ponedjeljak, 28.01.2008.

Dječja reduta

Ko i sako leto ove nedilje je dječja reduta. Po običaju tu bude cela škola tj. većina se maškara. Normalno da se dica spravljaju već unaprijed za taj dan. Tako i mora bit, jer mesopust su svakako i maškare. Neka in uđe pod kožu.
Zanimljivo je da se sako leto za dječju redutu spravljaju i oni najmlađi iz vrtića. Oni su i najslađi. Potrude se jako
puno uz pomoć svojih teta iz vrtića.
Svaka pohvala.






Evo dobil san još slika sa dječje redute, pa evo da ih si vidite. Ima sega, malih mesopustara, sopilaša, vampirica,
male crnkinje. Se nemoren klast na blog, jer je slik jako puno,

nedjelja, 27.01.2008.

Tanac va subotu

Ni bilo se dupko puno ko kad su bili Gustafi, ali je bilo isto prilično puno. Prišli su Zagonjski mesopustari i to u priličnom broju.
A i maškara je bilo dosta. Evo samo jedna slika da morete vidit ča misle ovi iz poglavarstva va slobodno vrime, tj. ča bi vrlo rado bili ili ča su, to prepuštam sakome da sam zaključi.

Noć muzeja

Kako je bila Noć muzeja, i mi iz Novoga smo se priključili toj lijepoj akciji. Točnije bili smo pozvani na otvorenje izložbe našeg prijatelja Branka Kukurina. A slike koje je predstavil na izložbi tiču se mesopusta ili pusta kako se poli njih reče. Kukurin je veliki prijatelj i štovatelj Novljanskoga običaja (mesopusta), ali i općenito tradicija.
Tako se dešava da onog momenta kad pasaju tri kralja, naš Branko krene na put po županiji. Obiđe skoro sako mesto, pa tako i Novi Vinodolski, se ča vidi on zabilježi sa foto-aparatom. Branko, jedno veliko HVALA. Vavik si dobro prišal poli nas va Novi.

BOG i se.

Evo malo slika od momenta kad smo krenuli sa novljanske rive, priko izložbe va Guvernerovoj palači.

petak, 25.01.2008.

Drugo napovidanje dovcen i dovican -"KUSI"-

Sinoć su mes opustari zišli van okolo 23 ure, kako je red po staron običaju. Ko i prvi put, gredu po raskrižjin i napovidaju dovice i dovce za tobožnju ženidbu. Na žalost vavik ima ljudi ki se jade ako ih se napovida, pa onda znaju i proklet mesopustare. Hvala Bogu to je više onako nego za spravo. To se govori samo to kakovi su to ljudi (udovci ili udovice). Izgleda da ti nisu nikad ni bili za ov naš običaj, takove ne bi trebalo spominjat uz običaj.

BOG i se !

srijeda, 23.01.2008.

Milenijsko kolo

Ki ni videl slike ili samo slikanje evo mu prilike. Ovo je bilo za sad prvi put da se ovoliko nošnji našlo na jednom mestu. Tako ni čak ni kad je mesopust. Lipo je vidit to, al' san siguran da ih još ima. Neki su morda delali, neki nisu va Novon, a neki nošnju drže samo kao ukras va vitrini.

Novljansko kolo

Ljetopisci nisu zabiljezili kada se'j va Novom Vinodolskom i uopce va Vinodolskom kraju pocelo igrat narodno kolo ili kako ga danas zovemo Novljansko kolo. Nisu zapisali ni leto kada su stari Vinodolci poceli odrzavat mesopusne obicaje. Prema legendi se tvrdi , da se Novljansko kolo igralo va Novom Vinodolskom i na sam dan donosenja Vinodolskog zakona 1288 leta , i da su Novljansko kolo i mesopusni narodni obicaji vezani jedno s drugim od dolaska Hrvata vavi kraj.

