morska iz dubina
ponedjeljak, 13.02.2023.
K...od kroštule
Foto: Morska
Za kurbu gudu, reka je barba Vike na našoj teraci u Vali. Ma koje Valentinovo? Eno mi se Jera jutros deštrigala. Da joj njanci čikolatu nisan kupi. Ma kad smo mi to slavili otega Valentina?
Ne se jidit, barba Vike, rekla san. Ni se potriba žestit. Teta Jera bi samo tila da joj učinite neku mižeriju od lipoga. Da zna da van je draga. Da van je pri srcu.
Slušaj ti, ne me činit da sad grubo zabeštiman, ražestija se barba Vike. Oli nismo skupa već pedest godin. I sad bi ona čikolatu jer bo ne zna da smo skupa prošli i pakal i raj.
A jesi tin dobila čikolatu, kukuvižo?
Nisan, barba Vike. On mi jutros ubra cviće. U vrtlu od barba Tomića. I doni mi. Evo san ga stila u vazu na trpezi.
Oli se to računa? Ni ti to kupi, nego je ukreja.
Pa računa se, nego kako. Meni se računa. Razveseli me je su dva cvita. A jan sam njemu pofrigala kroštule.
Gospe ti blažene, ima Jera u vrtlu svakega cvića. Sad ću joj poć brat, kako da ne.
A lipe su ti ove kroštule. Moga bi ja reć Jeri da mi ih malo učini.
Je, barba Vike, ja van predlažen da jon baš danas to rečete. Puno ćete je usrećit.
Vraga izija dabili izija, penjala se teta Jera uz naše skale do terace i glasno brontulala.
Dobićeš ti danak k...... od kroštula za Valentinovo.
Nego, srce moje, umilno me pogledala, ala ti mi sti čikaru kave. Da je danas popijen su tebon. A ne sa ovin beštijanom.
Bilo je to 14.02.2022.
U Vali.
