Osnovna škola Praputnjak - photo by Snow-White 09.01.09. (unuka je fotkala bakinu školu)
Moja škola
Uvde san naučil
čitat prve slova
i prve besedi pisat
- igla i -
i on i ti
tu smo sedeli
mići prestrašeni
va prazne glavi
kapalo nan je znanje
kod kapljica bistre vodi
va barilac.
Uvde smo doznali ča smo
ča nan je mat i otac
uvde su nas učili
da je čovik čoviku brat
da život
znači delat i volet
pošten bit
i da je bolje umret
leh svoga roda izrod bit
pa pozabit
zemlju ka te je rodila.
Moje prve misli
uvde su se rodile
kod bele tice
prhnule su
kroz ove poneštri
na prvi let
modri cvet moje prve želji
uvde je cval
prvi put san uvde
bogatstvo razmišljanja
upoznala.
Ako san danas čovik
ako san život živel
ako san umel
zet ča mi je pripadalo
i dat drugomu
ča je njega hodilo
uživat kad je vrime za uživanje bilo
i trpet kad se je zdurat moralo
za se to
ovoj mojoj školi hvala.
Dr Branka Vidas
Moja škola
03
veljača
2009
