Ma dobro, Marinko mali, jeman li i ja prav osnovat politišku stranku ?
A naravski da jemate, dobra moja šjora File !
Asti ga miša potopira, pa kako mi to samo već prin ni palo na pamet... da se, lipo, proglasin kapon o nike nove stranke - skroz na skroz nove i drugovačije od sviju stranak ča postojidu i ča su do sad postojale ?
Je, lipo ste to skontali ! Ma di su van slidbenici ?
Neš ti velike filozofije ? Oli su ovi drugi političari pametniji od mene ? Pola ji je za u ludnicu a druga polovica su redikuli !
A nemojmo se poć vriđat šjora File, dobacin ja ka jutito - jerbo
mogu i ja bit grub ! E...bome !
Ma dobro, dobro - nisan mislila da su baš svi političari munjeni. Znan ja da bi to otili kazat ona hadezejova trumbetala jerbo jin je glavni posal sad poć uvirit puk kako su, zapravo, svi isti....Pa nan onda deboto i ne tribadu promine ! Znan ja tu njiovu ucuntariju, znan ! Za pravo reč, jema i nešto drugovačijih političara.
Pa onda...?
Ma mislila san na ove ča se svaki put kad su izbori pojavidu i dilidu svima lekcjune i palamudidu ka da su svu pamet ovega svita popili - a zanje četri godini nisu njanka čunkon izvirili iz svojih mišji buži...E na takve politiške pantagane ja mislin !
I sad bi i Vi tili lipo poč osnovat svoju stranku !
A nego ča ? Oli san ja gora o drugi ? A ča meni fali ? Još u meni jema špirita, sinko moj. Još u ovoj svići jema uja.... reče ona i sva se izduži i izbeči onako štrkljava i nikako se priteči nakostreši ka pivac kad popizdi za kokošan joli kad se oče potuć s drugin pivcen ča mu je upa u njegov dvor o kuće i u njegov kokošinji harem.
E baš bi to volija vidit, nasmijen se ja podrugljivo. A jemate li ime o te Vaše nove novcijate stranke ?
Pa naravski ?
Baš san kurjožast...Ne vidin minute da čujen njeno ime ! I ke ?
Zvat će se "Crven, bil i plavi", reče ona uzdignuta nosa i zatvorenih očiju....A ja ču jon bit šefica !
A ne može to tako. Najprvo tribate jemat članove pa Vas oni poza tin tek tribadu izabrat - ako Vas ne potuče i šamaštra koji drugi kandidat !
Ma Boga ti ! Ja izumislila stranku a ti biš na me slava protukandidate ! Malo sutra .....razmaše se ona svojin košćatin rukama ka niki ženski Don Quijote. Kad su mogli onako izabrat Jacu za pridsidnicu hadezeja bome mogu i mene za pridsidnicu trikoluri !
Trikoluri ?
Je to je ka skraćeno o "Crven, bil i plavi" ! Pa neću valjda uvik morat svaku put nabrajat sve kolure...TRIKOLURI je nadimak joli kratica o moje domojubne stranke u kojoj jema mista za svakoga ko je unaprid za me ka pridsidnicu !
A lipo ste to sve izventali i skrojili u svojoj glavi - ma život more zapivat drugovačiju mužiku !
E neče pa neče ! Zapivat će kako ću ja dirigirat, i basta - a za moje unutarstranaške izbore pozajmit ću onega Jarnjaka jer će me to manje koštat vengo da pojden svakon delegatu platit pivu i sendvić ! Čist raćun - duga jubav ! Jel ti sad jasno ?
A kome ne bi bilo jasno...? Eto Van je kosa već posidila ka u Kosoruše. Biće to nika najfriškija moda o žena pridsidnica !
Aj ne zajebaji me, Marinko - jer bi ti mogla zalitat jednu trisku priko just...Ja tebi mogu bit baba pa onda ni ni ćudo ča san sida. Ma da mi je samo znat kako si ti posidija ? Da ne bi i ti tija uvatit mot o naše broširane pridsidnice Vlade ?
Opet vriđate ! Ovo je u mene prirodna kolura a ona pituraje svoje vlasi ! Sva je falša ka i kosa joj !
Ohoho...vidi ga vidi, ča se uzjogunija ! Kakvi si još na kraju reč da nana pridsidnica nosi periku. Kuco, mali kad govori starija gospoja ka čan sa ja i jedna žena vridna svakega rišpeta !
Kjaro ?
Jasno, jasno !
Dunkve...kad more oni Klarić izumišljavat nike svoje penšjunate i udruge nezaposlenih o dva člana - pa se mečat za velikega ujedinitelja i nikega politiškog Tarzana ča pridvodi "Pokret otpora" - a ča ne bi ja pozvala pod moju stranašku bandiru sve one ča nisu u niti jednu stranku - da ji lipo vodin u Misir na zemji...ovod direktno u Rvackoj ?!
Jemate prav, nakotit će se sad miljun ludaša i tih stranak o sami duhov prez ijednega živega stvora - ali su velikin, novin Vođama ča će du judima obećavat brda i doline i dilit šakon i kapon nepostojeće blago...
