< | veljača, 2008 | > | ||||
P | U | S | Č | P | S | N |
1 | 2 | 3 | ||||
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 |
Dnevnik.hr
Gol.hr
Zadovoljna.hr
Novaplus.hr
NovaTV.hr
DomaTV.hr
Mojamini.tv
O svemu ča mi pade na pamet dok pišen.
Najviše o ovon našen lipon Gradu i njegovin mesopusnim običajima.
Blog.hr
Forum.hr
Monitor.hr
Budalizacija.hr
Kuhinja
Lektire
cjepanica.net
lektire.net
lektire.org
Skripte za Faks
prijemni.net.org
Ča god vidim da piše o domaćin običajima.
VINODOLSKI ZAKON 1288
Ambasador turizma
Evo još slika pa uživajte.
Dragi Novljani i prijatelji Novog!
Nadan se da san Van bar malo na neki način približil mesopust. Kad priden još do slik, pokazat ću Van ih kao galeriju. Pokušat ću izabrat neke interesantne.
Toliko do nedilje. Ako imate kakov predlog rado prihvaćan i dalje se moremo dogovorit.
BOG i se
Evo da kladen još ove dvi slike, sopilaši kad se spravljaju za va kolo i naš voljeni mesopust
Pivači se vavik za mesopust sastaju va maloj sali. Tu se pričeka da mesopustari krenu zadnji krug, pa in se onda pridruže va sprogodu.Od žalosti kladu trakečrne oko ruke. Nezaobilazan je veliki prijatelj pivačih i općenito Novljanskoga običaja Branko Kukurin.
Balje rečeno, čin počne mesopust Kukurin je saki dan va Novon. Koliko slik ispuca to ne zna niki, nezna verovatno ni on sam.
Imamo sriće da se moremo pohvalit sa najstarijim pivačem i sopilašem. Ima točno 93 leta, kad malo razmislite treba do 93 nabrojit a kamoli ta leta proživit. Živi va Riki, ali sako leto pride va svoj Novi, da proživi još jedan Novljanski mesopust. Da još zasope Mantinjadu i Novigrade. Dao Bog još dosta mesopustih.
Branko Deranja - Dilber
Picimorti su deški ki nose mesopusta. Celo vrime mesopusta se brinu o njemu. Moraju ga kladat i skidat sa travice, nabavljat bršljan na kome će mesopust ležat dok je na stubami. Ali ga moraju se dani i čuvat, jer po tradiciji ako neki mesopusta ukrade, onda mesopusta kao običaja neće bit 7 let.
Na ovo se moran posebno osvrnut, jer je ¨pravi¨ otac bil sprečen da gre na sprogod. Mat se jako brzo snašla, zela je jednoga malog zamjenskog oca. Malecka jedna velika PUSA.
Kako vidite niki su bili jako umorni pa bi povremeno i zadremali.
Poli nas va Novon na čistu sredu-Pepelnicu održava se zadnji dan Mesopusnih običaja. Danas je sprogod mesopusta, gre ga se zapalit na puntu. Vavik se gleda kamo će dim krenut, dal će bit ribe ili morda prema šumi.
Mesopustari su danas jako tužni, pa će i njihova muzika bit takova, tužna. Hodit će jako pomalo, s noge na nogu.
Va samom sprogodu bit će popih, koludric i raznih drugih pučana ki će ovog našeg mesopusta otpratit do punte.
Na današnji dan počinje i Korizma.
P.S. dalje ćemo se čut iza sprogoda.
Sami spragod je pasal kako treba veselo i tužno, baš onako kako si zijamo zadnje dani:
BIL JE, NI GA, OPET ĆE PRIT - ZEL GA'J VRAG ZA CELO LETO DAN
Dozvolite da puno ne pripovidan, jer ov zadnji dan slike će same govorit, povremeno ću samo ubacit ki god kratki komentar.
Saki mesopusni sprogod počinje tako da mesopustari gredu tri put oko grada, a zadnji krug i tri put oko koprivića pa tek onda niz korzo počinje pravi sprogod.
POPI, KOLUDRICE I DRUGI
Sprogod
Ujutro ko i saki dan mesopustari gredu pozdravljat po Gradu. Taj dan oni moraju još pozdravit ča je ostalo i to mora bit gotovo do Žitka.
Oko 16 ur kolo se prekida ulaskom mesopustara va kolo. Oni doprate va kočiji Auditora (suca) i Abukata (odvjetnika) da provedu sudsku parnicu i procitaju - ŽITAK MESOPUSTA. Podignutom sabljom demeškijom sudac optuzuje i pripisuje mu sa nedela ka su se dogodila tokom leta, a odvjetnik ga pokušava obranit. Nikad mu to još ni uspelo, jer navada narodnog običaja kaziva da se mesopustu mora sako leto javno odrubit glava.
Nakon toga PI CI MO RT - i zimaju osuđenog mesopusta i zajedno sa mesopustarimi gredu tri put oko Grada. Nakon cega se vracaju va kolo ko j se nastavilo igrat do duboko va noć. Va kolu se pivaju ćurunbele, a pivaju ih uz pivače kola i si ki su tog momenta va kolu.
Mali mesopustari pozdravljaju po Krasi
U međuvremenu gredu pripreme za popodnevno održavanje Žitka. Najviše je veselja zato ča je konačno granulo sunce, jer ovih dan baš ni ni bilo bog zna kakovo vrime. Čak se kolo moralo va jednom momentu na pondiljak mesopusni igrat va Domu. Jer bi šteta bila nenadoknadiva da se ženska nošnja smoči (ča ako crvenilo otpusti na belu košulju).
Već se skupljaju mat i otac od mesopusta i hvataju valje advokata da dogovore obranu.
