JOŠ JEDAN TROJANSKI KONJ
E lipo, kad god ja dugo čekam da ništo napišem, i kad mi je sve kaj slušam i gledam nikako slabo i prozirno, uvik se dogodi ništo jako važno i značajno da morem pisat. Danas nebi divanila o našem malem Gradu, ma da posljedice velikih događaja od ščera i buduće iima i Ogulin, van ću se trun osvrnit na škandal nad škandalim u našeoj metropoli i to tamo kadi je moralna vertikala našega društva i naše države, beleg i sjajneg Zagreba.
U jednemu jutru naši su plavci krenili na Sveučilište, na akademce, profesore i studente ki su hodočastili na fakultete kupovat svoju budućnost i buduće položaje, a profesori su imali lipe kasice –prasice u ke su se metale milodare za našu svitlu budućnost. Potamanili su 21 dobročinitelja iz moralne verikale, kaj su sabirali indekse budućih uglednih građani, a ja Janjo, čekala sam 5 godin od kad sam to čula, kad će se to dogodit.
I dogodilo se!
Šefica Daša, od sukobi interesi konačno je probala sest u stari golf i to između dva čuvara, ki su ju je otpeljal u nepoznatem pravcu, na mesto kamo je trebala pojt prije kupnje žute kuće, zajedno sa ostatkum visoko moralne i ugledne gospode i gospođi.
Dobro je da se to konačno dogodilo, samo ni dobro kaj se to bas sad dogodilo a ne ranije, ni dobro kaj će taj škandal završit isto kaj i gruntovčani, maestro, invalidi domovinskeg rata i ostali cirkusi kaj su se režirali od strane malo večih glav kaj sidu po našem zakonodavnem telu i drugim institucijam i držu nam predavanja o moralu, poštenju i žrtvovanju.
Veliki i učeni Hrvat, glavni šef naše akademske zajednice, gospon kaj ni imal ujutro pojima kaj se događa, kaj je naučnum metodum dokaževal da sam ja Iračanka, ministar kaj je odma išal u Lurdes hodočastit kad je otkril da je vernik, navečer je bil zaslužan za raciju glavne prostitukte akademske zajednice Prometneg fakulteta. Sami od sebe deladu poprdu.
Zač su čekali do sad, kaj će bit sa ispostavum u Mostaru, ovdi u Zagrebu trebalo je hrpa euri i pet dani za 4 ispita i diplomu, pa to je dugi rok, u Mostaru ideš u petak kaj bravar ili mašinovođa a u pondeljak doneseš diplomu inženjera prometnih znanosti i to uokvirenu, napišeš dopis da si od pondeljka od 7 ur dipl.ing. i tako se potpisuješ na svakem mestu kadi je to potrebno, i to dipl.ing je puno večim slovim pisano neg ime i prezime .
Lipo, lipo bi bilo kad to nebi bilo samo zato i za to vrime dok naš rumeni i mili Polančec i ostalo društvo ne dogovori u miru kako će prodat dionice od INE MOL-u, jerbo su ih novinari i javnost pa i sam predsjednik države u tem vidno ometali.
Nimam niš protiv da se zamu diplome onim kaj su kupili ispite i diplome, ali ki će dokazat i kako ki je bil u šopingu na tem i drugim faksim, kako mislu to dokazat? Mislim da su to naredili i zato zač su oni svojoj dici i prijateljim, dici svoje dice i svoje rodbine davali diplome, i ki treba bit ing. to si je na vrime kupil, a i zaposlil se, jer ki ima novac za kupit diplomu i poznanstvi za isposlovat je, taj ima i za kupit posal , kadi god to triba, pa sad neka lipo sirotinja uči i nauči sve o prometu dok ovi kaj nisu niš naučili a zaposleni su projdu u pemziju, pa će onda morda dobit posal. Još ja mislim kako to niš ne štima u tem cestovnem i željezničkem saobračaju, a kako će, kaj se misli da ako graditelji naredu cestu i prugu samo od šoferi zavisi kulko će bit mrtvih, ranjenih i nesreći. Morda ima i pravih inžinjeri ali sudeći po derektoru županijskih cest u našoj županiji tuj ne treba znanje, samo kuraž da se sede na fotelju. Ni niki to naredil za siromašne i vridne, niki, naredili su oni to za svoju korist. Janjo, se ne veseli temu zač to ni bil cilj, i tega sam duboko svesna.
Da nisu krenili na fakultete, sigurno bi nekega skinili do gola i prikazali na internetu, ili bi kega ulovili u pedofiliji i grupnem seksu i to prikazali, ali to bi trajalo samo dva tri dana, jer to je postalo najnormalnija pojava. Ovako će se narod zabavljat ki zna kulko vrimena, dugo dani i miseci raspredat će se ki je prodal ,ki je kupil, ki je dobil diplome, a naši će vridni muži Hrvacke vlasti lipo dotle prodat dionice INE- MOL-u, pol u kasu državnu, pol u vlastitu kasicu –prasicu, a mi ćemo opet mislet kako će niki završit u reštu jerbo je to zaslužil.
