Duhanski Geto… ….
četvrtak, 26.02.2015.
Me je negdo pital da kaj je to .Geto.. i kak zgledi.. Praf za praf.. ne zgledi nikak.. barem denes.. negda morti još i gorše.. Po pravici Geto je nekakšni gradcki firtl okol kojega je visoki zid..a vse kaj je znutra je posebne namjene.. narafski za stanovanje..
Velke fabrike.. su negda zapošljavale velki broj radnikof.. al kak je te radnike trebalo dolifrati z bogtepitaj kakšne vukojebine.. onda je njih negde trebalo smestiti…. A kak je to bilo v doba Kraljevine.. to je značilo da kralefska vlast to mora delat.. Drugač bi se reklo da su to bile državne hiže za stanovanje radničke klase.. a nekaj kasnejše je to moderno nazvano .. Radničko naselje .. Kak i po celomu svetu..tak je i v Zagrebu zgrađeno nekolko takšnih Geta v kojima su zpočetka stanovali samo radniki pa i oni koji su imeli svoje familje.. Jer gda si čul da je kakšni dotepenec došel v naš Zagreb..a da za njim ni došlo pol sela.. kak negda tak i denes..
V našemu Gradu su tak bili zgrađeni ti radnički sirotinjski firtli.. opasani velkim zidom.. kak da bi nutra ofce pospremal.. Pa je bilo najpoznatejše i prvo naređeno Pupinovo naselje na Kustošiji.. pa gda je Kraljevina zgradila železnicu..mam je nastalo i železničarsko naselje.. prvo v Jagičevi vulici..posle pa na stari Trnjanski cesti.. pa Paromlinsko naselje na Paromlinski cesti .. pa Plinarsko naselje na Kanalu.. pa Magazinsko naselje na Selski cesti.. pa na Borongaju.. Žitnjaku… i bogtepitaj gde sve ne po Zagrebu… Nekaj od tega vsega je več porušeno.. no velik tega je ostalo i denes zgledi skorom jednak kak i pred dvjesto let…
Zpočetka su te ogromne hiže bile samo dvokatnice..pa kak se pokazala velka potreba za stanovanjem.. su se dozidavale vse do četrteg kata.. I vse su bile pune ljudi kak košnice pčela.. Al to je bilo tak zgrađeno da oni Kralj ziher nebi nutra nit svog cucka pustil da živi..al ljudi su morali.. Ja sam još kak klinac bil v nekolko tih Geta i videl kak te hiže znutra zglediju.. Ovak…
Do drugog kata kamene štenge..dalše drvene.. na vsakem katu po sredini dugački gajnk.. bi se reklo.. hodnik.. a z leve i desne strane teg gajnka sama vrata jena do drugih.. To su bili ulazi v luknje v kojima se živelo.. A živelo se od podruma pa do tavana.. Dakle.. z jene strane gajnka su bile samo kuhinje.. male luknje z šparhetom na dreva al vuglen… nekakšni drveni stol.. na njemu hamper za čistu vodu.. a pod njim kibla za zamazanu vodu.. V to doba još ni bilo vodovoda..a gdo bi ga i dal toj sirotinji.. Z druge strane gajnka su bile sobe za spanje.. manjša familja bi fasovala jenu sobu i kuhinju.. vekša familja dva sobička i kuhinju.. I od tega se ni moglo više imeti pa makar bilo i deset duša.. A oni radniki kaj su bili samci su imali male sobičke skroz gor na tavanu.. bi se reklo.. podkrovlje.. je to zgledelo kak v samostanu za fratre.. mala luknjica v koju je stal krevetlin i jen stolec i mala pečka v vuglu.. Tu kuhinje ni bilo… V ono doba v početku su vodu imeli v bunaru al pumpi na dvorišču i vsaki si je v kibli nosil kolko mu je trebalo.. A šekreti su bili njih deset z drva naređeni.. znaš ono.. srčeko na vratima.. na sred dvorišča spredi hiže.. Narafski.. sralo se v rupu v zemli.. moreš si zgruntat kak je to zgledelo.. I dok su gospodcke hiže po Gradu več imele lepe badecimere pa i one bideje.. ovi siromahi su mogli samo šmirglat rit da bi im se bolše sijala..
