MUKE PO MAX-TVeju
Dico moja, nimam još brojčanika da bi se vidlo kulko vas otvara i čita moj blok, ali ni ni važno, zač bi ja to morala znat, lipo je da mi se javite i da napišete koment ili ku rič, onda iman/m volju za pisat naše pripovetke iz Ogulina.
Sad ću na sve metat i m i n jerbo nisan/m mogla nikako čut ni n ni m kad san/m proveravala kako se zapravo divani. Rekla san/m Mijeti da mi izvadi 10 000 kun iz banke, a on je rekal niman/m, a ja san/m onda rekla, kako to da nima, on je rekal neznan/m i ja sad isto neznan/m, zač nis čula ni n ni m. Koji put je n a koji put m, i ja tuj niš nemoren/m naredit, zač se to ni zapisalo nigdi. Onda san/m krenila i pitala tetu Rožu, kaj viče zač je gluha:
O teta Roža, dal imate 10 hiljad kun za posudit do prekjutri, a ona mi je rekla nima, tako da opet niš nisan/m saznala o n i m.
A vraga ću čuda delat od jedno ili dva slova, tako ću vam pisat pa ćete svi bit zadovoljni, kaj ne?
I popravdala san/m se z Mijetum i reč ču vam zač, a nikako nis segura kaj ću sad, čul se mirit ili ću mučat samo, il čemo pojt na rastavu'?
Zrela sam onega vraga Max TV, ja vam volin/m te sve novine, jerbo su rekli da ima puno programi i puno filmov, jerbo su mi ova 4 naša dojadila, a strano neznan/m divanit, a ono malo kaj znan/m to ni dost bilo ni za kuze čuvat, kad san/m jednim iz Njemačke čuvala kad su prošli na more i pri meni ga ostavili za to vrime.
Da, da se vrnen/m, i tako smo mi gledali one filme i o životinjam i o svemu, a sad kad je došlo lipše vrime krenila san/m redit oko kuće i po dvoru, a Mije je više puti ostal gledat televizor, zač nesmi više pojt u grad bez mene, jer projde u Marinu i nažere se da ga onda nemoren/m ni slušat ni gledat. I stalno zaboravi onu roditeljsku zaštitu i zija preko okna, Janjo koji su ono broji za zaštitu da si oprem film, a to je meni došlo do vrh glave pa san/m mu dala papir na kem sve piše, kaj svi u selu moradu znat da san/m zela tega vraga u svoju kuću?
Pred par dani projdemo mi spat, i kako je misec jako svitel probudil me, a moga Mijete ni u krevetu. Ja mislin/m da je prošal na šekret ali ga ni pa ga ni, pa kadi mi je čovik bože mi prosti? Izajden/m ja iz kreveta i vidin/m da svitli plavo, to Mije gleda televizor, krenen/m ja doli kad ono kad san/m oprila vrata, bože mi prosti, kaj san/m videla, aaaaaaaaa, nis mogla ni slova reč, zanemila san/m ki drvo, ki kamen…Mije bulji u gologuzije, sidi u onoj piđami kaj san/m mu zela za rojendan, zelo ga skroz naskroz, a nemoren/m vam izdivanit koje su reči iz mene potekle, devetera te padavica Mije ulovila, a on kad se snašal od tega svega samo kaj drogiran projde spat.
Pa kad ne divaniš ti neću ni ja, ki bi se tote trebal jadit na kega, dal Mije name ili ja na Mijetu?
E sad će Max TV, lipo pojt nazad u t-com, pa nek ga prodadu kemu čedu i sa roditeljskum zaštitum i sa pini i sa videotekum i sa svim onim dugim.
