DOST MI JE NOGOMETA !
Danas ću vam, dico moja, čuda tega reč i napisat, jerbo se malo smirila Hrvacka i ni trublji ni larme, ni luđačkih vožnji po gradu, kanda je nastupil jučer i danas dan žalosti, ne samo u našemu malemu gradu van i u celoj zemlji Hrvackoj.
Dva čedna ni me doma niki gledal.ni me niš pital, samo se čekalo da počnu utakmice i da se gleda 22 junca ki će kega u Evropi bolje nadigrat i ki za više euri za svoje gospodare zaigrat. Ni se niš delalo, mozak je bil sav zaokupljen samo šarum loptum, a roba je bila na kockice, auti su imali zastavice na kockice, sve se je skockalo i na kraju, niš, ode mast u propast.
Ma u isto vrime su Irci izdivanili na referendumi da neće proširevat Evropsku uniju u koj smo mi trebali bit najbolji u nogometu, ali to ni bilo važno, samo Stipe naš je rekal da to ne vredi za nas i našu Hrvacku i da su to Francuzi rekli da se ne bi još ki predomislel u Evropi pa da narod njihov nebi bil neozbiljan i odbil predlog vlasti, ali kad se javila šefica od njemaćke vlasti, taman smo izgubili nogomet protiv Turki ki se isto natječu ne samo u nogometu van u u politiki da bi zašli u Europu.
Ovo je igranje i ganjanje lopte jako lipo iskoristil svaki političar u našoj zemlji jerbo se lipo odmaral, ni ga niki niš pital, mogal je delat kaj god će i dignit energente do neba, izmislet poreze do Marsa, niki se nebi ni osvrnil. Kad se malo oladimo od žalosti morda ćemo se vrnit na našu sadašnjost i na naš Hrvatski dan.
Ni to niš, nego su pomešale Mare i teta Roža nogomet i Evropsku uniju i teta Roža me ošpotala ko zadnju prasicu zač nisan zela rubac na kockice kad gren po dvoru kokoše ranit i prasce pojit, i kakovu maju za u grad pojt, zač se primamo u Evropsku uniju i sad će baš zet onu krušku tepku mojoj Mari o koj san već pisala i neka će i bože daj je zeli!? E kakovi smo mi, samo nek je zlo u tuđem dvoru i u tuđoj kući, onda je nam lipo i dobro .
Ja gledan ki je vrag tetu Rožu spopal, kaj ona tepe o tepki i Uniji, a ona sirotinja kako slabo čuje tako je mislela da ako budemo prvi u trčanju za loptum da ćemo pojt u Uniju.
Ma mahnila sam rukum i prošla nabrat ribizli, bože mi prosti našega naroda, nit kaj razumi niti kaj zna!
A moja Mare, je imela fertun na kockice, ma je jutros obukla onaj na male bele puže kaj san joj ja za osmi Mart darovala. Nisan je tila niš pitat, jerbo kad ga je dela nase ni me tila ni gledat, samo ispod oka u me šliljela, a ja san znala da će ona dojt na moje.
I danas lipo, Mije, dica, svi spidu, divanu kako su suci krivi i Turki kaj je sve na njivoj strani i lipo projden od njih obajt svoje lipe njive, naberen višanj i naredin štrudl i sakrin ga. Ma su svi po kući njušili kaj to miriši, ja san ga u špajzu zaklenila a ključ u žep..
Posle južine, vuču se kaj krepeni po kući, a ja zela lipo komad štrudla, mrzlega, dela gori prst šlaga i jim.
- Janjo, pa ti si pekla štrudel?, pita Mije.
-Jesam Mije, dva pleha..
-Pa kaj češ jist sama?
-Ču Mije!
-Pa zač Janjo, uvik si za sve naredila, i za dicu i za susede i ako ki dojde?
- Nek vam Bilić da štrudli, bute sretni da san vam i juve skuhala i pile spohala!
- Do navečer niki neće ni probat mojega štrudla, da se raspuknete, ki je višnje bral, ki ih je čistil, ki testo mesil i rastezal, ki se paril u letnjoj kuinji i pekal, vi nemorete od žalosti jist…
- Pa a, Janjo, nemoj bit takova, pa kaj smo mi tebi naredili, kaj smo gledali nogomet?