Gda je nekaj kasnejše došel vodovod i kanalizacija vsaka od teh hiža je dobila po jen vaserlajtung na koncu gajnka.. pa i dva šekreta takaj pokraj teg vaserlajtunga.. pa su tak ženske imele olakšanje kaj nisu za kuhinju morale z dvorišča vleči kible z vodom.. A v šekretu su bile samo one školjke za sranje i pokraj njih kibla z vodom.. Ni bilo kotliča za sirotinju..
Vse ovo kaj ja zdaj opisujem je od početka pa do denes samo nekaj malo zmenilo izgleda.. Ja se sečam tega kak je zgledelo pred pedeset i više leta .. Tam v Trnjanskom Getu su živeli nekakšni ljudi kaj ih je moj tatek odnekud dovlekel i tam im našel stanovanje.. a i često sam z mojom bakom.. plemenitašicom.. išel na Selsku cestu kod nekakšne stare ženske kaj je negda bila služafka v naši hiži..pa joj je moja baka vsako malo nosila špeceraja..
Takaj sam zalazil i v Paromlinski Geto jer je tam stanoval jen moj šul kolega z osmoljetke.. a dotepli su se v Zagreb negde z Kosova.. pa sam ja tak mogel lepo videti kak se sirotinjski živelo v tim Getima v moje vreme..a kak je tekar težko bilo još dalko prije..
I makar su v tim Getima bili največ radniki z obližnjih fabrika.. država je v ta Geta trpala i raznu sirotinju..skitnice..dotepence vsih fela.. pa je to bil celi velki cušpajz od stanovanja.. Navek bi se ženske svadile okol vaserlajtunga.. jer je na jen pipac z kiblama čekalo i po deset njih.. a da ti ne velim kak je to zgledelo na tem šekretu.. Vglavnom je bil saf zasran.. narafski ni bilo daske.. zascan po celomu zidu.. a največ pa začepljen jer su ljudi nutra srali.. hitali smetje.. rit si brisali z cajtungami.. a je bilo oneh kaj nebi z kiblom za sebom zalijali.. Po danu još nekak..al po noči nikak….
Štroma je bilo al v vsaki luknji samo po jena slaba žarulja..a oneh utičnica ni bilo jer se z početka ni imelo nit kaj za fštekat.. Ni bilo teh aparatof kak kasnejše.. Šparheti v kuhinjama su se kurili na drva al vuglen..a šupe su bile na dvorišču.. Do denes se to more videt v Magazinskom Getu na Selski cesti ..
No.. treba znat da makar je Kralevina..al država tu ljude razpoređivala.. vsaki kaj je nutra stanoval je moral to stanovanje platit.. Ak ni imel.. bi ga žandari lepo hitili van.. Pa i dan danas se tak dela.. samo se onda kazalo da su nekog zlifrali van..a denes ga ovršiju al deložiraju.. vrabec ga dal…
…………Pa kak je vreme išlo.. vse je manjše ljudi stanovalo po tem Getima.. zapraf.. gda bi negdo prešel.. sused bi mam provalil nutra i proširil sebi stanovanje.. Vse dalše i dalše.. ljudi su si sami razvlačili štrom.. vodovodne i kanalizacijske cjevi.. malo su si porihtavali zide i podove..
Pred dvajset let gda je država prodavala stanove .. i po tim Getima su stanari to mogli odkupiti za sitne peneze.. Tek onda je nastalo malo bolše uređenje vseg teg..al slabe vajde.. Gda nekaj nigdo ni obnavlal sto let..onda si moreš zgruntat kak je to..
Več se letima pripoveda da z teh Geta buju vse ljude preselili v druge stanove a ta Geta uredili za nekakšne druge namjene..a del tega i porušili.. No.. nikaj se ne pomiče … Ljudi još navek nutar živiju i čekaju dal se bu im nekaj zrušilo na tikvu..al buju propali čez pod ……..
