dugački je put na zapad

subota, 29.02.2020.

Kak tri mušketira Cajger… Špengler i ja vjutro na Trgaču.
Ščera nafčer je sused Cajger dal spamentog predloga da bi kakti mogli se počastit z finim burekom… narafski…na Dolcu. Je da je sused Špengler mrgljal i predlagal da rajši pemo tam na drugu stran na čevape… veli on da od bureka samo sračku dobi. Pa si deni čep vrit… velim mu ja…a on se žali da takšnog debelog čepa nema kaj bi nejgovu rupu zaprl. Još nadoda da sere takšne debele dreke da jedva projdeju čez nejgof šekret. I Cajger mu lepo obečava da bu mu zutra pri bureku… ak bu ga guzica poterala… nabil cipelu vrit. I tak je taj spametni dogovor utanačen za osam vur vjutro.
Na Trgaču sunčeko… znočka su Trgač oprali… još je mokar… a mokra je i Cajgeru brada kaj mu sline curiju jer si gušta bureka. Daaaaj… pemo gor na Dolac… tjera nas Cajger… buju se dovlekli Bosanci pa bumo ostali kratkih rukava. Je… pemo.. pemo… jebal te burek… mrglja Špengler.

Evo nas na polukatu Dolca… lanjskeg leta su tu celu terasu malo preuredili …pofriškali… trgofci su si znova uredili štacune… vredni kelneri su van pošlihtali stole i stolce… je da je malo friško al se bu dalo zdržati. Zapraf nas grije dobra domača travarica z otoka Paga… kaj smo si spili vsaki po tri štamprla… se razme..pri moji hiži. Drugač pa… Cajger i Špengler bi ostali suhog grla da ni pri meni pijače na rezervi. Oni svoje kaj imaju poločeju vse v jednom danu… vsaki v svoja četiri zida… a onda se prešlihtaju kmeni jer znaju da ja navek nekaj imam za posebne prilike. Jebal ih vrag… pa su si zamislili da je posebna prilika vsaki put gda zajdeju v moje dvorišće.
…………………… No… tu smo spred Bureka… znaš… Zagrepčanci jenostavno taj štacun nazivleju Burek…kak i piše na tabli. Kad negdo veli za Burek na Dolcu… vsi znaju gdi je to. Prafzapraf… na tem se je mestu burek delal i prodaval još za Endehazije…pa posle za doba črlene države… evo i dan danas je tu na istom mestu. Ja se spominjem još kak klinac sam sim dolazil z mojom bakom… uz burek tu se v to doba delala i štrudla od jabuka… makar su to takaj zvali burek. Tu je dugih desetlječa bil gazda nekakšni Ivek… pa se i štacun nazival… Burek kod Ivice. Bi ga vrag znal… Ivica ni nikak mogel bit Šiptar… jer v Zagrebu vglavnom Šiptari delaju bureke.
……………………… Cajger si gušta… Ja bum maznul dva komada jen od mesa i jen od sira… veli on… pa još i priupita… A gdo bu to platil… gdo časti danas… i mulac gledi v mene kak da sem ja Mojsije. A ja odbrusim… Svaki bu sebi naručil i platil… Aaaaa… zgraža se Cajger… onda bum ja samo jenega pojel… Vrabec dal teg mog pajdaša… takšneg žicara buš težko našel na ovem svetu. No…nooo… razrešim ja tu velku dilemu… bum ja denes častil. Onda bum i ja dva bureka pojel… javi se Špengler… makar se zasral dol do peta. I tak… nemreš pokraj mojih pajdašof propasti da i hočeš…ha.

Uuuuh… poštene mjere smo se nametali z burekom… ženskica kaj tu posluživa nam je ponudila da bu nas na račun hiže počastila z jogurtom. Kaaaaj… snebiva se Špengler … v jogurtu si morem samo noge oprati… a Cajger još masni po bradi spet spametno diskutira… Zdaj bu negdo platil i pijaču… burek se mora zalijat drugač pa bumo skapavali od žeđi.
…………………….. Polahko se vlečemo prek Dolca…gda najemput nastane velka galama. Iššššš…Išššš… kriči kumica i maše z rukami… pa zeme jenu jabuku i hiti ju gor na taubeka kaj se je smestil na žici od štroma i lepo spušta dreke taman kumici na pult. A taubek se ni nit mrvicu pomaknul… lepo se je zasral pa se dalše ljulja na žici i lufta posranu rit.