Nis nikem niš još divanila, a i kaj ću divanit, moja će Mare reč, Janjo, a kaj moreš, takvi su ti ti muški, mislu da su uvik mladi i uvik volu mlade, teta Roža će bečat po dvoru, a Janjo kad si sve izdurala, vrag š njin,, moreš još i to…, i kemu ću kaj divanit, ma kaj mu ni dost bilo tih svakovih žen, .? Uvik ja sebi nekakovu pokoru zamen/m, da se moran/m jist i sekirat i još k temu i velike troške delat.. Vrag crni neka zna kulko je on puti gledal te filme iz videoteke i kulko će me to koštat, sad me strah i pojt tamo u T.com jerbo će mislit da san/m ja Janjo to gledala.
A kaj sad, platit ću, pa plačan/m ni neznan/m ni kaj, ni kemu i zač pa ću i to, samo da se moren/m kako odlučit kaj ću naredit, a morda se i smirin/m pa će sve opet pojt dalje kaj i do sad? Kako ću dici tulkoj reč da je tako star takova benetina?
Ajte bok!
Janjo, 27. veljače 2008.
DAR IZ BILLE
Dico moja, puno van fala na dobrim zeljam za moj blok i uspjeh, ali ću ja i u buduće čitat i pisat i na Vašin blokin ako buden znala i razumila sve o čen se dela, a nute Vi i na mojen!
Ponosna san da san prva ženska kaj je oprila svoj blok u kem ću pisat o našemu malemu gradu, zame je to jako važno!
Ma jedva san se smirila oko našega radija i tih svakovih komenti, pogotovo kaj špotaju Nešu i gospu Dubravku, (pa kaj ne moru lipo reč nego grubo kaj divlji ljudi, bože mi prosti….) kad danas novo ludilo i stresi, ma ću van sad sve ispričat.
Našla san u kaslu od pošte reklame za Konzum, Billu, Lidel, i sad san si mislila da se svi u dogovoru organiziramo pojt po ti naše centri, zač svi nudu narodu kaj da su na cesti našli, pa kako se to ni moglo dogovorit san ja odredila da Mije gre u Konzum i da prati i dežura da bude broj 100, a Mare i ja ćemo pojt u Billu, zač Mare ne voli pojt sama nikad ni u grad, takova je stišnjena i srameća, pa ajde ćemo nas dvi u tu novu Billu.
Mije je krenil u pol jedanast za Konzum, i spisak je zel, zač on bi natrpal pive i vina i konjaka i onda mu to morda nebi ni priznali, znaju oni ki bi iskorištaval, a mi ćemo samo tako nešto sitno i da vidimo med narodom kaj ima i kakve su cene.
Moja je snaha došla po nas oko 12 ur kad je ludilo jenjalo i kad se to malo razredilo, (jer velu da je bilo tako puno naroda da se po stanici parkiralo), pa ću zet i nučicu sobom, a snaha će pojt južinu za sina i dicu finit i dojt će za uru i pol po nas.
I tako smo mi došle, tamo je sve lipo složeno, zelenjava lipo složena, sve kaj postoji na policam, friško meso, suho meso, rezanci, papri, pekmezi, kiseline praški, ma ne moran van nabrajt, ali ni van meni bilo do puno kupovine van morda zet brašno za štrudl,(i bome dobro da san Mijeti napisala cedulju zač je sve bilo skuplje, a to valjda jer je dučan lipši i u gradu, zač bi drugo, sve je to isto) i nučici kaj si izbere.
Ni moja Mare ni bila baš nešto zemala, neg moja nučica bi oni Nesquick (valja san dobro prepisala) u onoj žutoj škatuli, pa zet ću ditetu kad voli, i sve dobro do blagajne, idemo mi to platit, da i kruh san zela, jer nisan stigla misit, kad mala moja nučica dobije igračku uza taj Nesquick i to lipo ću van reč KOSTUR, mali lipi kosturak od čovika!
Ajme, kad je digla rukice prema meni sa tim kosturon, a ja se nasmišila, a kad san vidla to u rukican njezinin, ja san mislila da će me šlagirat, noge mi se oduzele, zela dite i pobigla van, da mi se mozak trun razladi…
Tako smo nas dvi vani stale, ja san gurnila kostur u onu vreću njivu i odma san ga bacila u sporet kad san prag prekoračila od svoje kuće.
