geomir

nedjelja, 02.09.2018.

ĆELA

Ovo djelo je plod fikcije. svaka sličnost sa stvarnim osobama i događajima slučajna je.

Kliknuti na link i slušati originalni izgovor teksta


Ritko, kruto ritko oćelavidu buodulski težoci i ribori i oni ča rabotodu na čistoj ariji,
jerbo oni vitridu glove.

Vlos po vlos, godišće po godišče impjegotima ča sididu po kancelarijima
i ne vididu puno svitlosti božje sve jače svitlidu ćele i sve veće sličidu na sviece
kojima se varti svitlo kolo okolo glovie.




Buoduli stimodu ćelave, jerbo ćelavci daržidu pera u ruke
(a sad duperodu i kompjutore) i vrotidu se doma čisti, a težoci i ribori
duojdedu doma šporki i sada kad imodu i motore, a ne somo motiku i vesla.
Reče se da ćelavima izrieste i kojo dlaka na jaziku,
ča hoće reć da oni ne govoridu sve ča jin pade na pamet,
ne rečedu dreto šćeto ča imodu voju, jerbo miridu riči i zatuo su i pametni.

Ćelavi i oni ča nosidu folse vlose moredu se nagledot i naslušot
svakih skondalih i batibujih na televiziji,
ma njima se ne more vidit najiežene vlose.

Ove batudice o ćeli ne biste mogli čitat i slušot da ni bilo oglasih Elektrodalmacije
priko kojih su napovidali svitu da će jin nestat svitlosti po kućima
ako ne namiridu svoje račune za struju i još su žuntali da će non somo ćele svitlit!
Po temu se vidi da su te oglase po novinima i na radiju
pisali letričari žutokjunci, jerbo oni ne znodu da smo prin
(a i sad po nikin selima i kućima)
koristili i koristimo svitlost od uognja na kominu, od šterike, od svićice na uje
i sviće na petrolij, a kojinguda ćelavac bi koristi i ćelu dok ne duojde do furmina.



Na kunju:
ako dobijete kojin popapreni račun Harvoske elektroprivrede,
nemujte odma zaželit da von svitli svitlost vikovišnja!



Autor: Dinko Matković
Autorov blog: Insulano

Prošti: Geomir
Fotografije: Geomir

Manje poznate riči:

kruto = veoma
impjegotima = činovnicima
duperodu = upotrebljavaju
žuntali = dodali
a kojinguda = a poneki
do furmina = do šibice
Na kunju na kraju
- 11:11 - Komentari (15) - Isprintaj - #