Hotel Granata

A ča san triba napisat?




Čin san se čapa za pisat, zna san ča san van tija reč. A kad san poče pisat, kontan i kontan i ne mogu se sitit, a znan da je jušto grubo. Jebi ga, starost čini svoje, oli ka ča se reče "mozak iša na ocat", ili ča bi mala od unuke ka i svi blizanci rekla " lešu jedan". Moš ti mislit ča bi tija, ali ča je - tu je i od tega ne triba bižat .
Eto na, sad san se sitija ča san ono mislija reč. Moran brzo pisat da ča ne zaboravin.
Danas ti se zaputin vanka iz kuće i mislin kako san ovi put proša lišo jerbo me nima ko zajebavat po škalaman, kad me šjora Ana sa trićega kata ferma pred lifton i počne nanovo štorije da ne triba plaćat pranje škala za četiri puta na misec dvadeset i pet kuni i da je dosti i dvaput, jerbo ih i ne triba prat kad jemamo lif oli ti dizalo.
- A i manje bi nas koštalo -, reče i tu san ugrabija priliku i zbrisa vanka kroz portun.
Vanka san mislija čapat malo arije ne bi li doša na se, kad neš vraga. Mislin kako ću izbeć onega ča me sako malo zajebaje da san škrtina ča mu saki dan nedan par kuni za pivu i španjulet, kad neka mrcina od pasa, ča ja znan koja je raca, ja ti se u to nerazumin, a meni se pari da je veća i od tovara, zaleti se, skoči i upre se u me pridnjin nogaman i poče me lizat ka da san oni sladolel u kornetu. Gazda od mrca mirno izliza iz portuna i čini fintu ka da se nije ništa dogodilo.
- Teraj mrca od mene – povičen, a on će kako je blago mirno ka bubica i ne bi me on tako liza jel da blago zna ča je dobar čovik. A ča je meni srce u peti, ma ke u peti, izišlo i trči ka ludo naokolo, to se ne računa ?
Ajde prođe i to, fala bogu da san osta živ, zaputin se korakon na korak ka kurijeri kojon ću poć na placu u varoš po spizu.
I tako dok ju čekan sitin se sna ča san ga usnija niku noć. Za popizdit je, tako san se pripa. Ni najgoren neprijatelji ne bi ga poželija.
Sanjan ti ja kako su naši vođi išli tamo nešto potpišivat za niku suradnju u regionu, pa su se vezali ka špagon naši i njiovi policijoti, pa ekonomišti, komuništi, lopovi, političari, mužikanti i ča ja sve neznan. Jerbo to od nas traži onaj organizacijun ča se zove „ Međunarodna zajebancija“ i da je došlo vrime da se potli nji, triba vezat i oni ča su branili svoju domovinu.
I tako se dogodilo da mi je zapala ona kolajna ča se zove „Junak Otdžbinskog rata „ jerbo san dva puta bija na straži kada su na varoš pucali sa parobrodiman oni drugi ča su mislili da mi branimo svoju a oni svoju domovinu. E nisan van ja samo bija na straži već san i puca, ali nesmin to ni izustit aš će me oni kako se zove, aha David Štrbac oma ka paket pa za Haag, jer san sigurno usput činija onako ka za dušu, more bit i koji zločin.
A moran van reč, opalija san dvaput da razbijen straj. As ti miša a di nečeš opalit. A ča san triba činit po škurini kad se ne vidu ni prsti pred očiman a niki se vrag čuje da ide. Dobro je finilo, ma skoro san ubija kaapa o straže. Aj fala Bogu sve je dobro bilo i tako da ne dužin, tribalo je poć u Zagreb, ka tamo će mi tu kolajnu obist na vrat.
Jedva san ti doša do pritsidničke palace di će se kolajne dilit, ča je je. Krepan i umoran ka pas, tražin jema li ča za popit. Oni ča prima one ča su pozvani reče kako nimaju aš je kriza u nas, već da gren u kondot napit se vode.
Ja san mu reka da ja pijen za stolon ka čovik a ne u kondotu, a on neka čini kako će. I još ga pitan ako nimate vi ča za popit, možda imadu ovi drugi ča su isto ka i ja branili svoju domovinu?
Da ča pitan jebate, kako smo mi još i dobri a oni ni za vodu nemadu. E baš lipo, mislin si, u finu si kumpaniju uša. Tako ti i triba. A lipo mi je ona moja polovica od života kazivala, prije nego san iša ča :
„ Zami ti ča za ispit i prigrist, daleko ti Zagreb“ . Neš vraga, di ću ja žensku glavu slušat. Munjenu. A sad znan da je jemala pravo i za jedno i za drugo. Jerbo ako ovi naši i njiovi nimaju ni vode, za pojist piši propalo!
I tako san uša u pridsidničku palacu s onin ča su čekali ka i ja za kolajne. Gospe ti Sinjske, tu se svita naprdilo i da ja prdnen niki ne bi gleda u me. Nikako ti se gurnen u predzanji rid, jerbo ki je taj ča voli bit zadnji?
I tako ti ja i dalje sanjan kako su počeli dilit kolajne i kad dođe na me rid, prozvalo me te stupin onako isprsan, kako je moja bolja polovica rekla neka se držin. Ka junak a ne ka prdekalo.
Pred menon je neki čovik, ma triba san ga odma pripoznat, ali budi ti odma napametan i što bi Švabo reko " Zicher ist zicher" jednin san ga okon dobro uškica, a drugin san traži onoga ča je isti ka ovaj ali ima onu crnu maču od kusa kose na desnoj strani.
Vidin naš je pritsidnik, ča je je, oma san ga pripozna po sedon pametnon glavinon. Dok san ga zagledava pruži ruku i ka čestitan van ovo, te ono i tako da van daje ne nabrajan.
Kada je kazivanje moji zaslugan finilo reče, neka svi čuju da će mi kolajnu uručit posebni faca iz našega lipoga regijona.
Svi su stali pljeskat a ja san vidija u onon zadnjen momentu od sna kako mi kolajnu ka tovaru, veže oni general, čekaj da se sitin. I sitin se, to je oni ča ga već dugo tražidu ali ga ka ne mogu nać, vrag mu sriću odnija, oni Ratko Mladić !
I tu ti se trgnen iz sna, mokar ka da san pa u more. Ona moja životna polovica njoji ko u raju i smije se u snu. Jebe se njoj ča je meni. Ritnem je laktom, ka fol u snu. E neš ti spavat i sanjat lipe snove kad je meni ovako grubo.
Eto tako je to finilo. Nisan van moga, a da ne rečen. Oma mi je lakše. Jebate !

I sad kad van ovod pripovidan ufati me niki straj. Ali dobro je. Došla je kurijera i oma mi je lakše. Znači da je to bija samo san.
Oli se možda varan ?