- E lipo mene ni bilo dva čedna u vašim glavam, samo nogomet, samo jedanajst junci s jedne i jedanajst junci s druge strane kaj lipo trošu novce po Evropam i naganjaju eure i delaju sebi reklame da se bolje prodaju u svitu i da ne platu Hrvackoj porez. Kuliko je potrošeno novac na te bedastoće, niki ni niš delal, svi ste obnevidili od tega, trošili ste kaj ludi, a sad dolazi pondeljak, nemojte mi samo divanit poć je benzin, poć struja, poć kruh, kulko košta krema za cipele ?
- Janjo, nemoj bit takova, mi muški smo ponosni kad naši pobidu kadi u svitu ?
- Ma nemoj, a kad ćete vi muški reda naredit u svojemu dvoru, u svojoj državi, tako si i prije poludel za Hrvacum pa si ostal i bez posla i bez poduzeća, dal vi nemorete mislet na dvi stvari, van uvik samo na jednu i to onu ku vam podmetnu ?
- -Janjo, pa misleli smo kako je krenilo ..'
- Ma Mije blesavi, i svi oko mene, uvik vi navijate srcum i dušum i onda, kaj ti imaš od tega, kaj Mije? Ponosan si, nač' Ja bi se dičila da moremo živet od tvoje pemzije, da morem pojt na more sa nukin deset dani, da projden kupit kakove lipe forange, da si malo uredimo stanje i kuću, kaj ću se dičit, nač Mije, to ni moje, to je njovo, njiova igra i njiova pobeda i njiov gubitak. Kaj ne vidiš da sve kaj postoji iskoristu da niš ne pitate i da niš ne mislite samo ono kaj vam reču. Ma Mije moj, niš te ne žalin, niš, trebalo ti je bit i gore, lako ti svaki zame kaj god će kad neznaš čuvat i pazit nase. Tetreb, tetreb u parenju si bil dva čedna, i ti i Mare i suseda i gluha Roža, samo ste gledali kaj će Bilić divanit, ni niš naređeno. Kaj samo meni mozak mora delat, sram te bilo Mije, nisi me vridan!
Pokunjil se moj Mije i prošal pod orah na klupicu sest i mislet, zač je njegova Janjo tako grdo divanila, a dogajale su se velike i važne stvari, puno važnije od mojega prašenja zlatic i špricanja protiv plemenjače. Neka misli, kaj je važnije, Rašić ili vatreni, Janjo ili Bilić?
Evo tako vam je to prošlo pri meni doma, ni bilo puno divana ni puno griha, pitan se samo bil bilo tako da smo pobidili, za dva čedna bi nas preselili na Sjeverni pol da nebi ni primetili.
U mojemu malenem Ogulinu, ta dva luda čedna trajale su bajke, nisam mogla pojt niš videt, nučica je imela školu i nuki istom, puno su morali učit i pisat zadnji čas ispite, ali kaj moremo, valja se bajke moraju delat za one velike ki moru pojt, a ne za ove male ki bi u njih još mogli i poverovat ?
Valja će do jutri projt ta žalost, pa će se morda ljudi vrnit iz ludila u kakov normalan životi svojem svakodnevnem poslu i dužnosti.
Ajte bok !
Janjo, 22. lipnja 2008.
Mišljenje Janje, jedneg zuba sitne stoke
Seguro vam je čudno kadi sam, a bilo je Gradsko veće u utorak, morda mislite da sam bolna ili da san umrila kad niš ne pišen, a ne, ne, neće Janjo ni u bolnicu ni u rešt ni u grobnicu dok ne reče sve kaj joj na srcu leži.
Ljuta san jerbo nisan znala da će bit Gradsko veče, pa nis zela radio sobum u Rašić na okapanje i nagrnjanje, ali san došla trun ranije i kad sam oprila radio u eteru pravo do moje kuinje čuje se glas našega Bege kako reži i prigovara, ali njega ću kašnje nabrat, kad sve drugo rečen! Morala san čekat izvešča novinari naših, jer nisam mogla samo Laprdalovem verovat, i vidin da je dost tega ispustl, pa san to našla kod gospona Koze, i ono malo kaj san čula to mi je dost da pišen..
