PREDIZBORNA KOMPANIJA (II)
Rekla san Mijeti da ne spada klat prasce u subotu zač u ponedeljak dolazi mlad i lip čivik u Ogulin i moja Mare i ja ćemo ga pojt vidit. Ma ne, Mije je iz inati zval Ivetu i mi moramo klat, a ja lipo prošla u mesnicu onu Karlovačku, zela crevi i začas finile Mare i ja
krvavice i mesnatice, a oni su ostali trančirat i posložili sve da se dene u pac. Špek lipo srezale i loj i stopile, ima lipi čvarki i masti, velu da ni zdrava, (bogme smo mi svi ki dren zdravi i crveni) i kako vrag ne spi, moj ti Mije donesal još 4 table u 11 ur iz one karlovačke mesnice, jerbo veli da mu čvarki pašu.
Šundral mi je plan, vraga pojil i on i čvarki!
A moja Mare i ja lipo sele u letnju kuinju, zele nože i daske i navile radio, ma kad ga nemoremo gledat kaj sav pošten svit ćemo ga slušat, lipo naložile kozu i padelu na nju, rakiju na stol, kafu u lonac i uživaj!
Lipo smo se zaklenile, da vrag muški nemore dojt k nami dok slušamo lipeg mladeg čovika!
Nešo je vodil kompaniju i sve ga je pital kaj je moju Maru i mene interesiralo, zač smo se već i popravdale radi tega malega!
Mare veli da dica neće imat veronauk u školi i da će se porez na kuću i štalu i na zemlju plaćat i na ono trun novac kaj imamo Mije i ja po banka, a ja san rekla da ni to istina. I, kaj mislite po čije je bilo, po moje, zač san ja pametnija od Mare!
Neće se bogme ni droga pušit i prodavat na kioski kako su rekli, neg će se pomoć toj ludoj dici, a koji zarađivaju na drogi ti će pojt va rešt!
Porez će plaćat samo oni kaj imaju puno novac i kaj su zgrnili na nam sirotinji kule i vile, i Mare i ja smo tako mislele, ali nas niki ni slušal, kad smo divanile?
Nešo je navijal da ovaj mlad Milanović špota HDZ-ej, a ni se dal navuć na tanak led, i još je rekal da imaju biskupi pravo reć kaj mislu i da trebaju reć, samo da baš ne razumidu preveć familije i brak i dicu pa i ne bi o temu morali preveć divanit. Ma i ja mislin isto tako, samo se bojin da ne bi bilo isto kaj pred 4 godine kad su potpisevali kaj će sve ukinit i kaj će sve dat, pa niš od tega, a morti će ovi mlađi poštivat svoju rič, bog bi ih znal?
Tako smo mi pol ure slušale mladega čovika ki ni niš mucal, ni ni bečal, lipo je divanil da ga svaki more razumit i baš nam se i po divanu dopal!
Ma ne bi morti ja ovo pisala, neg će taj čovik ako pobidi reć da nis ni crne ne bele o njem i njegovi rekla, more bit će se najidit na me, a ja nebi tila da se zameran vlasti, svi su meni lipi i dobri i sve ja njih volin, ma mi se čini da nekoji preveć lažedu, a ov je nov pa neznan ćel lagat il će sve to tako bit, a bilo bi dobro da ta bura dojde i radi mesa da se ne začrvljivi.
I tako van je to dico moja prošlo bez mene, da ja nisan vidila tega mladega i lipega Milanovića, nego san ga samo slušala, a dobro je, bar san dost masti natopila i poredila letnju kuinju i sad više do pacanja u nju neću ni pojt, nek Mije okreće meso, i loži pušu za meso sušit. Će skoro i izbori pa ćemo se brige rešit kad se izbroju glasovi i odredi ki će pojt u Sabor.
Ona gospa Milanka puno je lipša od kad ide sa ovin Milanovićon, lipša joj je flizura neg onda kad je isto se sa gosponon Kozon slikala, nekako mi se čini umilnija i mlađa, ma to mora da je ovaj lip čovik nešto na nju deloval, o temu smo Mare i ja divanile kad smo gledale po bloki od Ogulinskeg lista slike, ništo mi je friška i rascvotala, a ni red da vam o temu divanim, to samo moja Mare i ja tako…nemojte mi zamerit!
Ajme, kaj san ja tega nadrobila, moran projt zač će mi Mije leđa nabit, pa ću vraga pojist zač se bavin politikon !
Ajte bok !
JANJO, 19.11.2007.
