...a med bu tekel vulicama.........

nedjelja, 08.11.2015.

Kaam peeeš.. kriči moja najdraža za menom čez oblok gda sam vjutro zbrisal z hiže.. Paa.. pem malo špancirat.. mumlam ja.. Maaa. znam ja.. nedelja je.. štelo bi se mojoj kaj bi joj malo noge dugše grijal v krevetlinu... al se meni neče ležati gda se zbudim.. A zbudim se rano kak tramvajac.. pa kaj bum se onda po hiži vlekel.. lepše mi je prejti van............

Al se moja nikak nemre zgasit.. ljudi još zasluženo nedeljom dugše spiju.. a ona dalše kriči.. Pa znaš da moramo iti glasovat.. denes su izbori... Znam znam.. otpovedam ja i vse gledim dal bu mi negdo hitil kakšni ašenpeher v tikvu.. Pšššš... pokazivlem ja njoj z prstom na gupcu... No kaj.. v hiži do moje se na oblok pojavi moj sused Cajger.. vurmaher.. Aha..aha.. zdaj i on splazi jezika.. si pobegel z kreveta...ha ... Maaa. daj čkomi ..odbrusim mu ja.. kak da ti nisi domof nikaj dužan ostal ... ha ...I hitro sam dalše zgibal dok se ni još gdo zbudil .....

Lepo se špancirat.. mirno je.. v nedelu navek malo kasnejše začne gužvancija po Gradu.. Negdar davno je nedeljom celi dan bilo mira.. vjutro su ljudi dugo spali skorom do podneva.. pa su onda babe prešle na misu v cirkvu.. mužki pa pokraj cirkve v brtiju.. a djeca su bežala i kričala okol cirkve.. Onda su babe prešle kuhati nedeljnog obeda.. narafski.. navek nekaj finoga.. kakšni pohani picek..al dobra pečenka.. mlince al restanog krumpira.. šalatlina.. a brez domačeg kolača ni bilo nedelju za zmislit.. Narafski.. mužki su kak i navek malo dugše držali šank v brtiji.. politika se tu navek ganjala.... klinci su dobro prešli jer su takaj v brtiji došli na svoje.. himper saft se točil v velke čaše.. a i stari trdi pereci su bili prava stvar.. Pa onda okol jene vure je bil obed.. Posle obeda se obavezno moralo odmarat.. al v fotelji cajtunge listat.. al slušat radio.. a televizija je v to vreme bila jen obični drek ...
Moj bi tatek sel v svoju fotelju.. ta je ionak navek bila bezecirana za nejga.. zel cajtunge.. vsako malo nekaj preklel.. a v gupcu je vrtel cigaretlina kojeg ni smel zažgati.. I vsako malo je gledel svoju mamicu kaj bi mu se morti smilovala i dopustila za dimi v hiži.. Pri nam v hiži je moja baka.. plemenitašica.. navek strogu disciplinu držala.. Pa je tak moj tatek moral prejti na štenge ..al dole v haustor rajfat ak je baš moral .. Mamica se je posle obeda zavlekla v šlafcimer .. narafski spred špiglina i mazala po licu vse moguče z čim se je moglo nalarfati.. jeee.. ona se spremala na rendes z svojim kolegicama.. Pa je moja baka onak prek zubi znala komentirat.. Ahaha.. a te nejzine kolegice jajca med nogami nosiju.. Pa smo več vsi znali da ona pe svojeg poctanara kontrolirat.. v garsonjeru koju je iznajmlivala študentu.. tam na Gornjem Gradu... Al se o tomu šutelo.. tateku se fučkalo.. važno da je on mira imel ...ha ..
A ja bi se zavlekel v svoju sobu.. del kakšnu longplejku na gramofon i žifčano čekal gda bu gdo od mojih fakinof zafučkal spodi prozora.. Koji put bi kmeni došla moja pucka.. narafski.. navek je krevetlin nadrapal.. i onda bi ja na vrata navlekel šrajptiš tak da moja baka nemre zajti nutra i pitat dal hočemo kolača.. Ak baš ništ ni bilo splanirano.. se znalo.. popoldan pem v kino.. a posle se bu več i banda skupila na klupi spodi trete platane od paviljona na Zrinjefcu ...Ha .. A nafčer.. se razme.. v Tucman al na kakšnu drugu čagu v Gradu.. malo tancat.. više loviti curičke.. i po mogučnosti završi na kmični klupi gor na Griču ....
Kaj ti ja znam.. denes se nedelja slabo razlikuje od ostalih dni.. štacuni su otprti.. ljudi delaju.. Grad je pun ljudi.. vulice pune avtomobilof.. trajvani pelaju kak stekli.. .. vse skup.. nikaj posebnog ....