Nemojte sami sebe varat, nemojte verovat u te bajke, jerbo je ta ista ona priča stara par hiljad godin. Sve su priče od uvik, samo ih triba razumit.
I kaj, kaj ja to pišem, kaj će to vami svimi, vam je svejedno ki kaj dela, ki nam vodi državu , sve nam je dobro i sve vam je lipo. Slavite i dižate samo one kaj su niš, jer oni kaj su niš moru bit kaj god ćete, i kaj god će, a oni kaj znaju ki su, kaj imaju znanje i zasluženu profesiju i diplomu neka budu kelneri, akviziteri, nam znaje ni potrebno.
Primorac je rekal da smo zemlja znaja, a ja vidim da svi kaj ništo znaju čekaju na posal godinami, i ti po ciloj lipoj našoj 0d Dubrovnika do Vukovara.
Imamo primeri oko sebe kulko čemo, na moju žalost a njihovo veselje niš se neće prominit.
Presednik Vlade bil je ljut u Briselu kaj je dobil opomenu za pravosuđe, kaj taj sav posal vredi , sav taj metež i pisanje i imenovanje kriminalci kad ostaje posal nezavršen tamo kadi se triba rešit a to je na sudu. Sud će dat zadnju reč u svemu temu, a njemu će falit dokazi, pa fiškali, pa zastara i opet, plati sitni zube! INA-.kokoš ka nese zlatna jaja bit će rešena dok novinari i javnost bude likovala kako su naprevljeni dobri potezi protiv tega mita i korupcije, a onda će opet izbit ništo drugo, ako još kaj ostane za stržit.
Još su jednaega trojanskega konja uspili naredit, a mi sad skupa sa savesti našega drutva, tj novinari tancamo oko njega.
Ajte bok!
Janjo, 19. rujna 2008.
DELAJMO KRANJČEVKU, ZA INAT NARODU...
.
Ajme peljde od poglavarstva , idem brzo pisat zač nemorem tulku glupost i bedastoću progutat, idem izdivanit kaj mislim pa makar me vrag pravo u pakal odvukal, po direktivi HDZ-eja i našega Ivete!
Idemo delat Kranjčevku, hitno, nikako ne odustajat zač veli dr. Puškarić da je ideja fantastična i da oni ki to želu sprečit nisu dobronamjerni građani, ni većniki, a on kaj je sad izbauljal iz svojega oklopa i sel pravo za poglavarski stol, je dobronamjeran i misli samo o Ogulinu dobro. Kaj dr. Puškarić zna kaj bi Oguilinci rada, otkud on to more znat, on zna samo da oni ki su ga dopeljali u poglavarstvo to ćedu delat i da im to treba , a zač im treba opće nazna. Dr Puškarić je jedna meni jako interesantna rukica u zraku za sve predloge Ivete i Bege, jerbo su mu popravili malo pemziju. Da je mučal ne bi mogal spat jer bi se bojal da će ostat bez tega dodatka, a o časti kaj ju ima poglavarstvo neću opće divanit, jer o temu naš narod u Ogulinu sve zna! Zač ni rekal po čem je to fantastično. Seguro su odredili ki će kega na sanjčica vuć uzbrdo , a ki će se spuštat nizbrdo za vrime njihovega rekreiranja na snigu i ostale dane, morda će delat gore i druge sadržaje kaj borbe u blatu, grudanje sa peskom i takove razonade kaj nam hitno ovdi trebaju, jerbo su Ogulinci razigrani kaj dica, pa jim treba delat igrališta.
Gospon Paušić ki nosi predugačke lače kaj i Ive Vučić, pa mu se vuču po cesti i tako pokaževa svimi kako je grad lip i uredan, da se za svoje lače niš ne boji, bil je malo umereniji , jerbo se samo boji da nebi slučajno ki mislel da moru poglavari poslušat još kega osim Ivete i Bege, i kad su to smisleli, to bi morali i naredit, a drugo kaj čeka na dovršenje a spas je za Ogulin opće ni važno. Kad bude poplava onda će se ić skijat po Kranjćevki a nas će ostavit da se skijamo po vodi smrdljivoj i zasranoj jerbo ni kanalizacije i svaki put kad izajde poplava onda je cel grad jedan veliki zahod, ali to ni opće važno, važno je da narod vidi da su dreki uvik na površini i da to imadu na umu. Mladi Tmburak bi til nekoje stvari u politiki i oko incijative većniki bivših iz HSP-eja na čelu sa jurišnikum Bokulićum raščišćevat, a bilo bi mu bolje da nekoje stvari raščišćeva tamo kadi je puno hitnije. Uvik se niki ki ima svojega čišćenja javlja za raščišćevat ništo drugo, kaj je malo dalje od njega..! Ali mu ne zameram, puno jerbo ni se napalil da bi se hitno delalo novo snježno carstvo za nasanjkavanje naroda i Ogulinci.