Prvo bi rekla ku reč o Placu, tj zelenoj tržnici, ku ni tako trebalo delati i šundrat naš komotan plac, zač me podeća na tunel, pa mislin da je ideju za njega dal naš mašijnovođa i strojovoda ili šofer na lokomotivi gospon Ive, Saborski zastupnik, jerbo je to pravi tunel, propušina nutri, tama i sve tesno i stišnjeno, a jezero pred ulazum, tako da si lipo i noge operemo kajda gremo u džamiju, a ne na plac. Kaj su misleli, da će Janjo i mi zemat one špajzice za prodavat to trun zelenjave, mora bit deficit i bit će još veči jerbo ja više nejden prodavat niš na plac nego Mije lipo ženam more raspeljat kaj im treba, drito iz njive, lipo friško.
Kaj se tiče vodovoda i kanalizacije, tuj je pravo čudo da se posluje bez deficita zač ja znam da ima i običnega naroda kaj kradu vodu i kaj ne plačaju po uri, van po članu, a kaj se tiče poduzeći, mislin da se to nesmi puščat nego hitno tužit, jer ima poduzeći kaj tako tlačidu radnike i ne plačadu im ni plaču, i treba ih hitno zaprit i sve im zet da namiru vodu struju i druge naknade našemu gradu.
Kino polivalentne namjene, ni tuj polivalencije, to se veli po Hrvackem jeziku mnogostruka namjena i molin da se po Hrvatski divani u Gradskem veću, a ne da Bego lomi jezik i muči se sa tim svakovim stranim rečnikom. Ne pravte se drugo neg kaj jeste, jerbo svi znamo kako ki divani i kako more divanit, dost nam je tega !
Kino od 6 milioni nam ni potrebno, zač će mene bit strah pojt u njega tako skupega bez obzira o koj se od mnogostrukih namjeni delalo, jerbo ja nisam Ledi Dijana, da smin sedet u tako skupem stolcu i hodit i dihat u nekem prostori kaj tulko košta ? Kemu trebaju u Ogulinu te posebnosti i ta skupoča, ki se rodil takov i gojl da mu treba takova raskoš, spuščite se na zemlju. Knjižnici nimam kaj prigovarat, morda bi narod više učil i pročital da ništo naući, to mi ni žal i temu neču prigovarat, morda bi nam od čitanja pametnih knjig prodelal mozak i vrnil se očni vid, a morda i vlast počne čitat kad budu imali kadi?
Za Radio nemorem dobro prosudit, tuj mi ništo kanda ni preveč jasno, pa ni onda ako je Grad uredno dal preko 200 tisuć kun za ovu godinu, niki bi trebal reč kaj se i kako delalo do sad, jer 15 puti, ništo mi tuj ni baš jasno, pa neću o temu dok to ne saznam i ne promislim malo?
Od sad više Bokulića neću zvat jurišnik-pravednik, nego samo pravednik, jer je iskal novce sa svojum odsad nezavisnum družinum za dvi udruge koje se muču i delaju najviše sami i koji samo tu i tamo dobidu koju kunu iz našega proračuna i reč ću da je ov purt Bokulić dobro rekla, da sve kaj predlaže niki drugi a ne HDZej ne valja i da se niš ne prihvača, da se sve imenuje kaj provokacija, rušenje demokracije i trovanje naroda. Najviše me zabolelo kad je to Bego išal reč, jerbo je zadnji put špotal večnike kaj prigovaraju i tražu da im se odgovori na njihova pitanja dadu, da se postavljadu kajda one ne sudeluju u toj vlasti i ko da nisu suodgovorni za sve odluke koje donosi Gradsko veće E nisu odgovorni, za sve kaj je naređeno, a sve skoro je krivo investirano i naređeno i kriv je HDZ-ej, jerbo kulko san ja čula oporba je bila uvik protiv a njihovi predlogi se uvik odbacu .
Autobusni kolodvor, dva autobusa u Zagreb i Rijeku, putuju i jedan subotum na more, kaj i 46 kad su kamioni sa klupa volzili narod na more, pa se spržen vračal doma da ni niki mogal na njivu izajt 15 dani.