Znan ja to...Zato i gren i u kampanju su ovi moji par prijatejic na šćapu iz stariških domov i ništo naši priživili prijateljov. A kome će du virovat ova dićica ako nećedu nama ? Mi višje ne moremo ni krest ni trkat okolo za bortunima i šinjorinama. Zaraj naših godišć i bolešćina ne moremo vozit skupe tonobile i jahturine - joli gradit porodišne otela i poć se skitat po svitu i sakrivat pokradene šolde po Austrijskin, Švicarskin i ne znan sve čijin bankama. Ne razmimo se mi ni u te vaše "društvene mriže" i kompjutere pa nećemo izbečit oči i skakat u vis ka oni Pernar ća mu je najveći gušt vozit se u Crnu Maricu. Ča nama triba ? A skoro ništa ! Bokun šezlona za odmorit stare kosti...pijat kokošje juve oli komadić lešoga mesa a more i bokun mola. Kapju vina a meni, eto, bićerin prošeka. Nećemo bit nikakvi trošak vengo ćemo samo mislit za dobro sviju judi a ne samo za se. Vi crljeni ćete bit uz nas jer smo pošteni ka ča su bili vaši stari a i zarad crjene kolure u imenu stranke, Torcida će bit su namon zaraj bile a Bad Blue Boysi zaraj plave kolure. Ovi desničari čedu morat stat uz nas jerbo smo se jedino mi nazvali po Rvackoj zastavi...Manjine ćemo poštivat ka i svakega drugega i nigdi nan neće bit kraja. Biće to jedan pravi Raj u ovome loncu o lušije u kojemu se svi sad kuvamo i na koji slići cila nan država i društvo tuto-kompleto ! Aj reci i sam - jeman li ja prav, an,,,,,Ajde reci mi !?
Ma jemate sto puti prav moja šesna šjora File...ali višje ni potribna samo dobra voja vengo Rvacku triba vadit s dna najdubje jame pune blata u koju su je, na nesriću uvalili - Joli ne vidite da su Rvacku tako izmuzli da više ni na noge ne more stat, vengo skapava...polako ali sigurno.
Pa to znan !
Je...Ma za izvadit je iz tega gliba triba i te kakve force i te kakvog kurađa....a Vi morete najboje pomoć svitujući nas ka ča ste to i do sad radili. I morate svin tin Vašin judima govorit zašto nan vaja zasukat rukave , zašto nan vaja prominit ovu nesriknju vlast i fermat propadanje, zaustavit ludaše da i dalje divljaju i da nas vodidu tamo odakle nas više neće moć nikor Izvadit. Ni Veli Jože ! Jerbo - zanji je monenat za to ! Zanja minuta šjora File moja...U temu je stvar !
Ajde, ajde - ča si se navija ka žveljarin ! Samo san te malo štucigavala - Znaš ti dobro čigova san ja i čigova ću za navik vikova ja bit...Samo triba i Vas malo protrest, prodrmat i udrit lakton u bubrige ako je za to potriba - da se ne ulinite i ne pomislite kako van pobida pada s neba u ruke - ka mana Božija.
E to mi je drago ćut ! A Vi nas samo bubnite kad zatriba ! Ne boli puno kad Vas mlatnu oni koji vas volidu i očedu van dobro. Druga je stvar kad Vas oće mlatit oni koji vas mrzidu i ne volidu.
E, takve triba nogon u gujicu oli šakon u temple ako se pomamidu...da znaš ! Jebeš finecu i grandecu kad su ove stvari u pitanju ! Nima tu više zajebancije ! Vaja mislit na moje praunuke i svačiju dicu i unuke....jerbo jin ne smimo ostavit kažin o države u dotu, mišu moj iz uja !
Dobro, dobro - sve san razumija....A ča nas dvojica ovod zebemo na hodniku. Ajde svratite malo kod mene. Biće Maji puno drago..A jeman i onega farskog prošeka ča Van ni mrzak !
Aj, nagovorija si me....Samo me molaj onega tvoga pasa. Kad počme lajat sva se nakostrešin ka da me nožen bode u uvo i mogla bi ga kolpat nogon ka Frane Matošić mantel buvel - jerbo nisan ti ni ja više ona stara šjora File. I meni su se živci stanjili !
Ma ajte molin Vas, ča to govorite ? Vi ste očuvani ka da ste po života ležali u bumbaku a ne radili u poju ! A tek mozak !? Koji put pomislin da ste niki maškarani akademik joli sestra o Ajnštajna....Ćudo jedno !
Aj ne spominji mi tega sidega manjamuktaša i redikula. Neš ti ča je on izumislija. Pizdariju ! Niku teoriju relativiteta ! Ola velikega ćuda ! To kod nas znadu i malena dičica. Kad je toliko bija pametan ča nije još bokun poživija pa doša ovod kod nas da vidi kako ne postoji samo teorija o Kaosa vengo i pravi pravcijati Kaos koji se zove Rvacka. Pa ča se onda ni uvatija posla i to nikako složija i sredija. Vengo je radije umra i pobiga na drugi svit od problema. A jema takvih kod nas za bacat - deboto na svakon kantunu a najskoli ovod u našen Splitu.
Aj daj, Marinko mali, još jedan bićerin prošeka. Učini i ti čakod korisnega. Jeman ja pametnija posla vengo ovod uludo trošit vrime i mukte svitovat političara kojima još materino mliko curi iz just.
Aj živija ti meni, reče dobra moja susida, copne jezikom - i ode !
|
