Moj otac
je trejstipet let
bil va Merike
sedan put je
doma dohajal
kuću i šternu nan parićal
i saki put
po jedno dete
za sobun pušćal.
Nisan ga poznala
ni imela rad
kad je doma
zadnji put došal
umret
mat mi je rekla
da će me s postelji znet
i da ću sad
na kaselice spat.
- On će ti tako veli
va postelje leh pačit -
matere san rekla
- stavi njega na kaselicu
sejedno neće doma
puno ustat -
brižna san ju pitala
- kad se stane
kako ću ga zvat - .
Nikad ga nisan nikako
dospela zvat
ni ćaće ni tata
nikad se ni stal
na kaselice san
tri meseci spala
pa je umrl
moj otac
koga nisam ni poznala.
Branka Vidas
Džepni sat mog pranonića.