Zdaj smo se sparkirali v malom kafiču na Dolcu… se piše kakti Opatovina… makar je tu Dolac, a Opatovina je sto metri dalše. Valja gazda teg pajzlina nit nezna gdi je kaj. Ni važno, dok se tu more spiti po zakonu. Se razme… mam smo navalili na Žuju i te prve su prešle čez požirak kak Nijagara. Meni ta dva bureka kaj sem ih strpal v želudec zdaj stršiju van na vuha… Cajger je na koncu maznul i od sira i od mesa, narafski je ipak malo prigovoril da se preveč osjeti prženi luk… dok je Špengler maznul dva od mesa, tak da je sračku mogel izključiti kao posljedicu. Vrabec ga dal… trbuhi su nam posle druge Žuje tak nabreknuli…kak ratni bubanj Napoleonovih mundira. Ha… Špengler se je spazil v velkom špiglinu na zidu pa se ni mogel načudit kak zgledi… znaš… Špengler je malo niži rastom…al je široki kak kamijon…a gda mu se trbuh napuhne onda to vse skup zgledi kak ona Kožarićeva skulptura…Sunce. Gledi se Špengler i veli… Jebal me vrag… pa mene je laganejše preskočit nego zaobič… I odluka je pala da bumo tretu Žuju spili negdi uzput na putu za Zapad.

Dečki… zakmeči Špengler… kaj pemo na trajvan…ha… pa gdo bu zdaj cipelcugiral po Gradu. Zbilam… tak smo se nadamfali teg bureka i Žuje i zdaj se Cajger i ja vlečemo kak sprebijeni mački. A Špengler mrglja da bi on mogel još i jene čevape hitit v gubec. Dogovor je konačni da pemo polahko čez Ilicu do Malog Placa… tam si spijemo v Kraljefcu il Britancu još po Žuju…zapraf bumo vidli kakšna bu situacija… pa morti i na pol puta dol pri Fnakopanski naredimo pauzu za kakšnim šankom. Dakle… marš na Zapad.

No… put na Zapad se bu malo oduljil, jer se Cajger i Špengler okrečeju za vsakom ženskom kaj ju vidiju. Razmeš… njih dva skorom nigdar ne hodiju pješke po Gradu… pa je njim vse tak fest zanimlivo. Čudiju se beciklinima kaj kak nori šibaju prek Trgača… pa onda bleneju za onim romobilima na štrom… A Cajger svaka tri metra stane…kati se on mora malo počinut… a zapraf proučava vsaku žensku i vsaka mu je najbolša…on bi znjom ovo i ono… a Špengler mu povlađiva…kakti bi i on. Jezušek dečki… kakšna ste vi bogčija… zavapim ja… pa neznate nit z koje strane vam je pimpek…kaj bi vi z takšnim ženskama… a osime tega… pri hiži ste babama dužni kak Grčka. Jebal tebe kojn… prigovori meni Cajger… pa kaj si nas tu dopelal ak se tebi nekam žuri… I njih dva kak dva turista polahko gibaju na Zapad… a meni se več začelo scati. Nema nam druge neg v Petit v Pasažu… tam ima i Žuje… a to je tekar na frtalj puta. Zapad nek čeka.

Serbus !

virusi... vuhani... i ostale bedarije

četvrtak, 27.02.2020.

Nakon jenog kišnog dana... jutreko je osvanulo sunčekom okupano... je da je malo zimeka...al kaj... pa Veljača je.

Voda žubori... milina i za čut i za videt. Nemrem si nikak zgruntat kak negdo more imat nekaj protif teh naših zagrebačkih fontana i vodoskoka. Maaa...kaj... to se javlaju dotepenci z bregof i z žabarija... kaj im je opče čudovito hodit po asfaltu...vrabec ih dal... nigdar nebuju sfatili da su opanjki ... gange i cajke za kakšno drugo mjesto. No... ljudi prolaze a jedin se ja divim vodici kaj tek veselo skače. Kafič mam tu pokraj je prazan... nigdo ne sedi vani... hmmm... pa nebum onda nit ja... a i neče mi se samom v brtiju zajti...ha... nafčen sam platit rundu...ha.