Kašnje je došla Mare i donesla za manom one rožice, i veli ajde ih i ti zami tamo, ma nisan tila, neg si ih posadu da ne rečen kamo, kad su dici išli kosture davat uz ono kaj dica volu jist'?
Ne zvala se ja Janjo ako još krenen s diteton u koji trgovački centar na ovem celem svitu!
I ni to sve, Mije je došal u 6 ur popodne, ni mogal dočekat stoteg broja, zač mu je prvi prošal pa je čekal drugi, i rekal da ga je bilo sram više postavat i potrošil 389,16 kun, tulko ga gromi opalilo i mene i njega i više nikad neću slušat reklame i čitat jih.
Tako je lipo meni dan prošal u muki i trošku, težak i čemeran, a najviše mi bilo žal kaj su mojoj lipoj i pametnoj nučici, mojem anđelu u ruke deli kostur.
I Mije i Mare i snaha i sin, svi mislu kako i ja mislin o tem činu, a ja mislin i dalje jel se to samo meni tako dogodilo i mojem ditetu ili je još dice uz taj nesretni Nesquick dobilo kusturak od čovika ?
Eto, mislila san da ću vas s čin nasmijat i razveselit, ma ispalo je drukčije, ne more se sve grdo u lipo pretvorit i u smih, valjda ću to zaboravit i nešto van lipše drugi put pisat.
Došla su čudna vrimena i još čudniji običaji, ako um imaju moru znat da kosturi ne moru bit igračke za dicu.
Ajte bok
Janjo, 21.veljače 2008.
TUJ SAN, BLOKERI!
Dico moja, danas san odlučila otvorit svoj blok i blogovarat o svemu kaj čujen i kaj se divani u našem malenon gradu i o temu pisat svoje mišlenje. Dost mi je da moram pisat po tuđi bloki kad moren imat svoj, pa pište vi po mojem, ako ćete, ako ne, opet dobro.
Ovi kaj su špotali Nešota, Laprdalo lipo su napravili po celoj državi zbrku oko njega i pisanja o Belolasici, jedni velu da je dobro pisal a drugi da ni dobar, ma ja ću van reć kaj mislin..
Dobro je naš Nešo napisal, samo zato kaj retko reče ono kaj treba. Svaki put se uzbunu gradonačelniki i direktori i uvik ga tiraju od posla, tako da je došal i na velike bloke i u oni Novi list i svi su se digli špotat i branit, i tako će on postat bolji novinar u državi i projt će siguro u Zagreb, jer svi kaj su malo bolji projdu u Zagreb, a pogotovo oni ki završu kakovu višu školu u drugoj državi.
Gospa Dubravka nemore pojt nikud jer ima fakultet, pa će srećon ostat s nami i divanit kaj se sve ovdi dela, ako joj budu tili reč istinu, ako ne morat će kaj i do sad?
Za početak neću puno pisat, metla san van svoja blogovaranja da se zeru vrnete na ono kaj je bilo pri nam i o čemu san pisala, i da znate da je to najviše kriva moja Mare kaj mi je rekla da moran otvorit svoj blok, jer svaki vrag već ima kadi pisat samo ja nimam, a Mijeti nisan niš ni divanila jerbo se bojin da bi mi zel kompjuter i bacil ga čez okno u dvor, zač ne voli da ja pišen, a pogotovu da pišen o politiki i o političarim.
Ništo san se uozbiljila jerbo iman sad puno veću odgovornost kad san se odlučila već bit blokoogovaralica, morti ću morat ki koment i srušit ako bude jako grdo i prosto o kemu divanil zač san pročitala da nesmin svašta puštat i mogal bi me ki tužit, al ja vidin da su ljudi u Ogulinu dost fini i da samo ki god prostači i vređa. Treba lipo pisat ki oni Maks, Ogulin.blog, Uske staze i tako, a ne da se vučem po sudi, jerbo bi morala dok bi to došlo na red pojt u Karlovac, a to mi ni zgodno.
