Špancirancije …………….
četvrtak, 18.09.2014.
Nikak ja to nemrem zgruntati.. kak negdo more hrpu stekla deti med stare cigle i črepe .. Al gda si malo bolše spregruntam.. tak delaju po celoj Evropi po vsim Metropolama.. Sam preklani bil v Berlinu.. ti vrapca.. gda bi se zdaj Hitler zbudil i to videl.. mam bi ga šlak trefil.. Pa sam prolaufal čez Beč.. i tam kakti da su jednaki bedaki od teh se reče.. arhitektof.. I tam su zasrali celi Beč z steklom i plehom.. pa i v Pragu sam bil pred par leta.. takaj jednak se dela … Pa kaj bi se onda imel kaj čudit tu pri nami.. Mi ionak vse kaj ne valja poberemo od drugih….
Zapraf sam štel nekaj povedat o ovi tu palači na vuglu Palmotičeve i Stare Vlaške.. Viš.. tu dole je štacun za prodaju biciklina od gda ja pamtim.. a pamtim fest dugo.. Piše.. Metalia Comerc.. to je negda bilo Slovensko poduzeče pa je propalo več davno.. I je štacun bil dugo let zaprt.. A to ime je navek bilo gore znad izlogof.. Negdo je puno let kasnejše tu otprl pak štacun z biciklinima.. al je taj natpis tu ostal makar je zdaj vlasnik negdo drugi.. Viš.. taj gdo je tak odlučil je fest spameten človek.. Nigdar ne treba menjati ime nečega kaj je bilo lepo i dobro.. A slovenski biciklini.. oni Rog.. su navek bili kvalitetni.. Narafski.. zdaj te vse bicikline delaju Kinezi.. al je ljudima ostala navika da bicikline ideju kupovat baš v taj Metalia Comerc.. No.. ni to nis štel zdaj pripovedat..
Znaš.. imam domof jenu staru slikicu Zagreba na zidu.. zapraf ih ima više..al ta jena baš prikazivle taj del Vlaške i tu palaču.. Negda je ta hiža bila ..se reklo.. građanska.. denes velimo.. stambena zgrada.. i je z početka imela samo dva kata.. A građena je negde zmedi dva svecka rata.. I tu dole v prizemlju je bila . nebuš mi veroval… Kavana.. je.. je .. prava kavana.. i zvala se Bristol.. kak i oni negdarnji hotel v Gajevi vulici.. Pa bil je isti vlasnik.. I v toj tu kavani je v prizemlju bila .. bi rekli obična brtija .. a oni hoh del je bil na prvem katu.. I kaj je tu važno.. v ti se je kavani svaku večer održaval ..koncert.. Vlasnik te kavane.. bi ga vrag znal kak se je zval.. se samo zna da je bil bogati trgovac.. je za svoje goste tu pozival razne muzikaše i orkestre pa je čak i znal ples tu priredit.. Viš.. pripoveda se o starim Zagrebačkim kavanama.. ova.. pa ona.. al za ovu je malo gdo igda pripovedal. A to je stoga kaj je ta tu bila gda se je tek nova Palmotičeva začela gradit.. bi se reklo da je bila malo po strani..
A baš spred te kavane Bristol je bilo i stajalište prvih avtobusa kaj su po Zagrebu i okol Zagreba pelali ljude.. Tak ti je tu stajal avtobus za Gračane.. Šestine .. Markuševec.. Remete.. vse su to bila sela pokraj Zagreba spodi Medvednice.. A avtobusi kaj su pelali v sela okol Save i prek Save.. su stajali dole na Draškovičevi vulici kaj se v ono vreme takaj znova gradila.. Sam štel kazat da je ova stara kavana Bristol imela velki promet i puno gosti i v prizemlju i na prvem katu.. I nezna se točno kolko je ta kavana delala.. no posle je na tem mestu bila radionica za popravak avtomobila i motora.. I onda su hižu nadozidali kak i mnoge druge hiže po Zagrebu…
A ovo kaj vidiš na slikici je mam prek puta te Kavane Bristol. Tu spodi Biskupskog dvora je bilo prvo javno skladišče v našem Zagrebu.. Tu su v dvorišču bile nekakšne barake i tu su putniki kaj bi prihajali z onem autobusima mogli ostavit svoju prtljagu..al pak oni kaj bi nekam odlazili mogli su tu pospremit svoje stvari dok su v brtiji čekali avtobusa.. Negda se ta prtljaga pelala na krovu avtobusa.. Tu su takaj stajali i prvi kamijoni kaj su se pojavili v Zagrebu.. Oni su tu stajali na uslugu Zagrepčancima..narafski za peneze kak i denes.. I znaš kaj.. tu na tem mestu.. v tem dvorišču je još navek nekakšno skladišče.. Gdo bi rekel posle tolko let..ha …..