Ha... si videl... to su na kipecu oni Vuhani v svojemu Vuhanlandu... oni tak hodiju sasvim normalno... mi bi si tu pri nam gruntali da je karneval. Jebal ga vrag i teg dosadnog virusa kaj su ga Vuhani poslali po celomu svetu... Veliju spametni da je to stog kaj su Vuhani v svojemu Vuhanlandu jeli šišmiše i kače i ostalu živinu kaj leti...hodi... puže... i kaj ti ja znam. A kaj... gladni ljudi... ima ih .hmmm...kak Kineza...ha... Čital sem denes da su im nijhove vlasti zabranile jesti cucke i mačke... pa si gruntam kak bi to zgledelo da mi začnemo jesti cucke i mačke... Prafzapraf... veliju da je cucak fini skorom kak janjac... a mačke sam ja probal davnih leta...onak na saft naređene... i bilo je dobro... Bilo je to tam v šezdesetim letima v Udinama... rekli su mi da sam jel mačku gda sam se več najel do grla. Ak je fino... je fino... more bit kaj hočeš...samo da ne zapne v požiraku. No... kak vse zgledi... tim Vuhanima baš i ni najbolše z tim karnisterima na tikvi. Za vsaki slučaj pem si ja nabavit par komadof.

A ovo su takaj Vuhani...tu pri nam v Zagrebu nasred Trgača. Lepo se okupila žuta familja z očima všrek i uživaju na toplom zagrebačkom sunčeku. Fučka im se nijhof Vuhanland... kaj im tu fali...ha

I mali Vuhan uživa... ziher se čudi zakaj te kokoši tak slobodno hodiju... prhaju naokol... valjda si ih zamišlja priređene kak onu pekinšku patku. Bi mu ja pojasnil da su to naši dragi Zagrebački taubeki... morti bi i mamici kojekaj pojasnil... bi se meni fučkalo za onaj virus... no... valjda je oni tam nejgof tatek. Znaš... ipak imam rajši one Japanezice... nekak su bolše nabite... a ove KInezice su dost žgoljave... imaju ženske tanke noge kak čaplje... nemaju riti... ciceki im visiju... čudno zveraju očima... hmmm... no nebi bilo zviška probat... Ak ovi Korona virus potraje... zečel bum vučit kineskoga jezika... vrabec ga dal... neznam ni kak se veli... fukati.

Pa morem si ja gruntat ovak i onak...al na koncu bum ipak gledel naše lepe Zagrepčanke... Z njima si brez brige... nemaju viruse... vse je na pravom mestu... ciceki... ritice... nogice... najlepša ličeka na svetu... a o pipicama nebum danas pripovedal. No dost sam španciral... denes imam zestenek z pajdašima v brtiji pri Mađarici... pa bumo kak pravi vitezovi okruglog šanka razglabali o opasnostima kaj su se nadvile znad našega Grada. I tak bu Špengler povikal... Jebeš virus daj rundu... Onda bu pajdaš Cajger zadrečal... Jebeš Kineze daj rundu... pa bu došel red na mene...ja bum zmumljal... Jebeš susedu Miru daj rundu............................ i vsi buju gledeli v mene i čekali da čujeju pripovetku...ha.

Serbus !

i stari pajdaši se koji put najdu ........

četvrtak, 20.02.2020.

Evo… poslednji oblaki se pomalo seliju spram juga… veliju da bu denes sunčani dan. Tak i treba makar ni za verovat prognostičarima. Kolko put sam se zmočil kaj sem im veroval… paaa… tak ni denes nemam ambrelu pri sebi… al za vsaki slučaj se vrtim pokraj kafiča i brtija… pa ak nekaj začne curet…ha… za šankom ziher nebu. Još je nekak rano… baš i ni ljudi na vulici… znaš… tu v našemu Zagrebu su največ pa penzijoneri… a oni rad spiju do desete vure… a onda zletiju kak mravi na vulicu i smetaju. Tak i ja… evo stojim tu v šturcu Cvjetnoga Trga… okol mene more i cela regimenta prejti…al ide baba i trkne me da sam skor odletel… pa veli… Joj gospon… pa nisam vas videla. Nooo… tak… ja hrga od stoosamdeset centrimetrof i sto kil brez ajncuga i cipela… pa me ni vidla… A kaj buš… žensko je … i nigdar nemreš bit ziher kaj se ženskama po tikvi vrti. I ništ joj nis stigel odgovorit… odgibala je hitro… ta morti nit avtobus na cesti nebu vidla…

I tak se tu vrtim… čekam pajdaša Šlifera z mladosti… malo si bumo pospikali… naravski… o politiki… Uguracija bu ziher prva na spisku…pa onda Masoni… potlem valjda nekaj o Zagrebu i našemu gradonačelniku… tom dotepencu z bregof… a onda buju na red došle ženske… vse po redu… prvo one z mladih dana… onda one z sretnih dana… i na koncu ove današnje o kojima se baš i više nema kaj za reč. Znaš… nekak mi taj Cvjetni Trg zdaj po zimi i nije bogznakaj… vse je nakak sivo… i nebo i kamene ploče na podu… zabadaf su tam z druge strane kioski z cvetjem… I fest mi fali miris friškoga kruheka z pekarne Rukavina…tam z početka Preradovičeve.