Samo sam vas za prvi put tila to zamolit i unapred van se svimi zahvalit!
Ajte bok!
Janjo, 19.02.2008.
LAPRDALO NADRAPALO
Ajte vi svi ki imate bloke pisat da je dobro i lipo i krasno, ajte pisat da treba Belolasicu šundrat, da nam tega opće netreba, ajmo mi drugi kaj pišemo po bloki navijat da nam hitno treba Kranjčevku osposobit jer da nimamo kadi trčat, skakat, preko štriki skakat i ležat na travi, ajmo mi svi se počet falit kako je nam dobro i lipo pa se morda kaj pokrene?
Ja vidin da je naša vlast ko moja dica kad su bila mala, kad ih tiram spat neće ni za boga, kad ih tiram jist neće, kad ih tiram učit neće, e onda je Janjo lipo okrenila ploču...
Ne jist ni za boga, tanjuri prazni, ne učit , stalno su za knjigam letili, morate pojt van u disko, morda dva ili tri put je ova starija , a ni tila zač san ju tirala da se krene...
Morti bi bilo dobro tako, zač oni uvik stalno deladu ono kaj ni narodu potrebno!
Ov Nešo naš, dobro je sve to napisal, ali ja se sada bojin za njega zač bi ga mogli potirat sa radija, a mogli bi i gospu Dubravku prominit, pa će onda dojt morda opet onaj Šnajder kaj sad dela bazene po Belolasici, kaj da je to cibelin pa će skrojit kaput, bože mi prosti!
Ja više opće neznan koji je vrag tem našem narodu da ne vidu ni lani ni preklani samo slušaju njihove gluposti koje obećavadu, pa kaj taj narod nezna računat , da im ni jasno da od ovih novac kaj saberdu ne mogu niš napravit, nego jedva zase zet!
Rekla san de neću više ni slova reć, ma san morala ovo napisat!
Da samo znate da su i MIje i moja Mare došli na moje i da mislidu da bi ovaj moj predlog bil dobar!
A kaj Ive Vučić, kaj on divani i skida sa bloki kaj Nešo i ovi drugi pišu, da mu ni bilo Neše nikad ne bi bil to kaj je, nebi ni vidil Zagreba i bil zastupnik neg bi vozil lokomotivu, morti nagibni vlak ako bi ga tili izučit za to?
Ajte dico bok, i nemojte me sada špotat, a kadi je Franca sad i on Medaljunko, kadi su se oni u mišju škulju zaškuljili? Ništo san čula ki je mačkare zatrl, pa ću o tem drugi put jerbo bi rekli da san to napamet pisala!
Janjo, 28.01.2008.
PREDIZBORNA KOMPANIJA (II)
Rekla san Mijeti da ne spada klat prasce u subotu zač u ponedeljak dolazi mlad i lip čivik u Ogulin i moja Mare i ja ćemo ga pojt vidit. Ma ne, Mije je iz inati zval Ivetu i mi moramo klat, a ja lipo prošla u mesnicu onu Karlovačku, zela crevi i začas finile Mare i ja
krvavice i mesnatice, a oni su ostali trančirat i posložili sve da se dene u pac. Špek lipo srezale i loj i stopile, ima lipi čvarki i masti, velu da ni zdrava, (bogme smo mi svi ki dren zdravi i crveni) i kako vrag ne spi, moj ti Mije donesal još 4 table u 11 ur iz one karlovačke mesnice, jerbo veli da mu čvarki pašu.
Šundral mi je plan, vraga pojil i on i čvarki!
A moja Mare i ja lipo sele u letnju kuinju, zele nože i daske i navile radio, ma kad ga nemoremo gledat kaj sav pošten svit ćemo ga slušat, lipo naložile kozu i padelu na nju, rakiju na stol, kafu u lonac i uživaj!
