Domovinski bećarac (kao uvodno slovo)

Daleko sam, Slavonijo lijepa,
Al' bećarac ovaj meni tepa.

Intrigira i za rep me vuče,
pa neka se znamo tek od juče'.

Meni more pod prozore tuče,
Žitna polja tebi srce vuče.

Lipa li si domovino moja,
Od sjevera sve do bilog škoja.


Brački bećarac

Priko mora zaputi se Mote,
Nek sad vidu eto in ga tote.

Misli vlaj'na meni zapovidat,
Ka u crikvi samo propovidat.

Boga molit i dici ugođat,
A ja bidan kuću nadogrođat.

Ka'ćeš kopat, kad masline obrat,
Nevera će, spusti se u porat.

Vajalo bi s kozami u goru,
Jes' bi vidit kaić je u moru.

Svet' Ivane od nebeski sveci,
Ka'će molat, aj ti meni reci.

Dosta mi je badnji i samara,
Svi nas prtu, mene i tovara.

Broška krv je vrila i radišna,
Pa neka ih muči i zemljišna.

Ma bročonin zna bit i jutica,
Zmija zmija, neka zna ženica.

Nek se siti jadna li ne bila,
U koga se davno zajubila.

Vidi'će ga kad jon skrešen krila,
Bude bude za menon vapila.

Neka ide sve u suve smokve,
Ovce, novce, pa i mriže nove.

Ča je slano ni ni maški drago,
A ja mlađan zaradi lumbago.

Vazeja san boršu i lumbrelu,
Pinku bajam i slanu sardelu.

Špančeru san nataka na čelo,
Malon mistu zapiva opijelo.

Gren put Splita vidit malo svita,
Di me nikor nit' pozna nit' pita.

Pa nek tražu od poja do poja,
Vrati'ću se kad me bude voja.

Oznake: bećarac