Aha… deveta vura je prešla… moj pajdaš kasni… se tomu reče… žena mu je legla na piđamu… al si ja gruntam da on više nit ne spi z ženicom… prešel je v drugu sobu jer …kak veli… stara hrče kak dinosaurus… Hmmm… nigdar nis čul kak hrče dinisaurus… al mora bit da je grdo… Gda sam nema tomu dugo bil pri njemu v hiži… i pital nejgovu Tonkicu kakav je nejzin mužek… je rekla… Dobar je… al prdi kak slon. I evo ti ga na… dinosaurus i slon… na kaj ti dojde sretno bračno živlenje…ha

Moj pajdaš z djetinstva i šul kolega baš stanuje na broju 15 na Trgaču… v velki dvorišni hiži na zajdnem katu… Veli da mu je več težko po štengama hoditi… lifta nema a do četvrtog kata… kak veli… dušu zpusti… A dok ide dole… veli da ga kolena mučiju. Pa kak buš onda još za koju godinu… pitam ga ja… Aaaa… veli on… gda dojde to doba… onda bum čez oblok odprhal dol… posle me buju z lopatom pokupili i odpelali na breg Pilku. Nooo… si ja gruntam… nebuš ti stigel do obloka… neg buš baš dole v Kavaliru završil spodi šanka… Se razme… čim je pajdaš stigel… vrnuli smo se v nejgovo dvorište i poduprli šank V kavaliru.
……………….. Moj pajdaš z davnog doba ima špicname… Šlifer…ha… to je još od vremena dok smo bili klinci. To dvorišče na Trgaču broj 15 je fest velko… negda su tam bili samo stanovi a ne razni štacuni kak denes. Na prvem katu je bila velka ambulanta a spodi nekakšna skladišča i šupe… a vse poprek dvorišča ui bili raztegnuti štriki gdi su vredne purgerice veš svoj vješale. V šturcu teg dvorišča su bila dva velka pohabana stola i razklimane klupe gdi su takaj vredni mužki stanari.. purgeri … igrali šnapsa i navek na stolu imeli litru vina. Avtomobili nisu v to doba tu ulazili…a samo dvorišče ni bilo asfaltirano kak denes… je bila gola zemlja a tu i tam je po koji drač rasel.
…………………. I tak su jemput visele te razne posteljine… gače… rubače… i vse ono kaj ženske vešaju za osušit… I moj pajdaš kakti napredni klinac polufakin se je na beciklinu propelal čez dvorišče i za sebom zahakljal te krpe… štrik je pukel a veš je završil na zemlji. Se razme baba čiji je bil veš je zdigla halabuku do neba… mog pajdaša po leđima opalila z partvišem… pa je došla nejgova mamica… pa su došli tateki… svađa je trajala do konca dana… a moj je pajdaš to vse gledel z obloka na četvrtom katu.
………………………. Narafski… dobil je predcjednika kučnog savjeta opomenu i zabranu da se po dvorišču pela na beciklinu… i on je to zel fest za zlo i odlučil se osvetit. Gda je ta ista baba na štrik obesila plahte i šlifere… moj pajdaš je … bi ga vrag znal kak i odkud spuknul nečije mehko govno i namazal plahte i v šlifere nabacal kaj je bilo zviška. Ti vrapca… imela je posla i ondašnja milicija. Makar ga nigdo ni videl da to dela… ni bilo težko pogodit čije je to maslo. Mamica je morala plahte i šlifere toj babi znova oprati… a tatek mu je nategnul vuha … tak da su mu još denes klempava. I nakon teg događaja…vsi su ga začeli zvati …Mali Šlifer. Ostal je Šlifer do denes.