Trg Tranje Tuđnama, najgora i najzamazanija ulica, dodeljena je njemu, to valja da Ive more reč da je on deloval da se tako naredi kad prejde u drugi ili treći tabor, kako već bude.
Plac tesan, sa propuhin i puno špajzic ke niki neće. Spomenik i trg palih za slobodnu Hrvacku, tamo kadi se najviše larma i prolazi umesto u hladu i tišini, Park kaj će sad zasadit sa lipa i drvečem od 10 metri kaj u Italiji za olimpijade, kaj je bilo samo dok su olimpiske igre trajale, a potlje se sve posušilo Kaj će koštat u tem Parku tri i pol miliona, seguro će delat tamo nekakov raskošan šekret kaj u Dubrovniku, a morda bi bilo i vrime da dobimo kakov javni šekret, ali me i strah o tem mislit jer bi ga morda naredili na kakovem podvožnjaku ili nadvožnjaku tako da bude veliko čudo i kaj košta ki dvor Luja četrnajsteg ili keg već…? . Moj Mije veli da je važnio samo da se novci naši potrošu, a dal to treba ili ne opće ni važno! Ideš kroz grad po tratoari i svagdi stoji ctrvena ploča kadi piše, OPREZ, PADA FASADA ! Kaj to znači, po cesti nemoremo pojt od auti, a po tratori pada fasada, kaj mislu da su skinili krivicu ako napišu PADA FASADA, kao će Englez i Merikanac znat kaj to piše?
Ni lipo da naš Bego drži predavanja kako se nesmi igrat niki sa Udrugami, jerbo se baš HDZ-ej počel prvi igrat sa udrugami i to opasno od Spitske rive pa na dalje, znači Udruge su za igranje samo za HDZ-ej stranku i uporno temu služu…Kakovo je to podilaženje, ako se išće pomoć za slepe i dicu bolesnu, oni nisu politički interesne udruge, ali Bego zna da tuj ni puno glasači, pa nisu ni interesantne za donacije,. Da ni Bokulić niš spomenil ne bi se ni ispričal kaj ni bil na aukciji, a ni bil nigdi kadi ni političkeg interesa i političke igre i podilaženja.
Ni lipo da se ponaša kajda je Grad samo od HDZ-eja, Grad je od svih nas i građani i seljaki, i on bi moral bit Gradonačelnik svih građani. Ja mu puno i ne zameram jer mi još ni nismo imali gradonačelnika kega smo sami izabrali, uvik ga je postavljala stanka ka je na vlasti, a izmed njih su birali uvik samo one ki baš nisu imali jaku volju puno trošit svoju pamet, neg su slušali one kaj su ih postavili. Tako naš Bego i naš Tone i svi naši slušaju samo Ivetu, Saborskeg zastupnika i divanu ono kaj on reče, ili kaj mislu da bi njemu pasalo. Moja je želja da naš grad jedan put dobi gradonačelnika kega bi sam izabral, večinum, a to bojin se neću doživet, morda moja dica ili nuki ? Baš zbog tega pozdravila san pojavu nezavisnih večniki, pa makar se otrgali i od HSP-eja, samo neka se ne prodaju nikemu, i neka saberu šta više nezavisnih, jerbo bi nam u temu mogal bit spas. Neko vrime bi država zaprila pipu prema Ogulinu, ali izdržali bi mi to već, jer ovo kaj stranke delaju i kaj su naredile od našega grada, taj plac i sajam večniki kaj se kupuju i prodaju to više ni za pošten i normalan svit.