Lipo smo se zaklenile, da vrag muški nemore dojt k nami dok slušamo lipeg mladeg čovika!
Nešo je vodil kompaniju i sve ga je pital kaj je moju Maru i mene interesiralo, zač smo se već i popravdale radi tega malega!
Mare veli da dica neće imat veronauk u školi i da će se porez na kuću i štalu i na zemlju plaćat i na ono trun novac kaj imamo Mije i ja po banka, a ja san rekla da ni to istina. I, kaj mislite po čije je bilo, po moje, zač san ja pametnija od Mare!
Neće se bogme ni droga pušit i prodavat na kioski kako su rekli, neg će se pomoć toj ludoj dici, a koji zarađivaju na drogi ti će pojt va rešt!
Porez će plaćat samo oni kaj imaju puno novac i kaj su zgrnili na nam sirotinji kule i vile, i Mare i ja smo tako mislele, ali nas niki ni slušal, kad smo divanile?
Nešo je navijal da ovaj mlad Milanović špota HDZ-ej, a ni se dal navuć na tanak led, i još je rekal da imaju biskupi pravo reć kaj mislu i da trebaju reć, samo da baš ne razumidu preveć familije i brak i dicu pa i ne bi o temu morali preveć divanit. Ma i ja mislin isto tako, samo se bojin da ne bi bilo isto kaj pred 4 godine kad su potpisevali kaj će sve ukinit i kaj će sve dat, pa niš od tega, a morti će ovi mlađi poštivat svoju rič, bog bi ih znal?
Tako smo mi pol ure slušale mladega čovika ki ni niš mucal, ni ni bečal, lipo je divanil da ga svaki more razumit i baš nam se i po divanu dopal!
Ma ne bi morti ja ovo pisala, neg će taj čovik ako pobidi reć da nis ni crne ne bele o njem i njegovi rekla, more bit će se najidit na me, a ja nebi tila da se zameran vlasti, svi su meni lipi i dobri i sve ja njih volin, ma mi se čini da nekoji preveć lažedu, a ov je nov pa neznan ćel lagat il će sve to tako bit, a bilo bi dobro da ta bura dojde i radi mesa da se ne začrvljivi.
I tako van je to dico moja prošlo bez mene, da ja nisan vidila tega mladega i lipega Milanovića, nego san ga samo slušala, a dobro je, bar san dost masti natopila i poredila letnju kuinju i sad više do pacanja u nju neću ni pojt, nek Mije okreće meso, i loži pušu za meso sušit. Će skoro i izbori pa ćemo se brige rešit kad se izbroju glasovi i odredi ki će pojt u Sabor.
Ona gospa Milanka puno je lipša od kad ide sa ovin Milanovićon, lipša joj je flizura neg onda kad je isto se sa gosponon Kozon slikala, nekako mi se čini umilnija i mlađa, ma to mora da je ovaj lip čovik nešto na nju deloval, o temu smo Mare i ja divanile kad smo gledale po bloki od Ogulinskeg lista slike, ništo mi je friška i rascvotala, a ni red da vam o temu divanim, to samo moja Mare i ja tako…nemojte mi zamerit!
Ajme, kaj san ja tega nadrobila, moran projt zač će mi Mije leđa nabit, pa ću vraga pojist zač se bavin politikon !
Ajte bok !
JANJO, 19.11.2007.
RADIJSKO LAPRDANJE
Dico moja, namerate me na vražji posal, pa dobro delat ću kad ćete, al samo po bloki do proleća, zač ću bit umorna od dugega dana i dela po njiva i neću moć niš drugo nego to, jerbo Mijeća je pemzija mala, moran ja potegnit i pojt na palc, od dionic veli Miječe sestre čeri sin niš, zač se rušu, a mi nimamo dost za prodat, onaj sotonjak se niš ne javlja na mobitel, bi to prodali, ali ga ni, grom ga žarki spalil, a kad ja Mijetu slušan?
