Danas, kad san se vraća iz Zagreba u Split...deboto me, skupa s onin mojin rasklimanin tonobilon, odnija vitar...tamo između Karlovca i tunela o Male Kapele.
Sve je išlo u bekala....Umisto da me vitar nosi doli iza Svetog Roka i na Maslenici...iznenadija me iz zaside... tu - jušto kraj Zagreba. Jo... ja mislin da će sad past kamen sa srca našen graditeljskon neimaru Juri Radiću...jerbo, eto - puše tamo i di nima njegovoga mosta...Jer, već je bija infiša da bura gre za dišpet za njegovin mostovima...pa ma di ih on nasadija. Pa, eto, kad već puše... izgradija bi on i tu, kraj Karlovca - štogod mostića, makar i nima potribe - ali onako , čisto za svoj gušt ! I,naravski...za naše pare !
I tako san, malo jidreći - malo vozeći stiga do Splita.
Baš kad san se uspija parkirat...žena me zove na mobitel da kupin pive...ali da pazin da bude ladna....i da je priša jer je obid gotov i samo mene čekadu.
Aj, dobro!
Tu je odma jedna trafika di se može kupit svega i svačega..pa tako i pive. Tu naši lokalni penšjunati sididu na komade bloketa ili štogod puntižela i bumbidu jeftinu pivu kružeči oko trafike, i prinoseči te svoje sidalice - kako se sunce miće...i kako se di napravi ono malo ladovine da mogu u miru pit i ćakulat.
To je..ka niki dokaz da je sve samo vrćenje u krug i da se sve u životu ponavja i vraća na isto - ka šta i oni kružidu skupa sa ton ladovinon oko trafike.
Ma koja peripatetička grška filozofska škola.
Ovo je kružeča sideća i bumbeća splitska folozofska škola od koje bi i Sokrat i Platon...a Bogami i Aristotel jemali ča ćut i naučit...a nešmoli jedan bidni i nevažni političar ka ča san ja.
Zato ji ja lipo uvik saslušan i čujen koju pametnu...a nauk platin s par boca o pive.
E ma i tu su oni razvili cilu jednu filozofiju - da je li boje pivu pit iz zelenih oli kafenih caklenih boca..jerbo iz nekog svog duboko mudrog i nedokučivog razloga neće ni da čujedu za limenke o pivi oli, ne daj Bože - za pivu u plastičnim bocama. To je ...ka jedno od najvećih bogohuljenja i pivopijskih blasfemija.
A ja in se ionako u to ne pačan - nego ih uvik lipo saslušan, lipo pozdravin....i počastin jih s kojon pivon...ka ča i zaslužuje to mudro društvo.
I taman san ja doša do trafike i da ću ji ih lipo pozdravit sa : Veseli i zdravi bili - judi moji !....kad ono iza mene začujen poznati razdražjivi glas o moje suside:
A ča je nesriknji neradnici ? Ajte doma ženan pomagat a ne tu dangubit i palamudit po cili Božji dan ! Manjamuktaši i pijančine jedne...ne date poštenon svitu ni spizu učinit na miru...Ma, nemogu vas ni gledat...Gori ste o onih naših političara !
Šjora File !
A ča je Marinko...lipo si društvo naša...Naša lonac poklopac!
Pa se cila iskrivi onako sa boršon u ruci i zamotana u crni šudar: Oli bi se prin moglo reč: Našla botilja čep !
Ma ča Van je sad....
Ajde molaj...neću još sad i tebe i ovod slušat..Ionako san vas se jemala ča naslušat ovih dan na televiziju...tamo iz Sabora. Je, je...nima ča - same san pametne beside čula...Parilo mi se da je Akademija a ne Sabor !
Ma koja sad Akademoja ?
A Bogati...o velikih nauk i mudrolija..Jerbo, mi smo za vas samo ka nika puplika koja njanci miljunti dil od vaših velikih misli ne more razumit... ma bi van se isto tilo da van stalno plješćemo i begenajemo... jer vi ste - ka niki akademici, pucadu van glave od velike pameti i briga za malega čovika...Pa se onda lipo mejusobno uvažavate, jedan drugemu kokolajete...te poštovani ovi, te poštovani oni....Ma ko vas ne bi volija ?!
