Vrime je o Božića.
Ćeljad se uzmuvala...pun je grad svita, tonobili zakrčili ulice, judi trčidu amo - tamo ka muve bez glave...sve se nekako uskomešalo...Ma isto, ka da nešto ne valja, ka da nešto fali i ka da nima onoga uobićajenoga šušura i veselja, opuštenosti i smija - ka ča je i obićaj u ovo vrime.
Judi su nikako zlovoljni i ka da svako u sebi nosi svoju muku. Ka da su štufi svega i ka da gredu ka niki roboti oli makinje. Ka da se nešto opako svakome uvuklo u dušu.
Ma Marinko moj šesni, ča je ovo - krši ruke i sva nevojna pita me šjora File, koja nam je jušto arivala doma noseći tećicu sa makarunima u toču o mlivenega mesa....Onako da bokun probamo za svoj gušt.
A ča to ?
Pa ne znan ni sama ? Nisan pametna.....Ali nikad ovega ćuda nisan vidila. Evo će za koji dan Božić - a judi se ponašaju ka da su jin svi brodi potonili i ka da su u korotu a ne prid najlipji blagdan na svitu....Ma ča nas je ovo potrefilo...gore je i od najgore bolešćine. Ka da je neko u judima ubija svo veselje i radost....a ostavija samo ćemer i bolešćinu.
A ča će te...Nije lako svitu..Umiru o straja za posa...plaće su male, svugdi krađa i lopovluk.....Ne vididu budućnost za vlastitu dicu...ka da jin je nebo pala na glavu.
Ma koje nebo. sinko moj - Ni nebo ništa krivo...reće ona nekako ispod glasa i više za se. Sve su ovo zakuvali živi judi...Mangupi, eto ko....A na kraju će se i nebo rasplakat nad našon sudbinom.
Ajde, nemojte sad i Vi ovod počet kukat. Pa di Van je forca...? Di je oni Vaš dišpet....?
Digne ona glavu i njene bistre oči zasvitlidu ka dvi žerave.
Aj ne zajebaji me, barem ti....Znaš ti da u ovemu feralu uvik jema petrolja i da ga nećedu tako lako utrnit...I udre se u svoje košćate prsi stisnuton šakon.
E da su svi ka ja...ne bi se nama ovo dešavalo...Ne bi ! Odavno bi ovi mangupi partili sa vlasti. Ma je narod ćudan....Grinta ali ne denja se baš krenit u manifeštacjune, demonštracjune i prosvide...Je, znan ja - Krenit će kad mu prikipi...kad viišje ne bude jema kud ! Kad ga satiraju prid zid. Ali zašto smo mi došli dovle..pitan ja tebe ?
A to su nan dali zadnji izbori, šjora File ! Vlast koju je narod izabra !
Jemaš ti prav...Eto san se jutros zakačila u butigu s onon Mandicon...A je mi digla tlak !
Oli ste se opet pošli karat okolo ?
Ne..vengo san tribala primućat kad je počela branit vlast da ni njoj nije lako...Jo, koju san barufu učinila. Lipo san joj u čunku rekla sve ča je gre...pa i o onemu golfu !
A ča se Vi sad razumite i u golf ?
Neš ti filozofije. Otilo se gospodi rasprodat još i ono malo ća već nije odnija vrag...Pa su izumislili oti zakon o golfu. Znan ja kako je naš dotur Ivo navika od malena igrat golf pa nemore prez njega. Sve mi se pari da dok igra golf drži slušalice na oba uva i sluša operne arije iz Verone..Je, nima ča...jemamom puno kulturnu vladu i premijera. Ma narod je najeba radi te njiiove kulture !
Kako to ?
A lipo ! Eto će jin sad i njovu zemju odnit prez da ji njanka pitatdu želidu li je oli ne želidu prodat. Po otemu zakonu...glavno je da se najde kupac....a gazda o zemje more se frigat. Tija ne tija....svoju didovinu mora prodat nikom lovašu...i to za brokve. A oni Pankretić..da mi ga je samo uvatit. Svega bi ga išćepušala. Lipa mu je ona frizura - za krepat. pari mišanca pivca i tukca !
Nemojte samo opet beštimat šjora File, nije red u ovo vrime !
Ma ča nije red. Cili bi mu oni cuf išćupala. Oli mu je to čaćina zemja pa da je arči i banči ? I još je on ka iz neke seljaške stranke....Ma sve su to privaranti...slušaj ti mene.
Eto ga na...
Je...je. a jesi li ga vidija kako vrda - mrda doklen govori. Vrti se ka prdac u gaćama...Ali nikako da kaže o čemu je rić. Nikako da kaže kako ćedu, par la finta, gradit golf igrališta a zaozbiljno ćedu dizat apartmane, otele i ča jin padne na pamet. A pinezi će jin padat s neba drito u njiove žepe. To su prave kupravende ! Kupi jeftino - prodaj skupo..Otmi sirotinji - daj bogatunima ! Omasti brk prez truda i prez prolivene kapje vlastita znoja.
