SVE JE U BOŽJIM RUKAM
Ja san vam lipo sela u nedelji uz radio Ogulin i slušala kaj će Nešo laprdat sa zastupnikum Vučićom i kaj će mu ovaj izdivanit, da čujem sul se oni kaj primirili, da čujen čel ga Nešo pogladit ki put i kaj će se događat sa Belolasicum, sa plinum, sa poplavam i bila u strahu da ću čut kaj kako velu konkretnega i ki će kaj delat i kad će kaj od tega bit. Mirno san sedela i pozorno slušala, ali moj zaključak je bil da opće niš zapravo nisan saznala. Nešo je lipo postavljal pitanja i neki ki bi bil upućen mogal je morda i ništo znat. Ovo sve moje premišljanje završilo je na čitanju bloka od Radio Ogulina i to pet ili šest puti, i opet nisan niš saznala.
Oko Belolasice ni novac, sad će to bit poduzeće i treba puno papiri i onda će iskat de se da ništo novac za to delat, a čel Vlada dat ili ne to se nezna i to je u božjim rukam kaj i snig kaj neće da pada celu zimu..
Za obranu od poplav se krenilo prije autoceste, i to stoji i stoji i već se bogme i usmrdilo, ali vlada nima pa nima kun za to delat, a nima ni Ogulin i onda čekaj opet poplavu da dobro izajde Jula van, da dojdu sa helikopteri gledat kaj se dogodilo, da obećaju i pušču i to u Božje ruke. A kiša kaj za vraga pada i pada, još more i ovaj misec kulko je kiše voda izajt i nakitit sve drveće oko Jule sa najlon kesicami. Morda će onda EDO (Ekološko društvo Ogulin) imat kakov sastanak i odlučit da napiše kakovu depešu da se kaj pokrene…, ali ako ne more Vučić naprosit ki onda more?
Kaj se Suda općinskeg tiče, imal je još pomagači ki su jako važni, ali ih ni til spomenit, bog zna zač, morda zato zač ni u HDZ-eju, a ja ga isto neću imenovat, morda se sjeti naš zastupnik da nisu on i Vojvodić najzaslužniji za to, ali to će onda kad im to bude pasalo.
Kaj se plina tiče, čekamo ga kaj ozebal sunce jerbo je nafta skupa, a sa drvi puno posla, pa se bojim da će plin dok dojde k nam ili presušit ili bit tako skup da će svi izgubit volju do njega. Još niki ni kulko znam i čujem popisal domaćinstva koja bi ga tila imat, niki ni sračunal kulko bi to kega koštalo i dal ima narod novac za to. Kaj vredi da ga i provedu kroz Ogulin kad se nezna ki će ga zet. A i to poduzeće kaj je zelo posal, još ni ni kramp zabilo, i opet kaj u slučaju Belolasice ni dost papiri poštambiljano i sve je u božjim rukam kulko ja vidim, ali kaj moremo?
Šta se izbori tiče, to je već niki pisal o temu kako je HDZ-ej oslabil u Ogulinu, pa se valja boji da će dobit i onu gladnu bolest anoreksiju, a meni se vidi da je već debelo anoreksija zela HDZej i da će morat provest ozbiljno lečenje i to izgleda da je već i srce zelo, a morda i pluća, pogotovo posle oveg gradilišta u našemu Parku. E, nisu oni svesni tega da ljudimi moru delat kaj će, ljudi mogu i pobić i projt kamo a stabla nemoru, ona su im na milost i nemilost prepuščena, i sad narod dobro vidi, ako bude bil na jednem mestu i glasoval stalno za istu stranku da će nas sve ki smo tako nepokretni i ki uvik iste zakružimo –posič! O tem je malo divanil, jerbo je to bolest njegove stranke i o tem mora kaj pravi doktor mučat, zač se nesmi otkrivat ki je od čega bolan i zač.
Moj Mije veli da će to on rešit, zač se u prvoj stranki u kojoj je deloval prije nego je izbil rat pomagal srcum i dušum da se ta bolna stranka uruši I propade. Praksa je važna u svakem poslu pa i u politiki.
Ako vi morti najdete da je naš zastupnik ništo znal odgovorit našemu Neši Lapdalu , molim vas da mi to najdete kadi je i napišete, morda ja niman pravo, i ja ću molit za oprost. Mi Ogulinci i Ogulinke, nakon oveg divana sigurni smo da je sve kaj se tiče ovih pitanji čvrsto u božjim rukam i ničijim više. Ja san si pomislela da bi morda ta pitanja trebalo postavit i našemu Begi, morda bi on kaj znal reč konkretnega, a ako ne on onda morda naš Tone kaj zna o temu ?
Radio Ogulin nam je zašal u najbolje godine, lipo su to proslavili, nisan sve mogla slušat, ali sam čula kad je gospon Drenšek pozval za gosta svoju čer Sanjicu da mu divani kaj se doma pri njemu kuha, ali ja mislin da je glavna kuhinja kadi on kuha na Radio Ogulinu, od tega bi mogal čovik dobit i prolev a morda i krepat. Zato ću ja dobro pazit da ne kupim njegovu Kuharicu kad je napiše i počne prodavat.
Lipo je kaj se gospa Dubravka sitila zafalit gosponu Dubiću, a to je jako razveselilo mojega Mijetu, zač se nada da će ki dojt i njemu zafalit i donest mu dar kaj je u «Izgradnji» na gradilišti provel 30 godin, prošal u rat i onda kad se vrnil ni našal svoje Izgradnje ni direktora da mu se zafali.
Svi su došli slavit kako je i red, samo Laprdalo i Drenšek nisu, bog zna zač?
Ja čestitam Radio Ogulinu 43.rođendan i želim mu još puno rođendani i puno razgovori
sa našimi političari i drugim ljudimi ki značu ništo u ovem gradu, ali bi tila da u buduće ništo od njih i saznam kaj će bit i kaj će se događat u budućem vrimenu.
Malo san se iznenadila kad sam videla da je od 13. do danas na mojemu bloku bilo tako puno posjeti, pa sam se odlučila pisat i u buduće, ma da iman puno posla i mislela sam do zime prestat. Fala vam na posjetam!
Ajte bok!
Janjo, 25. travnja 2008.