Za sami Žitak su već spremni i Auditor i Abukat. Jedan se nada oslobodit optuženog, a drugi zna da će mu ipak odsić glavu. Koliko vidin tu svoje prsti riva i Bažok, ki zna ča je njegov interes.
Mesopustari su prinesli oba dva mesopusta i KORZO i OKOLOTORNO na sud.
Posljednji pozdrav malih i velikih mesopustarskih kapetanih
Mesopustari i mali i veliki se ove dani gredu po Novon pišice, tako da in je sega dosta. Dok se sudac i advokat voze priko place va kočiji magarećoj. Istovremeno mat i otac neutješno stoje zada mesopusta i brišu njegove i svoje suze.
Na kraju sega pivači su opet va maloj sali na okrijepi. Tu se nađu si ki vole pismu i sopilu. Kako stariji Novljani tako i oni ki su tek počeli ozbiljno se bavit našim običajem. Ali i mali sopilaši Edi i Davor Piškulić-Juraš, to in je va krvi po rođenju. Si njihovi preci su bili sopilaši pa se nadamo, ja i moj brat, da će i oni bit. Ponosni ? Ča mislite?
S KOLENA NA KOLENO, AJ MALENO PO MALENO.
Mesopusni pondiljak je predviđen za skupljanje "SIRA, PUTRA, MASLA, JAJA".
Prije su mesopustari tim proizvodima obilato darivani jer ih je bilo va simi konoban, danas tek toliko da se obicaj ne zatare. Ipak mesopustari dobiju dosta, jer građani kupe napošno za taj povod i ulja i jaja i masla, sega po malo.
Oko obeda se gre opet dalje pozdravljat po Gradu, se do kola oko 16.00 ur, kad se gre va kolo. Ča se tiče kola za ovo leto, to ne stignen sam poslikat, pa ću kad se završi napravit jednu galeriju slik samo iz kola.
Moran van simi reć a to sigurno i sami znate, da se mesopustari dosta strude okolo pobirajuć sira, putra, masla,jaja.
Pivači nakon kola odu va malu salu na vičeru i čašu vina. Obično ih časte sponzori.
Danas na mesopusni pondiljak va našoj osnovnoj školi ka nosi ime slavnog Bana pučanina Ivana Mažuranića održava se LIDRANO, općinsko takmičenje mladih pjesnika, poeta, recitatora i sega ča gre uz to. Sudjelovale su osnovne škole iz Novog, Bribira i Crikvenice.
Učesnicima LIDRANA je prezentiran ukratko celi naš običaj.
Mladi sopci Edi Piškulić-Juraš i Davor Piškulić-Juraš su na početku odsopli Mantinjadu, a onda tanac Hrvat pa su dva para i tancali.
Nedilju mesopusnu, valje iza maše va crikvi, mesopustari u svecanim uniformama sa instrumentima krecu priko NOVLJANSKE PLACE pozdravljati se gradane od kuce do kuce. Najprije se gre pozdravit Gradske ustanove i Gradske oce na čelu sa poštovanim Gradonacelnikom gsp. Olegom Butkovićem, nakon toga svog mesopusta ali i mesopusta od malih mesopustara.
To j prvi sluzbeni izlazak mesopustara. Tad se skupi na Placi puno gradana ki oće da ih vide.
Malo slik neće škodit:
Ovo je vrime kad nan va gosti pridu mesopustari iz susjednih mest, Ledenice, Zagone, Povile, itd.
Ledeničani:
Zagonjani:
Zagonjane moran posebno spomenut jer su si dali truda i obnovili stare nošnje po uzorcoma ke su našli na raznin slikami i zapisima. SVAKA ČAST .
Usmena predaja pripovida: " U davna vrimena zivel je va okolici Novog neki silnik ,tiranin, haračlija ki je pustosiš naš Grad i okolicu. Ki zna koliko je dugo trajala ta tiranija, dok jednog dana ni uspelo narodu novljanskomu uhvatit silnika, osudit ga, obisit i rijesiti se zla, sto je popraceno veseljem, pismom i igranjem kola.
Tako se i ovu subotu počelo sa mišenjem Mesopusta, na pozornici va našem Domu. Se se dela javno da bi si videli kako to naš Šikić misi. Inače on to dela već puno let, valjad će delat najmanje još toliko.
Samo mišenje traje celu večer, ali mora bit gotovo do pol noći. Tad va Dom u pratnji sopila pridu popi, fratri, pivači kola i masa drugih maškar i kunpanij ki su zainteresirani da daju ime Mesopustu. Ime ko se pozdravi od strane mesopustra, a dobije najveći pljesak i odobravanje ostaje na Mesoputu.To mu je ime. Često ime daju mesopustari, ako se tako dogovore među sobun. Va inat simi drugin.
Da puno ne pišen jer ni niman puno vrimena, moran se spravit za va kolo, klast ću malo slik pa gledajte.
Nadan se da ćete bit zadovoljni.
Mali mesopustari:
Veliki mesopustari:
Na samon krštenju mesopusta bude i puno zanimljivih maškar, ima tu i ljudi kimi je maškaranje vrlo ozbiljan posal, pa dobro razmisle vać će se maškarat.
Va maloj sali su okupljeni pivači, oni se sastaju saki mesopusni dan pa tako i sad. Čekaju pol noći da gredu va velu salu dat ime mesopustu.
Ni održano, sa razlogom ki je nažalost jako tužan.
ZOKI!
PRIJATELJU,
NEKA TI JE LAKA NOVLJANSKA ZEMLJA KU SI TAKO ZDUŠNO VOLEL I OBOŽAVAL.
Mikula Juraš