Veter je zapuhal odzgor z Medvednice… poteral oblake… sunčeko je zasjalo… doduše ne preveč toplo…al sasvim dovoljno da lepe naše zagrebačke pucice uživaju… Na pogleč ovu… maaa… krasotica… angelek… ima tak lepo ličeko… lasi su joj kak od svile… a ritica… guzičica kak špulica za Singericu… I kaj… vrabec ga dal… pogleč kak nezna noge posložit… Eeeeh… velim ja … hodati se ženske moraju vučiti od mladih dana… daj kaži kak bu ta zgledela v kratki kiklji i v štiklama… Zabadaf lepota ak su noge v šrek. Al kak zgledi… denes to nikomu ne smeta… kak god okreneš… žensko je žensko… a ja ih vse imam rad.

Serbus !

Vse su ženske Valentine

četvrtak, 13.02.2020.

Tak se moj pajdaš Cajger i ja spremišlamo dal se pelat v starem Čehu il počekat oni novi trajvan kaj još ni došel. Narafski, pemo v teg tu Čeha kaj zgledi kak stara konzerva z drugeg sveckog rata. Mam Cajger zauzme stolec … pa se i ja smestim mam za njim. Polahko se trajvan popunil… sam kaj ni krenul gda nutra kak furija vleti ženska… vse puše i zdihavle kak je bežala. Trajvan je dva tri put pocuknul pa krenul… vse nekaj spodi struže i lupa a vagon se zible kak pijanec. Mesta za sesti ni… taman se vse bezeciralo dok je ta ženska vletela i zdaj ona stoji mam pokraj Cajgera. Ženska je onak… bi se reklo dobrodržeča sredovječna… morti malo preveč popunjena… al kak se veli.-.. bolše se ljuljat neg žuljat.
……………………… Cajger zapazi žensku kak se pored nejga premešta z noge na nogu… valjda je ženskoj težko stajat… Pa stari kojn promumla… Kaj je gospica… bi se rad sjeli…ha… Ženska ništ ne veli al malo zdigne obrve pa slegne z ramenima… Narafski da bi si ona rad sjela pa kaj ju opče taj kojn to pita. No ona gledi… muči… a Cajger spet promumla… Znam da bi… znam… i još se bolše namesti v stolcu… pa nadoda… Evo… bu se of gospon iza mene zdigel. Se razme… tu je mislil na mene kaj sam se takaj lepo smestil. I zdaj ženska pogledi v mene… ja v nju… lepo se ja zdignem… Izvolte gospica… sednite si … pa joj odmah pokažem onak z prstom… zašrafim po svoji tikvi i pokažem na Cajgera… Mam je ženska razmela kaj joj ja pokazivlem. Ahmmm…ahmmmm… potvrdi ženska i zafali se meni na stolcu. Trajvan juri… gdo bi rekel da more taj stari Čeh tak hitro pelati. Posle smo ustanovili da je ženska tramvajka kaj upravlja i to mlada zgodna. A moj pajdaš Cajger mumlja i dela grimase… Buš ti videl gdo je trknut… buš…

I tak smo začas stigli do Trgača… človeku se nekak nit neče ziti z trajvana dol… vani je baš fest oblačno… par oblakof opasno hita gor z Medvedgrada nad Trgač… pa se zmračilo kak vriti. Stojimo i gledimo za starim Čehom i lepom tramvajkom… pajdaš Cajger zdihavle… Eeeeh… da je to moja ženska…ja bi se celi dan pelal zabadaf v trajvanu. Aha… velim ja… takšnu žensku ti nemreš dobit nit na lutriji… Nato me Cajger spopadne… bolše da sem čkomil… Zdaj buš ti videl svoje… tam si onoj babi rekel da sam ja trknut v tikvu… eee… pa zdaj ti mene tak trknutog lepo odpelaj v Kavalir na dve tri runde… se razme… buš vse sam platil jer ja sam … trknut i ne poznam nofce. Prafzapraf… čim je moj pajdaš Cajger uz mene… ja znam da bu taj dan jena norija zamenila drugu.
Sednemo si v Kavalir… mali kafebar v dvorišču na broju 15… tu navek započnemo … pa onda nastavimo polahko tam spram zapadne strane… malo v kafič Britanac… pa onda na drugu stran v pajzlin Kraljevec… i dalše kak Bog da. No… Cajger v Kavaliru mam naruči sebi velki žufki pelinkovec… meni Nesicu od vanilije i šibensku travaricu… al posebno naglasi kelnerici… Znate… to vse plača of gospon… i pokaže na mene. Al jasno je kelnerici… več nas pozna… na vsaku moju rundu Cajger bu platil ak treba i tri svoje…al denes se odlučil malo producirat. Al ni nas nikaj briga… penezi su v žepu… a več ide i treta runda z mojega žepa.