Uvik se dela ništo kaj nikem ne treba i kaj se kašnje pokaže promašeno, a tako će bit i sa Kranjćevkum, uvik se dela sve na brzinu samo da se novci potrašu da ih ni. Pa kad će več jedamput niki pametan dojt i reč da tega pol netreba nami jerbo nimamo novac za to održavat, pa nemoremo mi imat više kulturnih i sportskih sadržaji nego Zagreb po glavi Ogulinca. Kakovo to gospodarstvo more izdurat, narod nima kadi delat, bolnica propada, Jula smrdi, voda curi i gubi se, puščite doma samo jednu pipu da van curka pa ćete videt računa, po cestam poplave niš ne guta vodu kaj je naređeno, bolnička kaj u kaubojski filmovi, fasade se rušu, a mi glancamo tamo kadi će delat 10 ili 15 ljudi i trošimo kune na festivale, gradimo bajke, delamo ki zna kakve parke i trošimo, trošimo, trošimo na ono kaj nikad kunu neće vrnit. Morda će bit lipo, ali prazni trbuhi ne vidu tuliko lipote, kuliko će je naredit, i neće je pojt uživat, neg će doma u mrzlem sidit i klet!
Krenite med narod, obajdite sve kvarte, divante s ljudimi na cesti, u bolnici, pri dokturu, samo se zapirjete, dižete nos po cesti, čekate ki če vas ulizica bolje pomilovat i sabirjete ih oko sebe. Slušajte malo one ki vas špotaju, slušajte malo mlade matere , sve ih je manje, kuharice, učiteljice, bacte oko na narod i izmešajte se z njim jer od njega ste došli i on vam kruh daje, pa niste vi niki drugi neg isti kaj ste bili, samo kaj ste na vlasti, pa delajte za dicu svoju i za nas sve. Svi se mi med sobum poznamo i znamo ki je čiji i ki je kakov. Jako je grdo da naš Bego ljudimi ki su i školovani i pametni i vridni drži predavanja i sve kaj reču drukčije od njega pretvara u zlo. Pa more se valja ništo drukćije reč neg kaj misli Ive i Bego i HDZ-ej, pa makar bili i stoka sitneg zuba kaj Janjo, Mare, Roža, Mije i moji susedi i prijatelji.
Ajte bok!
Janjo, 12. lipanj 2008.
SLEPI NAŠI HUMANISTI !
Sad san došla iz grada, nedeljum se samo ji i lenčari, pa san odlučila da z mojum Marum grem na prodajnu izložbu slik Siniše Kesera u kino, kaj ih je daroval da se prodaju za udrugu naših slepih građani. Zela san i 500 kun, za kupit sliku kakovu, ali nisan niš, nisan išla ni pogledat zač san se jako najidila i razočarala. Čekale smo iza 6 ur popodne, ali niki ni došal osim presednika udruge, i još san nabrojila 16 onih kaj su iz udruge morali bit tamo i gospa Dubravka iz radija 17. Ma ni bilo ni kolegi slikari iz Ogulinske slikarske udruge, ma ni bilo ni Bege našega, ni Tone ni Turkovića smirenega, ni jurišnika i pravednika Bokulića, ni jedne stranke ni bilo ni čelniki, samo tužni narod iz Udruge slipci kaj te slike ni nemoru videt…
Bili su sami, kako su uvik sami, Mare moja i ja divanile smo o temu kad smo prošle pojist sladoled, oni su sami i u tami, niki kratko, niki dugo, niki celi život, a mi, kadi smo mi?
Ni kune ni niki portošil, ni jedno poduzeće ni privatnik ni došal, ni jedna druga udruga ka morda ima novac da da i petstoin kun, pa da je denu u svoju kancelariju i da reču, kupili smo sliku da saberemo ku kunu za slepe?
A mili Bože i premila Marijo, kadi su ti ljudi kaj su 45 tisuć kun sabrali u Remiksu, kad su svi poglavari došli i gradsko veće i poglavarstvo i direktori i tajnice, i sabrali uz vino i tamburice 45 hiljad kun, ovo im je valja bilo preozbiljno.
Da je Grad kupil jednu sliku bar za tristo kun, malo bi mi bilo lakše, mislela bi da u tem našem narodu kuca srce čovika, a ne črva.