Novljansko kolo igra se redovito sako leto kad je Mesopust , i to tri zapolneva : nediljun , pondiljkon i utorkon. Ali Novljani igraju kolo i za vrime raznih svecanosti. Kolo se igra po taktu ki mu daju pivaci, ki va srid kola pivaju junacke narodne pisme , o junacima naseg naroda ki su se borili za slobodu. Pisme se pivaju va osmercu . Novljansko kolo pozna tri koraka : «arbanaski» , « senjski « , « poskocicu «. Kad se pivaju junacke narodne tada u kolu pivaju samo odabrani pivaci va kolu , a kad se pivaju bugarstice , o zenidbi kneza i bana Pavla Subasica , tada u kolu pivaju si ki su va kolu pa i gledatelji . To isto vredi i za pisme ljubavnog karaktera , one se zovu «curumbela».

Novljansko kolo je ponos sih Novljanih , pa ni cudo da ovo kolo igraju si Novljani , i mladi i stari . S kolena na koleno se pripovida da je kolo igral i vodil ga i sam ban i knez Nikola Frankopan , kad bi se nasal va Novom. Novljansko kolo igral je i vodil ga i ban pucanin Ivan Mazuranić. Redovito se utorkon va kolu piva «Agovanje» , prvo pivanje Mazuranićeva epa «Smrt Smail-age Cengica» ki'j prikladan za pivanje va kolu.





Pivači Novljanskog kola
Oko kamenoga stola
Sa pivanjun ritam daju
Sa igranjen ne prestaju
Oko njih je kolo velo
Va njen skoro mesto celo
Štuju se junaci slavni
Običaji bate davni.

(Gordan Šamanić)

utorak, 22.01.2008.

Prošlost i Budućnost

Ovdi vidite dvi slike, na jednoj su stari jetikavci, drvojidi i kako se ne, a na ovoj drugoj je naša budućnost va semu, a pogotovo va baćenju mesopusta.

Svaća

Moramo malo bacit oko i na svaću. Na ovoj sliki vidimo novljansko-zagonjsku konbinaciju. A kad san već kod toga puno zagonjana je više za Novi nego neki rođeni Novljani. Za mene je Novljanin saki ki već dugo živi va Novon, živi za Novi i još k tome bati naše običaji (ali ako je zbog toga zaboravil običaje svoga kraja taj sam ne zna ča je, ni odkuda je.).

BOG i se.

Mlada Mesopustova (Mali meopustari)

Odlazak po mladu

Evo pa malo pogledajte kako je izgledala mlada malih mesopustara. Saki ki je upućen va Mesoput vidit će da dica nastavljaju tradiciju, dok je njih Mesopust sigurno neće propast.




Va domu mlade

Kad se pride poli mlade onda'j običaj da se svaća posluže sa pićen i sa fritima, tu svaća pivaju i čekaju da se mlada pojavi. Stari svati se jade i sprdaju na se i sašto. Normalno ko i sagdi, susedi pridu vidit ladu kad gre iz svoje kuće.




Svaća va dvoru poli mlade, momenat za slikat.


Na putu prema Zakonu (gre se matičaru).

Ko i na pravon piru, Mladu pelju kumi, a Mladoga prve divice (kume). Bandiraši gredu ispred sih i ponosno pivaju i mašu za Hrvatskom trobojnicun. Meni osobno je vavik najlipše bilo kad se pasa kroz onaj uski prolaz poli Sekule, cela svaća bljesne u punom sjaju. Gledajuć sa place prema Sekuli, slika je ništo najlipše ča gledaoc more vidit.




Svaća na Zakonu (kod matičara)

Kako je na pravon piru tako je i ovdi. Se gre po ustaljenom običaju. Najprije mladoj i mladome matičar reče ono
ča ih sleduje, a onda ih pita da li ti Jurja uzimaš Valentina i obrnuto da li ti Valentino uzimaš Jurju. Nakon potvrdnih odgovora sljedi poljubac mladenaca.





Glavni akteri: mladi i mlada, kumovi i prve divice

ponedjeljak, 21.01.2008.