Ti , Toma R, nemoj meni divanit , zlato moje zač će mi Mije napravit ku šljivu, kaj u mačkaram jedne godine kad me je jedan gospon lipo gledal, a ni niš divanil, uznemiril se siromak kad je videl kaj mi divanite, boji se za grunt, za blago, još ću mislit malo čul pojt u novine i u radio? Morda ako me gospa Dubravka bu zvala ( zač ju zovete Duda) i onaj gospon Koza.?
Laprdarij, ja san Janjo, pitaj Mijetu i još kega , a nesmin reć kega, zač bi bilo grija po selu i divana , moran se čuvat zač iman dicu ,a ti nemoj više mislit da ste vi muški ništo bolji i sposobniji od nas žen, vidiš da san ti crni dan prosvitlila ! Samo me stra da ne postanem bolja ženska kaj gospa Jadranka i ona Vlatka, pa da me dojdu slikat po novina i po televiziji, morat ću onda pojt na flizuru i pukat brke i bradu kod gospe Davorke, a ki će mi to platit, bolje meni bit Janjo i delat ono kaj znan.
Od France niš ne razumin kaj je rekla, zač mislin da blago još neće pojt na izbore, niš nisu rekli o temu, bože mi prosti svakakvega naroda.
Ovi Hugo nebi smil tako divanit, govori su da se slušaju i treba na njih pojt, jerbo uvik ima ništo za čut i vidit. Ja samo ne volin pojt sama, moja Mare se zeru jadi na mene radi ovi bloki, ali projt će je to.
Nešo, vrag ti kosti zdrmal zač ti mene po radiju spominješ, imaš sada posla drugega, vodit tu kompaniju do izbori i o politiki divanit i ki će kega savladat a ne Janju spominjat!
Joj, slušala sam jučer na radio iz gradskega veća divan, ma ja neznan samo kako će jadna dica koja idu i dopodne i popodne u školu igrat tenis u to vrime kad su rekli, pa san mislila reć da ja najbolje da igradu po noći. Ta dica niš ne spidu, ja gledan preko firange po noći kad je misec pun zač nemoren spat, i vidin da idu van iz kuće oko pol noći, dojdu oko 6 doma, zamu torbu i presvuku robu i projdu u školu, kad dojdu iz škole projdu spat do pol noći i opet u grad, to samo ovi kaj gredu u jutro u školu, a ovu kaj gredu popodne ni ne vidin, ta su dica zaminila dan za noć, pa morda je onda bolje da igradu tenis, bit će na sigurnem!
I slušala san za vodu iz Belolasice da je imala bakterije, pa je rekal naš Bego da nisu biološke, i onda san se smirila, pogotovo kad je rekal da će ih kiša šundrat, zač mi nuki gredu skijat ako bude sniga, mora bolje da ga ne bu, da dica ostanu doma, jerbo me svu zbenilo to s vodon i s bakterijami koje nisu bilološke!
Nisan mogla slušat sve, zač sam morala delat zafrig na južini pa nisan čula kamo će s porezon, kaj će sabrat i kulko mislu sabrat, a vrag s njimi ja ga puno i ne plaćan, samo bi tila da plaćan manje placovine zač je tamo dost skučeno i tesno.
Da i za Julo su divanili, i ja vas molin da ne bacate smeće zač će se sve zaštopat i ako bude fanj kiše plivat ćemo svi u dreki!
Ajte bok !
JANJO, 16.11.2007.
PREDIZBORNA KOMPANIJA (1)
Dico moja, nisan van se stigla prije javit zač san morala posadit česan na vrime, i još je bilo tega dela, kukuruzovinu spremit i đubar na njive otpeljat i rastrest, i dobro da smo Mije i ja to naredili zač ne bi mogla pojt na Čačića i na Sanadera. Išla san sama na Čačića, jerbo Mare moja ni tila pojt zač su joj cipele one bolje bile pri Damiru šusteru, a na Čačića se moralo pojt u kino pa ju je bilo sram u stari cipela. Ni bilo puno naroda, ma san skoro zanemila kad san vidla da je gospon direktor od bivše ZVEZDE, došal istom na Čačića , a ja san virovala da je on napredoval u službi, ma ni isto je kaj u onem bivšem mraku ništo pisal, valja ki je došal, a prije je isto popiseval ki ide na mise.