Aaaaa… kriči Cajger… nakon kaj smo zišli z kafiča… Crvena dobi… crvena dobi… najme je spazil žensku v črlenom kaputu… z črlenim šeširom… skorom vse je na njoj črleno. Daj bedak jen… vlečem ga ja za rukav… pa viš da je to stara gospica. Kaaaj… neda se Cajger… makar je fulal žensku on dalše drži tirade… Znaš… stara koka masna juha… ta je najbolša… nigdar joj ni dost… nemre ostati trudna… daje vse od sebe jer si grunta da joj je morti zajdni put… Vrabec ga dal… posle tri velka pelinkofca… Cajger bi i na dvogrbu devu skočil… samo nek je žensko. Nemaš ti zube za tak nekaj glodat… velim ja njemu… gebis bi ti se potrgal… Bolše da sem čkomil… zdaj sam začel slušat kak jezik tu ima velku ulogu ………………………… Daj pemo dalše… vlečem ga ja.

Bi ga vrag znal kaj je z tim oblakima došlo nad naš Zagreb…al moj pajdaš Cajger je denes skroz ponorel… mam nakon deset korakof pak je naletel na jenu drugu črlenu… Aha…aha… kaj sam ti rekel… nema neg kaj je črlena ženska… daj ju pogleč… I hodi Cajger malo v polukrug da ju bolše vidi. Čuj… vlečem ga ja… bu se dež spustil z neba… pa bu nam onda dost i črlenih i žutih i plavih… daj pemo dalše… a osim tega… ova tu ima i malo preveč tanke noge… Pojma nemaš… začne Cajger z svojom filozofijom… to su najbolše noge… gda ih ta zahaklja odostrag na tvojim leđima buš si gruntal da te je zveč…………….. Znam… znam… prekinem ga ja… kak da me zvečarka prijela… no… za tebe nebi nit anakonda bila dost. Jebal te kojn… odbrusi Cajger i mi nastavimo dol po Ilici spram Malog Placa.

Maaa … taman kaj smo tri koraka naredili začne nekakšni sitni dežek… ti vrapca… a ambrelu nemam nit ja nit moj pajdaš… Pa tri koraka nazaj i lepo se smestimo na sam početak Pasaža spodi nebodera. Tu baš i ni fest prometno… a mi bi rad gledeli ženske kak prolaziju… Ipak nam se dragi Bogeg smiloval i poslal jenu… pravu. Daj samo pogleč kaj ti je elegancija…. snubim ja Cajgera dok on fest zainteresirano udiše mirisne pare z picerije tu mam pokraj nas. Gdi…kaj… aaaa… mam se osvesti moj pajdaš… konačno nekaj za oči izlječit. No… onaj sitni dež i ovu lepoticu potjera knam pod Pasaž… se razme… nema nit ona ambrelu jer prognoza za denes ni predviđala kišu. Cajger se za pol koraka odmakne tak da bu bliže ovoj miloj ženskici i začne… Znate gospodična… da ga ja imam zdaj bi vam ga poklonil… se razme… kišobran. Od Cajgera je svakaj za očekivat… al da se bu fteknul v ovakšnu avanturu… vrabec ga dal nis očekival. I gda sam več gruntal kak bu ta mlada milostivica prošla pokraj nas kakti pokraj turskog groblja… ona malo zabremza… skor da bu stala … okrene se Cajgeru i veli mu… Hvala… hvala mladi gospon… na što god da ste mislili… ali dali uvijek nudite ono što nemate… pita ona i prejde dalše uz velki osmjeh. Moj pajdaš je ostal zjevat… i dok se je snašel več je ženskica prešla dol dalše od Petita. Si videl… veli on meni… to je prava spametna ženska kaj ti zna odgovorit … a ne da čkomi kak kakšna glupača.
I tak… kak drugač neg smo završili na Malom Placu v kafiču Kraljefcu… ja pri Žuji a Cajger je ostal vjeran žufkom pelinkofcu. Dok smo stigli do Kustošije malo je falilo da več v trajvanu ne zapopevamo.

Evo… več je i Valentinovo… a ja tvrdim da su vse ženske Valentine.
Kušlec vam vsim pošilam ! !