Jutros je Šjora File bila nikako sva vesele i prpošna, koliko to more bit čeljade koje je bliže sto vengo sedandeset godišć.....ka ča je to kod nje slučaj.
Od ranog jutra skakutala je ona nervožasto ka nika tičica s noge na nogu i tirala sve po kući da gredu ča prije u grad jerbo je uvatila nika priša i nestrpjivost - ka da je malo dite a ne najstarija osoba u cili naš portun.
Jerbo, danas je u Split fjera o Svetoga Duje.
Ajde Marinko mali, ne metiljaj se tot okolo ka nika stvar vengo reci svojin ženan da se pristanu lickat i maškaravat - jerbo ni ovo modna revija vengo gremo slavit našega Svetega Duju ča ga je oni Dioklecijan da ubit prin toliko godišć - a sve zaraj njegove vire...Dabogda uživa naš bidni Sveti Duje u sto nebeski raji ! Anđeli mu stalno bili upomoć. Misliš da je tome mučeniku i svecu bilo stalo kakvu je monturu ko nosija i je li bija spleten po zanjoj modi ? Jo nesriknjega svita ! Jo nesriknji žen !
Nemojte Šjora File tako...evo sad će bit gotove...još samo da namrčidu oči ! I ne vriđajte ji toliko jerbo će Vas napast za vriđanje žen i da propagirate neravnopravnost spolova ! Vidite kako se Kosorica jidi kad je zovedu Jaca !
Ma jebe se meni za ote tvoje spolove i za sve muškardine i gospoje ovega svita....a posebice za političarke ča omar, ka da su o cukra, obisidu nos do poda jerbo jin je narod nadija niko ime - koje tin pokondirenin tikvan nije po guštu ! Neš ti faca !? Neš ti belece i finece u njih !? Meni je do mojega Svetega Duje.... Pari se meni da ste svi vi inšepjali ka zanje mone !
Vidin ja koja je ura. Gren ja sama na "Prometov" autobus - pa drito na Rivu. Nećete vi mene tot maltretirat, ja van kažen !
Majooooo ! Majoooo !
Ajte ti i Vjera su Šjora Filinon familjon a ja i ona gremo sad - pa ćemo vas čekat kod kule tamo na vrj rive, jerbo Šjora File više ne more izdurat...a oče još na pazar kupit prvih trišanj !
I odosmo mi....
Cilin puten Šjora File grinta i brontulaje....Laje protiv ovi modernih žena ča jin triba deboto po dana da se sredidu za poć kupit kil kruva.
Dala bi ja njima dvi po čunki ! Mogla san ja vako zajebavat svoju svekrvu....počme ona mavat vamo-tamo svojon glavon stežući od pusta jida oni šudar su kojin je vezala bodljikavu sidu kosu.
Ma molajte Šjora File....i ne stežite oti šudar višje. Udavit ćete samu sebe !
A, moj sinko...To bi mi i bilo najboje. Da se ubijen ka ča činidu oni Japaneži. Vidiš da me ovod niko ne obadaje...ka da i ne postojin, Nima više tu rišpeta prima starijima, nima......nikako sjetno završi ona.
Na splitskoj rivi gungula, šušur i gužva. Ča ću sad su Šjora Filon ? Ne mogu je ostavit samu a mora bi u procesjun.....Dogovorili smo se nać u Dioklecijanovu palaču isprid Muzeja grada Splita...a moja susida navalila da oče kupit kil trišanj i ne mogu je ostavit samu.
Ma nima Van trišanj. šjora File...urazumite se, pokušavan je ja odgovorit. Ali ona ni da čuje. Jema pa jema - i gotovo !
Ne znaš ti ni po mise, rebac jedan...Na Svetega Duju se prodajedu prve trišnje i to one iz Tugari, poučno će ona meni !
Ma to je nekad bilo....ma ji višje nima, virujte mi ! Sve se to prominilo...Ni bilo sunca ove godine, falilo je tepline - bila je oštra zima, a pravo za reč ljudi višje i ne tišćedu do trišanj niti se bavidu poljoprivredon !
Ajme, Sveti Duje moj...zakuka Šjora File lomeči ruke. Pa ovo je doša susvita...ovo se crni pakal skala na zemju meju ljude ! Ča je ovo ? Sve se ispromišalo i razbilo u sto komadi ! Ni trišnju višje ne moš pojist na ovi sveti blagdan !
Pa ni to najgora stvar na svitu, falijen ja - pokušavajući je smirit.
Ma je li ? Ma tudume jedan - oli ne vidiš da dišemo na slamku, da stalno bacijedu nike riforme meju nas da se glođemo oko njih ka bidni izgladnili pasi oko košćic? Oli ne vidiš da nan naša Jadranka oče svima zamrčit oči, tuto kompleto - dok se naše bidne žene po kućan mažedu ne bi li bile ča lipje za ovu fjeru. Daju nan pedeset, sedandeset kun višje u buštu o plaće - ma nan krešijedu plin i struju, ukidadu beneficije i povrat onega poreza - pa sirotinja ne more ni zube poč popravit. Ionako jin nećedu višje ni tribat , ako se vako nastavi. Možedu ji slobodno spremit na škanciju ! Nek narod pije vodu i čini kuco...dok i voda ni još došla po zlato !
Ajde Šjora File, pustite ote crne misli - gremo u procesjun a ja ću Van iz Zagreba donit makedonski trišanj ! Evo obećajen....
Je...moš mi ji vazest drito iz Grške ! To nan je, pari mi se, postala nikako najbliža zemlja...odvrati mi ona oštro i ošine me onin svojin britkin pogledom su kojin bi se i najveći bradonja moga bez problema obrijat.
Ma ja san....
Aj, bolje ti je muči...zaklinjen te Svetin Dujon i svin mukama koje je on pritrpija...Molin te mući, procidi ona kroz zube, okrene se i počme žurit onin svojim sitnim nabadajućim korakom.
Još jedino ka da san čuja da govori, onako višje sebi u bradu nego drugima :
"A more bit da trišanj višje nima jerbo ovin muzuvirima smeta crljena boja. Ma nagledat će je se oni...ja jin to kažen...i to vrlo brzo..i to vrlo brzo !"
A isprid nas se prosula riva pripona svita i sva crljena o crljeni spliskih kapa !
|