Kašnje san čekala da Mare dojde u stari cipela, pa smo ostale na Sanaderu, a bilo je morti 300 duš,dice je bilo dost, a svi smo bili ki smo išli i prije na štafete i na Marketu Borića, svi smo isti !
Dice mi žal zač su poplavili od mrzline isto kaj oni tanki plavi buštići, kaj su im dali , mala Sanjica od Drenšeki je tila pivat i popeljala med curami HDZ-ej zna, ali dica nisu niš znala dalje, samo ona je sirota probala..
Prije tega je mala Poljačka plesala kolo,sa drugon dicon, ali je bilo zmešano, niki je kozaračko, niki užičko i niki bogme i makedonsko oro plesal, zač san ja bila prije u fokloru pa san malo pratila, ma ne znaju dica..., oni su morali radi roditelji.
Ma i strah me ulovil. zač je onaj naš Komes dopeljal čerti konja debela, a ja se bojin konji, zač su me skoro Miječi konji ubili kad san došla k njemu ko mlada nevesta, jerbo me nisu poznali, pa nisan morala dobro gledat. Ćula san da mi je gospon Sanader obečal da će me četri godine bolit glava i bogme je već počela, jer moja Mare ni mogla nikako virovat da je gospon Sanader u HDZ-eju ,jerbo je fort divanil o SDP-eju, pa je mislela da je nastal on transfer i ometala me sa pitanji! Rekla san joj da ću joj kad dojdemo doma rastumačit, ali još je tila da ono zelje skuhano zamemo doma za prasce da ne propade tamo, ma smo se dobro sa tim zeljen nasanjkale...
Prošle smo brže doma po tačke i to zele za prasce, zvala san na mobitel Mijetu pa je čekal sa traktoron da to metnemo u posude, bome su mi prasci i nam i Mari malo falilo krepali, imal je Mije celo drugo jutro strugat praščak.
Da, a onaj gospon od bivše ZVEZDE, je isto bil na HDZ-eju sa svojim cuckim, tako da su i ljudi i blago bili na Sanaderu i čuli kulko je govoril o SDP-eju, neka mi samo reče Franca da lažen ili onaj Medaljunko!
Slabo je bilo , ni bilo ni voli pečeni, tek tulko da se reče da je ništo bilo, i ja još niš nisan odlučila za kega ću dat glas, Mare veli da neće ni pojtk, a Mije je besan zač bi morali pojt skupa on i ja, a on bi radi malo u Marinu svrnil a ako ja gren onda nemore. Samo mi neće on dirigirat za kega ću glas dat, on po svoje ja po svoje, dost je bilo, još ću puno mislit, i mislin da neću za HDZej jerbo oni nisu jili zelje s narodom i one kobasice, neg su prošli svi u Frankopan i jili fina jila, više neću zemat niš ako oni prvo ne pojidu. Skoro san ostala bez blaga, bog zna kako je onem narodu kaj je jil ? Ni Tone R ni til jist ni zelje ni kobasice, pogospodil se i ji sad na stolnjaku sa bešteki, kaj da je gospon.
E da, i Madig je dopeljal glave kiselega, da se podili ovim važnijim iz HDZ-eja, a nisu ga ni zeli jerbo su se žurili jist u Frankopan,i ja nisan vidla ki ga je zel jerbo smo mi prošli doma. Jako san razočarana, jako...!
A morda još ki dojde, a ovi ću put samo slušat i gledat i niš neću zemat doma , ne zvala se ja Janjo ako zamem!
Ajte bok !
JANJO, 13.11.2007.
