimin kukumaron u čivericu barem će jedan put u životu moć reč, a ne lagat, kako ji glava boli zaraj pulitike !
Napokon !
|