Mlada mesopustova-2008.

Uz Novljansko kolo i mesopustarske obicaje pojavljivaju se i mesopustarski stari svati i mlada mesopustova.
Pozivanje sih mjestana na pir «mesopustove mlade» vrsi se kao i va davna vrimena, pa Novljani u tim prilikama pozivaju: «Mi se zenimo. Imamo mladu. Pridite knami na pir. Bit će veselo. Igrat će se kolo, a mladost će se natancat na mesopustarskom mladinom tancu do mile volje.»

Svadbena svecanost «Mlade mesopustove» odrzava se za vrime maškara, iza prvog cetvrtka u nedilju kada j va Gradu Novom Vinodolskom praznicko raspolozenje. Na kucami «mladog i mlade» ponosno se viju hrvatske bandire , na cijim se kopljima nalaze kolaci, baškoti, narance, jabuke, broskva i mirlin. Novljanski Mesopustari od ranog jutra vrse pripreme kako bi se dobro ispalo . A kao i vavik pol svace ce biti obuceno va muske a pol va zenske nosnje , ovisno kakovu ulogu imaju va svadbi. Kao i na pravoj svadbi tako i na ovoj, ima vise uloga.

Mladi je inače advitor mesopustara, a mlada je jedan od mesopustara ki ima najnjeznije crte lica. Kumovi su prvi i drugi kapetan mesopustarih . Oni su obuceni ko i mladozenja va crnim odijelima ( frak ) sa cilindrima na glavi. Zatim se javljaju ko glavna lica predvodnici svatova – bandirasi, i to jedan od mladog a drugi od mlade. Glavne zenske osobe na svadbi su prve divice obucene va svecanu zensku narodnu nosnju. To su obicno kasiri iz mesopustarskog drustva. Osim njih tu imamo i sopilase ki sopuc va sopile sakupljaju i privlace spomenute i vidjenije svate, pa zatim predvode svacu va povorci oko grada .

Jednu od glavnih ulog imaju stari svati , roditelji od mladenaca , to su mesopustari ki u mesopustarskoj muzici sviraju veliku trumbetu i veliki bubanj.

Stari svat , otac od mlade , krene nedilju oko 10 ure jutro kroz celi grad prema kuci od mladog kadi ga doceka stari svat , otac od mladog. Onda njih dva skupa krenu kroz grad sakupljat svacu . Stari svati su obuceni va starinskoj narodnoj nosnji, te umjesto jecerme nose starinske kozuni od ovcje vune , imaju na sebi tkane gace, te bele domace platnene kosulje, za pason nose prace-ćemer, ki im sluzi kako za oruzje, tako i za duhan kesu. Na glavi imaju starinske subare od ovcje vune, jedan belu, a drugi crnu. Za ovu priliku imaju pripremljene duge brki i bradu do pasa, kako ih mjestani ne bi lako prepoznali. Puse starinske lule. Na ramenimi svaki nosi svoju ponjavu-biljac. Va rukami imaju barilac pun vina , koga putem nude sakome. I tako stari svati obidju tri put stari del grada Novoga , bas onako kako su nekada hodili u stara vrimena oko zidina ka su opasivala Novi Vinodolski. I dok tako gredu okolo grada zijaju razne sale na racun mjestana , ali najvise na svoj i na racun mladenaca .

Kad ostanu bez vina odu va najblizu kucu i natoce barilce, jer ipak je to dogadjaj ki se obavlja na cast celom Novom Vinodolskom, pa svi rado va tom ucestvuju. Niki se ne vrijedja na razne sale i dosjetke , dapace za Mesopust je vrime da se neke stare zavade izglade a poneka prekinuta prijateljstva da se opet uspostave. Nakon ča obidju se ča se mora obić, gredu poli mlade kadi ih svaca ceka. Onda si zajedno gredu na « zakon » -kod maticara, da sve bude kako treba i po obicaju. Iza toga se gre slikat , jer se mlada mesopustova ko i saka druga mora slikat. Nakon slikanja se gre uz pratnju sopila i pivajuc prema Zdencu. Tako pivajuc pridu na Mel pa oko «STUDENCA» igraju kolo pivajuc ljubavne pisme , a zdenac darivaju sa jabukom punom novaca. Kad se okrenu oko «Zdenca» tri-cetiri put, onda krenu na placu kadi pocnu Kolo igrat. Kolo se igra do dugo u noc.