Kadi ste bili svi, pa ni slepcima ne morete pomoć. Da je grad zel tu jednu sliku pa je nekemu ki dojde poklonil, zač uvik samo od Gospe Marije moraju kupovat slike, dal ona plati porez kaj proda, ja neću nikad zet od nje sliku, zać se svaki put kad iden mimo Turističkega prestrašin one slike kaj bi trebale bit tulipani, pa oni su tamni kaj daždevnjaki, zač uvik za sve samo od nje zemaju, a morda zato kaj je iz HDZ-eja, valja zato, a ovi nisu povezani sa tum strankum, ali su seguro povezani su gluhimi i mutavimi, to bi i bilo više u skladu, gluhi i mutavi su seguro povezani sa HDZ-ejum, zač ne čuju kaj se dela i dogaja, a nemoru ni divanit, a slepi im nisu po volji jerbo samo ne vidu, bit će da je to krivo, kaj nisu siromaki niš zaradili na slika koje su bile darovane za njih.
Ja predlažen, da slepci drugi put organizairaju prodajnu izložbu u Remiksu, a to ako more uz tamburaše, da se poglavarstvu i većnikim plati sto kun kaj će dojt na tu aukciju, kako se veli i da za te kune kupu slike, da se složu kako god znaju i da slike denu u Gradsku kuću lipo po hodniki i da se ne sramotu ovako više nigda….
Mene je bilo sram, nisan mogla pojt nurti u svečanu salu, nisan mogla sama kupit sliku, da je zamen pod ruku i odnesen doma pa makar nikad ne visela na zidu, jer ni bilo nikega izvana, samo moja Mare i ja, a ni bilo ni onega gospona Koze, valja zato jer ni bilo nikega od vlasti, valja zato kaj ni bilo niš za jist, valja zato kaj ni bilo niš za pit, kako je to običaj kad niki drugi dela izložbe i kad se troši i slavi kajda je Božić. Ma je napisal i naslikal lipo humanu feštu iz Remiksa, napisal kulko se sabralo kuni, bilo je velu fantastično, a kod nas je u našemu malemu gradu sve fantastično.
Fantastičan nam je Park, i dela se svaki dan punum parum, fantastičan nam je ulaz na plac, treba kakov čamac od raftinga da se zajde nutra kad je kiša, fantastičan nam je gradonačelnik, zamjenik Tone, grad bajki je jedno veliko pokvareno i onemočalo srce kaj se duši u svojoj laži i dvoličnosti, čemeran i lažljiv, u glibu do nosa još samo na jednu škuljicu zemlje zrak i zadušit će se u svojoj nemilosti.
Ni bome bilo ni velečasnega, a zač on ni mogal pokazat svoje milosrđe sa Pastralnim večem mogli su izajt, sve im je oko Crikve potumplano i popločeno, ni bilo tulko kiše da bi bilo blato pa da se zamažu, lipo im je najprvo oko Crikve sve sređeno a ovo za narod kad bu?
A kaj morete, takovi smo mi, a ja ne vidin više pisat od suz u očimi, kulko sam žalosna dok o ovem mislin, ali poslat ću ovo da svi pročitate na mojemu bloku kaj mislin o svimi vami, jerbo sad me razočaral i narod, ne samo vlast, more vas bit sve sram! Za sve ima novac, i za pivače i za plesače i za glumce, ribičije, za fešte kaj nimaju nikakovega smisla ni razloga, a za Udrugu slepih, kaj celi život živu u tami ni u ovem gradu ni nade da će im bar u duši bit svitlo po nami, a moglo nas se sabrat bar još 25, ki su uvik svagdi, mogli su bit i tuj! Pravo je moj Mije rekal. Nemoj Janjo pojt, zač u takovi nevolja niki neće dojt, to ni nevolja od jednega dana, to ni za peraciju u bolnici, kadi se plati doktor pa čovik umre, to je celi život, i tuj treba stalno brigat, a ne jedan put pa gotovo. Bolje bi bilo da san ga poslušala, i da san ostala doma, mislela bi da se čovik more pomoći nadat i na duže vrime. Ovo je prvi put u našemu gradu, ali baš kega briga ako nemore napunit želudac i dobro se napit i zatancat.
Samo neka me dragi Bog čuva da me kakova nevolja ne zadesi, mene i moju familiju, vidin kaj morem očekivat po toj humanosti, naprvlje vlasti, a onda i dalje !
Niš lipega, niš veselega, danas ni svitla u mojoj duši …!
Ajte bok !
Janjo, 1.lipnja 2008.
