geomir

ponedjeljak, 22.10.2018.

ZAPLEŠIMO




- 00:20 - Komentari (4) - Isprintaj - #

ponedjeljak, 15.10.2018.

ŠJALPETA

Ovo djelo je plod fikcije. Svaka sličnost sa stvarnim osobama i događajima slučajna je.

Kliknuti na link i slušati originalni izgovor teksta



Oni ča u nos zovedu šjalpetu šjalpeton su u manjini – većina Kroata je zove kravata,
a tuo hoće reć da pročedi od riči Harvot, jerbo su u sedamnajiestemu viku
harvoski vojnici, kad su se tukli po Europima, parvi nosili okolo vrota faculete
od kojih je posli diventala šjalpeta.



U naše vrime kravatu, vidimo na judima svih nacijunih, partitih i virih,
ča hoće reć da je puno stimona u svitu, pok je i vonka zovedu po našu,
a somo niki su je karstili po svoju:
tie, nyakkendo, vratovrska, galstuk, razhodujuca, lazo, ....

U Lipoj našoj smo je dopokon vezali i okolo amfitejotra u Puli.
A da je viezat sve šjalpete ča hi imomo, jednu do druge,
mogli bismo obigrat cilu granicu Harvoske.



Ma Bodule, a i Vlahe, ne pjaži ni zabotunat guornji botun od košuje,
a nekmoli viezat šjalpetu okolo vrota;
ona fastidijo, fermoje rešpir, a kad Buodul vidi koga inšjalpetonog,
fermo ga i pito: „A komu je sprovod?“
Šjalpetih je raznoraznih, po robi, po diženju i po koluru.
Ukrale su sve piture dugie, sve diženje i kolure tropskih ribih i tičicih
i one uvik diluju ko magnet za oči.
Prin nego se čovika pogledo u obroz, vidi mu se šjalpetu i po njuoj moreš doznat
kojin požicijun imo tin čovik u društvu, i je kapoc izabrat veštit prema šjalpeti.



Po koluru šjalpete moremo znat ne somo je čovik u korutu, nego i u kojuoj je partiti,
a i koja mu je nacijun, ako su mu na šjalpeti čarnjeno-bili kvadroti.
Danas ne moreš vidit čovika na televiziji bez šjalpete,
a i u muodi je sve veći uzal od šjalpete okolo koleta,
kojin more dat i drugu sliku obo Harvoskoj šjalpeti.



A diguoda koguoda promisli da onemu ča govori po televiziji,
riči manje vrididu, ako ni okolo vrota obisi šjalpetu.

Zno se, ako kuo na javnemu mistu iskido i spoli našu bankanotu, da ga čeko kaštig,
ma bi tukalo stavit u paržun i onega, ča s maliganiman u divertimientu
vazme nuož i prisiče šjalpetu, pok bi onda imo vrimena pensat
kako tuko stimat i imat krejoncu prema kravati,
ča non je prinila naše ime svukuda po svitu.

Autor: Dinko Matković
Autorov blog: Insulano

prošti: Geomir
foto: sa Interneta


Manje poznate riči:
Pročedi = potječe, vuče porijeklo
Faculet = rubac
Diventala = postala
puno stimona = mnogo cijenjena
dopokon = čak
ne pjaži = ne sviđa
fastidijo = uznemiruje, smeta
fermoje rešpir = zaustavlja dah
fermo ga = zaustavi ga
i je kapoc = i da li je sposoban
kaštig = kazna
paržun = zatvor
pensat = promisliti
stimat = cijeniti, poštivati
imat krejoncu = imati uljuđenost, pristojnost

- 22:46 - Komentari (10) - Isprintaj - #