A oni moji kružeći filozofi o pive udri u smij.
A ča se vi...tovari jedni tovareći, smijete ? Eto ste spali na bocu o pive iza trafike - a vama je i to dobro. Umisto da grete na demonštracjune i na barikade ! Tu mi glumite nike velike muškardine - a ja mislin da bi van straj u kosti utira i oni gaštapan iz Sabora...
Pa onda doda sebi ispod brade: A bićete ionako navikli višje na bile miše!
Ne vriđajte šjora File, čuja san Vas...jer ćete me jemat ča ćut..isprsi se jedan.
Mooolin!!! Nakosterši se moja susida,,Tiš meni poć pritit...mamlazu jedan šupjoglavi ! Tu po cili dan lajate u prazno pa grete onda doma zadovojni...umisto da kad su izbori pazite ča radite i za koga glasate. E onda naglo zaboravite i na svoju mižerju i na prazne žepe...! Onda se ne sitite da ste poslin toliko godin posla spali na to da sidite s gujicon na ladnoj bloketi i čučate bocu o pive....ka krunu o cilega svog života..Jeste li zato fatigali ka pasi po tvornican i uredima...? .Ma je...sad tu lajete... ma na kraju opet ka ovce glasate za prazna obećanja i za one ća vas čućadu ka drakule...i punidu svoje žepe na račun vašega truda.
Ma ja san šjora File...
Ma ča si ti...Marinko moj nevojni..Ti si još za u pučku skulu o Života...Još si ti za kratke gaće i jemaš još učit puno tega pa da bi baranko malo razumija od ovega ča ja ovod govorin ovin nevojnicima.
Ma neće bit baš tako... moja šjora File !
Aaaaa, je, je...lipi moj. Jo ča san i ja išla na kvasinu...Jemaš ti, sinko moj, prav. Eno san nikidan čitala u Slobodnu da te se jema striljat..oli ča li...Ma svakako da si za niki odstril..jerbo da si star ! Je..krepala san deboto o smija !
Samo mi Vi još falite !
Ajde ne jidi se, Marinko moj....Lipo san se bila nasmijala. Trbuj me bolioja cilo jutro...A oli ste i vi esdepejci rebambili pa ste navalili jedni na druge i to...ne po, ča bi se reklo - pameti...vengo po godišćima..Pa do ove godine jedni vajadu..a od one godine - drugi ne vajadu ! A di van je, tako ti Boga dobrega...ta granica. A bi li vi tili da ka i dosad... i ja glasan i drukan za vas ? A ? Ili san van i ja stara i za škovace...za na Karepovac.... oli za u buka ? A ča je s vama crvenima ? S mojima ? Ugledajte se u indijance..I oni su van bili crveni...ma su poštivali stare i dobro su slušali baš ča najiskusniji i najstariji govoridu. Njih su najviše cinili.
Je, je...jemate prav, lipo ga svitujete. Fali njima Vinetu ! ...javidu se oni filozofi iz ladovine uz trafiku ..
Aj mučite vi tamo, Dat ću Van ja Vinetua!...Svaki od vas pari oni Bik koji sidi...jerbo po cili božji dan ništa ne radite nego sidite i bumbite... a pamet bi van vajalo tražit povečalon. A osin toga, višje bacate na volove nego na bike....Ko vas, uostalon, ča i pita...obrecnu se na njih moja šjora File.
Nije van to baš tako...pokušan se ja vratit na temu...
A Marinko moj, moran virovat da nije...i da van to niko samo sa zlon namiron čini dišpete i konfužjune..jer da je drugovačije.....nemoj mislit da bi višje bila vaša...makar sve u meni živi za oni esdepe koji san ja znala ka stranku o poštena i čestita svita !
A za ludonje ne bi nikad bila...e - tako da znaš !
Ajte šjora File, ostavite se Marina....taman smo ga tili nešto pitat...javi se opet filozofska družina koja je ostala bez pive..