Daj pogleč ovu sasvim uzku hižu.. ova kaj ima žute štrafte.. pa to malo koji Zagrepčanec zna da je to najuža hiža v našemu Gradu… samo nekaj malo prek dva metra.. Nigdo o tomu ne pripoveda.. Još davnih leta je to bil obični prolaz zmedi te dve pokrajne hiže.. Pa se negdo domislil i lepo taj prolaz zazidal odostrag nadogradil prostora i naredil pravu hižu.. pa ta uska hiža nema nit svojeg broja.. Dugo let je tu negdo stanoval..a tekar v novije vreme je tu otprt štacun.. Se ja sječam.. zdaj več davnih dni.. da se vodila velka rasprava o toj hiži.. Su nekakšni spametni poglavari šteli da se to poruši.. sim..pa tam.. je na koncu ostalo tak kak je … A vse ove tri stare hiže su prazne.. nit gdo stanuje nutar nit dole štacuni delaju.. Čuje se da je negdo z debelim penezima pokupoval skorom vse stare hiže v ovem djelu Stare Vlaške. A kaj je najgorše od vsega.. nit jena ta hiža ni zaštičena kakti Gradcka starina.. Ak se nekomu dopadne more to slobodno porušit i naredit kakšnu staklenu krletku … Žalostno..al je tak …Samo još da velim da v Zagrebu ima još samo jena slična vuska hiža.. tam v Maksimiru ….
Pogleč.. tu gde su te dve velke ambrele.. to je Pečenjarnica..znaš ono.. čevapi u somunu… Tu ti je pred kakšnih četrdeset let bila mala brtija pa je to preuzel nekakšni Šiptar.. I na velko čuđenje Zagrepčancof jenog je dana tu otprl pečenjarnicu… se zvala.. Banjalučki čevapi u somunu.. pa su Zagrepčanci odnavek znali za čevape..al su se zdaj pitali kak to zgledi ..čevapi u somunu.. Tega do onda v našemu Gradu ni bilo.. Of tu je bil prvi kaj je tak nekaj začel delati.. I bum ti za praf rekel.. malo po malo su Zagrepčanci navalili na te čevape u somunu.. se tu v dugačkom redu čekalo na porciju.. A kak je nutra v ti luknju bilo mesta samo za pet..šest ljudi.. je Šiptar začel delati to po naruđbi.. Mogel si sim dojti i naručiti .. bumo rekli.. vjutro ..a popoldan si došel po to.. Pa je taj gazda i telefona nabavil i tu ti je začela prva dostava teh čevapa u somunu po Zagrebu.. Prije tega ni bilo.. I nekakšni mamlazi su na biciklima to pelali naokol .. Kak je posel fest dobro išel.. nabavili su i one Tomosove mopede i pelali.. Je to bila velka novotarija v našemu Gradu..al ni dugo potrajalo.. Za jeno leto dni več je po svim firtlima bilo teh pečenjarnica .. Posle oneg zajdneg rata su maknuli z naziva ono.. Banjalučki.. pa je do denes ostalo samo čevapi u somunu … I dela tolka leta… prek četrdeset....ha…
A tu na broju petnajst v Stari Vlaški je bil jen fest poznati šnajder.. Se zval Mirko Špoljar.. Z početka šezdesetih leta gda su se v Zagrebu po prvi put vidle one mužke hlače krojene na..se reklo.. trapez.. znaš.. to ti je ono.. gore vuske a dole široke kak Meksikanske .. taj ti je šnajder navelko začel takšne delat.. A to je bila v to vreme največa moda kaj je knami prihajala z Londona.. Ti vrapca .. trebal si videt kakšna je tu gužvancija bila.. Navalili mladi dečki z celog Zagreba .. pa vsi hočeju da im se šiva po mjeri.. Najemput je taj šnajder Mirko bil zatrpan z naruđbama pa je moral još nekolko šnajdera zaposlit.. Pa i to ni bilo zanavek.. su brzo i drugi šnajderi v Zagrebu skužili kaj treba delat .. Al je ovi tu šnajder Mirko i dalše bil najpoznatejši po šivanju modernih hlača.. Narafski.. šival je on i meni po mjeri..a ja sam imel velku prednost jer je moj tatek još davnih leta pri njemu šival svoja odjela..ajncuge.. Pa je došlo vreme da stari Mirko mora v penziju.. Zaprl je štacun jer ni smel više bit obrtnik.. Al je nastavil šivati domof..onak v fušu.. Imel je velku vilu na Šalati v Alagovičevi vulici.. I pri hiži je šival vse dok ni vmrl.. čak su ostale još nesašivene naruđbe.. Sam ja takaj knjemu dolazil v hižu i još znal dopelati kakšnu mušteriju.. A okol svoje hiže je Mirko imel velkog parka.. vočnjak.. cvetnjak.. i tak.. A hižu mu ni čuval oštri pes.. neg oštri .. kokot.. Imel je ogromneg kokota.. takšneg nigdar posle nis videl.. Ha.. pokraj teg nigdo ni mogel samo tak prejti v dvorišče.. mam bi of z parklima poletel človeku v oči.. Pa ga je Mirko moral zapirati gda bi gdo pozvonil na ulazu…
Tak.. španciram se tu po Staroj Vlaški.. človek se tolko tega prisjeti.. imel bi kaj tri dni pripovedat…. No.. bum jemput gda mi pak dojde v tikvu ….
Serbus ………………….
ZAFRKANCIJA * * #