Od jutra je gore visoko nekakšna maglica.. to znači da bu lepo i sunčano vreme .. Ipak pomalo popuhuje oni sjevernjak z Medvednice pa zgledi gorše neg zapraf je.. kafiči se puniju.. ljudi se malo stiskaju..al ljepa je ova jesen.. Rad si sednem v kafič.. malo zdigneš kraglina.. guštam si Nesicu od vanilije.. a ak je kakšni pajdaš pri ruki.. ni na odmet i nekaj ljutoga zlijat čez požirak.. to ti fino zagrije želudac i čreva....kaj ne .....

I prijepoldan ti prejde tak hitro .. vrabec ga dal.. pa nis nit čul gda je top z Griča puknul.. Sedel sam dve i pol vure po kafičima.. hmmm.. zdaj več moja najdraža doma vrti z očima i slaže si prodiku kaj bum je ja moral odslušat.. ha .. Znaš ono.. Pa kolko put ja moram juhicu podgrijavat dok se ti.. gospon grof.. udostojiš dojti.. No.. no.. tu sam.. ni svet propal zbog juhice.. pravdam se ja ......
I tak.. popoldan ja i moja najdraža lepo z rukom spod ruke pemo na izbore.. glasati se mora .. građanska dužnost.. A za tu priliku se mora v mojem firtlu prejti jen celi kilometar i to v breg.. na brdo.. v planinu.. razmeš.. I moreš si zgruntat kak je zdaj meni vleči mojih sto kila i još nedeljni obed povrh toga gor na breg.. Maaa.. štel sam ja sesti v avto i lepo se par minut prepelat..al veli moja da se ona hoče špancirat.. Ti vrapca .. pa ja sam celo prijepoldan španciral.. zdaj bi bilo pošteno malo počinut..
...................................I evo nas v špilšuhu Petar Pan na vrhu brega.. tu se zaokruživaju naši politikancki ljubimci.. Narafski.. ja sam podučil svoju najdražu i vse ukučane koga se mora zaokružit.. da nebi bilo velke zabune pa se namesto črnog zaokruži..vrag ga zel..kakšni črleni ... Morem ti kazat da je bilo fajn ljudi v redu.. A soba v kojoj se ta špelancija odigrava je fajn vuska i vsega tri četiri.. človeka najemput moreju zaokruživat.. A of put su mi v ruke porinuli celu papirnatu plahtu.. velku kak Večernjak.. I dok sam ja podučaval svoju najdražu gde treba zaokružit ..zvana se čuje nekakšna galama.. Prvo se čulo brektanje i tandrkanje prastarog Fordovog kombija .. kak da je ruski tenk spred vratih stal.. pa nakon toga se čuje kak človek nekaj fest galami i ono.. pas mater.. bog rit.. vsi sveci.. Mam sam prepoznal i avto i človeka dog ga još nit videl nisam.. Došel je na glasanje moj sused debeli Špengler zkup z još debšom svojom Maricom..i dovlekel i dve kčerke ništ manjše debele.. Bog mater..veli on njima na saf glas.. lepo sam vam rekel kaj morate delat.. ste zapamtile kaj morate zaokružit.. One složno klimaju z tikvama.. mora se tateka slušat.. I zajde Špengler nutra.. pozdravi vse na saf glas.. Hvaljen Isus.. Glediju ga ljudi.. gdo ga ne pozna taj se čudi.. A kaj galamiš.. pitam ga ja.. A on veli.. Jebal mu vrag mater.. jedva sam se dopelal na breg z kombijem.. Pa kak to.. pitam ja.. A on spet.. Po celoj vulici je več začelo curit med i mleko..a još izbori nisu ni završili... kak bu tek zutra gda buju mesto deža Euri cureli z neba.. Narafski.. začeli su se ljudi smijat.. Špengler je uredno mesto svoje familje zaokružil te liste.. zgužval ih kak kuhinjsku krpu i ztrpal v onu škatulu.. Lepo se obrnul spram oneh kaj im veliju ..izborna komisija.. stal mirno.. zdignul ruku i zakričal.. Za domof spremni... Narfski.. vsi su šuteli jedin sam ja glasno nadodal.. Pemo skup domof.. Hajl litra ... Narafski.. završili smo na gemištu pri susedu Cajgeru ...

Serbus ..............................