Je, ka da Vas ja ne znan - Tili bi da van plati lokačinu !
A ča je vas briga ča mi radimo i koje posle mi jemamo sa njin ...okuraže se oni...
Ma za vas mi ni stalo njanka koliko je crno ispod nokta, reče ona pokazujući nokat od svoga malega prsta - ma mi je stalo do moga Marinka...i neće van dat za bumbu, pa neče....Ajde Marinko,,gremo skupa doma..Umorna san, moran se oslonit na te...i uvati me za rame.
A ja bidan, šta ću - uvatin je ispod ruke i polako s njon priko ceste i uza skale.
Ma pusti ji lipi moj, šapne mi ona na uvo..onako ka da neće..ovo san te ja samo izvukla od onih nevojnika jer bi te davili još dvi ure..Znaš ti da san ja žvelta i da mogu sama uza skale..Ovo san sve ja izventala. Samo činin fintu da san slaba...a sve zarj tebe...
Ma znan ja...šjora File.
A onda će mi malo ka mekše i s odobravanjem: Lipo si ono bija reka Sanaderu u Sabor da mu pomažeš oko škvera evo već jušto dvi godine...ma da on to jedini u cilu Rvacku ne razumi...lipo...Dobro si mu reka i za Vukelića ča se ne denja doć na sud. A drago mi je ča si se ono založija i za ove ceste uokolo Splita...Ostali smo ovdi ka niki zarobjenici..Ka na niki otok..Svi bi smo se u Split mogli slobodno zvat Robinzon Kruzo...jel tako ?
A, a.....
Ajde ne uzimji me za ozbijno...Tila san ti samo reč kako bi smo morali skakat u more da izbije niki, ne daj Bože požar, da se užge naš Split..oli da nas strefi potres...ili...da...
Ma šjora File...koje su van to crne misli ?
Da crne ? Malo je reč ! Ništa mi ovo nije drago moj Marinko...ništa. Svit je pa ka u niku apatiju. Kriminala nan je priko glave. Eto se ubijadu po cestama svaki dan..i to ne samo u nesrićan...nego jedni druge bodedu i nožiman - ča nikad ni bilo u Splitu. Vatadu se lupeži meju državnim službenicima. Izmišljadu se nova ministarstva za namirit one guzenje iz ote koalicije o ijadu stranak. Čujen da i kod Vas u Sabor sad izmišljadu nike Odbore - jer je ostalo još nezadovojnika meju vladajućin. Eno..oni Jarnjak...muko moja...otvoreno u Sinju nudi trista mijuni naših, narodnih kun - za prominit vlast....Sanader je prizadovojan i cili mi je doša ka mede...ma ne oni vaš malašni crveni, esdepejski - nego veliki, ogromni...hadezejski...i friga se njemu ča je sve krešilo i ča je penšjunat sritan ako i pivu može popit u trafiku kraj autobusne stanice.
Uto smo se uspeli do portune..pa smo lipo lifton do našega kata...a da ja nisan uspija prozborit niti jednu jedinu cilu rečenicu. Ka i obišno !
Očete li svratit ?
Neman vrimena stari moj...odgovori šjora File - i furbasto mi se nasmije prije nego ča je ulizla u svoj stan...
Opet Vi...
Ajde mulac jedan..oli ne vidiš da san i ja još mlada a di neš ti bit ! I nemoj se sad tu usrat u gaće od straja ! I zapamti: Koga očedu striljat taj ništo i vridi - inače ji ne bi za njega ni bilo briga ! Znači da te se još bojidu ! Aj Bog...pozdravi sve doma !
Ma ča se ko jema mene bojat...? Ali nisam uspija dovršit jer je šjora File već nestala iza svojih vrata.
A iza vrata o moga stana već se čulo lajanje Li-Lu koja me je nanjušila i ženin nervozan glas: A di si više za Gospu Blaženu !
Jebeš vod za streljanje - tek san sad najeba !...pomislin u sebi i zazvonim na vlastita vrata. pun straja i iščekivanja...
|
