< | lipanj, 2010 | > | ||||
P | U | S | Č | P | S | N |
1 | 2 | 3 | 4 | 5 | 6 | |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 |
Dnevnik.hr
Gol.hr
Zadovoljna.hr
Novaplus.hr
NovaTV.hr
DomaTV.hr
Mojamini.tv
Ka prvo, oli Vi ne znadete da je zabranjeno bumbit u vinariju ? Oli ne vidite da povrj vrata lipo piše: "Viška vinarija" a ne "Viška birtija" ! Kjaro ? Aj muči tote - Ko te ča pita ? Šjora File, jesmo l imi došli u vinariju po pet litar viškoga crnega joli smo došli sidit i bumbit ovod....I to na prazne gajbe o pive ? Aj muči, mulac jedan - Ko te ča pita ? Za majku Božju neću Vas višje nikad poč pratit do u butigu. Samo ćete me u škandal uvalit.....Zna san ja. Aj muči tote... Ivanko,ma Ivanko, okrene se šjora File podebjen čoviku ča je baš u bocun kroz piriju liva vino....Ma jesi li ti, ča bi se ono reklo, Ivan joli si baš Ivanko ? A ča je to važno ? Znan ja ča je to važno....Vengo ti meni lipo odgovori ! Ma Ivan, za Gospu blaženu...Ivan....Ali me moja pokojna baba Perina, onako od dragosti...uvik zvala. još od malih noguj - kad san bi još ka banbin - Ivanko.... jerbo se to njoj činilo nikako višje ka dičinje ime a Ivan postaneš kad naresteš.....Ma san ja, eto, za navik osta baš Ivanko ! A vidite kolikoga me jema.....i cili sritan se udre po trbuju i počme smijat ? Je, pariš gudin....dobaci mu jedan, crljena nosa, onako ka da neće... iz kantuna di je čuća svoju botilju o pive....ma napunjenu vinon. Mate....Istirat ću te iz butige budeš li još kenja....uznemiri se šjor Ivanko. Škužaj...Izletilo mi je ! E...sad kad smo doznali da si Ivan a ne Ivanko....Ča je je - red je da nas počastiš ! Ma Bogati...A zašto ? Jerbo je u prikjučer bija Sveti Ivan a ti si to zataja ovemu svitu i nisi jin da, u to ime, ni bićerin loze liznit da ti nazdravidu. Saš sve refat....unese mu se priko banka u lice moja šjora File. Ajde dobro, ča omar vičete. Evo dvi litre na moj račun ! Samo ča će oti političar ovod ? Ča ste ga doveli - pa da me špija da mi se u butigu pije. Znan ja take. Biće zna sve one inšpektore...ča malemu čoviku vadidu mast ispo kože - pa mu ni žmul vina ne dadu popit u vinariju...Jerbo, naravski, to će spasit državu....Jerbo je tako mi ruvinajemo i upropaštavamo, pljačkamo i deštrigajemo da nas sve triba bacit u pržun. E onda će ona procvitat ! Velike će šolde vlada tako ušparat ! Ajde ostavite se malega. Ni on loš. On je moj susid...zauzme se za me šjora File. A kako Vi kažete moja šjora File. Evo...ja Van virujen - ma mi je on nikako sumnjiv...i to ni samo meni, značajno nakrivi on svoju debelu glavu i podigne velike raštrkane obrve. Ča to jema sad značit ? Čuješ li me Ivanko....zaštitnički podigne svoj glas šjora File. A ništa ! Ča jema bit ? Eno san čita u foje...piše oni Butković da triba razbucat spliski SDP...Da sve to triba rastirat i raspustit...jerbo da su to niki, ča ti ga ja znan, vagabundi i nesriknjici...na čeli s otin tot.....I upre on svoj debeli prst prima meni. Ma ča si reka, sva se , ka lamica, stanji i naoštri moja susida ? Ča si to reka ? Ma koji Buković ? Ma ni Buković vengo Butković ! Znači ni on od nikih bukvana ? Ništa ja nisan tija reč...samo san pripriča ča je Mate pročita. Je li Mate ? Ne mišaj mene u pulitiku Ivanko....Ostavi se ti mene na miru. Znaš i sam di san radi pulitike odslužija svoje ! Ništa ja nisan ni čuja ni vidija ! Ma vidi tovara jednega...sad bi mene u govna uvalija. A jesi li mi reka da ga je i oni Kuljiš na televiziju isto izgadija...? Ja ? Bože oslobodi ? Šjor Ivanko vas pocrljeni i naduje se - ka da će puknit. Jesi, jesi...Reka si mi da je i on reka kako triba ove spliske esdepejce sve smečit i rastirat.....a da je najgori ovi ovod...A onda se okrene prima meni dodajući: Ma škužajte šjor Marine - nisan ja to reka nego ovi ovod da je čuja toga Kuljiša na televiziju u niku kasnu uru....da je to on reka - cili se smota moj šjor Ivanko ! A oti Bukvić...ovi, oni... Butković da je zaziva šjor Milanovića da Vas šamaštra...Eto ti ga na - pa ča san ja sad tot kriv ? Ma svitu moj lipi - ča se sekirate ? To već i rebci znadu kako bi niki dali ne znan ča da me se liberaju ! Ma oni van nisu u moju stranku. Mogu mi puvat...! Eto jin ga na ! Ma naravski....naravski. Ma koji su to nesriknji farabuti. Bićedu sve to pišedu zaraj pinez ? A ne vengo zaraj friške arje....dobaci poučno šjora File. A za koga oni igradu ? U koji tim ? Ko jin je trener ? Oli ste išempjali...? Pa ni van ovo svitsko prvenstvo u fuzbalu vengo politika. I to ona šporka ! A oli jema i drugovačije politike ? Jema ljudi, jema....Pustite ji na miru - nek se žešćidu i laju...Fermat će kad dobiju svoju kost ! Ma te je ištraca i oni Dujmović pa mi ništa ni kjaro....počme umovat šjor Ivanko nalivajući još jedan žmul crnega svakomu. Oti Dujmović te pjuca i kaže da je desničar. Dodaje balun Kuljišu koji te nastavja pjucat i kaže da je livičar - Ma ko to more razumit ? Trener ! Trener more razumit ! Oni za čiji tim igradu ! Annnn ! Bogami jemaš prav. Sve mi se pari da su ti, sinko moj spremali veliku papu - a spali su na manistru na pjuvaku ! E ča ti je čovik...doda iz kantuna šjor Mate...Ma jebeš ti sve foje, sve televizije i sve politiške kužine. Boje je nan ovod u vinariju sidit na gajbu, popit žmul vina i pročakulat, onako juski - vengo radit šporkarije za ne znan kakvu manču, jel tako ? Je, lipi naš Mate - Svaka ti piva....Ma ko bi reka da taki Salamun čući u tebi....Biće i tebe baba zvala doma sa ponistre: Oj Matune...dojdi doma , namazala san ti kruva i masti i posula cukron ! Zajebajite vi zajebajite....ma ja za obid jeman janječe tripice a Denis, Davor i Tihomir nek kusaju manistru na pjuvaku. Svakon prima zaslugama, jel tako ? Reče se: Svakon prima potribama Mate ! Gren ča dok je vrime...Vidin ja da se ovod počela širit komunistiška propaganda...Đava zna di će to na kraju završit...doda šjor Mate šerjasto i malo bordižavajući s jedne bande na drugu nikako pogodi vrata o viške vinarije i ode na obid i na svoje janječe tripice. |