Makar je prva manufaktura za preradu duhana i proizvodnju cigaretlina bila v oni lepi palači na Kazališču v koji je denes Pravni fakultet.. viš.. to malo Zagrepčancof zna.. ovo tu v Klajičevi vulici je negdarnja Fabrika za preradu duhana.. kasnejše.. Tvornica duhana Zagreb.. I ta je dalko prek sto let preživela makar se nutra več skorom deset let nikaj ne dela.. vse je napušteno… zapušteno..propada..V međuvremenu je v dvorišču zgrađena i nova moderna fabrika cigaretlina..al ni nje više ni.. su je pred pet let zrušili i denes je na tom mestu nekakšno ogromno stakleno čudo.. Staru fabriku današnji vlasnik nesmije zrušit jer je to kakti zaštičeno .. Nutra bi trebal posle obnove bit nekakšni muzej..al gdo bi to znal kaj zapraf i gda bu..
…………….……..Nooo.. sam štel zpripovedat kak je bilo dok je ta fabrika delala.. Dole v prizemlju su bili velki stroji kaj su dopirali skroz gor prek prveg kata… Stalno su se nutar vrtele te mašine i čez te obloke si z vulice mogel videt kak se cigaretlini koturaju po nekakšnim trakama.. Ženske su z rukama filale škatule i pakirale v one ogromne pakete.. Narafski..kasnejše je to vse ..se reče.. automatizirano.. Ali.. mi fakini kaj smo več navelko dimili..a nigdar nam ni bilo dost teh cigaretlina.. dočuli smo da se tu more dojti i žicati radnike da nekaj hitiju čez te obloke.. A na oblokima v prizemlju su bile i denes su železne gitre.. I gda bi došli spodi obloka..smo tem radnikima..a največ su bile ženske.. pokazivali da hočemo raufat i nek nam nekaj dobaciju čez blok.. A ti obloki su bili odprti i po letu i po zimi kaj je nutra bilo fest vruče a i peklo je od duhana za oči.. Negda dok je stara fabrika delala..cela Klajičeva vulica je mirišala po duhanu.. A gda ti nekaj sto let miriši..onda ti najemput začne smrdeti..pa su se tak stanari Klajičeve vulice fort bunili i tražili da se fabrika nekam preseli… No.. fučkaš stanare.. Tak bi spodi žicali.. a radnikima nas je bilo žal..pa bi koji d njih onak kakti po skrivečki hitil čez oblok škatulu cigaretlina.. Je to bila ona Drava..al Opatija v tvrdi kartonski škatuli.. Narafski ..onda još ni bilo filtera.. .. Malo po malo.. se pročulo vse dalše med fakinima gde ima cigaretlina kaj letiju čez obloke na vulicu.. pa je uprava fabrike na obloke dela guste železne mreže.. I kaj.. čez tu mreži nit muha nemre a da joj ne zglajzaju krila.. I kaj zdaj.. Ipak se našlo nekaj i na vulici.. najme.. radniki bi čez tu mrežu hitali jen po jen cigaretlin.. pa su se oni kaj su spodi žicali skorom navek tukli za to kaj bi opalo…. Mi fakini više nismo dolazili..kaj..ak nema cele škatule.. kaj bi se z drugim žicarima tukli za jen cigaretlin.. A tu su največ žicali razni skitnice .. bezkučnici i cigani.. Kaj bi mi med takšnima opče delali.. Praf za praf.. mi smo na Zrinjefcu bili kakti.. nobles banda.. navek z penezima .. cigaretlinima i fajercajkom v žepu.. … Al je uprava fabrike to prekinula.. se čulo da vsaki radnik koji bi hitil čez oblok cigaretlin more mam otkaza z posla dobit…..
Tak.. malo sam se vsega prisetil….. bil pa se spominalo….
Serbus …………
ZAFRKANCIJA * * #