Sve ovo ca danas dozivljavamo kao mesopustni obicaj, moramo znat da je to nekada bil svakodnevni nacin zivota.



A vidite ove Stare svate. Baš kako su i nekad bili naši dedi i oci, Nahodili su se, nazijali i povrh sega i napili.

nedjelja, 20.01.2008.

Friško rastavljena

Beli je totalno lud za maškare. Kad pride mesopust on samo čeka da krenu i tanci.To je njegovo vrime, njemu ne triba niki, sam je sebi više nego dovoljan za omaškarat se. Neznači da se neće i va koj grupi omaškarat. Vavik ima vrlo provokativne maske, a si ga obožavaju
Isto tako je bil i sinoć na tancu, za popišat od smiha. Govore stariji, ki poznaju njegove predke, da su valjad i dedi bili za smih začas napravit.
I na kraju moran priznat da je Beli jedini ki se vavik sa posebnim guštom maškara, to mu je šlo va krv i on tu ne more ama baš niš. TO JE JAČE OD NJEGA.

BOG i se.

Subota_prvi maškarani tanac

Konačno je prišal dan da se gre va Dom na tanac. Hvala bogu prišlo je jako puno maškar i drugih gostih na tanac. Vjerojatno su za to najzaslužniji GUSTAFI, ali nema veze glavno je da se tanca i zabavlja. A zabava je stvarno bila vrhunska, Gustafi nisu stajali sost. Štimung je bil pravi. tancali su si, iako je najviše bilo mladih.
Baštardi su bili va svon elementu, non-stop su tancali i skakali onako obučeni va Deda Mraza. I normalno angažirali su se oko tonbule. Evo da malo vidite kako je bilo.






Lipo ih je vidit ovako črljene, a dobra je i ova naša doktorica i njezina kunpanija, pravi komadi. Samo ih moramo još oženit.

BOG i se.

petak, 18.01.2008.

Baštardi

Koliko vidim i naši Baštardi su već daleko odmakli va pripremama za maškare. Ili ča bi se reklo : Za RI. Ali neka, glavno je da se maškaraju. Koliko se god nami to dopadalo ili ne dopadalo oni su za maškare i to vavik. Iskreno ni ih samo nedilju kad je RI-karneval, ali se ostale dani su tu i kad se treba maškarat i kad treba poć na tanac va Dom. Još ništo, si ki misle prit na tanac va Dom dolaze tek oko 10-te ure, a BAŠTARDI su tu već na sedmu/osmu uru. Po potribi i ranije zbog organizacije samog tanca ili tombule.

Kad san već spomenul organizaciju tancih tu nema do Baštardih i naših Novljanskih vatrogasaca. Tek tad se klapa kako treba. ipak su vatrogasci najorganiziraniji va ovon našen staron gradu.

BOG i se.

Pivači_prvi četvrtak

Pivači su se po običaju sastali va maloj sali, jer treba vježbat i hvatat kondiciju za kašnje kad pridu glavni dani kola. Tu uz njih su i redoviti i stalni gosti, ki zajedno sa njimi pivaju, popiju, pojidu,sopu ali i pomažu oko same organizacije. Oni su isto tako važni. Uostalom tu pridu i sponzori, ki sponzoriraju pivačin piće, hranu i drugo ča teba. Malo ih je poremetila rukometna utakmica, jer ih je puno ki su sportski nastrojeni. Ali ipak niki ni ostal doma, nego su si prišli na pivanje. Ipak je to sad glavno.