Lipo su nan čestitali Božić...Nisu mogli lipje !
Zato san ja šjora File i potpisa ustavnu tužbu protiv tega zakona.
A da nisi ja bi ti prisudila ovod na licu mista...pripriti mi se ona.
Onda bi ja ispa jedina žrtva otega zakona.
Narod je žrtva, cukunu jedan - narod...Samo ča još to ne razumi, e !
Pa kakvi je onda to narod ?
Eto takvi !
A ne moremo pobić od sebe samih....
A jesi li čuja, Marinko, onega Šeksa...ča laprda kako nije vrime za livicu ? Ma znan ja takve ka po šolda. Ćudna je to tica. On ti je, lipi moj...za onu "liva ruka - desni žep!"
To ste Vi onda za niku koaliciju livice i desnice !
Aj ne bleji i stoj s miron tot i dobro me slušaj. Tribaš izać tamo u Sabor s pridlogom da i balote ujdu u ti zakon o golfu. A ča je ona kuglica boja od naše balote ? Ništa ! Ka prvo..balote su rvatskija igra vengo oti ingleški golf..To je ka nika novitada za ove naše pokondirene tikvane koji ka žabe dižedu noge kad vididu da je i konj diga svoju... da ga potkuju ! Jel tako ? Je ! E sad...vidi. Moremo mi naše balote i prilagodit malo ton zakonu...pa ćemo po zemji izbužat buže i valjat balote u ote buže. Umisto šćapa jemamo svoje ruke...A igrat na balote puno je i zdravije vengo igrat golf. Jerbo - stalno se moraš saginjat..gori - doli...i stalno činit đinastiku...ča bi nan svaki dotur priporučija. Onda - za oni golf moraš jemat onega slugu ča stalno trči s onon boršon i štapima za tebom, ka niki pasić. To nije judski..Jel tako?
Tako je !
E, sad kad smo se i oko tega složili..Slušaj me..Najvažnije je to ča bi mi igrali na balote, koje bi smo mogli nazvat ka niki veliki golf....oli golf - grande...na svojoj vlastitoj zemji.... pa nan je ove lopuže ne bi mogle lambrit i priprodat okolo bilosvitskim lopovima.
A kako...?
Ma mući dok ti govorin i dobro načuli uši. Mi bi samo tribali na našoj zemji izbužat buže i reč kako to nije poljoprivredna zemja vengo teren o balota..odnosno golf-balota !
A ko će nan dat onu inglešku travu !
C,c.c....poćne ona mavat glavon livo - desno. Vidi se da si pravi političar. Glup si ka tava! Pa to ne bi bija svakakvi golf od baloti...vengo onaj koji je na najvišoj cini ! E, bome...!
Koja je sad to vrsta najcinjenijeg golfa o baloti ?
Ekstremni golf o baloti...mandrilo jedno splitsko ! Ekstremni !
Pa jemaš li ti televiziju. Oni moj unuk po cili božji dan glede ote ekstremne športove. Te se vozidu na bičikletu po jaman i rupetinama , te se mlatidu u kavezima ka beštije,. te se pentraju po najgorin stinjama i brdima, te trčidu di ni koze ne bi trćale, te plivadu po morima i valovima,.vozidu brode po divljin rikama i vodopadiman, ..motorima se rumbaju po blatu i kiši, tonobilima se zaliću jedni u druge....na rošulama izvodidu tombule i makakade, lomidu kosti i čiverice, vozidu se po ledu i ča ti ga ja znan ča sve ne činidu. Ča gore to boje i skupje Ča je teren lošiji to je više na cini...
Annnnnnn...!!!
Eto si me sad napokon razumija. Naše ledine. livade i poja...proglasit ćemo športskim terenima za eksremni golf o baloti i spasit ćemo naše zemlje od pljačke i pljačkaša...Jesi li me sad razumija?
A jesan !
Fala ti draga Gospe o Karmena ča si ga napokon prosvitlila - digne ona svoj zahvalni pogled prima plafonu...Prin bi tovaru ušlo u glavu vengo njemu..
reče to i digne se dodajući: I kušaj ove makaruna ča san ji učinila. To će nan bit turistiška oli kulinarska ponuda. A nabavit ću i šoltanskog crnog..pa ćemo guštat poć bacit koju botu na balote....na naše športske terene...A oni neka gredu oklen su i došli da ji moje oči višje nikad ne vididu skupa s domaćin izdajicama...Jer ča je golf kontra naših balota !?
A ništa, šjora File moja, ništa !
I manje od ništa, Marinko moj !
I manje od ništa !
|