Zač je tako hitno delat tu Kranjčevku i kemu ona to tulko treba? Mije misli da je niki pal u kakov deficit pa se mora namirevat novcimi od naših porezi, samo da se ništo dela i troši.
-Janjo, kakov je to stvaralački posal delat petonirane kockice, morda su oni radi Semerloka išli rušit Park, da im prodadu te kockice i sad će ih još za to odlikovat i dat im priznaje, pa kuliko sam ja tega popetoniral i moji iz Izgradnje pa ni fala a kamo li kakovo priznaje? Niš nimam protiv Semelroka, ali on je jedan jak profiter kaj dela samo ono kaj njegovem gazdi nosi zaradu a ne onimi kaj rombaju i valjda zato triba dobit priznanje za stvaralački rad. A Bože oslobodi kaj se to dela, niki nikega niš ne pita van se dogovaraju meda se kamo će s našimi novci i onda ovi kaj nigda niš nisu delali odmah dižu ruke i još divanu kako je to dobro, celem narodu za inat. Dal opće ki zna kaj je to stvaralački rad u tem poglavarstvu?
-a Mije moj, dobro si se tega sitil, meni to ni na pamet palo, to bi tako moglo bit! Za ove druge predloge me opće ni briga, neću pojt gledat to predavanje priznanji, zač mislim da da to nisu priznanja od grada i građani Ogulina, van od užeg kruga HDZ-eja, i zato se u to neću mešat, da sam ja u pitanju ne bi ga tila ni primit, zač bi me bilo sram.
Nemojte slušat Bokulića, dr. Tripala i Regetaša, nemojte jer i oni su isti kod i vi, ali pitajte malo bil to opće ki od naroda til? O nikemu kaj je do sad bil u politiki i bivšoj i sadašnjoj ne mislim lipo, ali je ideja da se održi referendum po tem pitanju jako dobra. Ja kulko god sam ljudi pitala i divanala o temu, svi su uvik rekli, -Pa neće valja ić to delat?
Kad sam malo gledala ki je sve u tem poglavarstvu i kaj oni tamo odlučaju, pa još čula Begu kaj je divanil na tem poglavarstvu odma mi je bilo jasno da niki to ni ni slušal jerbo i ni imel kaj čut, jer takovo obrazloženje ne bi ja dala svojoj nučici, kaj je tek počela u školu,a ona ga ne bi ni primila .
Dobro je da je Nešo prenesal kako se i kaj divani na tem poglavarstvu, a sad mi je i jasno zač se ono ne pronosi preko radija, jer da ni ovi par većniki iz opozicije nebi se smilo ni sjednice veća prenosit jer bi to bila čista sprdačina. Još im u poglavarstvu fali gospon Pukovnik kaj uvik ima za temu nekakove ceste i pute, groblja, kajda minja Ivetu na poslim derektora u Županijskim cestam, onda bi to bila reč Gospodnja.
Sve si mislim da ćedu ga brzo det tamo umesto kega drugega ako zine ku reč. Ki je još tamo, a naša slikarica i direktorica škole, od ke baš ni nikakova inicijativa o nićem potekla, samo sluša kaj bi trebalo naredit i mala i prodaje slikice, i promiće svoju nekakovu posebnu školu slikanja po celemu svitu, ona će sve izvršit kaj god naumu njezini stvoritelji, dobro je imat takove oko sebe, muči i diže ruku i to se bogme lipo ispati. I čudim se da se gospa Višnjić ni oduševila Kranjčevkum, njoj je to hitno potrebno jer vidim da se bavi fitnesum pa bi joj morda to bilo jeftinije. I tako, naš Tone ni niš prozboril zač zna da će seguro morat na sanjčica vozit Ivetu i Begu uzbrdo, oni će se spuščat nizbrdo a on će letit za njimi jerbo se neče dositit da se more spustit sa sanjčica doli i dočekivat ih da ih vuče opet prema gori, zač se seguro nezna det na skije i skijat, kako god ni znal ni zaigrat nogomet ni u jednem klubu žnj lige. Od Turkovića, Vukadinovića i Hudurovića ni ni crne ni bele o Kranjčevki, morda nisu sportsko-rekreativni tipovi, ali oni delaju više med večnikim i u veću, a i kaj bi divanili kad Ive točno zna kaj Bego mora delat a oni i onako nemoru niš, pa bolje da sve bude fantaaastičnnnnnoooooooo…..,a u gradu Bajki sve i mora bit fantastično.
Ajte bok !
Janjo, 4. rujna 2008.