DANI MOJEGA GRADA I ŽUPE
I tako je lipo bilo ovih dani kad su se slavili dana našega malega grada i naše Župe. Svi su ništo delali, bile su pune ceste naroda, malo su se bunili kuda dojt i projt, jer je tega bilo puno.
Svi su se pokazali kaj ništo značu, govorili i pozdravaljali a niki su bome i dobro zaradili. Gradonačelnik Bego, kan da je ništo bolje prodivanil, ni dugo mucal i štucal, Tone si je kupil novo ganz crno odelo ,slažu gori groblje, deladu ceste, predstavljali su i gledali vrte i davali vridnim ženam slikice, nekim bome i za malo a nikim i za puno rožic.
Puno se slik podililo, dobili su i Ive Vučić, i Bego i naš Župnik i još niki kaj ga ne poznan, kad su umitniki slavili 15 godin svojega rada u toj udrugi slikarskoj.
Bilo je i lipih kolači i svega po stoli i sve se to slikalo, samo je malo nestalo struje, ali ni to smetalo.
Bila sam i u procesiji i lipo je govoril nadbiskup iz Bosne Vinko Puljić, ma sam zapamtila sve ono o ljubavi, i da bez žrtav ni ljubavi i napretka ,pa je i on dobil sliku, puno veću i lipu, pa fala gospi Mariji ,direktorici škole kaj je to sve tako naslikala i lipo im dala i poklonila. Ma vidila sam na izložbi da ima dost Ogulin slikari, a i slikaric, ali ni niki til poklanjat slike neg Gospa Marija, valjda druge nisu dobre pa ih nećedu nikemu dat, ili čuvadu kad ih nebu pa će dica njihova to skupo prodavat kaj od onih drugih umitniki!
A, ne , ne morem reć, Toni je dal na izložbi slik ovim našim, tri slike, velike i kanda su rekli da je more, a bilo bi lipše da su rekli da su Sabljaki, jer je to isto ko more, još i malo bolje, zač ni tako skupo a i blizo je.
Ma sad mi se prosvitlilo, pa i Toni i gospa Marija su iz Zagorja, pa gore se sami umitniki i velikani rađaju i dobro da imamo Zagorje, ki bi nam slike delal za poklonit vridnim ženam i tem boljem narodu kad dojde u Ogulin da ni njih, pa joj kako sam luda i glupa i niš ne mislin, pa kaj bi mi bili bez Zagorja mili Bože, tuga i jad i čemer.
Bog i bogme lipo je bilo i jedva čekan dugu godinu da se narod sabere i da čujen kaj je novega. I moja je Mare bila smanum i veli da je i njoj bilo lipo, sve lipo ,lipo. Ma san skoro zaboravi8la, kad je onaj gospon kaj živi u Zagrebu isto one lipe slike poslagal, bi se morda našal uvređen da ga se ne sjetin A najlipše je bilo kad je naš folklor nastupal, joj ona je mala Nikolina sposobna, kako ona to lipo dela, lipo moje dite. Ma tako je bilo lipo i prelipo, da me nekva smuša zela, ne moren se nafalit i nadivit. I da van rečen, da san se svaki dan sa svojim Mijum pravdala radi tega kaj smo moja Mare i ja išle to sve obajat a zadnji se dan i on sredi i išal je gledat i slušat, pa je sa Slavom ostal u Marini i došal navečer pijan ko zemlja, ma je čul svoga boga, ja ako sam popila čašicu čega ma nisan došla pijana ko palandra doma.Neće više pojt, ne zvala se ja Janjo. Još mi je falila ona gospa Jadranka kaj svugdi ide, zač ni ona došla kad je bilo tako lipo, zač, morda ju ni niki zval ,pa da ona je ipak jedna fina gospa, kaj bi ona došla samo tako, a morda ni mogla, joj baš je fina .
Dobro dico moja, lipo smo to finili, krumpir u podrum, meso u pac, zelje u kace i gremo se odmarat, morda bude malo zime i sniga ,ako ne opet dobro. (JANJO 15.09.2007.)
