HRVACKA PRIČA
Dojde ščera moja Mare k meni popit jutarnju kafu, i ulovi mi divnit kako je preščera njezina snaha dobila slom živci, da je pukla, da neznaju kaj će naredit, ćel je doma umirivit il će pojt kakovim psihijatrim ili kemu, da je trun smiri.
-Mare, kaj je bilo, ni vajla Jurica kaj naredil, kakov cirkus, imaju troje dice, ki se je jarac dogodil?
-Ma ni, Janjo moja, Jurica ide delat još uvik u Tounj, ni već bog te pitaj otkad dobil kune, ali kaj će, mora pojt, morda se to kako sredi, išče na sve strane ali niki posla ne daje…
-Znaš da je ona delala pri onemu u dućanu, ( ja neću reć kojemu , ali prepoznat će se sam ), od veljače ni dobila plaće, u četvrtem ga je misecu molila da joj da otkaz da projde na burzu, pa bar ništo bi dobivala, ali on ju je lagal, danas će jutri će i tako , fala Bogu doguralo do skoro kraja šestega miseca. Ni niš uplaćival, konda ni ne dela, a mi smo im davali dok smo imeli ratu za taj polovni autić, zač nemore ni Jurica bez auta pojt na posal, a i nju onda otpelja na njezin posal. Nima još puno za otpaltit ali mi više nemremo, a treba mu tehnički i registracija. Ima minus na banki, zać smo mi uplaćivali za tu ratu, a on dost dugo vredi, Ošla ona da bi zela tri čeka da registrira auto, a oni joj ne daju jerbo, nima uplat od poslodavca već od veljače, stisla je zube i ošla doma, a kad je prag pekoračila, počela je plakat, čupat kose, jaukat, konda je sve pomrlo?
Ja sam se prestravila, noge su mi se zaledile i ruke onemoćale, Ive ja došal iz vani, i viće, na nas, ki nam je jarac, još nikad se nismo popravdale, kaj joj delam, a ona stisla rukam trbuh i joči, joči…
Kad smo je nikako umirili , onda nam je ispripovidala o svem, a suze kaplju konda je sve svoje izgubila? Pukla je sirota..?
Jurica je, kad je došal doma, s njum divanil, nima snage ni jist, samo veli da je sve boli, ljubi dicu i baca se u postelju..Zval je kašnje njezinega «poslodavca», javil se iz bertije, i rekal ako ima kaj da dojde k njemu u bertiju da to raščistu. Ošal je i vrnil se za dvi ure nazad, da mu je obečal da će je u utorak odjavit kaj višak i da će na burzi dobivat ,neznam kulko dugo ni kulko novac, a za ove plaće kaj ni isplatil, da će videt ako bu kaj mogal, u ratam joj na ruke isplatit.
Žal mi ju je moja Janjo, dobra i vridna, taj je posal držala ko zlato, uvik u strahu da ne zakasni, prala dučan, slagala, delala kaj god je tribalo, tužili bi ga al nimamo novac za sud, kaj moremo, nek se nažere te muke, Bože daj mu zadnja to bila…
Lagano, lagano, po Marinem licu kanile su suze, a i meni Bog i bogme, dela sam samo ruku na Marino rame i rekla joj ali slaba je to utjeha, ni vajde od moje rići.
-Mare moja, i mojoj je dici slično tako, svi se borimo kako moremo, ali ja se ufam da ćemo nikako to preživit, od onega kaj smo uvik divanili «Bog ne plaća svake subote» niš, njeva propast nas neće spasit!
Plakale smo obadvi, u miru i tišini, ja sam skamarila 4 čike sa đezvum kafe i još smo ondak jednu skuhale i pile, i divanile o svem i svačem, al nismo niš pametnega u svemu temu mogle najt, kaj bi mogle reč njezinoj snahi da je malo pušći muka njezina.
Mare je isto utučena, slaba je utjeha da je i drugim tako, nimaš kaj reć i nemoreš nikem pomoć jerbo si i sam skučen i nikakov…!
Bojim se da tuj doktori i nauk nemore puno pomoć, još se ni dgla iz postelje, dica skaču oko nje, Mare spremila kokošju juhu, morda će zeru pojist?
Kuliko je takovih pri nam, da ni neznamo za nji?
Kuliko će dugo gazde gazdovat a radniki gladovat, kuliko će familij vridnih i poštenih propast, kuliko će dice gledat matere u posteljam, kuliko će dugo, zreli zdravi ljudi sa familijam čekat na pemzije svojih roditelji, kuliko ?
Ki more tuj reda naredit, nekoje familije imaju sve zaposlene u državnim poduzećim, cele familije delaju u državnim firmam, po 5 i 6 njih, a Mare i Ive morali bi sad ranit 7 duš, od svoih 1500 kun, kako?
Ovo je istinita Hrvacka priča, ovo ni bajka, ovo je život, onakov kakov je, kaj će bit dalje sa svim tim pričam, ova visi u zraku, nima kraja, morda nekem ona ni strašna, ali meni je, i to baš zato kaj nima kraj, nima razrešnicu, stoji kod strašilo, kod tuča ka se sprema a ne pada, znaš da će sve šundrat a nemoreš je zaustavit?
Morda je nećete svi razumit i reč čete da tuj nima niš neobičnega, i nima, ovo je svagdašnja muka ku niki more izdurat a niki ne, mene od ove priče boli duša i zato sam je ovako, točno kako se odigrala vami napisala.
Ajte bok !
JANJO, 20. lipnja 2009.
Potlje svega: Na moj zadanji uradak ni bilo komentari, fala za ona dva kaj sam ih dobila, ( a za BB sam se već počela sekirat zač ga ni tako dugo a ni Ive ni niš napisal) to neće bit razlog da prestanem pisat, ma da bi to nekoji tili, dokle god se kolobroj na mojem bloku okreće dotle ću pisat kaj mislim!
Fala i bok!