Prvo napovidanje dovcen i dovican

Konačno se i to dogodilo, da su veliki mesopustari šli van na napovidanje. I to va velon broju, a kako sami pripovidaju bit će ih još i više za one glavne dani. Se va semu bili su dobri iako pojedini inštrumenti i nisu baš na pravoj visini kako bi trebali bit. To će se vrimenom popravit, ča ovisi samo o njimi i njihovoj vježbi va mesopustariji.
Deški su ozbiljni i se delaju kako je vavik bilo. Samo napovidanje su obavili kako treba, bez grešaka kakove se znaju dogodit za tu prigodu. Bitno je da se informiraju ki je umrl,ki je dovac ili udovica i tko dalje.


Mali mesopustari su isto tako šli van na prvo napovidanje dovcen i dovican, samo ča oni gredu malo ranije.
Tako da su izašli na sedan ur (19.00). Si ki su ih videli govore da ih je bilo oko 40-tak. Čovik jedva čeka da vidi tu dicu ka nastavljaju Novljansku tradiciju MESOPUSTARIJE. I oni su obavili se kako treba, napovidali su na sakom raskrižju udovice i udovce.

JEDINA RAZLIKA IZMEĐU VELIKIH I MALIH MESOPUSTARA JE TA DA SU VELIKI SU RASTOM VELIKI,
A MALI SU JOŠ KLINCI.
SE DRUGO JE ISTO: OBAVLJAJU SE A I SOPU BAŠ KAKO TREBA.

BOG i se.

četvrtak, 17.01.2008.

Prvi četvrtak_T U S T I_2008.

Kako vidim mesopustari su se već spravili, i ima ih dosta. Zoge su prve pale, vjerojatno se već zna i ki su kapetani i ki je advitor. Jer već ovu nedilju je Mlada mesopustova, pa se mora znat ki je mladi i kumovi.

Spravili su se i mali mesopustari, a njih je pogotovo jako puno. Čul san da je kod njih bilo velikih muk ki će bit obučen va žensko i pogotovo va mladu.
Dica ko dica poslušaju na kraju starije ki ih svetuju. Samo ča je tu bilo i suz i to velikih, jer neki jednostavno nisu oteli bit obučeni va žensko. Valjad iz straha da se ne bi ¨stvarno¨ pretvorili va žensko.
Ča se tiče malih mesopustarih, moran priznat da koliko god dica vole bit mesopustari ipak jako veliki teret oko sega toga nose Danijel Polić, Velimir Piškulić-Arbica, Zoran Krišković, a tu i tamo im još ki pomore ako vrime dopusti.

Večeras je prvi četvrtak, kad mesopustari gredu prvi put van na napovidanje.
Napovidanje dovcen i dovican.
Novljani će moć vidit ki su mesopustari i kako sopu štrumente.

Bog i se.

nedjelja, 13.01.2008.

MESOPUST_2008

Konačno je danas zvanično počel Mesopust_2008, tj. danas u se na poziv Gradonačelnika Grada Novog Vinodolskog prvi put sastali pivači kola i si ki gredu vati krug: sopilaši, mandatar,auditor, mat, otac itd. Sih zajedno nas je bilo va Maloj sali oko 40.

To je se jedna velika tradicija, ka traje nekoliko stoljeća

Normalno je da smo počeli sa Mantinjadun (zvanična i nezvanična himna Grada). Ali valje iza toga počelo se pivat na tanko i debelo, pa pisme Novljanskoga kola (junačke narodne pisme, pa red sopila - red pisme.)

Tu vavik ima mesta i za puno viceva, zajebancije, i ostalog ča gre uz to. Kraj jednog Bugarina, Mirića Salate ili Šamanića nemorete dugo bit ozbiljni va društvu ko je spremno na saku zajebanciju. Budite bez brige, si ostali se i te kako nadopunjuju va semu tome.


Za sad toliko od traviceisusura, bit će još toga a morda i slika.

BOG i se!
(ča bi rekal Dorijan Sokolić- Šarac)